ʼE Fia ʼIloʼi e Te Kau Lautohi . . .

ʼE Tali Koa e Te Kau Fakamoʼoni ʼa Sehova Ke Fai Kiā Nātou He ʼu Faitoʼo?

▪ Neʼe ʼui e Sesu “ ʼe mole ko te hahaʼi mālolohi ʼaē ʼe ʼaoga ki ai he tōketā, kā ko te hahaʼi mahahaki.” (Mateo 9:12) ʼE fakahā ʼi henī e Sesu ʼe mole fakafeagai te Tohi-Tapu mo kapau ʼe tou kumi hotatou faitoʼo ki te kau tōketā. Koia, ʼe tali e te kau Fakamoʼoni ʼa Sehova ke foaki age e te kau tōketā honatou faitoʼo. ʼE natou fia taupau tonatou maʼuli fakasino pea mo fakatologa atu. Koia ʼaē ohagē ko te Kilisitiano ʼo te ʼuluaki sēkulō ʼaē ko Luka, ko ʼihi kau Fakamoʼoni ʼa Sehova ʼe ko he kau tōketā.—Kolose 4:14.

Kae ʼe mole tali e te kau Fakamoʼoni ʼa Sehova te ʼu faitoʼo ʼaē ʼe fakafeagai ki te ʼu pelesepeto Fakatohi-tapu. Ohagē lā ko te ʼu foʼi huki toto ʼe mole natou tali, koteʼuhi ʼe tapuʼi ʼi te Tohi-Tapu te taupau ʼo te maʼuli ʼo te sino ʼaki te ʼai kiai ʼo he toto. (Senesi 9:4; Levitike 17:1-14; Gāue 15:28, 29) ʼE toe tapuʼi ʼi te Tohi-Tapu te ʼu faitoʼo peʼe ko te ʼu fakatuʼutuʼu faitoʼo ʼaē ʼe fakaʼaogaʼi kiai “te ʼu meʼa fakamanamana” peʼe ko te ʼu meʼa faifakalauʼakau.—Isaia 1:13; Kalate 5:19-21.

ʼE lahi te kau tōketā ʼe natou foaki te ʼu faitoʼo ʼe mole fakafeagai ki te ʼu lēkula ʼa te Tohi-Tapu. ʼI te agamāhani, ko te ʼu faitoʼo ʼaia ʼe tali e te kau Fakamoʼoni ʼa Sehova, ʼe lelei age ia ʼi te ʼu faitoʼo ʼaē ʼe fakaʼaogaʼi māhani e te hahaʼi ʼaē ʼe mole natou ʼiloʼi te ʼu fakamaʼua ʼa te ʼAtua.

ʼE mahino ia, ʼe lahi te ʼu manatu kehekehe ʼo ʼuhiga mo te ʼu faitoʼo ʼaē ke fakaʼaogaʼi kiā tātou. Ko te faitoʼo ʼaē ʼe lelei ki he tahi ʼe lagi mole lelei anai ia ki he tahi age. Koia, ʼe kumi ai e te hahaʼi ki te kau tōketā he fakamahino lelei ʼo ʼuhiga mo tonatou mahaki pea mo te ʼu faitoʼo ʼaē ke fai kiā nātou, ʼo lagi natou fia fai ia tanatou ʼu fekumi ʼaia ki niʼihi age tōketā.—Tāʼaga Lea 14:15.

ʼE tahi ʼalu pē anai te manatu ʼa te Fakamoʼoni ʼa Sehova ʼo ʼuhiga mo te ʼu faitoʼo ʼaē ke fai age ki ai. ʼE mole fakamaʼua ʼi te Folafola ʼa te ʼAtua ki te kau Kilisitiano fuli ke tatau ʼonatou leʼo ʼo loto, tāfito lā ki te ʼu faitoʼo ʼaē ʼe mole tapuʼi e he pelesepeto Fakatohi-tapu. (Loma 14:2-4) Koia ʼaē ʼe tonu ai kiā tātou takitokotahi ke tou fai he ʼu fekumi ʼo ʼuhiga mo he faʼahiga faitoʼo pē pea mo tōkakaga naʼa ko he ʼu faitoʼo ʼe mole tali e totatou ʼu leʼo ʼo loto.—Kalate 6:5; Hepeleo 5:14.

ʼE fakaʼuhiga anai e he Fakamoʼoni ʼa Sehova te ʼu tonu fuli ʼaē kā ina fai ohagē ko he tahi ʼe fakaovi mo tana motokā ki he magafā pea ʼe fonu ai te ʼu motokā. Kapau ʼe mulimuli pē ia ʼi te ʼu motokā ʼaē ʼe haʼele ʼi ʼona muʼa pea mo ʼulu atu aipē ki te magafā, ʼe feala pē anai ke tuʼutāmakiʼia. Ko he tahi ʼe taki motokā fakapotopoto ʼe ʼaluʼalu māmālie anai pea mo fakafuafua lelei te feʼaluʼaki ʼaē ʼa te ʼu motokā ʼi muʼa ʼo hana fai he puleʼaki. ʼO toe fēia, ʼe mole foimo fai anai e te kau Fakamoʼoni ʼa Sehova he ʼu tonu ʼo ʼuhiga mo te ʼu faitoʼo ʼaē ke fai age kiā nātou, peʼe natou hoko muli pē ʼi te manatu ʼaē ʼe maʼu e te tokolahi ʼo ʼuhiga mo te ʼu faitoʼo ʼaia. Kae ʼe natou sivisivi fakalelei te ʼu meʼa ʼaē ke natou fai pea mo vakavakaʼi te ʼu pelesepeto ʼo te Tohi-Tapu ʼi muʼa ʼo hanatou fai he tonu.

ʼE mahino ia ʼe leleiʼia e te kau Fakamoʼoni ʼa Sehova te gāue kinakina pea mo te tokaga fakamālotoloto ʼo nātou ʼaē ʼi te lōpitali ki te hahaʼi mahaki. ʼE natou toe loto fakafetaʼi foki ki te fīmālie fakasino ʼaē ʼe foaki e nātou ʼaia ki te ʼu mahaki.