Ko Te Maʼu ʼo Te ʼOfa ʼo Te ʼAtua ʼe Iku Ki Te Maʼuli Heʼegata

“Ko koe, ʼe ke tapuakina anai ia ia ʼaē ʼe faitotonu, Ê Sehova! Ohagē ko he meʼa tali tau lahi, ʼe ke takatakai anai ia nātou ʼaki te ʼofa.”—PES. 5:12.

1, 2. Koteā te kole ʼaē neʼe fai age e Elia ki te fafine vītua ʼo Salefate, pea koteā te fakapapau ʼaē neʼe ina fai age ki te fafine?

 KO TE fafine pea mo tana tama neʼe nā fia kakai, ʼo fēia mo te polofetā ʼa te ʼAtua. ʼI te ʼamanaki tafu te afi e te fafine vītua ʼaia ʼo Salefate moʼo fakamoho kiai ia tana meʼa kai, neʼe kole age e te polofetā ko Elia kiā ia hana moʼi vai pea mo hana moʼi pane. Neʼe ina tali ke ina foaki age ki te polofetā tana meʼa ʼinu, kae ki te meʼa kai leva neʼe ko tana ‘kiʼi moʼi falena pē ʼi te ʼipu lahi pea mo te kiʼi moʼi lolo ʼi te ʼipu veliveli.’ Neʼe ina ʼiloʼi neʼe mole feʼauga te meʼa kai ʼaē ke ina vaevae mo te polofetā, pea neʼe ina fakahā age ki ai te faʼahi ʼaia.—1 Hau 17:8-12.

² Neʼe kolekole fēnei age pē e Elia: “ ʼAki te ʼu meʼa ʼaia, teuteuʼi mai muʼa koe haku kiʼi foʼi kato takafuafua, pea ʼe tonu anai ke ke ʼaumai; pea hoki feala leva ke ke teuteuʼi hau meʼa maʼa koe pea mo tau tama. Heʼe koʼenī te folafola ʼa Sehova te ʼAtua ʼo Iselaele: ‘ ʼE mole toe ʼosi anai te ʼipu falena lahi, pea ko te ʼipu lolo veliveli ʼe mole toe ʼago anai.’ ”—1 Hau 17:13, 14.

3. Koteā te faʼahi maʼuhiga ʼaē ʼe tonu ke tou fai?

³ Ko te fihifihia ʼaē neʼe tau mo te fafine vītua neʼe maʼuhiga age ia ʼi te meʼa ʼaē neʼe tonu ke ina fai ʼaki tana toega meʼa kai. ʼE falala anai koa ʼe haofaki ia ia pea mo tana tama e Sehova, peʼe ina fakamuʼamuʼa anai tona maʼuli fakasino ʼi hana maʼu ia te ʼofa ʼo te ʼAtua pea ke kaumeʼa mo ia? ʼE tou toe maʼua mo tātou ke tou fai he tonu ʼi totatou maʼuli. ʼE tou fakahā anai koa ʼe maʼuhiga age kiā tātou ia tatatou maʼu ia te ʼofa ʼo Sehova ʼi hatatou fia maʼu hotatou maʼuli fakasino ʼe fīmālie? ʼE lahi te ʼu tupuʼaga ke tou falala ai pea mo tou tauhi ai ki te ʼAtua. Pea ʼe ʼi ai te ʼu faʼahi ʼe feala ke tou fai moʼo kumi pea mo maʼu ia tona ʼofa.

