ʼU Fāmili Kilisitiano, ‘Kotou Nonofo ʼAlaʼala’

“Tou nonofo ʼalaʼala pea mo tou aga fakapotopoto.”—1 TES. 5:6.

1, 2. Koteā ʼaē ʼe fakamaʼua ki he fāmili ke natou fai ke fua lelei ai ia tanatou nonofo ʼalaʼala ʼaē ʼi te faʼahi fakalaumālie?

 ʼO ʼUHIGA mo “te ʼaho lahi pea mo fakamataku ʼo Sehova,” neʼe ʼui fēnei e te ʼapositolo ko Paulo ʼi tana tohi ki te kau Kilisitiano ʼo Tesalonika: “ ʼU tehina, ʼe mole kotou nofo ʼi te fakapōʼuli, ke maʼutokā koutou e te ʼaho ʼaia ohagē ko hana maʼutokā anai he kau kaihaʼa, koteʼuhi ko koutou fuli ko te ʼu foha ʼo te mālama pea mo te ʼu foha ʼo te ʼaho. ʼE mole tou kau ki te ʼu pōʼuli peʼe ki te fakapōʼuli gaogao.” Neʼe toe ʼui fēnei e Paulo: “ ʼAua naʼa tou momoe ohagē ko ʼihi, kae ke tou nonofo ʼalaʼala pea mo tou aga fakapotopoto.”—Soe. 2:31; 1 Tes. 5:4-6.

² Ko te tokoni ʼaē neʼe fai e te ʼapositolo ko Paulo ki te kau Tesalonika, ʼe ʼaoga tāfito ki te kau Kilisitiano ʼaē ʼe māʼuʼuli nei ʼi “te temi fakaʼosi.” (Tan. 12:4) ʼI te kua ovi mai ʼo te fakaʼosi ʼo te tuʼu agakovi ʼo te ʼu faʼahiga meʼa ʼaenī, ʼe faigaʼi e Satana ke ina fakahalaʼi he tokolahi ʼi te kau ʼatolasio moʼoni, ke natou liʼaki tanatou tauhi ʼaē ki te ʼAtua. Koia ʼaē ʼe lelei ai ke tou fakalogo ki te tokoni ʼa Paulo ʼaē ke tou nonofo tōkakaga ʼi te faʼahi fakalaumālie. Ke fua lelei te maʼuli ʼo he fāmili Kilisitiano ʼo ʼuhiga mo tanatou nonofo ʼalaʼala ʼaē ʼi te faʼahi fakalaumālie, ʼe maʼuhiga kiā nātou takitokotahi ʼo te fāmili ke natou fakahoko ia tonatou ʼu maʼua ʼaē neʼe fakatuʼutuʼu e te ʼAtua ʼi te Tohi-Tapu ke natou fai. Koteā te gāue ʼaē ʼe ʼaoga ke fai e te ʼu tagata ʼohoana, mo te ʼu fafine ʼohoana pea mo te kau tūpulaga moʼo tokoni ki tonatou fāmili ke natou “nonofo ʼalaʼala”?

ʼU Tagata ʼOhoana, Kotou Faʼifaʼitakiʼi “Te Tauhi Ovi Lelei”

 3. ʼO mulimuli ki te manatu ʼaē iā 1 Timoteo 5:8, koteā te gāue ʼaē ʼe fakamaʼua ki te tagata ʼohoana ʼi tona ʼuhiga pule ʼo tona loto fale?

³ ʼE ʼui fēnei ʼi te Tohi-Tapu: “Ko te pule ʼo te fafine, ko te tagata.” (1 Ko. 11:3) Koteā te gāue ʼaē ʼe fakamaʼua ki te tagata ke ina fai ʼi tona ʼuhiga pule ʼo tona loto fale? ʼE ʼui fēnei ʼi te Tohi-Tapu: “Kapau ʼe mole tokaga he tahi ki tona ʼu kāiga, kae tāfito ia nātou ʼo tona loto fale, ʼe kua fakafisi ia ki te tui pea ʼe kovi age ia ʼi he tagata ʼe mole tui.” (1 Tim. 5:8) ʼE mahino ia, ʼe tonu ki te tagata ke ina taupau ia te maʼuli fakasino ʼo tona fāmili. Kae kapau leva ʼe tonu ke tokoni ki tona fāmili ke natou nonofo ʼalaʼala ʼi te faʼahi fakalaumālie, pea ʼe mole gata pē anai tona maʼua ʼi tana tokaga ʼaē ki tona fāmili ʼi te faʼahi fakasino. ʼE tonu ke ina lagalaga ia tona loto fale ʼi te faʼahi fakalaumālie, ʼo tokoni kiā nātou fuli ʼo tona fāmili ke mālohi ia tanatou ʼu felōgoi ʼaē mo te ʼAtua. (Taag. 24:3, 4) ʼE ina lava fakahoko feafeaʼi ia te faʼahi ʼaia?

 4. Koteā ʼaē ʼe lava tokoni ki he tagata ke fua lelei ia tana lagalaga ʼaē ʼo tona loto fale ʼi te faʼahi fakalaumālie?

⁴ Kapau ʼe “ko te tagata ʼe pule ki tona ʼohoana ohagē pē foki ko Kilisito ʼe pule ki te kōkelekāsio,” pea ʼe tonu ki te tagata ʼohoana ke ina ako te faʼahiga takitaki ʼa Sesu ki te kōkelekāsio pea mo faʼifaʼitakiʼi. (Efe. 5:23) Tou vakaʼi age muʼa pe neʼe feafeaʼi te ʼu felōgoi ʼaē ʼa Sesu mo tana ʼu tisipulo. (Lau ia Soane 10:14, 15.) Koteā ʼaē kā tokoni ki he tagata ke fua lelei ia tana lagalaga ʼaē ʼo tona loto fale ʼi te faʼahi fakalaumālie? Ko te faʼahi ʼaenī: Ke ina ako te ʼu manatu ʼaē neʼe talanoa kiai ia Sesu pea mo ina fai ʼi tona ʼuhiga “tauhi ovi lelei,” pea ke “mulimuli lelei ki tona ʼu tapugā vaʼe.”—1 Pet. 2:21.

 5. Koteā ʼaē ʼe ʼiloʼi e te Tauhi Ovi Lelei ʼo ʼuhiga mo te kōkelekāsio?

⁵ Tou vakaʼi age muʼa peʼe koteā ʼaē ʼe lava ako e he pule fāmili mai te faʼifaʼitaki ʼa Kilisito. Tou toʼo he fakatā: ʼe fia fakaovi te faga ovi ki te tauhi ovi heʼe natou ʼiloʼi lelei tonatou tauhi ovi pea mo natou falala ki ai. ʼE ʼiloʼi lelei e te tauhi ovi te ʼu agaaga kehekehe ʼo tana faga ovi. ʼE natou ʼiloʼi pea mo fakalogo ki tona leʼo. Neʼe ʼui fēnei e Sesu: “ ʼE au ʼiloʼi taku faga ovi pea ko taku faga ovi ʼe natou ʼiloʼi au.” ʼE ina ʼiloʼi lelei ia te kōkelekāsio. Ko te kupu Fakakeleka ʼaē neʼe fakaliliu ʼaki te kupu “ ʼiloʼi” ʼe fakaʼuhiga ki te “ ʼiloʼi lelei ʼo he tahi.” ʼEī, ʼe ʼiloʼi lelei e te Tauhi Ovi Lelei ia tana faga ovi takitahi. ʼE ina  ʼiloʼi te ʼu meʼa ʼaē ʼe ʼaoga kiā nātou takitahi, mo tonatou ʼu vaivaiʼaga pea mo te ʼu faʼahi ʼaē ʼe natou mālolohi ai. ʼE mole puli ki totatou Faʼifaʼitakiʼaga ia he meʼa ʼo ʼuhiga mo tana faga ovi. Pea ko te faga ovi ʼe natou ʼiloʼi lelei ia tonatou tauhi ovi pea mo natou falala ki tana takitaki.

 6. ʼE lava faʼifaʼitakiʼi feafeaʼi e te ʼu tagata ʼohoana ia te Tauhi Ovi Lelei?

⁶ Ke liliu he tagata ʼohoana ko he tagata tauhi ovi lelei ohagē ko Kilisito ʼe tonu ke ina muliʼi ia tana faʼifaʼitaki. ʼE tonu ke ina faigaʼi ke ina ʼiloʼi lelei ia tona fāmili. ʼE feala koa ki he tagata ʼohoana ke ina ʼiloʼi lelei ia nātou fuli ʼaē ʼo tona fāmili? ʼE feala te faʼahi ʼaia, mo kapau ʼe felōgoi lelei mo nātou fuli ʼaē ʼo tona fāmili, mo tokaga ki te ʼu meʼa ʼaē ʼe ʼaoga kiā nātou, mo ina takitaki te ʼu gāue fakafāmili ʼi te faʼahi fakalaumālie pea mo fakasino. ʼE tonu foki ke ina toe manatuʼi tona fāmili mokā ina fai he ʼu tonu ohagē lā ko te ʼu tonu ʼo ʼuhiga mo te tauhi fakafāmili, mo te kau tuʼumaʼu ki te ʼu fono, mo te fai fakamafola, mo te ʼu temi mālōlō pea mo te ʼu temi fakafiafia. Kapau ko te tagata ʼohoana Kilisitiano ʼe ina fakahoko ia tona maʼua takitaki heʼe ina ʼiloʼi lelei te Folafola ʼa te ʼAtua pea mo ina toe ʼiloʼi lelei mo nātou ʼaē ʼe fakalogo ki tana takitaki, pea ʼe mahino ia ko tona fāmili ʼe natou falala anai ki tana takitaki, pea ʼe fiafia anai ia ʼi tana sio ki tona fāmili kātoa ʼe natou faifaitahi ʼi te tauhi moʼoni.

7, 8. ʼE lava faʼifaʼitakiʼi feafeaʼi e he tagata ʼohoana ia te Tauhi Ovi Lelei mokā ʼe ʼofa kiā nātou ʼaē ʼe tokaga ki ai?

⁷ Ko he tauhi ovi lelei, ʼe ina toe fakahā foki mo tona ʼofa ʼaē ki tana faga ovi. Kā tou ako te ʼu Evaselio ʼaē ʼe talanoa ai ki te maʼuli pea mo te minisitelio ʼo Sesu, ʼe tou loto fakafetaʼi ki te ʼofa ʼaē neʼe fakahā e Sesu ki tana ʼu tisipulo. Māʼiapē lā ‘mo tona nefesi neʼe ina sākilifisioʼi maʼa tana faga ovi.’ ʼE tonu mo te ʼu tagata ʼohoana ke natou faʼifaʼitakiʼi ia Sesu, ʼo natou ʼoʼofa kiā nātou ʼaē ʼe natou tōkakaga ki ai. Ko he tagata ʼohoana ʼe loto ke leleiʼia tuʼumaʼu ia ia e te ʼAtua, ʼe ʼofa anai ki tona hoa “ohagē ko te ʼofa ʼa Kilisito ki te kōkelekāsio,” kae mole ina fai fakafefeka anai tana pule ʼaē ki tona hoa. (Efe. 5:25) ʼE tonu ke hā ia tana agalelei pea mo tana loto tokaga ʼi tana ʼu palalau ʼaē ʼe ina fai ki tona hoa, heʼe tāu mo ia ke fakamaʼuhigaʼi.—1 Pet. 3:7.

⁸ Kā akoʼi e te pule fāmili ia tana fānau, ʼe tonu ke fakaʼapaʼapa lahi ki te ʼu pelesepeto ʼa te ʼAtua. Kae ʼe tonu ke ina fakahā ia tona ʼofa ki tana fānau. Kapau ʼe ʼaoga ke akonakiʼi nātou, pea ʼe tonu ke fai ʼaki te ʼofa. Ko ʼihi fānau ʼe mole natou mahino vave ki te meʼa ʼaē ʼe loto kiai tanatou ʼu mātuʼa ke natou fai. ʼI te temi leva ʼaia, ʼe tonu ki te tamai ke loto faʼa kātaki kiā nātou ʼaia. Kā muliʼi tuʼumaʼu te faʼifaʼitaki ʼa Sesu e te hahaʼi tagata, pea ʼe maʼu anai ʼi te ʼu taʼi loto fale ʼaia ia te maʼuli fīmālie pea mo te tokalelei. ʼE maʼu anai e tonatou ʼu fāmili ia te maʼuli fakalaumālie fīmālie ʼaē neʼe hivaʼi e te tagata fai pesalemo.—Lau ia Pesalemo 23:1-6.

