ʼU Fāmili Kilisitiano, “Kotou Nonofo Teuteu”

“Kotou nonofo teuteu, heʼe ko te hola ʼaē ʼe mole kotou manatu kiai ʼaē ʼe haʼu ai te Foha ʼo te tagata.”—LUKA 12:40.

1, 2. He koʼē ʼe tonu ke tou mulimuli ki te fakatokaga ʼaē ʼa Sesu ke tou “nonofo ʼalaʼala”?

 “KĀ HAʼU anai te Foha ʼo te tagata ʼi tona kolōlia” pea mo ina vaeʼi “kehe . . . te hahaʼi,” ʼe kotou feafeaʼi anai pea mo tokotou fāmili? (Mat. 25:31, 32) Mai tona ʼaluʼaga ʼaē ʼe hoko mai anai te faʼahi ʼaia ʼi he hola ʼe mole tou manatu kiai, koia ʼe maʼuhiga ai ke tou mulimuli ki te fakatokaga ʼaē ʼa Sesu ke tou “nonofo teuteu”!—Luka 12:40.

² Neʼe tou vakaʼi ʼi te ʼalatike ʼaenī kua ʼosi atu, peʼe koteā ʼaē ʼe lava fai e nātou fuli ʼo he fāmili moʼo tokoni ki te fāmili kātoa ke natou nonofo ʼalaʼala ʼi te faʼahi fakalaumālie, ʼaki tanatou fakahoko fakalelei ia tonatou ʼu maʼua takitokotahi. Tou vakaʼi age muʼa ʼihi ʼaluʼaga ʼe feala ai ke tou lagolago ki te lelei ʼo te maʼuli fakalaumālie ʼo te fāmili.

Kotou Taupau He Mata ʼe “Lelei”

3, 4. (a) Koteā ʼaē ʼe tonu ke tōkakaga kiai te ʼu fāmili Kilisitiano? (b) Koteā te fakaʼuhiga ʼo te taupau maʼu ʼo he mata ʼe “lelei”?

³ Ke nonofo teuteu ia te ʼu fāmili ki te haʼu ʼa Kilisito, ʼe tonu ke natou tōkakaga naʼa natou maʼumaʼua fau ki he tahi age ʼu meʼa ʼi te ʼu gāue ʼaē ʼo te tauhi moʼoni. ʼE tonu ke natou tōkakaga naʼa liliu te ʼu fakafiafia ʼo maʼuhiga age kiā nātou. Mai tona ʼaluʼaga ʼaē kua lahi te ʼu fāmili kua tō ki te hele ʼo te mānumānu koloa, koia kotou fakatokagaʼi age muʼa pe neʼe koteā ʼaē neʼe ʼui e Sesu ʼo ʼuhiga mo te taupau ʼo he mata ʼe “lelei.” (Lau ia Mateo 6:22, 23.) Ohagē ko he mālama taki ʼe ina fakamālamaʼi ia totatou ala naʼa tou fetokaʼi, ko te meʼa ʼaē ʼe fakahū ki totatou ‘loto,’ ʼe lava tokoni mai ke ʼaua naʼa tou fai he ʼu tonu ʼe mole lelei, pea ke mole tou fai he aga ʼe kovi.—Efe. 1:18.

⁴ Ke sio lelei ia he mata, ʼe tonu ke lelei ia te mata ʼaia, pea ʼe tonu ke lava sio fakalelei ki te meʼa ʼaē ʼe ina lolotoga sioʼi. ʼE toe fēia mo te mata fakatātā ʼaē ʼe lelei, ʼe tonu ke kita tokaga pē ki he fakatuʼutuʼu e tahi. ʼE tou tuku kātoa totatou loto ki te ʼu gāue fakalaumālie, kae mole tou fakaʼaogaʼi totatou maʼuli ki te kumi ʼo te ʼu koloa fakamālama pea mo tokaga fau ki te maʼuli fakasino ʼo te fāmili. (Mat. 6:33) Ko tona fakaʼuhiga, ʼe tou maʼuli fakafeʼauga pē ʼaki te ʼu meʼa tāfito ʼaē kua tou maʼu, pea ʼe tou fakamuʼamuʼa ʼi totatou maʼuli ia tatatou tauhi ʼaē ki te ʼAtua.—Hep. 13:5.