‘ ʼE Tāu Mo Feʼauga Ke Ke Tali Ia Te Tauhi’

4. He koʼē ʼe tāu mo feʼauga mo Sehova ke tou tauhi kiā te ia?

⁴ ʼE matatonu te fakaʼamu ʼaē ʼa Sehova ke fai age e te tagata te tauhi ʼaē ʼe ina leleiʼia. Neʼe fakamoʼoni kiai te kiʼi kūtuga ʼo tana ʼu kaugana ʼi selō,  ʼo natou ʼui fakatahi fēnei: “ ʼE tāu mo feʼauga, Sehova, ʼio, tomatou ʼAtua ke ke tali ia te kolōlia, mo te fakaʼapaʼapa, pea mo te mālohi, heʼe ko koe ʼaē neʼe ke fakatupu ia meʼa fuli, pea ʼuhi ko tou finegalo neʼe māʼuʼuli pea mo fakatupu ia te ʼu meʼa ʼaia.” (Fakh. 4:11) Mai tona ʼaluʼaga ʼaē ko ia ʼe ko totatou Tupuʼaga, koia ʼe tāu mo feʼauga mo Sehova ke tou tauhi kiā te ia.

5. He koʼē ʼe tonu ke uga tātou e te ʼofa ʼo te ʼAtua ke tou tauhi kiā te ia?

⁵ Ko te tahi tupuʼaga ʼaē ke tou tauhi ai kiā Sehova heʼe mole he fakatatau ʼo tona ʼofa ʼaē kiā tātou. ʼE ʼui fēnei ʼi te Tohi-Tapu: “Neʼe fakatupu e te ʼAtua te tagata ʼo mulimuli ki tona pāki, neʼe ina fakatupu ia ia ʼo mulimuli ki te pāki ʼo te ʼAtua; neʼe ina fakatupu ia nāua ko te tagata mo te fafine.” (Sen. 1:27) Ko te tagata ʼe ina maʼu te loto faʼitaliha mo te fealagia neʼe foaki age e te ʼAtua ke fakakaukau pea ke ina fai hana ʼu tonu. ʼI tana foaki mai ʼaē ia te maʼuli kiā tātou, neʼe liliu ai ia Sehova ko te Tamai ʼo te mālamanei. (Luka 3:38) Ohagē pē ko he tamai agalelei, neʼe ina fai ia meʼa fuli moʼo foaki ki tona ʼu foha pea mo tona ʼu ʼofafine te meʼa ʼaē ʼe ʼaoga kiā nātou ke natou māʼuʼuli fiafia ai. ‘ ʼE ina fakahopo ake ia tona laʼā,’ pea ‘ ʼe ina fakatō mo te ʼua,’ koia ʼaē ʼe mahu ai te meʼa kai ʼi te Kele maʼa tātou ʼi he ʼu ʼaluʼaga taulekaleka.—Mat. 5:45.

6, 7. (a) Koteā te aga ʼe kovi neʼe fai e Atama ki tona hōloga kātoa? (b) Koteā ʼaē kā fakafealagia anai e te sākilifisio ʼa Sesu maʼa nātou ʼaē ʼe natou kumi ia te ʼofa ʼo te ʼAtua?

⁶ Neʼe toe haofaki tātou e Sehova mai te ʼu fua kovi ʼo te agahala. ʼI tana agahala, neʼe hagē ia Atama ko he tagata gaoʼi paʼaga neʼe ina kaihaʼa te falā ʼo tona fāmili ke feala ai hana gaoʼi paʼaga. ʼI tana agatuʼu ʼaē kiā Sehova, neʼe kaihaʼa e Atama te ʼamanaki ʼaē ʼa tana fānau, ke natou fiafia ʼo heʼegata. ʼE ko tana manatu pē ʼaē kiā ia totonu ʼaē neʼe tupu ai te kaugana ʼa te mālamanei ki te agahala. Koia ʼaē kua tau ai te hahaʼi fuli mo te mahaki, mo te maʼuli fakaʼofaʼofa, pea mo te mate. Kā fakaʼāteaina he tagata kaugana pea ʼe fakamaʼua kiai he totogi, pea ko Sehova neʼe ina foaki te totogi ke feala ai hotatou haofaki mai te ʼu fua kovi ʼaia. (Lau ia Loma 5:21.) ʼO mulimuli ki te finegalo ʼo tana Tamai, neʼe foaki e Sesu Kilisito ia “tona nefesi moʼo totogi ʼaki ʼo te tokolahi.” (Mat. 20:28) Ko nātou ʼaē ʼe natou maʼu ia te ʼofa ʼo te ʼAtua kua natou vave maʼu pē anai te ʼu lelei fuli ʼo te totogi ʼaia.

