Kotou Falala Kiā Sehova Heʼe Kua Ovi Mai Te Temi Fakaʼosi

“Kotou falala kiā Sehova, ʼi te ʼu temi fuli pē.”—ISA. 26:4.

 1. Koteā ʼaē ʼe kehekehe ai te ʼu kaugana ʼa te ʼAtua pea mo te hahaʼi ʼo te mālama?

 ʼE TOU māʼuʼuli nei ʼi te mālama ʼe lauʼi miliona te hahaʼi ʼaē ʼe mole kei natou ʼiloʼi, peʼe ko ai mo teā ʼaē ke tuku ki ai ia tanatou falala, lagi mai tona ʼaluʼaga ʼaē neʼe tuʼa lahi tanatou lotomamahi, pe neʼe natou ʼiʼita ʼo ʼuhiga mo he ʼu meʼa neʼe hoko kiā nātou. ʼE ko he faʼahi ʼe kehekehe mo te ʼu kaugana ʼa Sehova! Mai tona ʼaluʼaga ʼaē ʼe takitaki nātou e te poto fakaʼatua, ʼe natou ʼiloʼi lelei ʼe mole he ʼuhiga ʼo tanatou falala ki te mālama ʼaenī peʼe ki tona “kau ʼaliki.” (Pes. 146:3) ʼE natou falala kiā Sehova ʼo ʼuhiga mo tonatou maʼuli pea mo tonatou kā haʼu, heʼe natou ʼiloʼi ʼe ʼofa te ʼAtua kiā nātou pea ʼe ina fakahoko tuʼumaʼu tana ʼu fakapapau ʼaē ʼe tuʼu ʼi tana Folafola.—Loma 3:4; 8:38, 39.

 2. Koteā te fakamoʼoni ʼaē neʼe fai e Sosue ʼo ʼuhiga mo te tuha ʼaē mo te ʼAtua ke falala ki ai te hahaʼi?

² ʼI te temi muʼa neʼe fakamoʼoni e Sosue ʼe tuha mo te ʼAtua ke falala kiai te hahaʼi. ʼI te fakaʼosi ʼo tona maʼuli, neʼe ina ʼui fēnei ki tona ʼu tehina Iselaele: “ ʼE kotou ʼiloʼi papau ʼaki tokotou loto kātoa pea  mo tokotou nefesi kātoa, neʼe hoko te ʼu folafola lelei fuli ʼaē neʼe tala atu e Sehova, tokotou ʼAtua. Neʼe hoko fuli ia maʼa koutou.”—Sos. 23:14.

 3. Koteā ʼaē ʼe hā mai ʼi te huafa ʼo te ʼAtua ʼo ʼuhiga mo tona ʼuluagaaga?

³ ʼE fakahoko e Sehova ia tana ʼu fakapapau, ʼe mole ʼuhi pē ko tona ʼofa ʼaē ki tana ʼu kaugana kae ʼuhi tāfito ko tona huafa. (Eke. 3:14; 1 Sam. 12:22) ʼI te tohi a J. B. Rotherham (The Emphasized Bible), ʼe ʼui fēnei ʼi te kamataʼaga pē ʼo te tohi ʼo ʼuhiga mo te huafa ʼo te ʼAtua: “Ko te huafa ʼaē ko [Sehova] ʼe liliu ko he fakapapau lahi; ʼe lava liliu ko meʼa fuli ki he ʼu ʼaluʼaga kehekehe, mo he ʼu fihifihia, mo he ʼu meʼa ʼe ʼaoga ki he ʼu meʼa ʼe hoko . . . [Ko tona huafa ʼe ko] he fakapapau, . . . mo he fakahā, mo he fakamanatu, mo he fakamoʼoni. ʼO ʼuhiga mo te Huafa ʼaia, ʼe agatonu tuʼumaʼu anai te ʼAtua kiai; ʼe mole feala anai ʼi he temi ke ufiufi ʼi tona huafa ʼaia.”

 4. (a) Koteā ʼaē ʼe fakalotomālohiʼi tātou ke tou fai ʼi te koga tohi ʼo Isaia 26:4? (b) Koteā ʼaē kā tou vakaʼi anai ʼi te ʼalatike ʼaenī?