 5. Neʼe fakahā feafeaʼi e te kiʼi finemui neʼe ko tana fakatuʼutuʼu tāfito ke pioniē?

⁵ ʼI ʼu fua lelei leva ʼe feala ke maʼu e te fānau mokā akoʼi nātou ke natou taupau he mata ʼe lelei! Kotou fakakaukauʼi age muʼa te faʼifaʼitaki ʼa te kiʼi finemui ʼi te fenua ʼo Etiopea. ʼI tana poto lelei ʼaē ʼi te ako, neʼe foaki age e te puleʼaga he paʼaga ke feala hana hoko atu ia tana ako. Kae ʼi tana tokaga tāfito ki te tauhi ʼaē kiā Sehova, neʼe fakafisi ia ki te tokoni paʼaga ʼaia. Mole faʼa fualoa kiai, neʼe fakaʼui age ki ai te gāue ko tona totogi ko te 350 000 tupu ʼi te māhina. Logolā te lelei ʼo te totogi ʼo te gāue ʼaia, heʼe kā fakatatau atu ki te ʼu totogi māhani ʼo te hahaʼi ʼo tona fenua, neʼe ko he toe totogi ia. Kae neʼe fakafisi ia ki te gāue heʼe ko te fakatuʼutuʼu tāfito ʼa te kiʼi finemui ke pioniē. Neʼe mole ʼaoga ke ina fakafelōgoi mo tana ʼu mātuʼa ke fakafisi ki te gāue ʼaia. Neʼe feafeaʼi tana ʼu mātuʼa ʼi tanā ʼiloʼi ia te meʼa ʼaē neʼe fai e tanā taʼahine? Neʼe lahi tanā fiafia ʼo ʼuhiga mo tanā taʼahine pea neʼe nā fakahā age ki ai!

6, 7. Ko te tuʼutāmaki fea ʼaē ʼe tonu ke tou ‘tōkakaga’ kiai?

⁶ Ko te ʼu palalau ʼa Sesu ʼaē ʼe tuʼu iā Mateo 6:22, 23 ʼe ko he fakatokaga ʼo ʼuhiga mo te loto mānumānu. ʼE fakaʼaogaʼi ʼi te Tohi-Tapu te ʼu kupusiga palalau ‘te mata ʼe lelei’ pea mo te ‘mata ʼe agakovi.’ Ko he ‘mata ʼe agakovi’ ʼe mānumānu  ia. (Mat. 6:23) Koteā te manatu ʼa Sehova ʼo ʼuhiga mo te loto mānumānu? ʼE ʼui fēnei ʼi te Tohi-Tapu: “Ko te fai folonikāsio, mo te aga heʼemaʼa ʼi tona ʼu faʼahiga agaaga fuli pē, pea mo te mānumānu, ʼe mole tonu pe lā ke fai he talanoa kiai iā koutou.”—Efe. 5:3.

⁷ ʼE lagi faigafua hakita fakatokagaʼi te vaivaiʼaga ʼaia ʼi niʼihi kae ʼe mole faigafua hakita fakatokagaʼi te loto mānumānu iā kita totonu. Koia, ʼe tou aga fakapotopoto mokā tou tokagaʼi te tokoni ʼaenī ʼa Sesu: “Ke kotou tōkakaga pea ke kotou puipui ia koutou mai te ʼu faʼahiga mānumānu kehekehe.” (Luka 12:15) Tou faigaʼi ke tou sivisivi ia kita totonu peʼe koteā ʼaē ʼe holi kiai totatou loto. ʼE tonu ki te ʼu fāmili Kilisitiano ke natou vakavakaʼi fakalelei te temi pea mo te falā ʼaē ʼe natou fakaʼaogaʼi ki te ʼu fakafiafia, mo te ʼu temi mālōlō, pea mo tanatou tōkakaga ʼaē ki te kumi ʼo te ʼu koloa.

 8. ʼI te temi ʼaē ʼe tou totogi ai he meʼa, koteā ae ʼe tonu ke tou tōkakaga kiai?