⁷ ʼE gata pē ki totatou Tupuʼaga, ko Sehova, ʼaē neʼe ina fai ia meʼa fuli pē ke ina foaki mai kiā tātou he maʼuli fiafia, pea mo he maʼuli ʼe ʼi ai tona ʼuhiga moʼoni. ʼI tatatou maʼu ia tona ʼofa, ʼe feala anai hatatou sisio peʼe ina molehi feafeaʼi anai te ʼu mamahi fuli ʼaē ʼe fakahoko ki te hahaʼi. Pea ʼe haga anai ia Sehova ʼo fakahā mai kiā tātou takitokotahi, ʼe ko ia ʼaē ʼe ina “fakapale ia nātou ʼaē ʼe natou kumi moʼoni ia ia.”—Hep. 11:6.

“Ko Tau Hahaʼi ʼe Natou Foaki Fakamālotoloto Anai Ia Nātou”

8. Koteā ʼe tou ako mai te ʼaluʼaga ʼaē neʼe hoko kiā Isaia ʼo ʼuhiga mo tatatou tauhi ki te ʼAtua?

⁸ Ke tou maʼu te ʼofa ʼo te ʼAtua ʼe fakamaʼua kiai ke tou fakaʼaogaʼi fakalelei ia totatou loto faʼitaliha. Mai tona ʼaluʼaga ʼaē heʼe ko Sehova ʼe mole ina fakamālohiʼi he tahi ke tauhi age kiā te ia. ʼI te temi ʼo Isaia, neʼe ina fehuʼi fēnei: “Ko ai anai kā au fekauʼi pea mo ʼalu anai maʼa tātou?” Neʼe fakahā e Sehova ia tana fakaʼapaʼapa ʼaē ki te  polofetā ʼaki tana tuku ʼaē ke ina fai e ia totonu he tonu. Kotou fakakaukauʼi age muʼa te fiafia ʼaē neʼe maʼu e Isaia ʼi tana tali fēnei age: “Koʼenī au! Fekauʼi au.”—Isa. 6:8.

9, 10. (a) ʼE tonu ke feafeaʼi tatatou tauhi ki te ʼAtua? (b) He koʼē ʼe lelei kiā tātou ke tou tauhi kiā Sehova ʼaki he loto kātoa?

⁹ ʼE fakalogo ki te tagata peʼe tauhi peʼe kailoa ki te ʼAtua. ʼE loto e Sehova ke tou tauhi age kiā te ia mo totatou loto kātoa. (Lau ia Sosue 24:15.) Ko nātou ʼaē ʼe tauhi fakakinau ki te ʼAtua, ʼe mole feala ke ina leleiʼia tanatou tauhi, peʼe ke ina tali te tauhi ʼaē ʼe fai age e te hahaʼi ke leleiʼia nātou e ʼihi. (Kol. 3:22) Kapau ʼe tou “fakatuatuai” ʼi tatatou tauhi taputapu ʼo tou fakamuʼamuʼa te ʼu gāue ʼa te mālama ʼi tatatou tauhi ʼaē kiā Sehova, pea ʼe mole tou maʼu ai anai ia te ʼofa ʼo te ʼAtua. (Eke. 22:29) ʼE ʼiloʼi e Sehova kapau ʼe kita tauhi age kiā te ia mo tokita loto kātoa, pea ʼe lelei kiā kita. Neʼe uga e Moisese te kau Iselaele ke natou filifili te maʼuli ‘ ʼo natou ʼoʼofa kiā Sehova, ia tonatou ʼAtua, ʼo natou fakalogo ki tona leʼo pea mo natou pipiki maʼu kiā te ia.’—Teu. 30:19, 20.