⁴ Kotou fai te ʼu fehuʼi ʼaenī: ‘ ʼE au ʼiloʼi lelei koa te ʼuluagaaga ʼo Sehova ke feala ai haku falala kātoa kiā te ia? ʼE au loto falala koa ʼo ʼuhiga mo te kā haʼu ʼi taku ʼiloʼi ʼaē ko te ʼAtua ʼe tokaga kiā meʼa fuli pē ʼe hoko?’ ʼE ʼui fēnei iā Isaia 26:4: “Kotou falala kiā Sehova, ʼi te temi fuli pē, heʼe ko Sah Sehova ʼe ko te Maka ʼo aʼu ki he ʼu temi ʼe mole ʼiloʼi hona gataʼaga.” ʼE moʼoni, ʼi te temi ʼaenī ko te tokoni ʼaē ʼe foaki e te ʼAtua ki te maʼuli ʼo te hahaʼi, ʼe mole kei ina fai fakamilakulo ohagē ko tana fai ʼaē ki ʼihi ʼi temi muʼa. Kae ohagē ko “te maka ʼo aʼu ki he ʼu temi ʼe mole ʼiloʼi hona gataʼaga,” ʼe tou lava falala ki ai “ ʼi te temi fuli pē.” ʼE tokoni feafeaʼi totatou ʼAtua ʼaē ʼe tāu ke tou falala ki ai ki tana kau ʼatolasio agatonu iā ʼaho nei? Tou vakaʼi age muʼa te ʼu ʼaluʼaga e tolu ʼe tokoni mai kiā tātou: ʼE ina fakalotomālohiʼi tātou mokā tou kumi tokoni ki ai ke ʼaua naʼa tou tō ki te fakahala; ʼe lagolago kiā tātou mokā ʼe tou felāveʼi mo ni hahaʼi ʼe mole fia logo ki te logo lelei peʼe natou fakafeagai mai kiā tātou; pea ʼe ina foaki mai te mālohi mokā ʼe lahi fau ia tatatou ʼu tuʼania. Kā tou vakaʼi te ʼu ʼaluʼaga ʼaia, tou fakakaukauʼi peʼe lava feafeaʼi takotou fakamālohiʼi ia takotou falala ʼaē kiā Sehova.

Kotou Falala Ki Te ʼAtua ʼi Te Temi ʼAē ʼe Fakahalaʼi Ai Koutou

 5. ʼO ʼuhiga mo tatatou falala ʼaē ki te ʼAtua, ko te faʼahi fea ʼaē ʼe lagi feala ai ke faigataʼa tatatou falala ʼaē ki te ʼAtua?

⁵ ʼE lagi tou falala kiā Sehova ʼo ʼuhiga mo tana fakapapau ʼaē ki he Palatiso peʼe ko te fakatuʼuake—ko he ʼu faʼahi ʼe tou fakaʼamu mālohi kiai. Kae ʼi te tahi age faʼahi ʼe lagi faigataʼa ʼaupitō hatatou falala kiā te ia mokā ko he ʼu ʼaluʼaga ʼe tonu ke tou fakalogo ki tana ʼu lēkula ʼo ʼuhiga mo te aga ʼaē ʼe tonu ke fai, ʼo tou tui papau ʼi totatou loto ko tatatou fakalogo ʼaē ki tona ʼu ala pea mo tana ʼu lēkula ʼe lelei, pea ʼe ina taki anai tātou ki he fiafia ʼe lahi age. Neʼe tohi e te hau ko Salomone te tokoni ʼaenī: “Falala kiā Sehova ʼaki tou loto kātoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou.” (Taag. 3:5, 6) Tou fakatokagaʼi te ʼu kupu ʼaenī totatou ʼu “ala” pea mo totatou “ ʼu ala foufou.” ʼE mahino ia, ʼe tonu ke tou fakahā ʼi totatou maʼuli kātoa ia tatatou falala ʼaē ki te ʼAtua, kae ʼe mole gata pē ia ʼi tatatou ʼamanaki Fakakilisitiano. ʼE tou lava fakahā feafeaʼi ia tatatou falala ʼaia mokā ʼe fakahalaʼi tātou?