⁸ ʼI muʼa ʼo hakotou totogi he meʼa, ʼe lahi te ʼu faʼahi ʼi tuʼa atu ʼo tona totogi ʼe tonu ke kotou fakakaukauʼi. Ohagē lā, kotou vakaʼi age muʼa te ʼu fehuʼi ʼaenī: ‘ ʼE au maʼu anai koa he temi ke au fakaʼaogaʼi tuʼumaʼu ai pea mo tokaga kiai? Ko temi anai ʼe fia kā au ako ai ke au poto ʼi tona fakaʼaogaʼi?’ ʼU tūpulaga, ʼaua takotou hoko tui ki te ʼu talanoa fuli ʼaē ʼe fai ʼi te mālamanei ʼo ʼuhiga mo te maʼu koloa, ʼo kotou holi ai ki ni ʼu mutuʼi meʼa peʼe ko he ʼu meʼa gaoʼi ʼe totogi kovi fau. Kotou maʼu he loto lolomi. Kotou toe fakakaukauʼi age muʼa, peʼe feala anai koa ki tokotou fāmili ʼaki te ʼu koloa ʼaia ke natou nonofo teuteu ki te haʼu ʼaē ʼo te Foha ʼo te tagata. Kotou haga tui ki te fakapapau ʼaenī ʼa Sehova: “ ʼE mole au tuku anai koe, kailoa ʼe mole au liʼaki anai koe!”—Hep. 13:5.

Kotou Fai He ʼu Fakatuʼutuʼu Fakalaumālie

 9. ʼE feala ke tokoni feafeaʼi ia te fai ʼo he ʼu fakatuʼutuʼu fakalaumālie ki he fāmili?

⁹ Ko te tahi puleʼaki kiā nātou ʼaē ʼo te fāmili moʼo fakamālohi tanatou tui pea mo lagolago ki te lelei ʼo te maʼuli fakalaumālie ʼo te fāmili kātoa, ʼe ko tanatou fai he ʼu fakatuʼutuʼu fakalaumālie pea mo natou fakahoko. Ko te fai ʼo te faʼahi ʼaia, ʼe lava tokoni ki te ʼu fāmili ke natou ʼiloʼi peʼe lelei tanatou fakahoko ia tanatou tauhi ʼaē kiā Sehova, pea mo fakafealagia kiā natou ke natou fakafuafua te ʼu gāue ʼaē ʼe tonu ke maʼuhiga ʼi tonatou maʼuli.—Lau ia Filipe 1:10.

10, 11. Ko te ʼu fakatuʼutuʼu fea ʼaē ʼe kotou lolotoga fai nei mo tokotou fāmili, pea koteā he tahi age ʼu fakatuʼutuʼu ʼe lagi kotou loto anai ke kotou fai?

¹⁰ Tatau aipē peʼe ko he ʼu kiʼi fakatuʼutuʼu ʼaē ʼe lava fakahoko e nātou fuli ʼaē ʼo te fāmili, kae ʼe feala aipē ke natou maʼu hona ʼu fua lelei. Ohagē lā, ko te fakatuʼutuʼu ʼaē ke natou fai palalau ki te koga tohi ʼo te ʼaho fuli. Ko te ʼu tali ʼaē ʼe fai e nātou ʼo te fāmili, ʼe feala ai ki te pule fāmili ke ina ʼiloʼi peʼe feafeaʼi te lahi ʼo tonatou ʼofa ʼaē kiā Sehova pea mo te moʼoni. Ko te fakatuʼutuʼu ʼaē ʼo ʼuhiga mo te lau fakafāmili tuʼumaʼu ʼo te Tohi-Tapu, ʼe ko he faigamālie ʼaia ki te fānau moʼo hikihiki ia tanatou lautohi pea mo tanatou mahino ʼaē ki te ʼu manatu Fakatohi-tapu. (Pes. 1:1, 2) Pea ʼe lagi lelei anai ke liliu ia te faʼahi ʼaia ko hakita fakatuʼutuʼu ke feala ai hakita hikihiki age te lelei ʼaē ʼo tatatou ʼu faikole. Ke lahi age tatatou maʼuliʼi ia te ʼu agaaga ʼo te fua ʼo te laumālie, ʼe ko he tahi ʼaia fakatuʼutuʼu lelei ke tou fai. (Kal. 5:22, 23) Pea koteā anai he ʼu puleʼaki ʼe tou lava fai ke tou fakahā ai totatou loto manavaʼofa ki te hahaʼi ʼaē ʼe fai palalau mo tātou ʼi totatou minisitelio? ʼI tatatou faiga ʼaē ke tou fai fakafāmili ia te faʼahi ʼaia, ʼe lava tokoni anai ki te fānau ke natou ako ia te loto mahino, pea mo lagi natou fia toʼo anai ia te selevisi pioniē kātoa peʼe ko te selevisi misionea.

