Te ʼu Fehuʼi ʼa Te Kau Lautohi

ʼI te temi ʼaē neʼe fekauʼi ai e Sesu Kilisito te toko 12 kau ʼapositolo ke natou ʼolo ʼo fai fakamafola, neʼe ina ʼui age koa ke natou toʼo he ʼu tokotoko pea mo tui honatou ʼu tapugā vaʼe?

ʼE ʼui e ʼihi ʼe mole felōgoi tahi te ʼu fakamatala ʼo te ʼu Evaselio e tolu ʼo ʼuhiga mo te fekauʼi e Sesu te ʼu ʼapositolo ke natou ʼolo ʼo fai fakamafola. Kae kapau ʼe tou fakatatau te ʼu fakamatala ʼaia pea ʼe tou maʼu anai he manatu maʼuhiga. Moʼo kamata, tou fakatatau te ʼu meʼa ʼaē neʼe tohi e Maleko pea mo Luka. ʼE ʼui fēnei ʼi te fakamatala ʼa Maleko: “[Ko Sesu] neʼe ina fakatotonu age kiā nātou ke ʼaua naʼa natou toʼo he meʼa ki te ala, gata pē ko he tokotoko, ʼo mole ʼave he pane, pe ko he kato fafaʼo meʼa kai, pe ko he paʼaga kapa ki te taga ʼaiʼaga paʼaga ʼo tonatou ʼu noʼo, kae ke natou tui he ʼu tapugā vaʼe, pea ke ʼaua naʼa natou kofuʼi he ʼu kofu ʼo loto e lua.” (Mko. 6:7-9) Neʼe fakamatala fēnei e Luka: “ ʼAua naʼa kotou toʼo he meʼa ki te ala, pe ko he tokotoko pe ko he kato fafaʼo meʼa kai, pe ko he pane pe ko he falā; pe ko he ʼu kofu ʼo loto e lua.” (Luka 9:1-3) ʼE tou fakatokagaʼi ʼi henī ʼe mole felōgoi tahi te ʼu fakamatala. ʼE tohi e Maleko, neʼe ʼui age ki te kau ʼapositolo ke natou toʼo he tokotoko pea mo tui he ʼu tapugā vaʼe, kae ʼe ʼui ʼi te fakamatala ʼa Luka neʼe mole tonu ke natou ʼave he meʼa, māʼiapē lā mo he tokotoko. Ko Luka ʼe mole talanoa ia ke tui he ʼu tapugā vaʼe, ʼaē ʼe talanoa kiai Maleko.

Ke kita mahino ki te fakaʼuhiga ʼo te ʼu palalau ʼaē neʼe fai e Sesu ʼi te lakaga ʼaia, tou vakaʼi age muʼa te manatu ʼaē ʼe talanoa tatau kiai te ʼu Evaselio e tolu. ʼI te ʼu Evaselio e lua ʼaenī neʼe hoki tou ʼosi vakaʼi pea mo Mateo 10:5-10, neʼe ʼui age ki te kau ʼapositolo ke mole natou kofuʼi “he ʼu kofu ʼo loto e lua.” ʼE mahino ia, neʼe tahi kofuʼi e te kau ʼapositolo tona kofu. Koia, neʼe mole tonu ke natou toʼo ʼi tanatou ʼolo he tahi age kofu. ʼO toe fēia pē, neʼe kua ʼi ai tonatou ʼu tapugā vaʼe. Neʼe fakahā lelei e Maleko te ʼaoga ʼaē ke natou “tui [honatou] ʼu tapugā vaʼe,” te ʼu tapugā vaʼe ʼaē neʼe kua natou ʼosi tui. ʼE feafeaʼi ʼo ʼuhiga mo te ʼu tokotoko? ʼE tohi fēnei ʼi te tohi The Jewish Encyclopedia: “Neʼe ko te agaʼi fenua ʼa te kau Hepeleo mokā natou ʼolo ki he faʼahi ʼe natou toe toʼo mo nātou te tokotoko.” (Sen. 32:10) Neʼe ʼui ia e Maleko ʼe tonu ki te kau ʼapositolo ke “ ʼaua naʼa natou toʼo he meʼa ki te ala” gata pē te tokotoko ʼaē neʼe kua nofo mo nātou ʼi te temi ʼaē neʼe fai age ai e Sesu te fakatonutonu ʼaia. ʼE hā mai, neʼe fia fakamaʼuhigaʼi tāfito e te ʼu tagata faitohi ʼo te ʼu Evaselio ia te fakatonutonu ʼaē ʼa Sesu ke ʼaua naʼa toʼo e te kau ʼapositolo he tahi age ʼu meʼa ʼi muʼa ʼo tanatou ʼolo.

