Koteā Ia “Te Fakaʼosi”?
Koteā Ia “Te Fakaʼosi”?
“. . . pea hoko mai ai leva te fakaʼosi.”—MATEO 24:14.
MOLE heʼeki faʼa fualoa ko te tokolahi neʼe natou talanoa ʼo ʼuhiga mo te fakaʼosi ʼo te mālamanei ʼaki he ʼu tohi, mo he ʼu ʼata, pea mo he ʼu nusipepa. Pea ʼe natou fakamatala te ʼaho fakaʼosi ʼaki he ʼu ʼaluʼaga ʼe fakakata ʼo aʼu ai ki te fakaʼaogaʼi ʼo te poto fakatagata, kae ʼe ko he ʼu malaʼia ʼe hoko ʼi te fakamāu fakaʼosi. Ko te ʼu malaʼia ʼaia, ʼe ʼi ai te fakaʼauha ʼo te kele ʼaki he tau fakanukeleʼea, peʼe ko te feʼīʼaki ʼo te ʼu fetuʼu, te ʼu taʼi mahaki ʼe feala ai ke kotou mamate ai, peʼe ko te fetofetogi ʼo te agaaga ʼo te ʼaele ʼo te kele ʼe mole he poto moʼona tāʼofi, peʼe ko te ʼu hahaʼi ʼe natou ʼomai mai te tahi potu ʼo te lagi.”
ʼE mole manatu tahi ia te ʼu lotu; ʼe lahi te ʼu lotu ʼe natou ako ko te “fakaʼosi” ʼe pulihi anai ʼo talu ai ia te maʼuli fuapē ʼi te kele. Neʼe talanoa ia te tagata teolosia kiā Mateo 24:14, neʼe ina tohi fēnei ia te ʼu palalau fakamataku ʼaenī: “Ko te vaega ʼaenī ʼe ko he vaega ʼe maʼuhiga ʼi te ʼu folafola fuli ʼo te Folafola ʼa te ʼAtua . . . ʼE ʼamanaki hoko te fakaʼauha fakamataku ʼi te mālamanei kātoa kae ʼe tokolahi ʼi te taʼiake nei ʼe mole natou fia manatu ki te faʼahi ʼaia.”
ʼI te agamāhani, ko te taʼi ʼu manatu ʼaia ʼe mole natou tokagaʼi te manatu maʼuhiga ʼaenī: Ko Sehova ʼAtua “neʼe ina fakatuʼu ʼo mālohi” ia te kele; “neʼe mole ina fakatupu noa, [kae] neʼe ina faʼu ke nofoʼi.” (Isaia 45:18) ʼI te palalau ʼa Sesu ʼo ʼuhiga mo “te fakaʼosi,” ʼe mole fakaʼuhiga leva ʼe fakaʼauha anai ia te kele; pea neʼe mole ina ʼui ʼe fakaʼauha fuli anai te hahaʼi. Kae neʼe ina ʼui, ko te hahaʼi agakovi, ia nātou ʼaē ʼe natou logogataʼa ʼo fakafisi ki te takitaki ʼofa ʼa Sehova, ʼe ko nātou ʼaia kā fakaʼauha anai.
Tou toʼo he faʼifaʼitaki. ʼE ʼi ai tokotou ʼapi matalelei pea neʼe kotou fakagafua ki te ʼu hahaʼi ke natou māʼuʼuli ʼi ʼai kae mole natou totogi he meʼa. Ko ʼihi ʼo te hahaʼi ʼaia neʼe natou māʼuʼuli ʼi te tokalelei pea mo natou tokaga lelei ki tokotou ʼapi. Kae ko te tahi ʼu hahaʼi neʼe natou fakatupu te ʼu fihifihia, ʼo natou fekēʼaki pea mo natou gaohi koviʼi te hahaʼi ʼaē ʼe agalelei. Neʼe natou maumauʼi tokotou ʼapi pea neʼe mole natou fia fakalogo ki takotou ʼu faiga ʼaē ke fakagata ia te aga ʼaē ʼe kovi.
Koteā ʼaē kā kotou fai moʼo fakatokatoka ia te faʼahi ʼaia? ʼE kotou maumauʼi anai koa tokotou ʼapi? Kailoa ia. ʼE lagi kotou kapu anai te ʼu hahaʼi agakovi pea mo kotou toe faʼu ia te ʼu meʼa ʼaē neʼe maumau.
ʼE toe fai fēia pē anai mo Sehova. Neʼe ina takitaki te tagata fai pesalemo ke ina tohi fēnei: “ ʼE molehi anai te hahaʼi agakovi, kae ko nātou ʼaē ʼe falala kiā Sehova ʼe natou maʼu anai te kele. Pea kei toe he kiʼi temi siʼi pē, pea pulihi anai te tagata agakovi; pea ʼe mahino papau ia ʼe ke tokaga anai ki tona potu, ka kua puli anai ia. Kae ko te kau agavaivai ʼe nātou maʼu anai te kele, pea ʼe nātou fiafia moʼoni anai ʼi te mahu ʼo te tokalelei.”—Pesalemo 37:9-11.