¹⁰ Ko Tavite, te Hau ʼo te Iselaele ʼāfea, neʼe hiva fēnei kiā Sehova: “Ko tau hahaʼi ʼe natou foaki fakamālotoloto anai ia nātou ʼi te ʼaho ʼo tou ʼu mālohi fakasōlia. ʼI te taulekaleka ʼo te māʼoniʼoni, ʼi te mafoa ʼo te ʼaho, kua ʼi ai tau kau tūpulaga ohagē ko he ʼu mosiʼi hahau.” (Pes. 110:3) Tokolahi iā ʼaho nei ʼe natou fakamuʼamuʼa ʼi tonatou maʼuli ia tonatou maʼuli fīmālie fakapaʼaga pea mo te ʼu fakafiafia. Kae ko nātou ʼaē ʼe ʼoʼofa kiā Sehova, ʼe natou fakamuʼamuʼa tanatou tauhi taputapu ʼi ʼihi atu ʼu meʼa. Ko tanatou faʼafai ʼo fakamafola te logo lelei ʼe hā ʼaki ai te ʼu meʼa ʼaē ʼe maʼuhiga kiā nātou ʼi tonatou maʼuli. ʼE natou falala kātoa ki te fealagia ʼaē ʼa Sehova ke ina foaki age te ʼu meʼa ʼaē ʼe ʼaoga kiā nātou ʼi te ʼaho fuli.—Mat. 6:33, 34.

Te ʼu Sākilifisio ʼAē ʼe Tou Maʼu Ai Te ʼOfa ʼo Te ʼAtua

11. Koteā te tapuakina ʼaē neʼe ʼamanaki kiai ia te kau Iselaele ke natou maʼu ʼi tanatou momoli ʼaē te ʼu sākilifisio kiā Sehova?

¹¹ ʼI te fuakava ʼo te Lao, neʼe momoli e te hahaʼi ʼa te ʼAtua he ʼu sākilifisio lelei ke tupu ai hanatou maʼu ia tona ʼofa. ʼE ʼui fēnei iā Levitike 19:5: “Kapau ʼe kotou fai ia he sākilifisio komūnio kiā Sehova, pea ʼe kotou sākilifisioʼi anai ke tali koutou.” ʼI te tohi pē ʼaia ʼo te Tohi-Tapu, ʼe tou toe lau fēnei: “Kapau ʼe kotou momoli ia he sākilifisio fakafetaʼi kiā Sehova, ʼe kotou sākilifisioʼi ke tali koutou.” (Lev. 22:29) ʼI te temi ʼaē neʼe momoli ai e te kau Iselaele he ʼu sākilifisio manu ʼe lelei ʼi te ʼaletale ʼa Sehova, ko te kohu ʼaē neʼe hake ake neʼe hagē ia ko “he magoni fakamālōlō” ki te ʼAtua moʼoni. (Lev. 1:9, 13) Neʼe ina logoʼi he fīmālie pea mo he lotomālohi ʼi te fakahā ʼaia ʼo tana hahaʼi tonatou ʼofa kiā te ia. (Sen. 8:21) ʼI te ʼu fakamaʼua ʼaia ʼo te Lao, ʼe tou maʼu ai te pelesepeto ʼe kei ʼaoga iā ʼaho nei. ʼE maʼu e nātou ʼaē ʼe natou momoli te ʼu sākilifisio lelei ia te ʼofa ʼo Sehova. Ko te ʼu sākilifisio fea ʼaē ʼe ina tali? Tou vakaʼi age muʼa te ʼu faʼahi e lua ʼo totatou maʼuli: ia tatatou aga pea mo tatatou palalau.

12. Koteā te ʼu aga ʼaē ʼe feala ke liliu ai anai te ‘momoli ʼo totatou sino ko he sākilifisio’ ko he meʼa fakalialia ki te ʼAtua?