ʼE toe fakahā lelei ia te manatu ʼaia e Mateo, ʼaē neʼe logo ki te fakatotonu ʼa Sesu ʼi te lakaga ʼaia pea neʼe ina tohi. Neʼe ʼui fēnei e Sesu: “ ʼAua naʼa kotou toʼo he ʼaulo, pe ko he siliva, pe ko he paʼaga kapa ke ʼai ki te taga ʼaiʼaga paʼaga ʼo tokotou ʼu noʼo, pe ko he kato fafaʼo meʼa kai ki te ala, pe ko he ʼu kofu ʼo loto e lua, pe ko he ʼu tapugā vaʼe, pe ko he tokotoko; heʼe tāu mo te tagata gāue ke ina maʼu tana meʼa kai.” (Mat. 10:9, 10) ʼE feafeaʼi ki te ʼu tapugā vaʼe ʼaē neʼe kua ʼosi tui e te kau ʼapositolo pea mo te ʼu tokotoko ʼaē neʼe kua natou ʼosi toʼo? Neʼe mole ʼui age e Sesu kiā nātou ke natou liʼaki te ʼu meʼa ʼaē neʼe kua natou ʼosi maʼu, kae neʼe ina ʼui age kiā nātou ke ʼaua naʼa natou ʼolo ʼo toʼo mai te ʼu meʼa ʼaia. He koʼē neʼe fai e Sesu te fakatotonu ʼaia? Heʼe “tāu mo te tagata gāue ke ina maʼu tana meʼa kai.” Neʼe ko te fakaʼuhiga ʼaia ʼo te fakatotonu ʼaē neʼe fai e Sesu, ʼaē ʼe ʼalutahi mo tana tokoni ʼaē neʼe ina fai ʼi te Akonaki ʼi te Moʼuga, ke ʼaua naʼa natou hoha ʼo ʼuhiga mo tanatou meʼa kai, mo tanatou meʼa ʼinu, peʼe ko tonatou ʼu mutuʼi meʼa.—Mat. 6:25-32.

Lagi ʼi takita ʼuluaki lau te ʼu Evaselio ʼe feala ke kita manatu ʼe mole felōgoi tahi te ʼu fakamatala, kae ʼi te ʼu Evaselio ʼaia e tolu ʼe ko te manatu pē ʼe tahi ʼaē ʼe kita maʼu ai. Neʼe tonu ke fakafeʼauga pē te kau ʼapositolo ʼi tanatou ʼolo ʼaki pē te ʼu meʼa ʼaē kua natou maʼu, pea ke mole natou hoha ki he tahi age ʼu meʼa. Koteā tona tupuʼaga? Heʼe ko Sehova ʼaē kā ina taupau tonatou maʼuli fakasino.

 Neʼe ko ai koa ‘te fafine, ʼeī te ʼu fafine’ ʼaē neʼe talanoa ki ai ia Salomone?—Tnk. 2:8.

ʼE mole kita ʼiloʼi papau pe ko ai te ʼu fafine ʼaia, kae ʼe feala pē ke fakaʼuhiga ki te ʼu fafine maʼuhiga ʼaē neʼe fetaulaki mo Salomone ʼi tona fale hau.

Iā Tagata Tānaki kāpite 2, neʼe talanoa ia Salomone ki te ʼu gāue kehekehe ʼaē neʼe ina fakahoko, ʼo kau kiai tana ʼu gāue laga fale lalahi. Neʼe ina ʼui fēnei: “Neʼe au toe tānaki maʼa ʼaku te siliva pea mo te ʼaulo, pea mo te ʼu koloa ʼaē ʼe maʼu tāfito e te ʼu hau pea mo te ʼu tisitilike. Neʼe ʼi ai taku kauhiva tagata pea mo taku kauhiva fafine, pea mo te ʼu meʼa matalelei ʼa te ʼu foha ʼo te tagata, mo he fafine, ʼeī he ʼu fafine.”—Tnk. 2:8.

