Ko Sesu—Te Tupuʼaga ʼo Tana Mate

“[Ko] te Foha ʼo te tagata, neʼe . . . haʼu ke . . . ina foaki tona nefesi [peʼe ko tona maʼuli] ko he totogi moʼo fetogi ʼaki ʼo te tokolahi.”—MALEKO 10:45.

NEʼE ʼiloʼi e Sesu te meʼa ʼaē kā ʼamanaki hoko kiā te ia. Neʼe mahino kiā ia ʼe mole maʼuli anai ʼi te tokalelei. Kae neʼe ina ʼiloʼi lelei pē, ko tona maʼuli ʼe fakanounou anai ʼi hona ʼaluʼaga fakaʼofaʼofa ʼi tona taʼu 30 tupu, pea neʼe kua nofo teuteu ia ki tona mate.

ʼE fakamaʼuhigaʼi lahi te mate ʼo Sesu ʼi te Tohi-Tapu. ʼE ʼui ʼi te tohi ko te mate ʼo Sesu ʼe tuʼa 175 tupu tona talanoa kiai ʼi te ʼu Tohi Fakakeleka Fakakilisitiano, peʼe ko te Tauhi Foʼou. Kae, he koʼē neʼe maʼuli mamahi ia Sesu pea mate? ʼE tonu ke tou ʼiloʼi, ko te mate ʼo Sesu ʼe feala ke malave mālohi ki totatou maʼuli.

▪ Koteā ʼaē neʼe ʼamanaki kiai ia Sesu? Lolotoga te taʼu fakaʼosi ʼo tona maʼuli, neʼe tuʼa lahi te haga ʼaē ʼa Sesu ʼo fakatokaga ki tana ʼu tisipulo ʼo ʼuhiga mo te mamahi pea mo te mate ʼaē neʼe ʼamanaki hoko kiā te ia. ʼI tanatou fagona ki Selusalemi moʼo fakamanatu ia tana Pāsikate fakaʼosi, neʼe ina ʼui fēnei ki tana ʼu ʼapositolo e toko 12: “Ko te Foha ʼo te tagata ʼe ʼave anai ki te kau pelepitelō pule pea mo te kau sekelipa, pea ʼe natou fakatūʼā anai ia ia ke matehi, pea ʼe natou ʼave anai ia ia ki te ʼu tagata ʼo te ʼu puleʼaga, pea ʼe natou manukiʼi anai ia ia, pea mo ʼanuʼanuhiʼi anai, pea mo haha anai, pea mo matehi anai.” a (Maleko 10:33, 34) He koʼē neʼe ʼiloʼi papau e Sesu te ʼu meʼa ʼaē kā hoko kiā te ia?

Neʼe ʼiloʼi lelei e Sesu te ʼu lea fakapolofetā ʼi te ʼu Tohi Fakahepeleo ʼaē neʼe natou fakakikite peʼe feafeaʼi anai te fakaʼosi ʼo tona maʼuli. (Luka 18:31-33) Tou vakaʼi age muʼa ʼihi ʼo te ʼu lea fakapolofetā pea mo te ʼu vaega Fakatohi-tapu ʼe natou fakamahino pe neʼe feafeaʼi tonatou fakahoko.

ʼE fakahoko anai ki te Mēsia tona . . .

▪ Lavakiʼi ki te ʼu foʼi piesi siliva e 30.—SAKALIA 11:12; MATEO 26:14-16.

▪ Tā pea mo ʼanuʼanuhi.—ISAIA 50:6; MATEO 26:67; 27:26, 30.

▪ Haʼi ki te pou.—PESALEMO 22:16; MALEKO 15:24, 25.

▪ Laukoviʼi lolotoga tona haʼi ʼi te pou.—PESALEMO 22:7, 8; MATEO 27:39-43.

▪ Matehi kae ʼe mole fasifasi anai tona ʼu hui.—PESALEMO 34:20; SOANE 19:33, 36.

Neʼe fakahoko e Sesu te ʼu lea fakapolofetā ʼaia pea mo ