Koteā Koa Ia Te Puleʼaga ʼo Te ʼAtua?

“Ko te logo lelei ʼaenī ʼo te puleʼaga . . . ”—MATEO 24:14.

ʼI TANA Akonaki ʼiloa ʼi te Moʼuga, neʼe foaki mai e Sesu ia te faikole ʼe ko he faʼifaʼitakiʼaga, ʼe ko te kole ʼaia ʼaē ʼe fai ki te ʼAtua: “Ke hoko mai tou puleʼaga.” ʼE kaugamālie ʼaupitō te hahaʼi ʼe natou ako fakaʼatamai te kole ʼaia pea mo natou lau liuliuga. Neʼe ʼui ʼi te tohi Encyclopedia, ʼe ko te “kole tāfito ʼaia ʼe fakaʼaogaʼi e te kau Kilisitiano fuli ki te tauhi pē e tahi.” Kae tokolahi te hahaʼi ʼe natou lau liuliuga te kole ʼaia ʼe mole natou faʼa mahino lelei peʼe koteā ia te Puleʼaga ʼaia peʼe koteā anai kā ina fai mokā hoko mai anai.—Mateo 6:9, 10.

ʼE mole tou punamaʼuli ki te faʼahi ʼaia. Ko te kau takitaki lotu ʼo te Keletiate ʼe mole ʼalutahi tanatou ʼu faʼahiga fakamahino ʼo ʼuhiga mo te Puleʼaga ʼo te ʼAtua, mo fakatupu maveuveu, pea mo tanatou ʼu faigataʼa. Neʼe tohi fēnei e te tagata ko te Puleʼaga ʼo te ʼAtua ʼe “ko he mālohi fakalaumālie, . . . ʼe ko he felōgoi loloto mo te ʼAtua . . . , ʼe ko he maʼuli mo te ʼAtua ʼaē ʼe maʼu haofaki ai ia te ʼu hahaʼi tagata mo fafine.” Ko te tahi tagata ʼe ina ʼui ko te evaselio ʼo te Puleʼaga ʼe hagē ko he “fakatotonu ʼo ʼuhiga mo te ʼēkelesia.” Pea ʼi te tohi Catechism of the Catholic Church ʼe ʼui fēnei ai: “Ko te puleʼaga ʼo te ʼAtua [ʼe] ko te faitotonu mo te tokalelei pea mo te fiafia ʼi te Laumālie Māʼoniʼoni.”

ʼE kotou maʼu anai he ʼu fakamahino ʼe mahino lelei age ʼi te pāsina 2 ʼi te nusipepa ʼaenī. ʼE tou lau ai: “Ko te Puleʼaga ʼo te ʼAtua, ʼe ko he Puleʼaga moʼoni ʼe i selō, kua ina vave pulihi anai ia te agakovi fuli pē pea mo ina fakaliliu anai ia te kele ko he palatiso.” Tou vakaʼi age muʼa peʼe lagolago feafeaʼi te Tohi-Tapu ki te ʼu fakamahino ʼaia.

Ko Te Kau Takitaki Ki Te Kele Kātoa ʼi Te Kā Haʼu

Ko he puleʼaga hau ʼe ko he puleʼaga ʼe takitaki e he hau. Ko te Hau ʼo te Puleʼaga ʼo te ʼAtua ʼe ko Sesu Kilisito ʼaē kua fakatuʼuake. Ko tona fakanofo hau ʼi selō neʼe fakamatala ʼi te meʼa neʼe hā age ki te polofetā ko Taniela, ʼaē neʼe ina tohi fēnei: “Neʼe au haga sioʼi te ʼu meʼa ʼaē neʼe hā ʼi te pōʼuli, pea koʼenī ʼaki te ʼu ʼao ʼo te lagi, neʼe haʼu te tahi ʼe hagē ko he foha ʼo he tagata [ko Sesu]; pea neʼe ʼalu ia ʼo aʼu ki te Matuʼa ʼo te ʼu ʼAho [ko Sehova ʼAtua], pea neʼe fakaovi ia ia kiā te Ia. Pea neʼe foaki kiā te ia te pule, pea mo te fakaʼaliʼaliki, pea mo te puleʼaga, koteʼuhi ke tauhi kiā te ia te hahaʼi, pea mo te ʼu fenua, pea mo te ʼu faʼahiga lea kehekehe. Ko tana pule ʼe ko he pule ia ʼe mole ʼiloʼi hona gataʼaga, ʼe mole tuku anai ia, pea ko tona puleʼaga ʼe mole fakaʼauha anai.”—Taniela 7:13, 14.

ʼE toe fakahā mai ʼi te Tohi-Tapu, ʼi te tohi ʼa Taniela ko te Puleʼaga ʼaia neʼe fakatuʼu mālohi e te ʼAtua, pea ko te Puleʼaga ʼaia kā ina pulihi anai ʼo talu ai ia te ʼu puleʼaga fakatagata fuli, pea ʼe mole feala anai ke puli ʼi he temi. ʼI te kāpite 2 ʼo te tohi ʼa Taniela ʼe fakamatala ia te moemisi ʼe haʼu mai te ʼAtua pea neʼe sio kiai ia te hau ʼo  Papiloni, ko te fakatātā lahi ʼe fakaʼuhiga ki te fakahoahoa ʼo te ʼu mālohi fakapuleʼaga ʼo te mālamanei. Neʼe fakahā e te polofetā ko Taniela ia te fakaʼuhiga ʼo te moemisi ʼaia. Neʼe ina tohi fēnei: “[ʼI] te temi fakaʼosi ʼo te ʼu ʼaho . . . ko te ʼAtua ʼo te lagi ʼe ina fakatuʼu anai he puleʼaga ʼe mole pulihi anai ʼi he temi. Pea ko te puleʼaga ʼaia ʼe mole tuku anai ki he tahi hahaʼi. ʼE ina laliki anai pea mo fakagata anai te ʼu puleʼaga fuli ʼaia, pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi hona gataʼaga.”—Taniela 2:28, 44