¹¹ ʼE lagi feala kiā koutou pea mo tokotou fāmili ke kotou vakavakaʼi fakatahi he ʼu fakatuʼutuʼu ʼe kotou lava fakahoko. ʼE feala koa ke kotou fakatuʼutuʼu fakafāmili ke lahi age takotou kau ʼaē ki te fai fakamafola? ʼE feala koa ki te fāmili ke natou tauʼi ia te mataku ʼo ʼuhiga mo te fai fakamafola ʼi te telefoni, ʼi te ala, peʼe ʼi te ʼu fale gāue? ʼE feafeaʼi lā ia te ʼu koga meʼa ʼaē ʼe ʼaoga lahi kiai he ʼu hahaʼi fai fakamafola? ʼE feala koa ki he tahi ʼo tokotou fāmili ke ina ako he tahi lea ke feala ai hana fakamafola te logo lelei ki te hahaʼi ʼo te lea ʼaia?

12. Koteā ʼaē ʼe lava fai e te ʼu pule fāmili moʼo tokoni ki tonatou fāmili ke natou tuputupu ʼi te faʼahi fakalaumālie?

¹² ʼI tokotou ʼuhiga pule fāmili, ʼe tonu ke kotou ʼiloʼi te ʼu faʼahi ʼaē ʼe tonu ke tuputupu ai tokotou  fāmili ʼi te faʼahi fakalaumālie. Koia kotou fai he ʼu fakatuʼutuʼu moʼo fakahoko te faʼahi ʼaia. Ko te ʼu fakatuʼutuʼu fakafāmili ʼaē ʼe kotou fai ʼe tonu ke kotou lava fakahoko ʼo mulimuli ki tokotou ʼu ʼaluʼaga pea mo tokotou ʼu fealagia. (Taag. 13:12) ʼE mahino ia, moʼo fakahoko he fakatuʼutuʼu ʼe tāu mo ʼaoga ʼe fakamaʼua kiai he toe temi loaloaga. Koia kotou fakaʼaogaʼi fakalelei tokotou temi ki te fakahoko ʼaē ʼo takotou ʼu gāue fakalaumālie, kae ʼaua naʼa kotou fakaʼaogaʼi ki te sioʼi ʼo te televisio. (Efe. 5:15, 16) Kotou gāue mālohi ke kotou fakahoko te ʼu fakatuʼutuʼu ʼaē neʼe kotou fai maʼa tokotou fāmili. (Kal. 6:9) ‘ ʼE ʼiloga anai ki te hahaʼi fuli’ ia te tuputupu fakalaumālie ʼa he fāmili ʼe ina fai he ʼu fakatuʼutuʼu fakalaumālie.—1 Tim. 4:15.

Kotou Taupau Tuʼumaʼu Te Tauhi Fakafāmili ʼi Te Afiafi

13. Koteā te fetogi neʼe fai ʼi te polokalama ʼo te ʼu fono ʼo te kōkelekāsio ʼo te vāhaʼa, pea ko te ʼu fehuʼi fea ʼaē ʼe tonu ke tou fakakaukau kiai?