 9. Ohagē ko te pāteliaka ko Noe, koteā te maʼua ʼaē ʼe tonu ke fakahoko e te ʼu tagata ʼohoana Kilisitiano, pea koteā ʼaē kā tokoni anai kiā nātou ke natou fakahoko lelei te faʼahi ʼaia?

⁹ Ko te tahi faʼifaʼitaki lelei ki te kau pule fāmili Kilisitiano neʼe ko Noe. Neʼe maʼuli ia te pāteliaka ko Noe ʼi te ʼu ʼaho fakaʼosi ʼo te mālama ʼo tona temi. Kae ko Sehova neʼe ina haofaki ia ia, “mo te toko fitu, ʼi [te temi ʼaē neʼe ina] fakatō [ai] te tulivio ki te mālama agahala.” (2 Pet. 2:5) Neʼe maʼua kiā Noe ke tokoni ki tona fāmili ke natou hao mai te Tulivio. ʼE toe fēia pē ki te ʼu pule fāmili Kilisitiano ʼaē ʼe māʼuʼuli nei ʼi te ʼu ʼaho fakamuli ʼaenī. (Mat. 24:37) Pea ʼe hoki feala hanatou tokoni ki ʼonatou fāmili mo kapau ʼe natou ako te faʼifaʼitaki ʼa te Tauhi Ovi Lelei pea mo natou tokaga ʼo muliʼi ia tana faʼifaʼitaki.

ʼU Fafine ʼOhoana, ‘Kotou Laga Ia Tokotou Loto Fale’

10. ʼE fakaʼuhiga feafeaʼi ia te fakalogo ʼaē ʼa he fafine ki tona ʼohoana?

¹⁰ Neʼe tohi fēnei e te ʼapositolo ko Paulo: “Ke fakalogo te ʼu fafine ki ʼonatou ʼohoana ohagē ko hanatou fakalogo ki te ʼAliki.” (Efe. 5:22) ʼE mole fakaʼuhiga leva ia te ʼu palalau ʼaenī, ʼe mole tāu ke fakaʼapaʼapaʼi ia te fafine. ʼI muʼa ʼo tana fakatupu te ʼuluaki fafine, ia Eva, neʼe ʼui fēnei e te ʼAtua moʼoni: “ ʼE mole lelei ke nofo tokotahi te tagata. ʼE au fai anai hona tokoni ke liliu ko hona fakakātoa.” (Sen. 2:18) Ko te gāue ʼaē ʼe fai e he “tokoni” pea mo he “fakakātoa,” ʼaē ko te lagolago ki tona ʼohoana mokā ina fakahoko ia tona ʼu maʼua fakafāmili, ʼe ko he gāue ia ʼe tāu ke fakaʼapaʼapaʼi.

11. ʼE feafeaʼi ki he fafine ʼe ina tuku he faʼifaʼitaki lelei hana ‘laga ia tona loto fale’?