 6. ʼE feafeaʼi hatatou lava fakamālohiʼi tatatou fakatotonu ʼaē ke tou liʼaki te ʼu meʼa ʼaē ʼe kovi?

⁶ ʼE kamata atu ʼi tokita ʼatamai takita liʼaki ia te ʼu meʼa ʼaē ʼe kovi. (Lau ia Loma 8:5; Efesi 2:3.) Koia, ʼe lava feafeaʼi hakotou fakamālohiʼi ia takotou fakatotonu ʼaē ke kotou lītuʼa ki te ʼu  fakakaukau kovi? Kotou vakaʼi age muʼa ia puani e nima: 1. Kotou kumi tokoni ki te ʼAtua ʼi te faikole. (Mat. 6:9, 13) 2. Kotou metitāsioʼi te ʼu hisitolia ʼo te ʼu hahaʼi ʼi te Tohi-Tapu neʼe mole natou fakalogo kiā Sehova pea mo ʼihi neʼe talagafua kiā te ia. Pea kotou fakatokagaʼi te ʼu meʼa ʼaē neʼe hoko kiā nātou ʼaia. a (1 Ko. 10:8-11) 3. Kotou fakakaukauʼi te mamahi ʼaē ʼi te ʼatamai pea mo te loto, ʼaē ʼe lava fakatupu e he agahala kiā koutou pea mo te hahaʼi ʼaē ʼe kotou ʼoʼofa ai. 4. Kotou toe fakakaukauʼi age mo te mamahi ʼaē neʼe feala ke logoʼi e te ʼAtua ʼi te temi ʼaē neʼe fai ai e hana kaugana he agahala mamafa. (Lau ia Pesalemo 78:40, 41.) 5. Kotou fakakaukauʼi age te fiafia ʼaē ʼe maʼu e Sehova mokā sio ifo ki hana kaugana agatonu ʼi te fakalilo peʼe ʼi te kaugamālie, ʼe lītuʼa ki te aga ʼaē ʼe kovi kae ʼe ina fai te meʼa ʼaē ʼe lelei. (Pes. 15:1, 2; Taag. 27:11) ʼE feala foki mo koutou ke kotou fakahā ia takotou falala ʼaē kiā Sehova.

Kotou Falala Kiā Sehova ʼi Te Temi ʼAē ʼe Mole Fia Logo Ai Te Hahaʼi Ki Te Logo Lelei Peʼe Natou Fakafeagai Kiai

 7. Koteā te ʼu ʼahiʼahi ʼaē neʼe tau mo Selemia, pea koteā ʼaē neʼe ina logoʼi ʼi tona loto ʼi ʼihi temi?

⁷ Tokolahi totatou ʼu tehina ʼe natou fai fakamafola ʼi te ʼu telituale ʼe faigataʼa ʼaupitō. Neʼe fai fakamafola ia te polofetā ko Selemia ʼi te ʼaluʼaga fēia—ʼi te temi ʼaē neʼe maveuveu ai te puleʼaga ʼo Suta ʼi tona ʼu ʼaho fakamuli. ʼI te ʼaho fuli pē, neʼe ʼahiʼahiʼi ai tana tui he neʼe fakalogo ia ʼo tala ki te hahaʼi ia te ʼu fakamāu a te ʼAtua. ʼI te tahi temi, māʼiapē lā mo tana sīkalaipe agatonu ʼaē ko Paluke, neʼe meo he neʼe kua fiu ʼi te fai ʼo te gāue. (Sel. 45:2, 3) Neʼe lotovaivai ai koa ia Selemia? ʼIo, ʼi te tahi temi neʼe lotovaivai, he neʼe kalaga fēnei: “Ke malaʼia ia te ʼaho ʼaē neʼe au tupu ai! . . . He koʼē neʼe au haʼu ki te tuʼa mai te falega fānau ke au sio ki te gāue kinakina pea mo te mamahi, pea ke fakaʼosi toku ʼu ʼaho ʼi te ufiufi?”—Sel. 20:14, 15, 18.