¹³ Ko te fakatuʼutuʼu lelei moʼo tokoni ki te ʼu fāmili ke natou “nonofo teuteu” ki te haʼu ʼo te Foha ʼo te tagata, neʼe ko te fetogi foʼou ʼaē kua fai ʼi te polokalama ʼo te ʼu fono ʼi te vāhaʼa, ʼaē neʼe kamata ʼi te ʼaho 1 ʼo Sānualio 2009. Ko te fakatuʼutuʼu ʼaē neʼe fai ʼo ʼuhiga mo te Ako Tohi, ke fai ʼāteaina ʼi he tahi age ʼaho ʼo te vāhaʼa ʼe mole kei fai. Ko te fono ʼaia kua fai fakatahi mo te Ako Fakateokalatike pea mo te Fono Gāue. Neʼe fai te fetogi ʼaia ke feala ai ki te ʼu fāmili Kilisitiano ke natou fakamālohi tonatou maʼuli fakalaumālie, ʼaki hanatou fakatuʼutuʼu he afiafi ʼi te vāhaʼa fuli ki te tauhi fakafāmili. Kae talu mai te kamata ʼo te fetogi ʼaia ʼo aʼu mai ki te temi nei, kua feala ke tou fai te ʼu fehuʼi ʼaenī kiā tātou totonu pē: ‘ ʼE au fakaʼaogaʼi koa toku temi ʼaē kua au ʼāteaina ai moʼo fai haku Tauhi Fakafāmili ʼi te afiafi, peʼe ke au fai haku ako tokotahi mokā mole au maʼuli mo toku fāmili? ʼE au mulimuli fakalelei koa ki te fakatuʼutuʼu ʼaia neʼe tuku mai ke tou fakahoko ʼi totatou maʼuli?’

14. (a) Koteā te ʼuluaki tupuʼaga ʼaē ke fai ai te Tauhi Fakafāmili ʼi te afiafi peʼe ko te ako takitokotahi? (b) He koʼē ʼe maʼuhiga ke tou tuku he temi ʼi te afiafi moʼo fai hatatou ako fakalaumālie?

¹⁴ Ko te fakatuʼutuʼu tāfito ʼaē ke fai he Tauhi Fakafāmili ʼi te afiafi peʼe ki te ako takitokotahi, heʼe ina fakafealagia ai kiā tātou ke tou fakaovi ki te ʼAtua. (Sake 4:8) Kā tou fakaʼaogaʼi lelei totatou temi moʼo ako tuʼumaʼu ia te Tohi-Tapu pea mo lahi age tatatou mahino ʼaē ki te Tupuʼaga, ʼe mālohi age anai tatatou ʼu felōgoi ʼaē mo ia. Kapau ʼe tou fakaovi tuʼumaʼu kiā Sehova, pea ʼe toe lahi age anai totatou ʼofa ʼaē kiā te ia ‘ ʼaki totatou loto kātoa pea mo totatou nefesi kātoa pea mo tatatou manatu kātoa pea mo totatou mālohi kātoa.’ (Mko. 12:30) ʼE mahino ia, ʼe tou fiafia anai ʼi te fakalogo ki te ʼAtua pea mo muliʼi tana faʼifaʼitaki. (Efe. 5:1) Koia kā kotou fai tuʼumaʼu takotou Tauhi Fakafāmili ʼi te afiafi, pea ʼe tokoni kiā nātou fuli ʼaē ʼo te fāmili ke natou nonofo teuteu ʼi te faʼahi fakalaumālie, ʼi tanatou lolotoga fakatalitali ki te ʼamanaki hoko mai ʼo te “mamahi lahi” ʼaē neʼe fakakikite mai. (Mat. 24:21) ʼE ko he fakatuʼutuʼu maʼuhiga ke tou fakahoko mokā ʼe tou fia hao ʼi te ʼaho ʼaia.

15. ʼO ʼuhiga mo tanatou ʼu fefelogoiʼaki, koteā te fua lelei ʼe feala ke maʼu e nātou fuli ʼaē ʼo te fāmili ʼi tanatou Tauhi Fakafāmili ʼi te afiafi?

¹⁵ ʼE ʼi ai te tahi age tupuʼaga ʼaē ʼe tonu ai ke fai te Tauhi Fakafāmili, heʼe tokoni kiā nātou fuli ʼo te fāmili ke lahi age tanatou fefelogoiʼaki. Ko te temi ʼaē ʼe fakaʼaogaʼi e te fāmili ʼi te vāhaʼa fuli moʼo fai palalau ki he ʼu manatu fakalaumālie, ʼe fua lelei anai kiā nātou fuli ʼo ʼuhiga mo tanatou ʼu fefelogoiʼaki. ʼE mālohi age te logotahi ʼa he taumātuʼa mokā ʼe nā fiafia ʼi te ʼu manatu ʼaē ʼe nā ako fakatahi ʼi te Tohi-Tapu! (Lau ia Tagata Tānaki 4:12.) ʼE mahino ia, ko te ʼu mātuʼa ʼaē ʼe tauhi fakatahi mo tanatou ʼu fānau ʼe natou logotahi ʼi te ʼofa, ia te “noʼo haohaoa . . . ki te logotahi.”—Kol. 3:14.