¹¹ Ko he fafine ʼe ina tuku he faʼifaʼitaki lelei ʼe gāue ia ki te lelei ʼo tona loto fale. (Lau ia Tāʼaga Lea 14:1.) Ko te fafine poto ʼe fakaʼapaʼapa lahi ia ki te fakatuʼutuʼu ʼo ʼuhiga mo te tuʼulaga pule, kae ʼe mole hagē ia ko te fafine vale ʼaē ʼe mole  fakaʼapaʼapa ki te fakatuʼutuʼu ʼaia. Ko te fafine poto ʼe fakalogo ki tona ʼohoana kae mole logogataʼa ia pea mo faʼifaʼitaliha, ʼaē ko he ʼu aga ʼe maʼu ʼi te mālama ʼaenī. (Efe. 2:2) Ko he fafine vale, ʼe mole mataku ia ʼi te palalau kovi ʼo ʼuhiga mo tona ʼohoana, kae ko te fafine poto ʼe ina hikihiki age te fakaʼapaʼapa ʼaē ʼe maʼu e tana fānau pea mo ʼihi age ki tona ʼohoana. Ko te taʼi fafine ʼaia, ʼe mole ina haga ʼo fakamālaloʼi te tuʼulaga pule ʼo tona ʼohoana, ʼaki hana fakafihiʼi tuʼumaʼu peʼe ina fakakēʼi. ʼE toe tokaga foki te taʼi fafine ʼaia ke ina fakaʼaogaʼi fakalelei te falā ʼo te loto fale. Ko te fafine vale, ʼe lagi ina maumauʼi ia te ʼu lelei ʼo te loto fale ʼaē neʼe gāue kinakina kiai tona ʼohoana. Ko te fafine ʼaē ʼe tokoni ki tona ʼohoana ʼe mole fēia ia. ʼE lagolago ia ki tona ʼohoana ki te fakaʼaogaʼi lelei ʼaē ʼo tanā falā. ʼE hā ʼi te ʼu fakatuʼutuʼu ʼaē ʼe ina fai ia tana tokaga pea mo tana aga fakapotopoto ʼo ʼuhiga mo te falā. ʼE mole ina uga ia tona ʼohoana ke gāue fakalaka.

12. Koteā ʼaē ʼe lava fai e he fafine moʼo tokoni ki tona fāmili ke natou “nonofo ʼalaʼala”?

¹² Ko he fafine ʼe ina tuku he faʼifaʼitaki lelei, ʼe tokoni ki tona fāmili ke natou “nonofo ʼalaʼala” ʼaki tana lagolago ʼaē ki tona ʼohoana ki te akoʼi ʼo te fānau ʼi te faʼahi fakalaumālie. (Taag. 1:8) ʼE tokaga ia ʼo lagolago fakalelei ki te polokalama ʼo te Tauhi Fakafāmili. Tahi ʼaē, ʼe lagolago ki tona ʼohoana mokā tokoniʼi e tona ʼohoana tanā fānau pea mo akonakiʼi nātou. ʼE kehekehe ia mo te fafine ʼaē ʼe mole lagolago ki tona ʼohoana, pea ʼe tupu ʼaki ai te maʼuli mamahi ʼa te fānau ʼi te faʼahi fakasino pea mo te faʼahi fakalaumālie!

13. He koʼē ʼe maʼuhiga ke lagolago te fafine ki tona ʼohoana ʼi tana fakahoko ʼaē ʼo tana ʼu gāue Fakateokalatike?

¹³ Kā sio he fafine ʼe lagolago lelei ki tona ʼohoana, ʼe tokaga tona hoa ki te ʼu gāue ʼo te kōkelekāsio, koteā tana manatu ʼo ʼuhiga mo te faʼahi ʼaia? ʼE fiafia ʼaupitō ia! Peʼe ko tona ʼohoana ʼe ko he tagata faifekau fakaminisitelio, peʼe ko he tagata ʼāfea, peʼe lagi ko he tehina ʼe kau ʼi te Komitē Fakafelōgoi Mo Te Lōpitali peʼe ko te Komitē Laga Fale ʼo Te Fenua, ʼe fiafia aipē ia te fafine ki te ʼu pilivilēsio ʼaia ʼe fakahoko e tona ʼohoana. ʼE mahino ia, ʼe ko he ʼu toe sākilifisio anai kā ina fai ʼi tana ʼu palalau pea mo tana aga, mo kapau ʼe tonu ke lagolago ki tona ʼohoana. Kae ʼe ina ʼiloʼi ʼe ko he tokoni ke nonofo ʼalaʼala te fāmili kātoa ʼi te faʼahi fakalaumālie, ia te maʼumaʼua ʼaē ʼo tona ʼohoana ki te ʼu gāue Fakateokalatike.