8, 9. ʼO mulimuli ki te ʼu palalau ʼaē iā Selemia 17:7, 8 mo te Pesalemo 1:1-3, koteā ʼaē ʼe tonu ke tou fai ke tupu ʼaki ai he hoko atu ʼo tatatou fakatuputupu he ʼu fua ʼe lelei?

⁸ Kae neʼe mole tuku e Selemia ia tana gāue. Neʼe hoko atu aipē ia tana falala ʼaē kiā Sehova. Koia neʼe sio mata ia te polofetā agatonu ʼaia ki te moʼoni ʼo te ʼu palalau ʼa Sehova ʼaē iā Selemia 17:7, 8: “Tapuakiʼi te tagata maʼuli ʼaē ʼe ina tuku ia tana falala kiā Sehova, pea kua liliu ia Sehova ko tona falalaʼaga. ʼE mahino papau ia, ʼe liliu anai ia ko he fuʼu ʼakau neʼe tō ovi ki te ʼu vai, ʼe ina fakakaku tona ʼu aka ki te vaitafe; pea ʼe mole sio anai ia mokā hoko mai te vevela, kae ko tona ʼu lau ʼe matalelei anai. ʼI te taʼu ʼo te taʼi laʼā, ʼe mole tuʼania anai ia, pea ʼe tuputupu pē anai ia tona ia fua.”

⁹ Ohagē ko he fuʼu ʼakau ʼe fua lelei “neʼe tō ovi ki te ʼu vai” peʼe ko he gāueʼaga ʼi he kele ʼe lelei, neʼe mole he temi neʼe ‘iku noa ai te gāue ʼaē neʼe fai e Selemia. Neʼe mole ina tuku te hahaʼi vāvā agakovi ʼaē ʼi tona temi ke natou fakahēʼi ia ia mai tana gāue. ʼI te temi fuli pē, neʼe nofo ovi ia ʼi te Matapuna “vai” ʼo te maʼuli pea neʼe fakalogo mo tona loto kātoa kiā meʼa fuli neʼe fakatotonu age e Sehova ki ai. (Lau ia Pesalemo 1:1-3; Sel. 20:9) ʼE ko he faʼifaʼitaki lelei neʼe tuku mai e Selemia kiā tātou, tāfito lā ia nātou ʼaē ʼe fai fakamafola ʼi te ʼu telituale ʼaē ʼe faigataʼa ai te fai ʼo te gāue! Kapau ʼe fēia takotou minisitelio, kotou haga falala kiā Sehova ʼaē ʼe ina foaki atu anai kiā koutou te kātaki ʼi te temi ʼaē ʼe kotou ‘fakamafola ai ki te hahaʼi ia tona huafa.’—Hep. 13:15.

10. Koteā te ʼu tapuakina ʼaē ʼe tou maʼu, pea koteā te ʼu fehuʼi ʼaē ʼe tonu ke tou fai kiā tātou totonu pē?

¹⁰ Neʼe lahi te ʼu tokoni neʼe foaki mai e Sehova kiā tātou, ke feala ai hatatou tekeʼi ia te ʼu faigataʼaʼia ʼaē ʼe tau mo tātou ʼi te ʼu ʼaho fakamuli ʼaenī. ʼI te ʼu tokoni ʼaia, ʼe ʼi ai te Folafola kātoa ʼa te ʼAtua, ʼaē kua lahi te ʼu lea kehekehe kua fakaliliu kiai. ʼAki te kalasi  ʼo te tagata kaugana agatonu mo poto neʼe ina foaki mai te toe meʼa kai lahi fakalaumālie ʼi tona temi totonu. Pea neʼe ina foki mai te tokoni ʼa te ʼu tehina mo te ʼu tuagaʼane ʼe kaugamālie ʼi te ʼu fono pea mo te ʼu fakatahi lalahi. ʼE kotou fakaʼaogaʼi lelei koa te ʼu fakatuʼutuʼu fuli ʼaia? Ko nātou fuli ʼaē kā natou fai te faʼahi ʼaia, “ ʼe natou kalaga fakafiafia anai, heʼe lelei tonatou loto.” Kae kiā nātou ʼaē ʼe mole fakalogo ki te ʼAtua ‘ ʼe natou kalaga anai, heʼe mamahi tonatou loto, pea ʼe natou kekē anai, ʼuhi ko te mamahi ʼo tonatou ʼatamai.’—Isa. 65:13, 14.