16. Kotou fakamatala pe neʼe koteā te fua lelei neʼe maʼu e te ʼu tuagaʼane fakalaumālie e toko tolu, ʼaki te fakatuʼutuʼu ʼaē ke tuku he temi ʼi he afiafi ki te ako ʼo te Tohi-Tapu.

¹⁶ Tou vakaʼi age muʼa, pe neʼe koteā te fua lelei neʼe maʼu e te ʼu tuagaʼane fakalaumālie e toko tolu, ʼi te fakatuʼutuʼu ʼaē ke tuku he temi ʼi he afiafi ki he ako Fakatohi-tapu. Neʼe mole kāiga te ʼu finematuʼa vītua ʼaia, kae neʼe natou nonofo ʼi te kolo pē e tahi pea neʼe natou kaumeʼa lelei lolotoga ni ʼu taʼu. Neʼe natou loto ke lahi age te temi ʼaē ke natou nonofo fakatahi ai pea neʼe natou toe loto foki ke natou fefakalotomālohiʼaki fakalaumālie  ʼi tanatou ʼu fakatahitahi ʼaia, koia neʼe natou fakatotonu ai ke natou fakaʼaogaʼi he temi ʼi he afiafi ke natou fakatahi ai pea mo ako ia te Tohi-Tapu. Neʼe natou fai te faʼahi ʼaia, ʼo natou kamata ʼaki te tohi ‘Rends pleinement témoignage au sujet du Royaume de Dieu.’ Neʼe ʼui fēnei e te tahi tuagaʼane iā nātou: “ ʼI te lahi ʼo te temi ʼaē ʼe matou maʼu, ʼi te agamāhani ko tamatou ako ʼe fakalaka age ia ʼi he hola kātoa. ʼE matou faiga ke matou fakakaukauʼi ia te ʼu ʼaluʼaga ʼaē neʼe hoko ki totatou ʼu tehina ʼo te ʼuluaki sēkulō, pea ʼe matou fai palalau peʼe koteā ʼaē neʼe feala ke matou fai ʼi te ʼu ʼaluʼaga ʼaia. Pea ʼi tomatou minisitelio ʼe matou faigaʼi ke matou maʼuliʼi te ʼu puani ʼaē neʼe matou ako ʼi tamatou ʼu fai palalau. Neʼe feala ai ke lahi age ia tamatou fiafia ʼi tamatou fai fakamafola mo tamatou fai ʼo he ʼu tisipulo, pea kā fakatatau atu ki tamatou ʼu gāue fakalaumālie ʼaē ki muʼa atu, neʼe laka age ia.” ʼO mole gata ʼaki pē ʼi tanatou liliu ʼaē ʼo mālolohi ʼi te faʼahi fakalaumālie, kae neʼe toe fakafealagia e te fakatuʼutuʼu ʼaia ke lahi age te feʼofaʼaki ʼa te ʼu kaumeʼa lelei ʼaia e toko tolu. Neʼe natou ʼui fēnei: “ ʼE matou leleiʼia ʼaupitō te fakatuʼutuʼu ʼaia.”