14. (a) Koteā ʼaē ʼe feala ke liliu ko he meʼa faigataʼa ki he fafine ʼe lagolago lelei ki tona ʼohoana, pea koteā ʼaē kā tokoni ki ai ke ina fakahoko lelei te faʼahi ʼaia? (b) Koteā ʼaē ʼe lava fai e he fafine moʼo lagolago ki te maʼuli fīmālie ʼo tona fāmili?

¹⁴ ʼE feala ʼi ʼihi temi mokā ʼe fai ʼe te tagata he tonu ʼe mole leleiʼia e te fafine, ke faigataʼa kiā ia fafine hana lagolago ki ai. Kae tatau aipē mo te ʼu temi ʼaia, ʼe ina fakahā ai anai he “loto tokalelei mo malū” pea mo lagolago aipē ki te tonu ʼaē kua ina fai. (1 Pet. 3:4) Ko te fafine ʼohoana poto ʼe ina faigaʼi ke ina muliʼi te ʼu faʼifaʼitaki lelei ʼo te ʼu fafine ʼaē neʼe natou manavasiʼi ki te ʼAtua ʼi te temi muʼa, ohagē ko Sala, mo Lute, mo Apikaela pea mo te faʼē ʼa Sesu, ia Malia. (1 Pet. 3:5, 6) ʼE ina toe faʼifaʼitakiʼi mo te ʼu fafine kua matuʼatuʼa ʼo te temi nei ʼaē ʼe natou “fakaʼapaʼapa ki te ʼAtua.” (Tito 2:3, 4) ʼI tana ʼofa ʼaē ki tona ʼohoana pea mo fakaʼapaʼapa ki ai, ʼe tokoni ʼaupitō ai ia te fafine ʼaē ʼe ina tuku he faʼifaʼitaki lelei ki te fua lelei ʼo tonā maʼuli fakataumātuʼa pea mo te maʼuli fīmālie ʼo te fāmili kātoa. Ko tona loto fale ʼe ko he nofoʼaga fakatupu lotofīmālie pea mo tokalelei. ʼE liliu te taʼi fafine ʼohoana ʼaia ʼo maʼuhiga ʼaupitō ki te tagata ʼohoana ʼaē ʼe ʼofa pea mo gāue mālohi kiā Sehova!—Taag. 18:22.

ʼU Tūpulaga, ‘Kotou Haga Sio Ki Te ʼu Meʼa ʼAē ʼe Fakapulipuli’

15. ʼU tūpulaga, ʼe feafeaʼi hakotou lava gāue fakatahi mo ʼakotou mātuʼa ke feala ai anai he “nofo ʼalaʼala” ʼo tokotou fāmili?

¹⁵ ʼU tūpulaga, ʼe feafeaʼi hakotou lava gāue fakatahi mo ʼakotou mātuʼa ke ‘nofo ʼalaʼala’ ia tokotou fāmili ʼi te faʼahi fakalaumālie? Kotou fakakaukauʼi age muʼa te totogi ʼaē neʼe tuku e Sehova ʼi ʼokotou muʼa. Lagi ʼi takotou kei veliveli neʼe fakahā atu e takotou ʼu mātuʼa he ʼu pāki ʼe fakahāhā ai ia te faʼahiga maʼuli ʼaē kā maʼu anai ʼi te Palatiso. Pea ʼi takotou kua lahilahi ake leva, neʼe lagi natou fakaʼaogaʼi ia te Tohi-Tapu pea mo te ʼu tohi Fakakilisitiano moʼo tokoni atu ke kotou fakakaukauʼi peʼe feafeaʼi anai ia te maʼuli ʼaē ʼi te mālama foʼou. Kā kotou tōkakaga tuʼumaʼu ʼo gāue maʼa Sehova pea mo kotou fai he ʼu fakatuʼutuʼu ke ʼalutahi tokotou maʼuli mo takotou ʼu gāue ʼaia, pea ʼe tokoni atu anai te ʼu ʼaluʼaga ʼaia ke kotou “nonofo ʼalaʼala.”

16, 17. Koteā ʼaē ʼe feala ke fai e te kau tūpulaga ke lava lelei ai ia tanatou kau ki te lele ʼaē ki te maʼuli?

