Tou Tuku Te Laumālie ʼo Te ʼAtua Ke Ina Taki Tātou, Kae Mole Ko Te Laumālie ʼo Te Mālamanei

“Neʼe mole tou maʼu te laumālie ʼo te mālamanei, kae ko te laumālie ʼaē ʼe haʼu mai te ʼAtua,ke feala hatatou ʼiloʼi te ʼu meʼa ʼaē neʼe lotolelei e te ʼAtua ke ina foaki mai.”—1 KO. 2:12.

1, 2. (a) Koteā te fakaʼuhiga ʼo te ʼui ʼaē ʼe kau te kau Kilisitiano ki te tau? (b) Ko te ʼu fehuʼi fea ʼaē kā tou vakaʼi anai?

 ʼE KAU te kau Kilisitiano moʼoni ki te tau. Ko totatou fili ʼe mālohi, mo aga fakakākā, pea mo faiva ʼi te tau. ʼE ina fakaʼaogaʼi tana mahafu ʼe mālohi ʼaupitō, koia lā ʼaē kua ina puleʼi ai ia te tokolahi ʼi te mālamanei. Kae ʼaua naʼa tou manatu ʼe mole tou lava tauʼi totatou fili peʼe mole feala hatatou mālo iā ia. (Isa. 41:10) ʼE ʼi ai totatou haofakiʼaga ʼe faigataʼa tona hūfi pea mo tona holoʼi.

² ʼE mole ko te tau ki te kakano ʼaē ʼe tou kau kiai, kae ʼe ko te tau fakalaumālie. Ko totatou fili ʼe ko Satana te Tēvolo, pea ko te mahafu tāfito ʼaē ʼe ina fakaʼaogaʼi, ʼe ko “te laumālie ʼo te mālamanei.” (1 Ko. 2:12) Ko tatatou mahafu ʼaē moʼo puipui ʼo tātou mai tana ʼu ʼohofi ʼe ko te laumālie ʼo te ʼAtua. Pea ke feala hatatou hao ʼi te tau ʼaia pea mo tou taupau maʼu ia tatatou ʼu felōgoi lelei ʼaē mo te ʼAtua, ʼe maʼua ke tou kole te laumālie ʼo te ʼAtua pea ʼe tonu ke ʼiloga te fua ʼo te laumālie ʼaia ʼi totatou maʼuli. (Kal. 5:22, 23) Kae koteā te laumālie ʼo te mālamanei, pea koteā ʼaē ʼe mālohi fēia ai ia tana fakahalaʼi te tokolahi ʼi te mālamanei? ʼE tou lava ʼiloʼi feafeaʼi peʼe takitaki tātou e te laumālie ʼo te mālamanei? Pea koteā ʼaē ʼe feala ke tou ako mai te faʼifaʼitaki ʼa Sesu ʼo ʼuhiga mo te maʼu ʼo te laumālie ʼo te ʼAtua, pea mo tou tauʼi ia te laumālie ʼo te mālamanei?

Koteā ʼAē ʼe Tupu Ai Te Mafola Mālohi Fēia ʼo Te Laumālie ʼo Te Mālamanei?

 3. Koteā te laumālie ʼo te mālamanei?

³ Ko te matapuna ʼo te laumālie ʼo te mālamanei ʼe ko Satana, “te pule ʼo te mālamanei,” pea ʼe fakafeagai ia ki te laumālie māʼoniʼoni ʼo te ʼAtua. (Soa. 12:31; 14:30; 1 Soa. 5:19) Ko te laumālie ʼo te mālamanei ʼe ko te faʼahiga manatu ʼaē ʼe mafola ʼaupitō ʼi te hahaʼi ʼo te mālama ʼaenī, pea ʼe ina uga te hahaʼi ke natou fai he ʼu faʼahiga aga kehekehe. Ko te faʼahiga manatu mālohi ʼaia ʼe ina uga te hahaʼi ke natou fakafeagai ki te finegalo pea mo te fakatuʼutuʼu ʼa te ʼAtua.