¹² ʼI tana tohi ʼaē neʼe ina fai ki te kau Loma, neʼe tohi fēnei e te ʼapositolo ko Paulo: “Ke kotou momoli ʼokotou sino ko he sākilifisio maʼuli, mo māʼoniʼoni, pea mo lelei ki te ʼAtua, ko he tauhi tapu ʼaki tokotou ʼatamai.” (Loma 12:1) Ke maʼu e he tahi te ʼofa ʼo te ʼAtua, ʼe fakamaʼua kiai ke ina taupau ia tona sino ke lelei ki te ʼAtua. Kapau ʼe ina ʼulihi ia tona sino totonu ʼaki te suluka, te kai ʼo te pata, te toloke, peʼe ʼaki te ʼinu fakavale ʼo te kava, pea ʼe mole he ʼuhiga ʼo tana mōlaga ʼaia. (1 Ko. 7:1) Tahi ʼaē, ko he tahi ʼe ‘maʼuli ʼi te fai folonikāsio, ʼe agahala ia ki tona sino totonu,’ koia ʼe mole leleiʼia ai anai e Sehova ia he sākilifisio ʼa he tahi ʼe ina fai he faʼahiga aga heʼe ʼaoga pē. (1 Ko. 6:18) Ke leleiʼia he tahi e te ʼAtua, ʼe tonu ke ‘liliu ʼo māʼoniʼoni ʼi tana aga kātoa.’—1 Pet. 1:14-16.

13. He koʼē ʼe lelei ke tou fakavikiviki kiā Sehova?

¹³ Ko te tahi sākilifisio ʼe fiafia ai ia Sehova ʼe ʼi ai tona pikipikiga mo tatatou palalau. Ko nātou ʼaē ʼe ʼoʼofa kiā Sehova ʼe natou palalau lelei tuʼumaʼu pē ʼo ʼuhiga mo ia iā muʼa ʼo te kaugamālie pea mokā natou nonofo ʼi tonatou ʼapi. (Lau ia Pesalemo 34:1-3.) Kotou lau te ʼu Pesalemo 148-150, pea kotou vakavakaʼi ai peʼe fakalotomālohi tuʼa fia tātou e te ʼu Pesalemo ʼaia ke tou fakavikiviki kiā Sehova. ʼE moʼoni, ‘ ʼe gali mo te kau agatonu ia te fakavikiviki.’ (Pes. 33:1) Pea ko totatou Faʼifaʼitakiʼaga, ia Sesu Kilisito, neʼe ina fakahā lelei te  maʼuhiga ʼo te fakavikiviki ʼaē ki te ʼAtua ʼaki ia tana fakamafola te logo lelei.—Luka 4:18, 43, 44.

14, 15. Koteā te ʼu faʼahiga sākilifisio ʼaē neʼe uga ai e Osea ia te kau Iselaele ke natou momoli, pea neʼe tali feafeaʼi kiai ia Sehova?

¹⁴ Kā tou faʼafai ʼo fai fakamafola, pea ʼe tou fakahā ai ia tatatou ʼofa ʼaē kiā Sehova pea mo tatatou loto ʼaē ke tou maʼu ia tona ʼofa. Ohagē lā, tou vakaʼi age muʼa pe neʼe tokoniʼi feafeaʼi e te polofetā ko Osea ia te kau Iselaele ʼaē neʼe tō ki te tauhi hala pea ko te ʼAtua neʼe mole kei ʼofa kiā nātou. (Osea 13:1-3) Neʼe ʼui age e Osea ke natou kolekole fēnei: “ ʼOfa pē [Sehova] ke ke fakamolemole te agahala; pea tali te meʼa ʼaē ʼe lelei, pea moʼo liufaki atu, ʼe matou momoli atu anai te ʼu vītulo kei mui ʼo tomatou ʼu laugutu.”—Osea 14:1, 2.