Kotou Falala Ki Te ʼAtua ʼi Te Temi ʼAē ʼe Kotou Tau Ai Mo He ʼu Tuʼania

11, 12. ʼE hā feafeaʼi anai ia te poto moʼoni ʼo ʼuhiga mo te ʼu faigataʼaʼia ʼaē ʼe hoko ʼi te mālama ʼaenī?

¹¹ Ohagē ko tona kua fakakikite, ʼe lolotoga hoko nei ʼi te mālamanei ia te ʼu maveuveu lahi ʼaupitō. (Mat. 24:6-8; Fakh. 12:12) Kā hoko he lōmaki ʼi te kele, ko te manatu ʼaē ʼe maʼu māhani e te hahaʼi ke natou feholaki ki he koga meʼa ʼe māʼoluga ʼaupitō peʼe ke natou kake ki he ʼato ʼo he ʼapi—ko he faʼahi pē ʼe māʼoluga. Pea ʼe toe fēia ʼi te kua ʼāsili age te lahi ʼo te ʼu fihifihia ʼaē ʼi te mālamanei, ko te toko miliona hahaʼi ʼe natou kumi tokoni ki te ʼu fakatuʼutuʼu ʼe hagē ʼe lelei, ohagē ko te paʼaga, te politike peʼe ko te ʼu kautahi fakalotu, ʼo toe fēia ki te poto fakatagata pea mo te tekenolosia. Kae ʼe mole he fakatuʼutuʼu ʼi te ʼu fakatuʼutuʼu ʼaia ʼe ina lava foaki kiā nātou he maʼuli fīmālie moʼoni. (Sel. 17:5, 6) Tahi ʼaē ko te ʼu kaugana ʼa Sehova ʼe natou maʼu te haofaki moʼoni—“te Maka ʼo aʼu ki he ʼu temi ʼe mole ʼiloʼi hona gataʼaga.” (Isa. 26:4) Neʼe ʼui fēnei e te tagata fai pesalemo: ‘Ko Sehova ʼe ko toku maka pea mo toku haofakiʼaga, ʼe ko toku holaʼaga moʼoni.’ (Lau ia Pesalemo 62:6-9.) ʼE liliu feafeaʼi ia te Maka ʼaia ʼe ko totatou holaʼaga?

¹² ʼE tou pipiki maʼu kiā Sehova mokā ʼe tou fakalogo ki tana Folafola, pea ko tana Folafola ʼi te temi fuli pē ʼe mole ʼalutahi mo te poto fakatagata. (Pes. 73:23, 24) Ohagē lā, ʼe feala ke manatu fēnei ia te hahaʼi ʼaē ʼe takitaki e te poto fakataga: ‘ ʼE ko totatou maʼuli pē e tahi, koia tou fakaʼaogaʼi kātoa ai te ʼu meʼa ʼo te mālama ʼaenī.’ ‘Tou fai he gāue ʼe lelei age.’ ‘Tou maʼu hatatou falā ke lahi.’ ‘Tou totogi te meʼa fuli pē ʼe tou loto kiai.’ ‘Tou faifolau haʼele, tou ʼolo ʼo mamata ʼi te ʼu potu fuli ʼo te kele.’ Kae ko te poto fakaʼatua, ʼe ʼalutahi mo te tokoni ʼaenī: “Ko nātou ʼaē ʼe natou fakaʼaogaʼi te mālama, ke natou hagē ko nātou ʼaē ʼe mole natou fakaʼaogaʼi kātoa; koteʼuhi ko te ʼaluʼaga ʼo te mālama ʼaenī ʼe lolotoga fetogi nei.” (1 Ko. 7:31) ʼO toe fēia mo Sesu, ʼe ina fakalotomālohiʼi tuʼumaʼu tātou ke tou fakamuʼamuʼa te ʼu gāue ʼaē ʼo ʼuhiga mo te Puleʼaga pea ke tou tānaki he “ ʼu koloa ʼi selō,” ʼaē ʼe mole toe feala ai ke maumauʼi e he meʼa.—Mat. 6:19, 20.