4, 5. Neʼe feafeaʼi te mafola ʼo te laumālie ʼaē ʼe haʼu mai ia Satana ki te mālamanei?

⁴ Neʼe mālohi feafeaʼi te mafola ʼo te laumālie ʼaē ʼe haʼu mai ia Satana ki te mālamanei? ʼI te kamata, neʼe kākāʼi e Satana ia Eva ʼi te ʼōloto ʼo Eteni. Neʼe ina fakalotoʼi ia ia ke tui ʼe maʼuli fiafia anai mo kapau ʼe maʼuli faʼifaʼitaliha mai te ʼAtua. (Sen. 3:13) Neʼe ko he loi ʼaia ʼa Satana! (Soa. 8:44) Neʼe ina kākāʼi te fafine ke feala ai hana fakahalaʼi ia Atama ke  talagataʼa mo ia ki te ʼAtua. ʼAki te talagataʼa ʼaia ʼa Atama, neʼe pōpula ai leva te mālamanei ki te agahala, koia ʼaē ʼe maʼu ai e te hahaʼi ʼo te mālama ʼaenī ia te laumālie talagataʼa ʼo Satana.—Lau ia Efesi 2:1-3.

⁵ Neʼe toe fakaneke e Satana mo te ʼu ʼāselo ʼe tokolahi, ʼaē neʼe liliu ko te ʼu temonio. (Fakh. 12:3, 4) Ko te talagataʼa ʼaia ki te ʼAtua, neʼe hoko ʼi muʼa ʼo te tō ʼo te Tulivio ʼi te temi ʼo Noe. Neʼe tui ia te ʼu ʼāselo ʼaia ʼe lelei age kiā nātou hanatou liʼaki tonatou ʼu pilivilēsio ʼaē ʼi selō, kae ke natou hifo mai ki te kele ʼo fakahoko faʼifaʼitaliha ai ia tonatou ʼu holi heʼeʼaoga. (Suta 6) Ko te kau temonio ʼaia, ʼaē kua natou toe liliu ki selō, ʼe natou gāue tahi mo Satana moʼo “fakahēʼi ia te kele kātoa.” (Fakh. 12:9) Kae ko te meʼa ʼaē ʼe fakaʼofaʼofa, heʼe ʼi te mālama ʼaenī tokolahi te hahaʼi ʼe mole natou mahino ki te ʼu fakahala ʼaē ʼe fai e te kau temonio.—2 Ko. 4:4.

ʼE Takitaki Koa Koutou e Te Laumālie ʼo Te Mālamanei?

 6. Koteā ʼaē ʼe hoki feala ai ki te laumālie ʼo te mālamanei ke ina fakahalaʼi tātou?

⁶ Tokolahi ʼe mole natou mahino ki te ʼu fakahala ʼaē ʼe fai e Satana ki te hahaʼi, kae neʼe ako e te kau Kilisitiano moʼoni ʼaki te Tohi-Tapu peʼe feafeaʼi tana fakahoko ia te faʼahi ʼaia. (2 Ko. 2:11) ʼI tona fakahagatonu, ʼe hoki feala ki te laumālie ʼo te mālamanei ke ina fakahalaʼi tātou mo kapau ʼe tou tuku ke ina takitaki tātou. Tou vakaʼi age muʼa te ʼu fehuʼi e fā kā tokoni mai ke tou ʼiloʼi peʼe takitaki tātou e te laumālie ʼo te ʼAtua, peʼe ko te laumālie ʼo te mālamanei.