¹⁵ Ko te vītulo neʼe ko te manu totogi kovi ʼaia neʼe feala ki he tagata Iselaele ke ina mōlagaʼi kiā Sehova. Koia, ko “te ʼu vītulo kei mui ʼo [totatou] ʼu laugutu” ʼe fakaʼuhiga ki te ʼu palalau fakamālotoloto pea mo lelei ʼaē ʼe tou fai moʼo fakavikiviki ki te ʼAtua moʼoni. Neʼe koteā te tali ʼaē neʼe fai e Sehova kiā nātou ʼaē neʼe natou fai te taʼi ʼu sākilifisio ʼaia? Neʼe ina ʼui fēnei: “ ʼE au ʼofa anai kiā nātou ʼaki toku loto lelei.” (Osea 14:4) Neʼe fakamolemole e Sehova kiā nātou ʼaē neʼe natou momoli te ʼu sākilifisio fakavikiviki ʼaia, neʼe ʼofa kiā nātou, pea neʼe fakakaumeʼa mo nātou.

16, 17. Kā ko te tui ʼaē ki te ʼAtua ʼe ina uga he tahi ke ʼalu ʼo fakamafola te logo lelei, koteā te manatu ʼa Sehova ʼo ʼuhiga mo tana fakavikiviki ʼaia?

¹⁶ Ko te vikiʼi ʼaē ʼo Sehova ʼi muʼa ʼo te kaugamālie ʼe ko he koga ʼe kei maʼuhiga tuʼumaʼu pē ʼi te tauhi moʼoni. Neʼe maʼuhiga ʼaupitō ki te tagata fai pesalemo tana fakakolōliaʼi ia te ʼAtua moʼoni, koia neʼe ina kole mamahi fēnei ki te ʼAtua: “Ê Sehova, fakalelei age siʼi ʼou loto, ke ke leleiʼia ia te ʼu sākilifisio ʼo toku gutu ʼaē ʼe fai ʼaki he loto lelei.” (Pes. 119:108) ʼE feafeaʼi koa iā ʼaho nei? ʼI tana talanoa ʼo ʼuhiga mo te toe hahaʼi ʼe tokolahi ʼi totatou temi, neʼe fakakikite fēnei e Isaia: “ ʼE natou tala anai te ʼu fakavikiviki ʼo Sehova. . . . [Ko tonatou ʼu meʼa ʼofa] ʼe . . . hake anai ki toku ʼaletale [ʼa te ʼAtua] heʼe au tali nātou.” (Isa. 60:6, 7) ʼI te fakahoko ʼo te lea fakapolofetā ʼaia, ko te ʼu toko lauʼi miliona hahaʼi ʼe natou momoli ki te ʼAtua “he sākilifisio fakavikiviki, ko tona fakaʼuhiga ko te fua ʼo te ʼu laugutu ʼaē ʼe natou fai he tala iā muʼa ʼo te kaugamālie maʼa tona huafa.”—Hep. 13:15.

¹⁷ ʼE feafeaʼi koa kiā koutou? ʼE kotou momoli koa ki te ʼAtua he ʼu sākilifisio ʼe lelei? Kapau ʼe mole lelei te ʼu sākilifisio ʼaē ʼe kotou fai kiā ia, pea ʼe kotou fai anai koa he ʼu fetogi ʼi tokotou maʼuli pea mo kotou kamata fai he ʼu fakavikiviki kiā Sehova iā muʼa ʼo te kaugamālie? Kā uga koutou e takotou tui ke kotou kamata fakamafola te logo lelei, pea ‘ ʼe leleiʼia anai e Sehova ia takotou sākilifisio ʼaia ʼo laka age ia ʼi he vītulo.’ (Lau ia Pesalemo 69:30, 31.) Kotou tui papau ʼe malave anai kiā Sehova te “magoni fakamālōlō” ʼaia ʼo takotou sākilifisio fakavikiviki pea ʼe ʼofa anai ia kiā koutou. (Esk. 20:41) Pea ko te fiafia ʼaē kā kotou logoʼi ʼe mole hona fakatatau.

‘Ko Sehova Totonu ʼAē Kā Ina Tapuakina Anai Ia Ia ʼAē ʼe Faitotonu’

18, 19. (a) Koteā te manatu ʼe maʼu e te hahaʼi ʼi te temi nei ʼo ʼuhiga mo te tauhi ki te ʼAtua? (b) Koteā te ikuʼaga ʼo te mole kei maʼu ʼo te ʼofa ʼo te ʼAtua?