13. ʼAki te manatu ʼaē iā 1 Soane 2:15-17, koteā te ʼu fehuʼi ʼaē ʼe tonu ke tou fai kiā tātou totonu pē?

¹³ ʼE hā koa ia takotou falala kātoa ki te ʼAtua ʼi takotou aga ʼaē ki te “mālamanei” pea mo “te ʼu meʼa ʼaē ʼe ʼi te mālamanei”? (1 Soa. 2:15-17) ʼE maʼuhiga age koa kiā koutou te ʼu koloa fakalaumālie pea mo takotou ʼu gāue ʼaē ki te ʼAtua ʼi te ʼu meʼa ʼaē ʼe foaki atu e te mālama? (Filp. 3:8) ʼE kotou faiga koa ke kotou taupau he ‘mata ʼe faigafua’? (Mat. 6:22) ʼE moʼoni, ʼe loto e te ʼAtua ke kotou maʼu he manatu ʼe fakapotopoto ki te ʼu faʼahi ʼaia, tāfito lā mo kapau ʼe tonu ke kotou taupau te ʼu meʼa maʼuli ʼo tokotou kiʼi fāmili. (1 Tim. 5:8) Kae ko tana fakaʼamu ke falala kātoa age ia tana ʼu kaugana kiā te ia, kae mole ki te mālama ʼa Satana ʼaē kā pulihi.—Hep. 13:5.

14-16. Koteā te ʼu tapuakina neʼe maʼu e ʼihi ʼi tanatou taupau he ‘mata ʼe faigafua’ pea mo fakamuʼamuʼa ia te ʼu gāue ʼaē ʼo te Puleʼaga ʼo te ʼAtua?

¹⁴ Tou vakaʼi age muʼa te faʼifaʼitaki ʼa Richard pea mo Ruth neʼe ko tanā ʼu tamaliki e toko tolu. Neʼe ʼui fēnei e Richard: “Neʼe au logoʼi pē ʼi toku loto neʼe feala ke lahi age taku gāue ʼaē kiā Sehova. Neʼe lelei ʼaupitō toku maʼuli ʼi te faʼahi fakasino kae neʼe au logoʼi neʼe mole lahi taku ʼu gāue ʼaē neʼe au fai maʼa te ʼAtua. ʼI taku ʼosi faikole ʼo ʼuhiga mo te faʼahi ʼaia pea mo fakakaukauʼi te ʼu meʼa ʼaē kā hoko anai, ko au pea mo Ruth neʼe mā manatu tahi ke au kole ki toku pātolō ke au gāue pē iā ʼaho e fā ʼi te vāhaʼa, logolā ʼi te temi ʼaia ko te fenua neʼe fihifihia ʼi te faʼahi fakaekonomika. Neʼe tali taku kole pea neʼe au kamata fai taku fakatuʼutuʼu foʼou ʼaia ʼi te māhina kātoa.” Kua feafeaʼi ia Richard ʼi te temi nei?

¹⁵ Neʼe ina ʼui fēnei: “Neʼe lahi te hifo ʼo toku totogi ʼi te 20 ki te teau, kae ʼi te temi nei kua au maʼu ʼaho e 50 ʼi te taʼu ke au nofo ai mo toku kiʼi fāmili pea mo akoʼi taku fānau. Kua feala ke au fakalahi age toku temi fai fakamafola, ʼo lahi ʼaupitō age taku ʼu ako Fakatohi-tapu pea mo lahi age taku tokaga ki te ʼu gāue ʼaē ʼi te kōkelekāsio. Pea mai tona ʼaluʼaga ʼaē kua lahi age toku temi ʼaē ke au tokoni ai ki taku  fānau, kua feala kiā Ruth ʼi ʼihi temi ke pioniē vaeluaʼi temi. Kua au fakatotonu ke au taupau maʼu te polokalama ʼaenī ʼi te ʼaho fuli pē.”