Ko te Haʼu ʼo te Puleʼaga ʼo te ʼAtua ʼe mole ina fakahoko tokotahi anai tana takitaki. Lolotoga tona minisitelio ʼi te kele, neʼe fakapapau age e Sehova ki tana ʼu tisipulo agatonu, ʼe natou kau anai mo ʼihi ki te fakatuʼuake ʼaē ki selō pea ʼe natou heheka ʼi he ʼu hekaʼaga fakahau. (Luka 22:28-30) Neʼe palalau ia Sesu ki he ʼu hekaʼaga fakahau fakatātā heʼe ohagē ko tona ʼui e Sesu ʼe tuʼu te Puleʼaga ʼi selō. Neʼe fakamatalatala ʼi te Tohi-Tapu ko te ʼu kaugā haʼu ʼaia ʼe natou ʼomai “mai te ʼu telepī kehekehe, mo te ʼu lea kehekehe, mo te ʼu hahaʼi kehekehe pea mo te ʼu puleʼaga kehekehe.” ʼE natou faʼufaʼu anai “he puleʼaga pea mo he ʼu pelepitelō maʼa totatou ʼAtua, pea ʼe natou pule fakahau anai ki te kele.”—Fakahā 5:9, 10.

He Koʼē Ko Te Logo ʼo ʼUhiga Mo Te Puleʼaga ʼe Ko He Logo Lelei?

ʼE tou fakatokagaʼi ko Kilisito Sesu ʼe pule anai ki te “hahaʼi [fuli], mo te ʼu puleʼaga [fuli] pea mo te ʼu lea [fuli]” pea ko nātou ʼaē ʼe kaugā haʼu mo ia ʼe natou “pule fakahau anai ki te kele.” Kae ko ai te ʼu hahaʼi fakalogo ʼo te Puleʼaga ʼaia? Ko nātou ʼaē neʼe natou tali ʼaki he manatu ʼe lelei ia te logo lelei ʼaē ʼe lolotoga fakamafola iā ʼaho nei. ʼI te hahaʼi fakalogo ʼaia, ʼe kau ai anai mo nātou ʼaē kā fakatuʼuake ki te maʼuli ʼi te kele pea mo natou ʼamanaki anai ke natou māʼuʼuli ʼo heʼegata.

ʼE fakamatala ʼi te Tohi-Tapu te ʼu tapuakina ʼe fakafiafia anai kiai ia te hahaʼi ʼaki te takitaki ʼa te Puleʼaga. Koʼenī te kiʼi vaega ʼo te ʼu tapuakina ʼaia:

“Neʼe ina fakagata te ʼu tau ʼo aʼu ki te potu taupotu ʼo te kele. ʼE ina fasifasiʼi te nahau pea mo maumauʼi te tao; ʼe ina tutu te ʼu sāliote ʼi te afi.”—Pesalemo 46:9.

“ ʼE mahino papau ia, ʼe natou laga anai ni ʼu fale pea ʼe natou nofoʼi anai; pea ʼe mahino papau ia ʼe natou tō anai he ʼu fuʼu vite pea mo natou kai anai tonatou ʼu fua. ʼE mole natou laga anai ke nofoʼi e he tahi kehe; pea ʼe mole natou tō anai ke kai e he tahi kehe.”—Isaia 65:21, 22.

‘Ko te ʼAtua ʼe ina holoholoʼi anai te ʼu loʼimata fuli pē ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.’—Fakahā 21:3, 4.

“ ʼI te temi ʼaia ʼe ava ai anai te ʼu mata ʼo te kau kivi, pea ʼe ava ai anai te ʼu taliga ʼo te kau tuli. ʼI te temi ʼaia ko te ketu ʼe kake anai ohagē he tia pea ko te ʼalelo ʼo te tagata ʼaē ʼe gutu mate ʼe kalaga fakafiafia anai.”—Isaia 35:5, 6.

“ ʼE hoko mai te hola ʼaē ko nātou fuli ʼaē ʼe nonofo ʼi te ʼu falemaka fakamanatu ʼe natou logo anai ki tona leʼo [ʼo Sesu] pea ʼe nātou hū mai anai ki tuʼa, ko nātou ʼaē neʼe natou fai te ʼu meʼa ʼe lelei, ki he fakatuʼuake ʼo te maʼuli.”—Soane 5:28, 29.

“Ko te kau agavaivai ʼe natou maʼu anai te kele, pea ʼe natou fiafia moʼoni anai ʼi te mahu ʼo te tokalelei.”—Pesalemo 37:11.

ʼE mahino papau ia ʼe ko he logo lelei! Pea tahi ʼaē meʼa, ʼe fakahā e te ʼu lea fakapolofetā ʼi te Tohi-Tapu kua ovi mai te temi ʼaē kā fakahoko ai e te Puleʼaga tana takitaki faitotonu ki te kele kātoa.