Tou Ako Mai Te Folafola ʼa Te ʼAtua

Ko Ai Ia Sesu Kilisito?

ʼE lagaʼi ʼi te ʼalatike ʼaenī te ʼu fehuʼi neʼe lagi kua kotou ʼosi fai pea mo te ʼu vaega ʼi takotou Tohi-Tapu ʼaē ʼe feala ke kotou maʼu ai te ʼu tali. ʼE fiafia anai te kau Fakamoʼoni ʼa Sehova ʼi te fai palalau mo koutou ki te ʼu fehuʼi ʼaenī.

1. Ko ai ia Sesu Kilisito?

ʼI muʼa ʼo te tupu tagata ʼa Sesu ʼi te kele, neʼe ko ia tokotahi pē neʼe maʼuli ʼi selō ko he laumālie. (Soane 8:23) Neʼe ko te ʼuluaki fakatupu ʼaia ʼa te ʼAtua, pea neʼe tokoni ki te fakatupu ʼo te tahi age ʼu meʼa. ʼE ko ia tokotahi pē ʼaē neʼe fakatupu tokotahi e Sehova pea neʼe fakahigoaʼi ai ia ia ko te ʼAlo “ ʼulu tokotahi.” Neʼe liliu ia Sesu ko he ʼAve Folafola ʼa te ʼAtua, koia neʼe fakahigoaʼi ai ia ia ko “te Folafola.”—Soane 1:1-3, 14; lau ia Tāʼaga Lea 8:22, 23, 30; Kolose 1:15, 16.

2. He koʼē neʼe haʼu ia Sesu ki te kele?

Neʼe fekauʼi mai e te ʼAtua ia tona ʼAlo ki te kele, ʼo ina tuku ifo ia tona maʼuli ki te ʼalo ʼo te tāupoʼou Sutea ko Malia. Koia ʼaē neʼe mole tupu ai Sesu ʼi te kele mai he tagata. (Luka 1:30-35) Neʼe haʼu ia Sesu ki te kele (1) moʼo akoʼi te moʼoni ʼo ʼuhiga mo te ʼAtua, (2) moʼo fakahā mai peʼe feafeaʼi te fakahoko ʼo te finegalo ʼo te ʼAtua, pea (3) moʼo foaki tona maʼuli haohaoa ko he “totogi.”—Lau ia Mateo 20:28; Soane 18:37.

3. He koʼē ʼe ʼaoga kiā tātou he totogi?

Moʼo fakaʼāteaina he tahi ʼe nofo pōpula, ʼe tonu ke foaki hona totogi. Neʼe mole fakatuʼutuʼu e te ʼAtua ʼi te kamata ke mātutuʼa te hahaʼi pea mo mamate. ʼE tou ʼiloʼi feafeaʼi te faʼahi ʼaia? Neʼe ʼui age e te ʼAtua kiā Atama, te ʼuluaki tagata, kapau ʼe ina fai te aga ʼaē ʼe fakahigoaʼi ʼi te Tohi-Tapu ko te agahala, pea ʼe mate anai ia. Kanapau lā neʼe mole agahala ia Atama, kanaʼaua lā neʼe mole mate ia. Tatau aipē pe neʼe heʼeki aʼu te maʼuli ʼo Atama ki te fakaʼosi ʼo te ʼu taʼu e 1 000, kae ʼi te ʼaho pē ʼaē neʼe talagataʼa ai ki te ʼAtua neʼe mate ai pē ia. (Senesi 2:16, 17; 5:5) Neʼe tuku holo e Atama ki tona hōloga kātoa te agahala pea mo te tūʼā ʼaē ko te mate. Koia ʼaki ia Atama “neʼe hū” te mate ki te mālamanei. Ko te tupuʼaga lā ʼaia ʼo te ʼaoga ʼaē kiā tātou ʼo he totogi.—Lau ia Loma 5:12; 6:23.

  4. He koʼē neʼe mate ia Sesu?

Ko ai ʼaē neʼe feala ke ina foaki te totogi moʼo fakaʼāteainaʼi tātou mai te mate? ʼI te temi ʼaē ʼe tou mamate ai, ʼe kua tou totogi ia tatatou ʼu agahala ʼo tātou takitokotahi. Neʼe mole feala ki he tagata agahala ke ina totogi te ʼu agahala ʼa te hahaʼi.—Lau ia Pesalemo 49:7-9.

Mai tona ʼaluʼaga ʼaē neʼe hao ia Sesu mai te agahala he neʼe mole tupu ia mai he tagata, koia ʼaē ʼe mole fakaʼuhiga ai tana mate he neʼe ina fai he ʼu agahala, kae neʼe mate ia maʼa te ʼu agahala ʼa te hahaʼi. Neʼe fekauʼi mai e te ʼAtua ia tona ʼAlo ki te kele ke mate maʼa tātou, ko te fakahā ʼaia ʼo Tona ʼofa fakatalakitupua ki te mālamanei. Neʼe toe fakahā e Sesu ia tona ʼofa ʼaē kiā tātou, ʼi tana fakalogo ʼaē ki tana Tamai pea mo ina foaki tona maʼuli moʼo totogi tatatou ʼu agahala.—Lau ia Soane 3:16; Loma 5:18, 19.

5. Koteā ʼaē ʼe fai e Sesu ʼi te temi ʼaenī?

ʼAki tana haga ʼaē ʼo fakamālōlō te kau mahaki, mo fakatuʼuake te kau mate, pea mo tokoni ki te hahaʼi ʼaē neʼe ʼi te faigataʼaʼia, neʼe fakahā e Sesu te ʼu gāue ʼaē kā ina fai anai maʼa te hahaʼi fakalogo fuli. (Luka 18:35-42; Soane 5:28, 29) ʼI te ʼosi mate ʼa Sesu, neʼe toe fakatuʼuake ia ia e te ʼAtua ko he laumālie. (1 Petelo 3:18) Neʼe fakatalitali ai leva ia Sesu ʼi te toʼo mataʼu ʼo te ʼAtua, ʼo aʼu ki te temi ʼaē neʼe foaki age e Sehova kiā te ia, te mālohi ʼaē ke pule ko he Hau ki te kele kātoa. (Hepeleo 10:12, 13) ʼE lolotoga pule nei ia Sesu ko te Hau ʼi selō, pea ʼi te kele ʼe lolotoga tala nei e tana ʼu tisipulo ia te logo lelei ʼi te mālamanei kātoa.—Lau ia Taniela 7:13, 14; Mateo 24:14.

Kua vave pē anai te gāue ʼa Sesu ʼi tona tuʼulaga Hau moʼo pulihi ia te mamahi fuli pē pea mo nātou ʼaē ʼe natou fakamamahiʼi te hahaʼi. Ko te ʼu toko lauʼi miliona hahaʼi ʼaē ʼe natou tui kiā Sesu pea mo fakalogo kiā te ia, ʼe natou māʼuʼuli anai ʼi te palatiso ʼi te kele.—Lau ia Pesalemo 37:9-11.

Kapau ʼe kotou fia maʼu he tahi ʼu fakamahino, vakaʼi te kāpite 4 ʼo te tohi ʼaenī, Koteā ʼAē ʼe Akoʼi Moʼoni Mai ʼi Te Tohi-Tapu? neʼe tā e te kau Fakamoʼoni ʼa Sehova.

[Paki ʼo te pasina 11]

Ko te ʼu toko lauʼi miliona hahaʼi ʼaē ʼe natou tui kiā Sesu pea mo fakalogo kiā te ia, ʼe natou māʼuʼuli anai ʼi te palatiso ʼi te kele