Te ʼu Fehuʼi ʼa Te Kau Lautohi
Te ʼu Fehuʼi ʼa Te Kau Lautohi
He koʼē neʼe ʼita ia Moisese kiā Eleasale pea mo Itamale, te ʼu foha ʼo Alone, ʼi te kua ʼosi mamate atu pē ʼaē ʼo tonā ʼu tehina ko Natape pea mo Apiu, pea koteā ʼaē neʼe tupu ai te malū ifo ʼo tona ʼita?—Lev. 10:16-20.
Mole heʼeki faʼa fualoa ki te ʼosi fakanofo ʼo te kau pelepitelō ki tanatou gāue ʼi te tapenakulo, neʼe matehi e Sehova te ʼu foha ʼo Alone ia Natape pea mo Apiu, koteʼuhi neʼe nā momoli te afi iā muʼa ʼo te ʼAtua kae neʼe mole fakatotonu e te Lao. (Lev. 10:1, 2) Neʼe fakatotonu e Moisese ki te ʼu foha ʼo Alone ʼaē neʼe kei māʼuʼuli ke ʼaua naʼa nā putu ki te mate ʼo tonā ʼu tehina. Kae mole faʼa fualoa kiai, neʼe ʼita ia Moisese kiā Eleasale pea mo Itamale, he neʼe mole nā kai te tao ʼaē neʼe fai ki te sākilifisio ʼo te agahala. (Lev. 9:3) He koʼē neʼe ʼita fēia ia Moisese kiā nāua?
Ko te ʼu lao ʼaē neʼe foaki e Sehova kiā Moisese, neʼe fakahā lelei ai ko te pelepitelō ʼaē neʼe ina momoli te sākilifisio neʼe tonu ke ina kai he koga ʼo te sākilifisio ʼi te malaʼe ʼo te fale fono. ʼI tana fai te faʼahi ʼaia, neʼe fakaʼuhiga ohagē ko hana tali ki te ʼu agahala ʼa nātou ʼaē neʼe natou fai te sākilifisio. Kae kapau neʼe fakahali he koga ʼo te toto ʼo te sākilifisio ʼi te Potu Taputapu, te ʼuluaki koga fale ʼo te sagatualio, pea neʼe mole tonu ke kai te sākilifisio, kae neʼe tonu ke tutu.—Lev. 6:24-26, 30.
ʼE hā mai ʼi te hili ʼo te meʼa fakamataku ʼaē neʼe hoko ʼi te ʼaho ʼaia, neʼe tokaga ia Moisese ke muliʼi fakalelei te ʼu fakatotonu fuli ʼaē ʼa Sehova. ʼI tana ʼiloʼi age ʼaē neʼe tutu te sākilifisio ki te agahala, neʼe ʼita ia Moisese, ʼo ina fehuʼi age kiā Eleasale pea mo Itamale pe koʼē neʼe mole nā kai te sākilifisio ohagē ko tona fakatonutonu ake, koteʼuhi neʼe mole liligi te toto ʼo te manu iā muʼa ʼo Sehova ʼi te Potu Taputapu.—Lev. 10:17, 18.
Ko Alone ʼaē neʼe ina tali age ki te fehuʼi ʼa Moisese, heʼe ko te meʼa ʼaē neʼe fai e te ʼu pelepitelō neʼe nā mulimuli pē ki te meʼa ʼaē neʼe ina fakatotonu age. ʼI te kua ʼosi matehi ʼo tona ʼu foha e lua, neʼe lagi feʼekeʼaki e Alone pe feala ki he tahi ʼi te kau pelepitelō ke ina kai te sākilifisio ki te agahala ʼi te ʼaho ʼaia. Lagi ʼi tana manatu ʼe feala pē anai ke mole leleiʼia e Sehova mo kapau ʼe nā kai kiai, logolā neʼe mole ʼi ai honā pikipikiga mo te agahala ʼaē neʼe fai e Natape pea mo Apiu.—Lev. 10:19.
Neʼe lagi mahino lelei kiā Alone ko te ʼaho ʼaē ʼe kamata fakahoko ai e tona fāmili tona ʼu maʼua fakapelepitelō, neʼe tonu ke natou tōkakaga ʼo fakafiafia te loto ʼo te ʼAtua, tatau aipē ʼi te ʼu kihiʼi meʼa noa. Kae ko te huafa ʼo Sehova neʼe moamoagaʼi e Natape pea mo Apiu, pea neʼe ʼita te ʼAtua kiā nāua ʼo ina tutu ia nāua ʼo nā mamate ai. Koia ʼi te manatu ʼa Alone ko te fāmili ʼo te kau pelepitelō ʼaē neʼe hoko ki ai te taʼi agahala ʼaia neʼe mole tonu ke natou kau ki te kai ʼo te sākilifisio taputapu.
Neʼe tali e Moisese te ʼu fakamahino ʼaē neʼe fai age e tona tehina kiā ia, heʼe fakaʼosi fēnei ʼi te vaega Tohi-Tapu: “ ʼI te logo ʼaē ʼa Moisese ki te meʼa ʼaia, pea neʼe matatonu kiā te ia.” (Lev. 10:20) ʼE toe hā mai, neʼe toe leleiʼia foki e Sehova te tali ʼaē neʼe fai e Alone.