¹⁶ Ko te ʼapositolo ko Paulo ʼe ina fakatatau ia tatatou gāue ʼaē kiā Sehova ki he lele, pea ʼe ina fakatatau  ia te maʼuli heʼegata ki he totogi. Kotou fakamaʼuhigaʼi te ʼu palalau ʼa te ʼapositolo ko Paulo ʼaē iā 1 Kolonito 9:24. (Lau.) Kotou kau ki te lele ʼaē ki te maʼuli ʼaki te fakatuʼutuʼu mālohi ʼaē ke kotou mālo. Kotou filifili te ala ʼaē ʼe iku anai ki te totogi ʼaē ko te maʼuli heʼegata. Tokolahi neʼe mole kei natou taupau maʼu ia tanatou sio ʼaē ki te totogi, ʼuhi ko tanatou manako ʼaē ki te ʼu koloa fakamālama. ʼE mole ko he manatu fakapotopoto ia! Ko te fakatuʼutuʼu ʼaē ʼo tokita maʼuli ke kita maʼu ni ʼu koloa fakamālama, ʼe mole kita maʼu ai anai ia te fiafia moʼoni. ʼE fakatemi pē te ʼu meʼa ʼaē ʼe feala ke kita totogi ʼaki he falā. Kae kotou haga sio ki ‘te ʼu meʼa ʼaē ʼe fakapulipuli.’ Koteā tona tupuʼaga? Heʼe “ko te ʼu meʼa ʼaē ʼe . . . [fakapulipuli] ʼe heʼegata [ia].”—2 Ko. 4:18.

¹⁷ ʼE ko te ʼu tapuakina ʼo te Puleʼaga ia ‘te ʼu meʼa ʼaē ʼe fakapulipuli.’ Kotou fai he ʼu fakatuʼutuʼu ʼi tokotou maʼuli ke kotou maʼu te ʼu tapuakina ʼaia. Ko te fiafia moʼoni ʼe tupu mai takotou fakaʼaogaʼi tokotou maʼuli ki te tauhi ʼaē kiā Sehova. Ko te tauhi ʼaē ki te ʼAtua moʼoni ʼe kita maʼu ai te ʼu faigamālie ke kita fakahoko he ʼu fakatuʼutuʼu ʼe mole loaloaga te temi ʼaē moʼona fakahoko pea mo te ʼu fakatuʼutuʼu ʼe loaloaga age te temi ʼaē moʼona fakahoko. a ʼI takotou fai ʼaē ʼo he ʼu fakatuʼutuʼu fakalaumālie ʼe kotou lavaʼi, ʼe tokoni atu anai kiā koutou ke kotou tōkakaga tuʼumaʼu ki takotou tauhi ʼaē ki te ʼAtua ʼaki te manatu ʼaē ke kotou maʼu te totogi ʼo te maʼuli heʼegata.—1 Soa. 2:17.

18, 19. ʼE lava ʼiloʼi feafeaʼi e he tūpulaga peʼe ina maʼuliʼi ia te moʼoni?

¹⁸ ʼU tūpulaga, ko te ʼuluaki fakatuʼutuʼu ʼaē ki te ala ʼo te maʼuli, ke kotou fakatuputupu ia takotou ʼu felōgoi ʼaē mo Sehova. ʼE kotou fai koa ia te fakatuʼutuʼu ʼaia? Kotou fai ia te ʼu fehuʼi ʼaenī kiā koutou totonu pē: ‘ ʼE au mālohi koa ʼi te faʼahi fakalaumālie, peʼe ko taku kau ʼaē ʼi te ʼu gāue fakalaumālie ʼe fakalogo koa ki taku ʼu mātuʼa? ʼE au maʼuliʼi koa te ʼu kalitātē ʼaē ke leleiʼia ai au e te ʼAtua? ʼE au faiga koa ke au kau putuputu ki te ʼu gāue ʼaē ʼe pipiki ki te tauhi moʼoni, ohagē lā ko te faikole tuʼumaʼu, mo te ako, mo te kau ki te ʼu fono pea mo te fai fakamafola? ʼE au fakaovi koa ki te ʼAtua ʼo au taupau taku ʼu felōgoi ʼaē mo ia?’—Sake 4:8.

