Ko He Lea Fakapolofetā ʼe Maʼuhiga ʼAupitō

“Ko te logo lelei ʼaenī ʼo te puleʼaga ʼe fakamafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.”—MATEO 24:14.

KO TE ʼu hahaʼi sivi Tohi-Tapu ʼe natou ʼui ʼe maʼuhiga ʼaupitō te vaega ʼaia. ʼE maʼuhiga he ko te gāue ʼaia kua fakahoko ʼi te mālamanei kātoa. Pea ʼe maʼuhiga he ko te vaega ʼaia ʼe ina fakahā te gāue ʼaē ʼe tonu ke fai e te kau Kilisitiano, ʼaē ko te gāue fai fakamafola ʼe hoko fakatomuʼa pea ʼe ina tala te temi maʼuhiga ʼaupitō kua ovi mai, te temi ʼaia ʼaē neʼe fakahigoaʼi e Sesu ko “te fakaʼosi.”

Ko te lea fakapolofetā ʼaia ʼe lolotoga hoko nei ʼi totatou temi. ʼE ʼi ai tokotou pikipikiga ki te lea fakapolofetā ʼaia heʼe ko te logo lelei ʼe ko he fakaafe pea mo he fakatokaga kiā koutou. Ko te logo ʼaia ʼe ina tuku atu kiā koutou ke kotou filifili: Peʼe kotou tali lelei te Puleʼaga ʼo te ʼAtua peʼe kotou fakafeagai kiai. Ko te tonu ʼaē kā kotou fai ʼe maʼuhiga ʼaupitō ki tokotou maʼuli.

Tou vakaʼi muʼa te ʼu vaega ʼaē ʼi muʼa atu. ʼI te ʼu ʼaho ʼi muʼa ʼo te mate ʼo Sesu, neʼe ʼolo age te kau tisipulo kiā ia pea mo fehuʼi age ki ai ʼo ʼuhiga mo te kā haʼu. Neʼe natou fia ʼiloʼi ʼo ʼuhiga mo te fakatuʼu ʼo te Puleʼaga ʼo te ʼAtua, ʼaē neʼe palalau tuʼumaʼu age kiai ia Sesu. Neʼe natou toe fia ʼiloʼi foki ʼo ʼuhiga mo “te fakaʼosi ʼo te tuʼu ʼo te ʼu faʼahiga meʼa ʼaenī,” ʼaē ʼe fakaliliu e ʼihi Tohi-Tapu: “Ko te fakaosi o te malama-nei.”—Mateo 24:3, Tauhi Foou.

Moʼo tali kiai neʼe fakakikite ia Sesu ʼe hoko anai ki te mālamanei kātoa ia te ʼu tau, te ʼu hoge, te ʼu tai mahaki pea mo te ʼu mafuike lahi. Neʼe ina toe ʼui foki ʼe ʼāsili age anai te maumauʼi ʼo te lao, pea ʼe fakahēʼi anai e te kau fai akonaki hala ia te tokolahi, pea ko te kau Kilisitiano moʼoni ʼe fehiʼaʼinaʼi anai ia nātou pea mo fakatagaʼi iā nātou. Ko te ʼu meʼa fuli ʼaia ʼe ko he ʼu logo kovi.—Mateo 24:4-13; Luka 21:11.

Kae neʼe toe i ai foki te ʼu logo lelei. Neʼe talanoa ia Sesu ki te ʼu palalau ʼaē neʼe tohi ʼi te kamata, neʼe punamaʼuli te hahaʼi ki te ʼu palalau ʼaia pea neʼe fakaʼamu te tagata ki he ʼamanaki talu mai lolotoga ni ʼu sēkulō. Tatau aipē peʼe ʼui e te hahaʼi te maʼuhiga ʼo te ʼu palalau ʼa Sesu, kae ʼe mole natou manatu tahi ki te fakaʼuhiga ʼo te ʼu palalau ʼaia? Koteā te ʼuhiga moʼoni ʼo te logo lelei ʼaia? Koteā ia te Puleʼaga ʼo te ʼAtua? Ko te temi fea ʼaē neʼe fakahoko ia lea fakapolofetā ʼaia pea ko ai ʼaē ʼe ina fakahoko? Pea koteā “te fakaʼosi”? Tou vakaʼi age muʼa te ʼu faʼahi ʼaia.

[Paki ʼo te pasina 2, 3]

 Ko he toe hiki ʼo te ʼu evaselio e fā ʼo te tohi the washington manuscript. ʼe fakaʼiloga keheʼi ia mateo 24:14.

[Haʼuʼaga ʼo te paki]

From the book Facsimile of the Washington Manuscript of the Four Gospels in the Freer Collection 1912