 7. Koteā ʼaē ʼe fai e Satana ʼi tana faigaʼi ʼaē ke ina fakamamaʼo tātou mai ia Sehova?

⁷ Koteā ʼaē ʼe au fakahā ʼo ʼuhiga mo au ʼi te ʼu fakafiafia ʼaē ʼe au filifili? (Lau ia Sake 3:14-18.) ʼE faigaʼi e Satana ke ina fakamamaʼo tātou mai te ʼAtua ʼaki hana haga ʼo fakahalaʼi tātou ke tou manako ki te agamālohi. ʼE ʼiloʼi e te Tēvolo ko Sehova ʼe fehiʼa ki he tahi ʼe manako ki te agamālohi. (Pes. 11:5) Koia, ʼe faigaʼi ai e Satana ʼaki te ʼu tohi, mo te ʼu ʼata, mo te musika, pea mo te ʼu gaoʼi viteo, ke ina uga totatou ʼu holi fakasino, pea ko ʼihi gaoʼi viteo ʼe natou uga nātou ʼaē ʼe gaoʼi ki he ʼu aga heʼeʼaoga fakalialia pea mo te agamālohi. ʼE fiafia tuʼumaʼu pē ia Satana mokā ʼe ina fakatokagaʼi ʼe falele totatou loto ki te ʼu meʼa ʼaē ʼe kovi, tatau aipē peʼe kei tou manako ki te meʼa ʼaē ʼe lelei.—Pes. 97:10.

8, 9. Koteā te ʼu fehuʼi ʼe tonu ke tou fai kiā tātou ʼo ʼuhiga mo te ʼu fakafiafia?

⁸ ʼI te tahi faʼahi, ko nātou ʼaē ʼe takitaki e te laumālie ʼo te ʼAtua ʼe uga nātou ke natou agamaʼa, mo tokalelei, pea mo manavaʼofa. ʼE lelei ke tou fai kiā tātou te fehuʼi ʼaenī: ‘Ko te fakafiafia ʼaē ʼe au filifili ʼe ina fakalotomālohiʼi koa au ke au fakatuputupu he ʼu kalitātē?’ Ko te poto ʼaē mai ʼoluga ʼe “mole mālualoi” ia. Ko nātou ʼaē ʼe takitaki e te laumālie ʼo te ʼAtua ʼe mole natou fakamafola ki te hahaʼi ia te agamaʼa pea mo te tokalelei, pea ʼi tonatou loto fale ʼe fia sisio leva e nātou ki te agamālohi pea mo te ʼu aga heʼeʼaoga.

⁹ ʼE fakamaʼua e Sehova ke tou tauhi ʼāteaina age pē kiā te ia. Kae ko Satana ia, ohagē ko tana faiga ʼaē ke tulolo age Sesu ʼi ʼona muʼa, ʼe toe fiafia pē anai ia mo kapau ʼe tou fai age pē kiā te ia te faʼahi ʼaia. (Luka 4:7, 8) ʼE feala ke tou fai te ʼu fehuʼi ʼaenī kiā tātou totonu pē: ‘ ʼE tokoni mai koa te ʼu fakafiafia ʼaē ʼe au filifili ke au tauhi ʼāteaina pē ki te ʼAtua? ʼE faigataʼa anai koa kiā au taku tauʼi ia te laumālie ʼo te mālamanei ʼaki te ʼu meʼa ʼaē ʼe au filifili peʼe faigafua anai koa kiā au te faʼahi ʼaia? ʼE tonu anai koa ke au fetogi te ʼu fakafiafia ʼaē ʼe au filifili?’

10, 11. (a) ʼO ʼuhiga mo te ʼu koloa, koteā te aga ʼaē ʼe fakanekeneke e te laumālie ʼo te mālamanei ke maʼu e te hahaʼi? (b) Koteā te aga ʼaē ʼe fakalotomālohi e te Folafola ʼaē neʼe tohi ʼaki te laumālie ʼo te ʼAtua?