¹⁶ Ko Roy mo Petina, ʼaē kei ʼi ai pē tana taʼahine ʼe kei nofo mo nāua, neʼe feala kiā nāua ke nā fakasiʼisiʼi tonā ʼu hola gāue ke feala hanā kau ki te selevisi temi kātoa. Neʼe ʼui fēnei e Roy: “ ʼE au gāue ʼaho e tolu ʼi te vāhaʼa, pea ko Petina ʼe gāue iā ʼaho e lua. Tahi ʼaē meʼa, neʼe matou mavae ʼi tomatou ʼapi kae matou ʼolo ʼo nonofo ʼi te tahi ʼapi ʼe veliveli age, ke faigafua age tona fakamaʼa. Neʼe mā pioniē ʼi muʼa ʼatu ʼo te tupu mai ʼo tamā tama pea mo tamā taʼahine, pea ʼe kei mā taupau pē te manatu ʼaia. Koia ʼi te kua lahilahi ake ʼo tamā fānau, neʼe mā toe toʼo te selevisi temi kātoa. ʼE mole he koloa ʼe lava fakatatau ki te ʼu tapuakina ʼaē neʼe mā maʼu.”

Kotou Tuku “Te Tokalelei ʼo Te ʼAtua” Ke Ina Taupau Tokotou ʼu Loto

17. ʼO ʼuhiga mo te ʼu meʼa ʼaē ʼe hoko fakapunamaʼuli ʼi tokotou maʼuli, ʼe fakalotomālohiʼi feafeaʼi koutou ia te Tohi-Tapu ?

¹⁷ ʼE mole he tahi iā tātou ʼe ina ʼiloʼi ʼo ʼuhiga mo te ʼapogipogi, heʼe ko “te ʼu temi pea mo te ʼu meʼa fakafokifā” ʼe hoko kiā tātou fuli. (Tnk. 9:11) Kae ko takita mole ʼiloʼi te ʼu meʼa ʼaē kā hoko ʼi te ʼapogipogi ʼe mole tonu ki te faʼahi ʼaia ke ina pulihi ia te tokalelei ʼo tokita ʼatamai, ohagē ko te meʼa ʼe tautau hoko kiā nātou ʼaē ʼe maʼuli hoha ʼi tanatou mole maʼu ʼaē he ʼu felōgoi lelei mo te ʼAtua. (Mat. 6:34) Neʼe tohi fēnei e te ʼapositolo ko Paulo: “ ʼAua naʼa kotou tuʼania ki he meʼa, kae ʼi te faʼahi fuli, ʼaki te faikole pea mo te ʼu kole mamahi ʼaki te fakafetaʼi, kotou fakahā ki te ʼAtua takotou ʼu kole; pea ko te tokalelei ʼo te ʼAtua, ʼaē ʼe māʼoluga ake ʼi te ʼu manatu fuapē, ʼe ina taupau anai tokotou ʼu loto pea mo tokotou ʼu ʼatamai.”—Filp. 4:6, 7.

18, 19. ʼE fakalotofīmālieʼi feafeaʼi tātou e te ʼAtua? Kotou fakamahino.

¹⁸ Tokolahi te ʼu tehina pea mo te ʼu tuagaʼane ʼaē neʼe tau mo te ʼu ʼaluʼaga faigataʼa ʼi tonatou maʼuli, neʼe natou maʼu te fīmālie pea mo te tokalelei ʼaē mai ia Sehova. Neʼe ʼui fēnei e te tuagaʼane: “Neʼe tuʼa lahi te haga ʼa te tōketā faitafa ʼo fakamatakuʼi au ke au tali te toto. Neʼe ina ʼui fēnei mai kiā au: ‘Koteā koa te fakatuʼutuʼu vale ʼaia ki te mole tali ʼo te fakaʼaogaʼi ʼo te toto?’ Neʼe ko te ʼuluaki palalau mai ʼaia ʼa te tōketā faitafa. ʼI te temi ʼaia pea mo ʼihi age temi, neʼe au faikole fakalogologo ai kiā Sehova, pea neʼe ina foaki mai aipē tona tokalelei kiā te au. Neʼe hagē ʼi te temi ʼaia toku mālohi ko he mata maka. Logolā toku vaivai ʼaē ʼi te kua lahi ʼo te puli ʼo te toto iā au, kae neʼe feala ke au fakamahino fakalelei ʼaki te Tohi-Tapu te ʼu tupuʼaga ʼo taku fakafisi ki te toto.”