Tokolahi te hahaʼi fakamahino Tohi-Tapu ʼe natou ʼui ko te “ ʼu fafine” ʼaē ʼe talanoa ki ai Salomone, neʼe fakaʼuhiga ki te ʼu fafine ʼohoana matāpule ʼe tokolahi pea mo te ʼu fafine ʼaē neʼe ina toʼo maʼa ia ʼi tona temi matuʼa, te ʼu fafine ʼaē neʼe natou taki ia ia ki te tauhi hala. (1 Hau 11:1-4) Kae ʼe ʼi ai te fihifihia ʼo ʼuhiga mo te fakamahino ʼaia. ʼI te temi ʼaē neʼe tohi ai e Salomone te ʼu palalau ʼaia, neʼe kua feʼiloʼiʼaki ia mo ‘te fafine, ʼeī te ʼu fafine’ ʼaia. Pea ʼi te temi ʼaia, neʼe kei ʼofa Sehova kiā ia, he neʼe ko te ʼAtua ʼaē neʼe ina takitaki ia Salomone ke ina fai he ʼu tohi ʼo te Tohi-Tapu. Koia, ʼe mole feala ai ke ʼui ko te ʼu palalau ʼaia ʼe fakaʼuhiga ki te maʼuli ʼo te Hau ko Salomone ki ni ʼu taʼu ki muli age, heʼe ʼi te temi ʼaia neʼe kua lauʼi teau tona ʼu ʼohoana matāpule pea mo te ʼu fafine neʼe nofo mo ia, pea neʼe kua kau Salomone ki te tauhi hala.

ʼI te tohi ʼo Tagata Tānaki, neʼe ʼui e Salomone neʼe ‘faiga ia ke ina maʼu he ʼu palalau matalelei pea ke ina tohi te ʼu palalau totonu ʼo te moʼoni.’ (Tnk. 12:10) ʼE mahino mai, neʼe ina ʼiloʼi te ʼu kupu ʼaē ʼe fakaʼuhiga ki te “fafine ʼohoana,” mo te “fineʼaliki,” pea mo te “fafine kaugana,” koteʼuhi neʼe ina fakaʼaogaʼi ia te ʼu kupu ʼaia ʼi tana ʼu tohi ʼaē neʼe takitaki e te ʼAtua. (Taag. 5:18; 12:4; 18:22; Tnk. 9:9; Hiva 6:8, 9) Kae ʼi te koga tohi ʼo Tagata Tānaki 2:8, neʼe mole fakaʼaogaʼi te ʼu kupu ʼaia ʼaē neʼe kua māhani pē kiai te hahaʼi ʼo te temi ʼaia.

ʼO ʼuhiga mo te ʼu kupusiga palalau “he fafine, ʼeī he ʼu fafine,” ʼe tuʼa tahi pē tona fakaʼaogaʼi fēia ʼi te Tohi-Tapu ʼi te kupu Fakahepeleo. ʼE ʼui e te hahaʼi sivi Tohi-Tapu ʼe mole ʼiloʼi lelei tona fakaʼuhiga. Tokolahi te hahaʼi fakaliliu Tohi-Tapu ʼe natou fakaʼuhiga te kupusiga palalau ʼaia iā Tagata Tānaki 2:8 ki te hahaʼi fafine. ʼAki tona ʼui ʼuluaki ʼaē ‘te fafine’ pea toe ʼui leva ko ‘te ʼu fafine’ ʼe fia fakamaʼuhigaʼi ai tonatou tuʼulaga. Koia ko te kupusiga palalau “he fafine, ʼeī he ʼu fafine” ʼe fakaʼuhiga ki te faʼahi ʼaia.

ʼI te logona ʼaupitō ʼaē ʼo Salomone, neʼe aʼu tona logona ki te fineʼaliki ʼo te fenua koloaʼia ʼaē ko Sepa, pea neʼe haʼu ʼo vakaʼi te ʼu faʼahi ʼaia, pea neʼe ōfo ʼaupitō ʼi te ʼu meʼa ʼaē neʼe logo pea mo sio kiai. (1 Hau 10:1, 2) ʼE lagi ko he faʼahi ʼe feala ke fakaʼuhiga kiai te ʼu palalau ʼa Salomone ʼo ʼuhiga mo “he fafine, ʼeī he ʼu fafine.” Neʼe lagi talanoa ki te ʼu fafine lalahi ʼaē neʼe fetaulaki mo ia ʼi tona fale hau lolotoga te toe temi fualoa ʼaē neʼe kei ʼofa ai ia te ʼAtua kiā ia.