¹⁰ ʼE feafeaʼi taku aga ʼo ʼuhiga mo te ʼu koloa fakamālama? (Lau ia Luka 18:24-30.) ʼE pipiki ia “te holi ʼo te ʼu mata” ki te laumālie ʼo te mālamanei, ʼaē ʼe ina fakaneke ki te fialahi pea mo te fia maʼu koloa. (1 Soa. 2:16) ʼE ina fakatuputupu ʼi te loto ʼo te tokolahi ia te fia maʼu koloa. (1 Tim. 6:9, 10) ʼE haga anai te laumālie ʼaia ʼo uga tātou ke tou manatu ʼe lelei ke tou tānaki hotatou ʼu tuʼuga koloa, ke feala ai hatatou maʼuli fīmālie ʼo talu ai. (Taag. 18:11) Kae kapau ʼe lahi age totatou ʼofa ʼaē ki te paʼaga ʼi totatou ʼofa ʼaē ki te ʼAtua, pea ʼe mālo anai ia Satana iā tātou. ʼE lelei ke tou fai te fehuʼi ʼaenī kiā tātou totonu pē: ‘Kua au tokaga tāfito pē koa au ʼi toku maʼuli ki te kumi ʼo te ʼu koloa fakamālama pea mo te ʼu fakafiafia?’

¹¹ Kae ko te Folafola ʼaē neʼe tohi ʼaki te laumālie ʼo te ʼAtua, ʼe ina fakalotomālohiʼi tātou ke tou maʼu he manatu fakapotopoto ʼo ʼuhiga mo te paʼaga, pea ke tou gāue kinakina ki te ʼu meʼa ʼaē ʼe ʼaoga kiā tātou pea mo totatou fāmili. (1 Tim. 5:8) Ko nātou ʼaē ʼe natou maʼu te laumālie ʼo te ʼAtua, ʼe tokoni kiā nātou ia te laumālie ʼaia ke natou faʼifaʼitakiʼi te loto  foaki ʼo Sehova. ʼE ʼiloa te hahaʼi ʼaia ʼe ko ni hahaʼi loto foaki, kae mole ko ni hahaʼi ʼe natou fakatalitali pē ke foaki age hanatou ʼu meʼa. ʼE maʼuhiga age kiā nātou ia te hahaʼi kae mole ko te ʼu koloa fakamālama, pea ʼe natou fiafia ʼi te vaevae te ʼu meʼa ʼaē ʼe natou maʼu, ʼo tahi mulimuli pē ki tona fealagia. (Taag. 3:27, 28) Pea ʼe mole natou fakamuʼamuʼa ʼi he temi te kumi koloa ʼi tanatou tauhi ʼaē ki te ʼAtua.

12, 13. ʼO mole hagē ko te laumālie ʼo te mālamanei, ʼe feafeaʼi te haga ʼa te laumālie ʼo te ʼAtua ʼo takitaki tātou ke fua lelei kiā tātou?

¹² ʼO ʼai te laumālie ʼaē ʼe hā ʼi toku ʼuluagaaga? (Lau ia Kolose 3:8-10, 13.) Ko te laumālie ʼo te mālamanei ʼe ina uga te hahaʼi ke natou fai te ʼu gāue ʼo te kakano. (Kal. 5:19-21) ʼI te temi ʼaē ʼe lelei ai totatou maʼuli, ʼe mole tou ʼiloʼi lelei peʼe ko te laumālie ʼo ʼai ʼaē ʼe ina takitaki tātou, kae ʼe hoki tou ʼiloʼi te faʼahi ʼaia mokā hoko he ʼu fihifihia, ohagē lā mo kapau ʼe mole tokagaʼi tātou e he tehina peʼe ko he tuagaʼane, peʼe agakovi mai ia kiā tātou, peʼe kapau ʼe agahala mai kiā tātou. Tahi ʼaē meʼa, ʼe feala ʼi totatou loto fale ke hā lelei ai peʼe ko te laumālie fea ʼaē ʼe ina takitaki tātou. ʼE lagi lelei ki te faʼahi ʼaia ke tou vakavakaʼi muʼa ia tātou takitokotahi. Tou fai kiā tātou ia te fehuʼi ʼaenī: ‘ ʼI te ʼu māhina ʼaenī e ono kua hili, kua lahilahi age koa te ʼu kalitātē Fakakilisitiano ʼaē neʼe au fakatuputupu ʼi toku maʼuli, peʼe kua au toe fai pē au taku ʼu faʼahiga palalau pea mo taku ʼu aga māhani ʼaē ʼe kovi?’