¹⁹ Kotou fakakaukauʼi age muʼa ia te faʼifaʼitaki ʼo Moisese. Logolā tana maʼuli fakalogo ʼi te fenua kehe mo tona ʼu agaʼi fenua, kae neʼe ina fili ke ʼatolasio kiā Sehova, ke mole fakaʼuhiga ia ia ko he tama ʼo te ʼofafine ʼo Falaone. (Lau ia Hepeleo 11:24-27.) ʼU tūpulaga Kilisitiano, ʼe tonu foki ke kotou toe fakatotonu ke kotou tauhi agatonu kiā Sehova. ʼI takotou fai ia te faʼahi ʼaia, ʼe kotou maʼu ai anai te fiafia moʼoni, mo he maʼuli ʼe lelei age ʼi te temi nei, pea mo te ʼamanaki ʼaē ke kotou “puke maʼu ia te maʼuli moʼoni.”—1 Tim. 6:19.

20. ʼI te lele ki te maʼuli, ko ai anai ʼaē kā ina maʼu te totogi?

²⁰ ʼI te ʼu gaoʼi ʼaē ʼo te temi muʼa, neʼe ko te tokotahi pē ʼaē neʼe mālo ʼi te lele. Kae ʼe mole fēia ia te lele ʼaē ki te maʼuli. ʼE ko te finegalo ʼo te ʼAtua “ke haofaki te faʼahiga tagata fuli pē, pea ke natou aʼu ki te ʼatamai mālama totonu ʼo te moʼoni.” (1 Tim. 2:3, 4) Tokolahi ʼi muʼa atu neʼe lava lelei tanatou lele, pea tokolahi kei natou lolotoga lele nei ʼi tokotou temi. (Hep. 12:1, 2) ʼE maʼu anai te totogi e nātou fuli ʼaē ʼe mole natou liʼaki ia tanatou lele ʼaē ki te maʼuli. Koia kotou fakatotonu ke kotou mālo!

21. Koteā ʼaē kā tou vakaʼi anai ʼi te ʼalatike kā hoa mai?

²¹ ʼE ‘hoko moʼoni anai te ʼaho lahi pea mo fakamataku ʼo Sehova.’ (Mala. 4:5) ʼOfa pē mokā hoko mai te ʼaho ʼaia ke ʼaua naʼa ina maʼu fakafokifā te ʼu fāmili Kilisitiano ʼaē neʼe maʼuli fakaʼauʼauganoa ʼi te faʼahi fakalaumālie. Koia ʼaē ʼe maʼuhiga ai kiā nātou fuli ʼaē ʼo te fāmili, ke natou fakahoko tonatou maʼua ʼaē ʼe tuʼu ʼi te Tohi-Tapu. Koteā he tahi age meʼa ʼe kotou lava fai ke feala ai hakotou nonofo tōkakaga pea mo mālolohi age ia takotou ʼu felōgoi ʼaē mo te ʼAtua? ʼE talanoa anai te ʼalatike ʼaē kā hoa mai kiā faʼahi e tolu ʼe malave ki te maʼuli fakalaumālie fīmālie ʼo te fāmili kātoa.

[Nota]

Koteā ʼAē Neʼe Kotou Ako?

• He koʼē ʼe maʼuhiga ki te ʼu fāmili Kilisitiano ke natou “nonofo ʼalaʼala”?

• ʼE lava faʼifaʼitakiʼi feafeaʼi e he tagata ʼohoana ia te Tauhi Ovi Lelei?

• Koteā ʼaē ʼe lava fai e he fafine ʼe ina tuku he faʼifaʼitaki lelei ke liliu ko he lagolago ki tona ʼohoana?

• Koteā ʼaē ʼe lava fai e te kau tūpulaga moʼo tokoni ki ʼonatou fāmili ke natou haga nonofo ʼalaʼala ʼi te faʼahi fakalaumālie?

[ʼU fehuʼi ʼo te ako]