¹⁹ ʼE feala ki te ʼAtua ʼi ʼihi temi ke ina foaki mai te tokoni ʼaē ʼe ʼaoga kiā tātou, ʼaki he tehina peʼe ko he tuagaʼane ʼe ina fakalotofīmālieʼi tātou peʼe ʼi tona temi totonu ʼaki te meʼa kai ʼi te faʼahi fakalaumālie. Neʼe lagi kua kotou logo ki he tehina peʼe ko he tuagaʼane ʼe ʼui fēnei atu: “Neʼe tō tonu te ʼalatike ʼaenī mo toku fihifihia. Neʼe hagē pē ia neʼe tā ʼo fakahagahaga kiā au!” ʼEī, logolā totatou ʼu ʼaluʼaga peʼe ko te ʼu meʼa ʼaē ʼe ʼaoga kiā tātou, kae ko Sehova ʼe ina fakahā mai anai ia tona ʼofa ʼaē kiā tātou, mo kapau ʼe tou falala age kiā te ia. Pea ʼi tona fakahagatonu, ʼe ko tātou ko tana ʼu “ovi,” pea neʼe ina fakafealagia mai kiā tātou ke tou fua ia tona huafa.—Pes. 100:3; Soa. 10:16; Gāue 15:14, 17.

20. He koʼē ʼe maʼuli fīmālie anai te ʼu kaugana ʼa Sehova ʼi te temi ʼaē kā fakaʼauha ai ia te mālama ʼa Satana?

²⁰ ʼI te kua fakaovi fakavilivili mai ia “te ʼaho ʼo te hauhau ʼo Sehova,” ko meʼa fuli ʼaē ʼe falala kiai te mālama ʼo Satana ʼe fakaʼauha anai. ʼE mole feala anai ki te ʼaulo, mo te siliva pea mo ʼihi age meʼa maʼuhiga ke natou foaki he tokalelei. (Sofo. 1:18; Taag. 11:4) Ko totatou holaʼaga pē e tahi ʼe ko te “Maka ʼo aʼu ki he ʼu temi ʼe mole ʼiloʼi hona gataʼaga.” (Isa. 26:4) Koia tou fakahā ʼi te temi nei ia tatatou falala kātoa ʼaē kiā Sehova, ʼo tou fakalogo ʼo haʼele ʼi tona ʼu ala faitotonu, ʼo tala te logo ʼo tona Puleʼaga tatau aipē peʼe mole fakalogo te hahaʼi ki te logo lelei peʼe natou fakafeagai kiai, pea mo tuku ia tatatou ʼu tuʼania ki te ʼAtua. Kapau ʼe tou fai fēia, ʼe mahino ia ʼe tou ‘maʼuli fīmālie anai pea mo tokalelei, ʼo mole tou tuʼania he malaʼia.’—Taag. 1:33.

[Nota]

ʼE Feala Koa Hakotou Fakamahino?

ʼE feala koa ke tou falala ki te ʼAtua

• ʼi te temi ʼaē ʼe fakahalaʼi ai tātou?

• ʼi te temi ʼaē ʼe mole fia logo ai te hahaʼi ki te logo lelei peʼe natou fakafeagai kiai?

• ʼi te temi ʼaē ʼe tou tau ai mo he ʼu tuʼania?

[ʼU fehuʼi ʼo te ako]

[Paki ʼo te pasina 17]

ʼE tou maʼuli fiafia anai mo kapau ʼe tou taupau maʼu te ʼu lēkula ʼa te ʼAtua

[Paki ʼo te pasina 18]

“[Ko] Sehova ʼe ko te Maka ʼo aʼu ki he ʼu temi ʼe mole ʼiloʼi hona gataʼaga”