¹³ Ko te laumālie ʼo te ʼAtua ʼe lava tokoni mai ke tou “toʼo kehe . . . [te] ʼuluagaaga ʼāfea mo ʼana gāue” pea ke tou kofuʼi “te ʼuluagaaga foʼou.” ʼE ko he faʼahi ʼe tokoni mai anai ke tou fakatuputupu iā tātou ia totatou ʼofa pea mo tatatou agalelei. ʼE faigafua anai kiā tātou ia tatatou fefakamolemoleʼaki, tatau aipē peʼe lagi matatonu te ʼu ʼaluʼaga ʼaē ʼe tou meo kiai. ʼE mole tou toe tali anai ki te ʼu aga heʼe faitotonu ʼaē ʼe feala ke fai mai, ʼaki ‘te lotokovi, mo te hauhau, mo te kalaga, pea mo te lea kovi.’ Kae ʼe tou faiga anai ke tou liliu “ ʼo fonu ʼi te manavaʼofa.”—Efe. 4:31, 32.

14. Koteā te manatu ʼa te tokolahi ʼi te mālamanei ʼo ʼuhiga mo te Folafola ʼa te ʼAtua?

¹⁴ ʼE au fakaʼapaʼapa koa pea mo manako ki te ʼu lēkula ʼa te ʼAtua ʼo ʼuhiga mo te aga ʼaē ʼe tonu ke fai? (Lau ia Tāʼaga Lea 3:5, 6.) ʼE hā ʼi te laumālie ʼo te mālamanei ia te agatuʼu ki te Folafola ʼa te ʼAtua. Ko nātou ʼaē ʼe mulimuli ki te laumālie ʼaia ʼe natou meʼa noaʼi te ʼu pelesepeto Fakatohi-tapu ʼaē ʼe mole natou leleiʼia, heʼe natou leleiʼia age nātou te ʼu talatisio pea mo te ʼu filosofia fakatagata. (2 Tim. 4:3, 4) Ko ʼihi ʼe mole natou tali te Folafola kātoa ʼa te ʼAtua. Ko nātou ʼaia ʼe mole natou faʼa tui ki te ʼaoga pea mo te moʼoni ʼaē ʼo te Tohi-Tapu, ʼo natou fakaʼuhiga pē ia nātou totonu ʼe natou popoto. ʼE natou manukiʼi tana ʼu lēkula maʼa ʼaē ʼe tauteaʼi ia te tono, mo te fai tagata, pea mo te māvete. ʼE natou akoʼi “ko te meʼa ʼaē ʼe lelei ʼe kovi pea ko te meʼa ʼaē ʼe kovi ʼe lelei.” (Isa. 5:20) ʼE tou toe maʼu koa mo tātou ia te taʼi faʼahiga manatu ʼaenī? Kā tou tau mo he ʼu fihifihia, ʼe tou falala koa ki te poto ʼo te tagata, pea mo tātou totonu pē? Peʼe tou faiga tātou ke tou mulimuli ki te tokoni ʼa te Tohi-Tapu?

15. Koteā ʼaē ʼe tonu ke tou fai, kae ʼaua naʼa tou falala ki totatou poto fakatagata ?

¹⁵ Ko te laumālie ʼo te ʼAtua ʼe ina fakatupu iā tātou te fakaʼapaʼapa ʼaē ki te Tohi-Tapu. Ohagē ko te tagata fai pesalemo, ʼe hagē kiā tātou te folafola ʼa te ʼAtua ko he mālama taki ki totatou vaʼe, pea mo he mālama ki totatou ala. (Pes. 119:105) Tou falala kātoa ki te Folafola ʼa te ʼAtua ke tokoni mai ke tou ʼiloʼi te meʼa ʼaē ʼe lelei pea mo te meʼa ʼaē ʼe kovi, kae ʼaua tatatou falala ʼaē ki totatou poto fakatagata. ʼE mole gata pē anai ʼi tatatou ako ʼaē ke tou fakaʼapaʼapa ki te Tohi-Tapu kae ʼe tou toe manako anai ki te lao ʼa te ʼAtua.—Pes. 119:97.