17. Ko te ʼu faʼahi fea ʼaē ʼe feala ai ke fua lelei ia te Tauhi Fakafāmili ʼaē ʼe fai ʼi te afiafi?

¹⁷ ʼE feafeaʼi kiā koutou? Koteā te ʼu fua lelei ʼaē ʼe kotou maʼu mai te afiafi ʼaē neʼe kotou tuku ki te tauhi fakafāmili peʼe ki te ako takitokotahi? Kapau ʼe tahitahiga pē ia tona fai, pea ʼe mole feala anai ke hoko te ʼu fakatuʼutuʼu ʼaē neʼe kotou fakaʼamu kiai. ʼE tonu kiā nātou fuli ʼaē ʼo te fāmili ke natou tokalelei ʼi te temi ʼaē neʼe hinoʼi kiai ia te ako. ʼAua naʼa kotou tuku he ʼaluʼaga ʼe mole faʼa maʼuhiga fau ke ina fakaleluʼi te Tauhi Fakafāmili ʼo te afiafi. Tahi ʼaē, ʼe tonu ke fili he tohi ʼe feala ki tokotou fāmili ke natou maʼu ai he ʼu ako ʼe ʼaoga. Koteā ʼaē ʼe feala ke kotou fai ke liliu te ʼu temi ako ʼaia, ko he ʼu temi fakafiafia? Ke lelei te ʼu faʼahiga faiako ʼaē ʼe kotou fakaʼaogaʼi, pea kotou tokaga ke liliu te temi ako fakafāmili ʼaia ʼe ko he temi fakaʼapaʼapa pea mo fakalotofīmālie.—Sake 3:18. a

Kotou “Nonofo ʼAlaʼala” Pea Mo “Kotou Nonofo Teuteu”

18, 19. ʼE tonu ke malave feafeaʼi kiā koutou pea mo tokotou fāmili takotou ʼiloʼi ʼaē kua ovi mai te haʼu ʼo te Foha ʼo te tagata?

¹⁸ Ko te lahi ʼaē ʼo te agakovi ʼi totatou temi, ʼe hā lelei ai talu mai te taʼu 1914 kua nofo nei te mālama agakovi ʼa Satana ʼi tona ʼu ʼaho fakaʼosi. Kua ʼamanaki hoko mai pē te ʼaho fakamataku ʼo Halamaketone. Kua vave hoko mai pē anai te temi ʼaē kā haʼu ai te Foha ʼo te tagata ʼo fakahoko te tautea ʼa Sehova ki te hahaʼi aga heʼe lotu. (Pes. 37:10; Taag. 2:21, 22) ʼAki takotou ʼiloʼi ia te faʼahi ʼaenī, ʼe lagi lelei kiā koutou pea mo tokotou fāmili ke kotou nonofo tōkakaga pea mo teuteu.

¹⁹ ʼE kotou fakalogo koa ki te tokoni ʼaē ʼa Sesu ke kotou taupau he mata ʼe “lelei”? Kapau ko te hahaʼi ʼo te mālama ʼaenī ʼe natou fia maʼu koloa, pea mo loto ke ʼiloa nātou, peʼe ke natou maʼu tuʼulaga, kae kiā koutou pea mo tokotou fāmili ʼe kotou fai koa hakotou ʼu fakatuʼutuʼu fakalaumālie? ʼE fua lelei koa kiā koutou te fakatuʼutuʼu ʼaē ki te Tauhi Fakafāmili peʼe ki te ako takitokotahi? ʼE kotou fai koa te ʼu fakatuʼutuʼu ʼaia? Ohagē ko tatatou vakaʼi ʼi te ʼuluaki ʼalatike, ʼe kotou fai fakalelei koa tokotou maʼua ʼaē ʼe tuʼu ʼi te Tohi-Tapu ʼi tokotou ʼuhiga tagata ʼohoana, ʼuhiga fafine ʼohoana, peʼe ʼuhiga fānau, ʼo kotou tokoni ai ki te fāmili kātoa ke natou “nonofo ʼalaʼala”? (1 Tes. 5:6) Kapau ʼe kotou fai ia te faʼahi ʼaia, pea ʼe kotou “nonofo teuteu” anai ki te haʼu ʼo te Foha ʼo te tagata.

[Nota]

Koteā ʼAē Neʼe Kotou Ako?

• Kotou fakamahino peʼe lava “nonofo teuteu” feafeaʼi ia te ʼu fāmili Kilisitiano ʼaki . . .

tanatou maʼu he mata ʼe “lelei.”

tanatou fai he ʼu fakatuʼutuʼu fakalaumālie pea mo fakahoko.

tanatou taupau tuʼumaʼu te Tauhi Fakafāmili ʼi te afiafi.

[ʼU fehuʼi ʼo te ako]