¹⁸ Iā ʼaho nei, tokolahi ʼe hagē tanatou manatu ko ʼihi ʼi te temi ʼo Malakia, ʼaē neʼe natou ʼui fēnei: ʼE mole he ʼaoga ʼo te tauhi ʼaē ki te ʼAtua. Pea koteā ʼaē neʼe tou maʼu ʼi tatatou muliʼi tana ʼu fakatotonu?” (Mala. 3:14) ʼI te holi ʼaē ʼo tonatou ʼu loto mānumānu ki te ʼu koloa fakamālama, ʼe mata faigataʼa ai kiā nātou hanatou mulimuli ki te ʼu pelesepeto ʼa te ʼAtua pea mo natou ʼui ai ʼe mole kei ʼaoga tana ʼu lao. Kiā nātou ko te fakamafola ʼo te logo lelei ʼe fakapuli temi pea ʼe fakatupu ʼita.

¹⁹ Ko te mālohi ʼaē neʼe ina fakaneke te taʼi ʼu  manatu ʼaia neʼe kamata ia ʼi te ʼōloto ʼo Eteni. Neʼe ko Satana ʼaē neʼe ina fakalotoʼi ia Eva ke ina meʼa noaʼi te maʼuhiga moʼoni ʼo te maʼuli fakaofoofo ʼaē neʼe foaki age e Sehova ki ai, pea ke ina manukinuki ia Tona ʼofa. Iā ʼaho nei, ʼe faigaʼi tuʼumaʼu pē e Satana ke ina fakalotoʼi te hahaʼi ke natou tui ʼe mole natou maʼu anai he ʼu fua lelei ki tonatou maʼuli mokā ʼe natou fai ia te finegalo ʼo te ʼAtua. Kae ki muli age neʼe mahino leva kiā Eva pea mo tona ʼohoana ko tanā mole kei maʼu te ʼofa ʼo te ʼAtua, neʼe iku ki tonā mate. Ko nātou ʼaē ʼe natou muliʼi tanā faʼifaʼitaki kovi, ʼe vave pē anai hanatou mahino ko te mole kei maʼu ʼo te ʼofa ʼo te ʼAtua ʼe iku ki te mate.—Sen. 3:1-7, 17-19.

20, 21. (a) Koteā ʼaē neʼe fai e te fafine vītua ʼo Salefate, pea koteā ʼaē neʼe hoko kiā ia? (b) ʼE tou lava faʼifaʼitakiʼi feafeaʼi te fafine vītua ʼo Salefate, pea he koʼē ʼe tonu ke tou mulimuli ki tana faʼifaʼitaki?

²⁰ ʼI kehekehe leva te fakaʼosiʼosi ʼaē ʼo te maʼuli ʼo Atama mo Eva, pea mo te ikuʼaga ʼo te ʼu meʼa ʼaē neʼe hoko kiā Elia pea mo te fafine vītua ʼo Salefate ʼaē neʼe tou talanoa kiai ʼi te kamata. ʼI tana kua logo ʼaē ki te ʼu palalau fakalotomālohi ʼa Elia, neʼe taʼo ai leva e te fafine te foʼi pane pea neʼe ina ʼuluaki foaki age muʼa ki te polofetā ke kai, logolā te mole lahi ʼaē ʼo tana meʼa kai. Neʼe hoki fakahoko ai leva e Sehova tana fakapapau ʼaē neʼe tala age e Elia. ʼE ʼui fēnei ʼi te fakamatala: “Neʼe haga kai [te fafine vītua] mo [te polofetā] pea mo tona loto fale, lolotoga ni ʼu ʼaho. Neʼe mole ʼosi te ʼipu falena lahi, pea neʼe mole ʼago te ʼipu lolo veliveli, ʼo mulimuli pē ki te folafola ʼa Sehova, ʼaē neʼe ina fakahā ʼaki ia Elia.”—1 Hau 17:15, 16.

