Ko Te ʼAtua Koa ʼAē Neʼe Ina Fakatupu Te Tēvolo?
ʼE Fia ʼIloʼi e Te Kau Lautohi . . .
Ko Te ʼAtua Koa ʼAē Neʼe Ina Fakatupu Te Tēvolo?
▪ ʼE manatu e ʼihi neʼe lagi ko te ʼAtua ʼaē neʼe ina fakatupu ia te Tēvolo heʼe ʼui ʼi te Tohi-Tapu ʼe ko te ʼAtua ʼaē “neʼe ina fakatupu ia meʼa fuli.” (Efesi 3:9; Fakahā 4:11) ʼE fakahā mai ʼi te Tohi-Tapu neʼe mole ko te ʼAtua ʼaē neʼe ina fakatupu ia te Tēvolo.
Neʼe fakatupu e Sehova te ʼāselo ʼaē neʼe liliu ki muli age ko te Tēvolo. Koia, ko te ʼāselo ʼaia ʼaē neʼe fakatupu e te ʼAtua, ʼe ʼalutahi mo te ʼui ʼaē ʼi te Tohi-Tapu ʼe ko Sehova te Tupuʼaga, pea ʼe ko te ʼāselo ʼaia neʼe fakafeagai lahi ki te ʼAtua ki muli age. Pea ʼo ʼuhiga mo Sehova, ʼe ʼui fēnei: “ ʼE haohaoa tana gāue, heʼe ko tona ʼu ala fuli ʼe faitotonu. ʼAtua ʼo te agatonu, ʼaē ʼe mole iā te ia te heʼe faitotonu; ʼe faitotonu ia pea mo totonu.” (Teutalonome 32:3-5) ʼI te ʼu palalau ʼaenī, ʼe tou mahino ai ko Satana, ʼi te kamata, neʼe haohaoa pea mo faitotonu, neʼe kau ia ʼi te ʼu ʼāselo ʼa te ʼAtua, ʼaē ko tona ʼu foha. Iā Soane 8:44, neʼe ʼui e Sesu ko te Tēvolo “neʼe mole haga nofo ia ʼi te moʼoni,” ko tona fakaʼuhiga ʼi te kamata, neʼe ʼi te moʼoni ia Satana pea neʼe mole he hala iā te ia.
Kae ohagē pē ko te ʼu meʼa maʼuli popoto fuli ʼaē neʼe fakatupu e Sehova, ko te ʼāselo ʼaē neʼe liliu ki muli age ko Satana, neʼe feala pē ke ina filifili te meʼa ʼaē ʼe lelei peʼe ko te meʼa ʼaē ʼe kovi. ʼI tana filifili ʼaē ke fakafeagai ki te ʼAtua pea mo uga te ʼuluaki taumātuʼa ke nā lagolago ʼaē mo nāua ki tana agatuʼu, neʼe ina fakaliliu pē ia ia totonu ko Satana, ko tona ʼuhiga ʼe “Fakafeagai” ki te ʼAtua.—Senesi 3:1-5.
Neʼe toe haga pē ia te ʼāselo agakovi ʼaia ʼo fakaliliu ia ia totonu ko Tēvolo, ko tona fakaʼuhiga ʼe “Fasituʼu” ki te ʼAtua. Ko Satana ʼaē neʼe ina fakapalalauʼi ia te gata pea mo fai te ʼu palalau fakakākā moʼo fakanekeneke ia Eva ke talagataʼa ki te lao ʼaē neʼe fakahā lelei age e te Tupuʼaga kiā ia. Koia lā ʼaia neʼe fakahigoaʼi ai e Sesu ia Satana ʼe “ko te tamai ʼo te loi.”—Soane 8:44.
Kae ʼe lava feafeaʼi ki he ʼāselo ʼe haohaoa, ʼaē ʼe mole hona ʼu vaivaiʼaga pea mole maʼuli ʼi te lotolotoiga ʼo he ʼu meʼa ʼe kovi, ke liliu ʼo agakovi? ʼE mahino ia, neʼe holi ia ke fai age te tauhi ʼaē neʼe fai ʼāteaina pē ki te ʼAtua, pea neʼe ina fakatokagaʼi te fealagia ʼaē ke fakalogo mai te hahaʼi ki tana takitaki kae mole natou fakalogo ki te takitaki ʼa Sehova. ʼI tana haga ʼaē ʼo taupau maʼu ia tana holi ʼaē ke pule ki te mālamanei kae mole ina haga ʼo tekeʼi, neʼe ina haga aipē ʼo fafaga ʼo aʼu ki te temi ʼaē neʼe ina fakahoko ai leva tana agakovi. ʼE fakamatalatala ʼi te tohi ʼa Sake te ʼu ʼaluʼaga fuli ʼaē ʼe iku ki te agahala: “ ʼE ʼahiʼahiʼi te tagata takitokotahi mokā ina tuku ia ia ke taki pea mo kākāʼi e tana holi ʼa ia totonu. Pea ko te holi, kā fakatupu, pea ʼe ina fānauʼi te agahala.”—Sake 1:14, 15; 1 Timoteo 3:6.
Tou toʼo te faʼifaʼitaki: Kotou fakakaukauʼi he tagata ʼe gāue ʼi he fale paʼaga ʼe ina maʼu te faigamālie ʼaē ke ina kaihaʼa te falā. ʼE feala ke ina tekeʼi fakavilivili ia te manatu kovi ʼaia. Kae kapau ʼe ina taupau pē te manatu ʼaia ʼi tona ʼatamai, ʼe ina leleiʼia anai te manatu ʼaia, pea ʼe mahino ia ʼe ina fakahoko anai ki muli age. Kapau ʼe ina kaihaʼa te falā, pea ʼi tona fakahagatonu, ʼe ko ia totonu pē ʼaē neʼe ina fakaliliu ia ia ko he tagata kaihaʼa. Kapau ʼe loi ʼe mole ko ia ʼaē neʼe ina kaihaʼa te falā ʼaia, pea ʼe toe liliu ko he tagata gutuloi. ʼO toe fēia pē, ʼi tana haga ʼaē ʼo taupau te ʼu holi ʼe kovi pea mo ina fakahoko, ko te ʼāselo ʼaē neʼe fakatupu e te ʼAtua neʼe ina fakaʼaogaʼi tona loto faʼitaliha moʼo talagataʼa pea mo fakafeagai ki tana Tamai, ʼo ina fakaliliu ia ia totonu pē ko Satana te Tēvolo.
ʼE tou loto fiafia heʼe fakaʼauha anai ia Satana te Tēvolo ʼi te temi ʼaē kua fakakatofa kiai e te ʼAtua. (Loma 16:20) Kae ʼi muʼa ʼo te hoko mai ʼo te temi ʼaia, ʼe fakahā ki te kau ʼatolasio ʼa Sehova ʼAtua te ʼu fakahala ʼa Satana pea mo foaki kiā nātou he puipui ki tana ʼu aga fakakākā. (2 Kolonito 2:11; Efesi 6:11) Koia kotou faiga mālohi ke kotou “fakafeagai ki te Tēvolo, pea ʼe hola mamaʼo anai iā koutou.”—Sake 4:7.
[Fakamatala ʼo te pasina 32]
ʼI tana filifili ʼaē ke fakafeagai ki te ʼAtua, neʼe haga te ʼāselo haohaoa ʼo fakaliliu pē ia ia totonu ko Satana