Tou Ako Mai Te Folafola ʼa Te ʼAtua

Ko Ai Koa Te ʼAtua?

ʼE fakahā ʼi te ʼalatike ʼaenī te ʼu fehuʼi ʼe feala ke kotou fai ʼo ʼuhiga mo te ʼAtua, pea ʼe ina fakahā peʼe ko te ʼu vaega Tohi-Tapu fea ʼi takotou Tohi-Tapu ʼe feala ke kotou maʼu ai tona ʼu tali. ʼE fiafia anai te kau Fakamoʼoni ʼa Sehova ʼi te felōgoi mo koutou ki te ʼu fehuʼi ʼaia.

 1. Ko ai koa te ʼAtua?

Ko te ʼAtua moʼoni ʼe ko te Tupuʼaga ʼo meʼa fuli ʼaē ʼi te kele pea mo te ʼatulaulau. ʼE fakahigoaʼi te ʼAtua ʼi te Tohi-Tapu ʼe ko te “Hau ʼo te heʼegata,” ko tona fakaʼuhiga ʼe mole hona kamataʼaga pea ʼe mole ʼi ai anai mo hona gataʼaga. (Fakahā 15:3) Mai tona ʼaluʼaga ʼaē ko te ʼAtua ʼe ko te Matapuna ʼo te maʼuli, koia ʼe tonu ai ke tou ʼatolasio ʼāteaina pē kiā te ia.—Lau ia Fakahā 4:11.

 2. ʼE feafeaʼi te agaaga ʼo te ʼAtua?

ʼE mole heʼeki ʼi ai he tahi kua sio mata ki te ʼAtua koteʼuhi ʼe ko te Laumālie, ko tona fakaʼuhiga ʼe māʼoluga age ia tona maʼuli ʼi te ʼu meʼa maʼuli fuli ʼaē neʼe fakatupu ʼi te kele. (Soane 1:18; 4:24) ʼE hā lelei te ʼu kalitātē ʼo te ʼAtua ʼi te ʼu meʼa ʼaē neʼe ina fai. Ohagē lā, mokā tou mamata ki tana fakatuʼutuʼu pea mo te kehekehe ʼo te ʼu fuaʼi ʼakau mo te ʼu fisiʼi teu, ʼe tou mahino ai ki te ʼofa pea mo te poto ʼo te ʼAtua. Ko te laulahi ʼo te ʼatulaulau ʼe ina fakahā mai ia te mālohi ʼo te ʼAtua.—Lau ia Loma 1:20.

ʼE toe feala pē foki ke lahi age te ʼu meʼa ʼaē ke tou ako ʼo ʼuhiga mo te ʼuluagaaga ʼo te ʼAtua ʼi te Tohi-Tapu. Ohagē lā, ʼe ina fakahā mai te ʼu meʼa ʼaē ʼe leleiʼia e te ʼAtua pea mo te ʼu meʼa ʼaē ʼe fehiʼa kiai, mo tana faʼahiga tokaga ʼaē ki te hahaʼi, pea mo tana ʼu faʼahiga fakatuʼutuʼu ʼaē ʼe ina fai mokā hoko he ʼu meʼa.—Lau ia Pesalemo 103:7-10.

 3. ʼE ʼi ai koa he huafa ʼo te ʼAtua?

Neʼe ʼui fēnei e Sesu: “Ko tamatou Tamai ʼe ʼi selō, ke tapuhā tou huafa.” (Mateo 6:9) Logolā te lahi ʼaē ʼo te ʼu higoa fakatuʼulaga ʼo te ʼAtua, kae ʼe ko tona higoa pē e tahi. Pea ʼi te ʼu lea kehekehe, ʼe tahi ʼalu pē tona faʼahiga puʼaki. ʼI te lea Fakaʼuvea, ʼe ʼui māhani ko “Sehova” peʼe ʼi ʼihi temi ko “Iave.”—Lau ia Pesalemo 83:18.

ʼE lahi te ʼu Tohi-Tapu neʼe mole kei tohi ai te huafa ʼo te ʼAtua pea neʼe fetogi ʼaki te ʼu higoa fakatuʼulaga ohagē ko ʼAliki peʼe ko ʼAtua. Kae ʼi te temi ʼaē neʼe tohi ai te Tohi-Tapu, neʼe tohi tuʼa 7 000 te huafa ʼo te ʼAtua. Neʼe fakahā e Sesu te huafa ʼo te ʼAtua ʼo ina fakaʼaogaʼi te huafa ʼaia ʼi te ʼu temi ʼaē neʼe ina fakamahino ai te Folafola ʼa te ʼAtua ki te hahaʼi. Neʼe tokoni ki te hahaʼi ke natou ʼiloʼi te ʼAtua.—Lau ia Soane 17:26.