²¹ ʼI te ʼu toko lauʼi miliale hahaʼi ʼaē ʼe māʼuʼuli nei ʼi te temi ʼaenī, ʼe tokosiʼi pē ia nātou ʼaē ʼe natou fai ʼaki he loto lelei te meʼa ʼaē neʼe fai e te fafine vītua ʼo Salefate. Neʼe falala kātoa ia ki te ʼAtua ʼo te haofaki, pea ko te ʼAtua neʼe mole ina tuku ia ia ʼi te faigataʼaʼia. Ko te fakamatala ʼaenī pea mo ʼihi age fakamatala ʼi te Tohi-Tapu, ʼe fakamoʼoni ki te ʼui ʼaē ʼe tāu mo Sehova ke tou falala kiā te ia. (Lau ia Sosue 21:43-45; 23:14.) Ko te faʼahiga maʼuli ʼo te kau Fakamoʼoni ʼa Sehova ʼo te temi ʼaenī, ʼe ko he tahi ʼaia fakamoʼoni ʼe mole ʼi ai anai he temi ʼe haga ai ia Sehova ʼo liʼakina ia nātou ʼaē ʼe natou maʼu ia tona ʼofa.—Pes. 34:6, 7, 17-19. *

22. He koʼē ʼe maʼuhiga ke tou foimo kumi ke tou maʼu te ʼofa ʼo te ʼAtua?

²² Kua vave “haʼu [pē te ʼaho ʼo te fai fakamāu ʼa te ʼAtua] kiā nātou fuli ʼaē ʼe nonofo ʼi te kele kātoa.” (Luka 21:34, 35) Pea ʼe hoko moʼoni mai anai. Ko te falā peʼe ko te fīmālie fakakoloa ʼe mole feala ke fakaoviovi ki te maʼuhiga ʼaē ʼo te fakalogo ki te ʼui fēnei ʼa te Tuʼi Fakamāu ʼaē neʼe fakanofo e te ʼAtua: “ ʼOmai, ia koutou ʼaē neʼe tapuakina e taku Tamai, ʼo maʼu te puleʼaga ʼaē neʼe teuteuʼi maʼa koutou.” (Mat. 25:34) ʼEī, ‘ko Sehova totonu ʼaē kā ina tapuakina ia nātou ʼaē ʼe faitotonu, ohagē ko he meʼa tali tau lahi, ʼe ina takatakai anai ia nātou ʼaki te ʼofa.’ (Pes. 5:12) ʼE mole tonu koa lā mo tātou ke tou kumi ke tou maʼu te ʼofa ʼo te ʼAtua?

[Nota]

ʼE Kei Kotou Manatuʼi Koa?

• He koʼē ʼe tāu mo Sehova ke tou tauhi fakamālotoloto kiā te ia?

• Ko te ʼu sākilifisio fea ʼaē ʼe tali e Sehova ʼi te temi ʼaenī?

• Koteā ʼaē ʼe fakaʼuhiga kiai “te ʼu vītulo kei mui ʼo totatou ʼu laugutu,” pea he koʼē ʼe tonu ke tou momoli te ʼu sākilifisio ʼaia kiā Sehova?

• He koʼē ʼe tonu ke tou kumi ke tou maʼu te ʼofa ʼo te ʼAtua?

[ʼU fehuʼi ʼo te ako]

[Paki ʼo te pasina 17]

Koteā te tonu ʼaē neʼe kole e te polofetā ʼa te ʼAtua ke fai e te fafine masiva pea mo fia kai?

[Paki ʼo te pasina 18]

Koteā te tapuakina ʼe tou maʼu mokā tou momoli he ʼu sākilifisio fakavikiviki kiā Sehova?

[Paki ʼo te pasina 21]

ʼE mole kotou lotomamahi anai ʼi he ʼaho ʼi takotou falala moʼoni ʼaē kiā Sehova