Tou Ako Mai Te Faʼifaʼitaki ʼa Sesu

16. Koteā ʼaē ʼe tonu ke tou fai ke tou maʼu “te manatu ʼa Kilisito”?

¹⁶ Ke tou maʼu te laumālie ʼo te ʼAtua, ʼe tonu ke tuputupu iā tātou ia “te manatu ʼa Kilisito.” (1 Ko. 2:16) Ke tou maʼu “te faʼahiga manatu ʼaē neʼe maʼu e Kilisito Sesu,” ʼe tonu ke tou ʼiloʼi tana faʼahiga fakakaukau pea mo tana aga pea mo tou mulimuli ki ai. (Loma 15:5; 1 Pet. 2:21) Tou vakaʼi age muʼa he ʼu faʼahi ʼe feala ai ke tou faʼifaʼitakiʼi ia Sesu Kilisito.

17, 18. (a) Koteā ʼaē ʼe tou ako mai te faʼifaʼitaki ʼa Sesu ʼo ʼuhiga mo te faikole? (b) He koʼē ʼe tonu ke tou “haga kole”?

¹⁷ Tou faikole ke foaki mai te laumālie ʼo te ʼAtua. ʼI muʼa ʼo te hoko mai ʼaē kiā te ia he ʼu ʼahiʼahi, neʼe faikole Sesu ke tokoni age kiā te ia te laumālie ʼo te ʼAtua. (Luka 22:40, 41) Mo tātou foki lā, ʼe ʼaoga ke tou kole ki te ʼAtua ia tona laumālie māʼoniʼoni. ʼE foaki fakalahi e Sehova ia tona laumālie kiā nātou ʼaē ʼe natou kole age kiā te ia ʼaki te tui. (Luka 11:13) Neʼe ʼui fēnei e Sesu: “Kotou haga kole, pea ʼe foaki atu anai kiā koutou; kotou haga kumi, pea ʼe kotou maʼu anai; kotou haga fisifisi, pea ʼe ʼavahi atu anai kiā koutou. He ko  ʼaē ʼe ina kole ʼe foaki age ia kiā te ia, pea ko ʼaē ʼe ina kumi ʼe ina maʼu ia, pea ko ʼaē ʼe ina fisifisi ʼe ʼavahi anai ia kiā te ia.”—Mat. 7:7, 8.

¹⁸ Kā tou kole te laumālie pea mo te tokoni ʼa Sehova, ʼaua tatatou foimo tuku ia tatatou ʼu kolekole ʼaia. ʼE lagi ʼaoga ke tou faikole tuʼa lahi pea mole tonu ke tou faikole fakavilivili. ʼI ʼihi temi, ʼe mole foimo tali e Sehova te ʼu kole ʼaē ʼe fai age, heʼe ina tuku muʼa he fealagia kiā nātou ʼaia ʼe faikole age, ke natou fakahā ʼe maʼuhiga kiā nātou te ʼu faʼahi ʼaē ʼe natou kole age pea ʼe mālohi ia tanatou tui ʼaē kiā te ia. a