Neʼe palalau ia te ʼapositolo ko Petelo ʼo ʼuhiga mo te ʼaluʼaga ʼaia. ʼAki te takitaki ʼa te ʼAtua neʼe ina tohi fēnei: “Neʼe ʼi ai te ʼu lagi ʼi te ʼu temi ʼāfea, pea mo he kele ʼe māʼopoʼopo lelei ʼe ʼasi mai te vai pea ʼe nofo ʼi te lotomālie ʼo te vai ʼaki te folafola ʼa te ʼAtua; pea ʼaki te ʼu meʼa ʼaia neʼe fakaʼauha ai te mālama ʼo te temi ʼaia, ʼi te temi ʼaē neʼe lōfia ai ʼi te vai.” (2 Petelo 3:5, 6) ʼI henī ko te ʼapositolo ʼe palalau ki te Tulivio ʼo te temi ʼo Noe. Ko te mālama ʼa te hahaʼi agahala ʼaē neʼe fakaʼauha kae neʼe mole ko te kele ia. Ko te Tulivio ʼaia ʼaē neʼe hoko ʼi te mālamanei kātoa neʼe “ko he faʼifaʼitakiʼaga ki te hahaʼi agakovi ʼo ʼuhiga mo te ʼu meʼa ʼaē kā hoko ki ʼamuli.”—2 Petelo 2:6.
Neʼe ina toe ʼui fēnei e Petelo: “Ko te ʼu lagi pea mo te kele ʼo te temi ʼaenī, kua tānaki maʼa te afi.” Kapau ʼe tou toʼo fakakoga te vaega ʼo tou fakagata pē ʼi henī, pea ʼe lagi tou maʼu anai he manatu ʼe hala. Kae ʼe tou fakatokagaʼi te hoko atu ʼo te vaega ʼaē ʼe ʼui fēnei ai: “Pea mo te fakaʼauha ʼo te hahaʼi aga heʼe lotu.” ʼE mole ko te fakaʼauha ʼo te kele kae ko te fakaʼauha ʼo te aga heʼe lotu. Koteā kā hoa mai leva kiai? Neʼe tohi fēnei e Petelo: “ ʼE tou talitali ki te ʼu lagi foʼou [te Puleʼaga Fakamēsia ʼo te ʼAtua] pea mo te kele foʼou [ko te hahaʼi agatonu] ʼaē ʼe tonu ke nofo ai te faitotonu.”—2 Petelo 3:7, 13.
Ko te ʼu lea fakapolofetā ʼe ina toe fakahā foki kua ovi mai te temi “fakaʼosi.” Kotou lau ia Mateo 24:3-14 mo 2 Timoteo 3:1-5 ke kotou sio ai ki te ʼu agaaga ʼe natou fakamoʼoni ki te faʼahi ʼaenī. *
ʼE mole faikehe koa lā kiā koutou ia te ʼu mahino kehekehe ʼo ʼuhiga mo Mateo 24:14, kae ko he vaega ʼe feala ke mahino lelei kiai he kiʼi tamasiʼi? ʼE ʼi ai tona tupuʼaga ʼo te faʼahi ʼaia. Ko Satana ʼe ina fakakiviʼi te hahaʼi ke ʼaua naʼa natou sisio ki te ʼu moʼoni taulekaleka ʼaē ʼe tou maʼu ʼi te Folafola ʼa te ʼAtua. (2 Kolonito 4:4) Pea tahi ʼaē meʼa, neʼe toe fufū e te ʼAtua tana ʼu fakatuʼutuʼu ki te hahaʼi fialahi kae neʼe ina fakahā kiā nātou ʼaē ʼe agavaivai. ʼO ʼuhiga mo te faʼahi ʼaia, neʼe ʼui fēnei e Sesu: “Tamai, ʼe au vikiviki kiā te koe iā muʼa ʼo te hahaʼi, ʼAliki ʼo te lagi mo te kele, koteʼuhi neʼe ke fufū te ʼu meʼa ʼaenī ki te kau popoto pea mo te hahaʼi ʼaē ʼe gāue fakaʼatamai, kā kua ke fakahā koe kiā nātou liliki.” (Mateo 11:25) ʼE ko he toe pilivilēsio hakita kau ʼi te hahaʼi agavaivai ʼaē ʼe natou mahino peʼe koteā ia te Puleʼaga ʼo te ʼAtua pea mo feala hakita mamata fakatomuʼa ki te ʼu tapuakina ʼaē kā foaki mai e te Puleʼaga ʼo te ʼAtua kiā nātou fuli ʼaē ʼe natou lagolago kiai!
[Nota]
^ Kapau ʼe kotou fia maʼu he tahi ʼu fakamatala, kotou vakaʼi te kāpite 9 ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? ʼaē neʼe tā e te kau Fakamoʼoni ʼa Sehova.
[Paki ʼo te pasina 9]
Ko te Puleʼaga ʼe ina fakagata anai te agakovi fuli pē ʼi te kele