  4. ʼE tokaga mai koa te ʼAtua kiā tātou?

ʼE tokaga mai ia Sehova kiā tātou ʼaki tana fakalogo ki tatatou ʼu faikole takitokotahi. (Pesalemo 65:2) ʼE fakaʼuhiga koa te lahi ʼaē ʼo te ʼu mamahi, ʼe mole tokaga mai te ʼAtua kiā tātou? ʼE ʼui e ʼihi ko te ʼAtua ʼe ina fakamamahiʼi tātou ʼaki tana ʼahiʼahiʼi ʼaē ʼo tātou, kae ʼe mole ko te moʼoni ʼaia. ʼE ʼui fēnei ʼi te Tohi-Tapu: “ ʼE mamaʼo ʼi te ʼAtua moʼoni ia te fai ʼo he meʼa ʼe kovi.”—Sopo 34:10; lau ia Sake 1:13.

Neʼe fakafealagia e te ʼAtua ki te tagata ke ina filifili faʼifaʼitaliha te meʼa ʼaē ʼe loto kiai. ʼE mole koa lā tou leleiʼia te ʼāteaina ʼaē ʼe tou maʼu ke tou filifili ke tou tauhi ki te ʼAtua? (Sosue 24:15) ʼE lahi te mamahi he neʼe filifili e te tokolahi ke natou agakovi ki ʼihi. ʼE lotomamahi ia Sehova ʼi tana sio ki te ʼu aga heʼe faitotonu ʼaia.—Lau ia Senesi 6:5, 6.

Kua vave pē anai te fakaʼaogaʼi e Sehova ia Sesu moʼo pulihi te mamahi pea mo nātou fuli ʼaē ʼe natou fakatupu te mamahi. Kae ʼi muʼa ʼo te hoko mai ʼo te temi ʼaia, ʼe ʼi ai te tupuʼaga tāfito ʼo te tuku fakatemi ʼaē e Sehova ke hoko te ʼu mamahi. ʼI he tahi ʼalatike ki muli age ohagē pe ko te ʼalatike ʼaenī, ʼe talanoa ai anai, pe koʼē ʼe fakagafua e te ʼAtua te mamahi.—Lau ia Isaia 11:4.

 5. Koteā ʼaē ʼe loto e te ʼAtua ke tou fai?

Neʼe fakatupu tātou e Sehova ʼaki te fealagia ʼaē ke tou ʼiloʼi ia ia pea mo ʼoʼofa kiā te ia. ʼE ina loto ke tou ʼiloʼi te moʼoni ʼo ʼuhiga mo ia. (1 Timoteo 2:4) Kapau ʼe tou ako te Tohi-Tapu, pea ʼe feala ai ke tou mahino ki te ʼAtua ohagē ko hokita Kaumeʼa.—Lau ia Tāʼaga Lea 2:4, 5.

Mai tona ʼaluʼaga ʼaē neʼe foaki mai e Sehova te maʼuli, koia ʼe tonu ai ke lahi age totatou ʼofa ʼaē kiā te ia ʼi he tahi age. ʼE feala ke tou fakahā ki te ʼAtua ʼe tou ʼoʼofa kiā te ia, ʼaki hatatou palalau kiā te ia ʼi te faikole pea mo fai te ʼu meʼa ʼaē ʼe loto kiai. (Tāʼaga Lea 15:8) ʼE kole mai e Sehova ke tou ʼoʼofa ki te hahaʼi.—Lau ia Maleko 12:29, 20; 1 Soane 5:3.

Kapau ʼe kotou fia maʼu he tahi ʼu fakamahino, vakaʼi te kāpite 1 ʼo te tohi ʼaenī, Koteā ʼAē ʼe Akoʼi Moʼoni Mai ʼi Te Tohi-Tapu? neʼe tā e te kau Fakamoʼoni ʼa Sehova.

[Paki ʼo te pasina 11]

ʼE ʼi ai koa he tupuʼaga tāfito ʼo te tuku fakatemi ʼaē ke hoko te ʼu mamahi?