19. Koteā ʼaē neʼe fai tuʼumaʼu pē e Sesu, pea he koʼē ʼe tonu ke tou muliʼi tana faʼifaʼitaki?

¹⁹ Tou fakalogo kiā Sehova ʼaki he loto kātoa. Ko Sesu neʼe ina fai tuʼumaʼu pē te ʼu meʼa ʼaē ʼe lelei ki tana Tamai. ʼI te tahi lakaga, neʼe kehekehe te manatu ʼa Sesu pea mo te meʼa ʼaē neʼe loto kiai tana Tamai, ʼo ʼuhiga mo te tauʼi ʼaē ʼo te ʼaluʼaga kā hoko kiā te ia. Kae ʼaki he loto falala, neʼe ina ʼui fēnei ki tana Tamai: “Ke mole ko toku finegalo ʼaē ʼe tonu ke fai, kae ʼo koe ia.” (Luka 22:42) Kotou fai kiā koutou totonu ia te fehuʼi ʼaenī: ‘ ʼE au fakalogo koa ki te ʼAtua tatau aipē peʼe mole faigafua taku fai ʼo te faʼahi ʼaia?’ Ke feala hatatou maʼu te maʼuli, ʼe tonu ke tou fakalogo ki te ʼAtua. ʼE tonu ke kātoa tatatou fakalogo ʼaē kiā te ia, heʼe ko ia totatou Tupuʼaga, ko ia te Matapuna ʼo totatou maʼuli pea ʼe ko Ia ʼaē ʼe tokaga kiai. (Pes. 95:6, 7) ʼE mole feala ke fetogi te fakalogo ʼaki he tahi age aga. ʼE mole feala ke ʼofa te ʼAtua kiā tātou mokā ʼe mole tou fakalogo kiā te ia.

20. Koteā ʼaē neʼe tokaga tāfito kiai Sesu ʼi tana maʼuli ʼaē ʼi te kele, pea ʼe tou lava mulimuli feafeaʼi ki tana faʼifaʼitaki?

²⁰ Tou ʼiloʼi lelei ia te Tohi-Tapu. ʼI te temi ʼaē neʼe fakafeagai ai Sesu ki te haga ʼaē ʼa Satana ʼo tauʼi fakahagatonu ia tana tui, neʼe ina fakaʼaogaʼi te ʼu vaega Fakatohi-tapu. (Luka 4:1-13) ʼI te temi ʼaē neʼe fihi ai mo te kau takitaki lotu ʼaē neʼe fakafeagai kiā te ia, neʼe fakaʼaogaʼi e Sesu te Folafola ʼa te ʼAtua moʼo fakatafito kiai tana ʼu tali. (Mat. 15:3-6) ʼI te maʼuli kātoa ʼo Sesu, neʼe ina ʼiloʼi te lao ʼa te ʼAtua pea mo ina fakahoko. (Mat. 5:17) Mo tātou foki ʼe tou toe fia fafaga tuʼumaʼu ia totatou ʼatamai ʼaki te Folafola ʼa te ʼAtua, ke mālohi ai tatatou tui. (Filp. 4:8, 9) ʼE lagi faigataʼa ki ʼihi iā tātou hanatou maʼu he temi moʼo fai ia tanatou ako takitokotahi, pea mo tanatou ako fakafāmili. Koia ʼe lagi mole tou faiga anai ke tou maʼu he temi ʼi tatatou polokalama, kae ʼe lagi tou faiga anai ke tou toʼo he temi ʼi tatatou ʼu gāue ʼaē ʼe mole faʼa maʼuhiga moʼo fai tatatou ako takitokotahi pea mo tatatou ako fakafāmili.—Efe. 5:15-17.

21. Ko te fakatuʼutuʼu fea ʼaē ʼe feala ke tou fakaʼaogaʼi moʼo tokoni kiā tātou ke tou fakatuputupu ia tatatou mahino ʼaē ki te Folafola ʼa te ʼAtua pea mo tou maʼuliʼi?

²¹ ʼE foaki mai e “te tagata kaugana agatonu mo  poto” te ʼu tokoni ke feala ai hatatou fakaʼaogaʼi he temi moʼo fai ia tatatou ako takitokotahi pea mo fakafāmili, ʼo ina fakatuʼutuʼu he afiafi ʼi te vāhaʼa fuli ke tou fai ai ia tatatou Tauhi Fakafāmili. (Mat. 24:45) ʼE kotou mulimuli fakalelei koa ki te fakatuʼutuʼu ʼaia? Moʼo tokoni atu ke kotou maʼu te manatu ʼa Kilisito, ʼe feala koa ʼi te ʼu lakaga fuli ʼaē ʼe kotou fai ai takotou ako, ke kotou vakaʼi te ʼu meʼa ʼaē neʼe akoʼi e Sesu ʼo ʼuhiga mo he manatu ʼe kotou fia ako? ʼE feala ke kotou fakaʼaogaʼi te tohi Index des publications de la Société Watch Tower moʼo kumi kiai he ʼu manatu ʼe kotou fia ako. Ohagē lā, talu mai te taʼu 2008 ki te taʼu 2010, neʼe tā ʼi te nusipepa ʼaenī ia te ʼu ʼalatike e 12 ko tonatou kupu tāfito ʼaenī: “Koteā ʼAē ʼe Tou Ako Mai Iā Sesu.” b ʼE lagi kotou fia fakaʼaogaʼi anai te ʼu ʼalatike ʼaia moʼo fai ʼaki takotou ako. Talu mai te taʼu 2006, neʼe tā ʼi te Réveillez-vous ! te ʼu ʼalatike ʼi te kupu tāfito ʼaenī: “Que répondriez-vous?” (ʼE Kotou Tali Feafeaʼi Anai?) Ko te ʼu ʼalatike ʼaia ʼaē ʼe hagē ko he kiʼi gaoʼi, neʼe fai moʼo tokoni mai kiā tātou ke tou fakatuputupu pea mo fakaloloto ia tatatou mahino ʼaē ki te Folafola ʼa te ʼAtua. ʼE lagi lelei anai hakotou vakaʼi ʼi ʼihi temi te ʼu ʼalatike ʼaia ʼi takotou Tauhi Fakafāmili.

ʼE Feala Ke Tou Mālo ʼi Te Mālamanei

22, 23. Koteā ʼaē ʼe tonu ke tou fai ke tou mālo ʼi te mālamanei?

²² Ke takitaki tātou e te laumālie ʼo te ʼAtua, ʼe tonu ke tou tekeʼi te laumālie ʼo te mālamanei. ʼE mole ko he meʼa faigafua ia te fai ʼo te faʼahi ʼaia. ʼE hagē pē ko hatatou kau ki he tau ʼe tou kinakina lahi ai. (Suta 3) Kae ʼe feala ke tou mālo! Neʼe ʼui fēnei e Sesu ki tana ʼu tisipulo: “ ʼI te mālamanei ʼe kotou maʼu te mamahi, kae ke kotou kātaki! Kua au mālo ʼi te mālamanei.”—Soa. 16:33.

²³ ʼE feala mo tātou ke tou mālo ʼi te mālamanei mo kapau ʼe tou tekeʼi tona laumālie, pea mo tou fai ia meʼa fuli pē ʼe tou lavaʼi ke feala ai hatatou maʼu te laumālie ʼo te ʼAtua. ʼE mahino ia, “kapau ʼe kau te ʼAtua mo tātou, pea ko ai ʼaē kā fakafeagai mai kiā tātou?” (Loma 8:31) ʼI tatatou maʼu ia te laumālie ʼo te ʼAtua pea mo tou mulimuli ki tana takitaki ohagē ko tona tuʼu ʼi te Tohi-Tapu, ʼe tou maʼu ai anai ia te fīmālie, mo te tokalelei, mo te fiafia, pea ʼe feala ai anai ke tou maʼuli ʼo heʼegata ʼi te mālama foʼou ʼaē kua vave fakatuʼu ʼi te kele.

[ʼU nota]

ʼE Kei Kotou Manatuʼi Koa?

• He koʼē kua mafola mālohi fēia te laumālie ʼo te mālamanei?

• Koteā te ʼu fehuʼi e fā ʼaē ʼe tonu ke tou fai kiā tātou totonu?

• ʼO ʼuhiga mo te maʼu ʼo te laumālie ʼo te ʼAtua, koteā te ʼu faʼahi e tolu e tou ako mai iā Sesu?

[ʼU fehuʼi ʼo te ako]

[Paki ʼo te pasina 12]

Koteā ʼaē neʼe tupu ai te liliu ʼa ʼihi ʼāselo ko he ʼu temonio?

[Paki ʼo te pasina 15]

ʼE fakaʼaogaʼi e Satana te laumālie ʼo te mālamanei moʼo puleʼi te hahaʼi, kae ʼe feala hatatou ʼāteaina mai tana takitaki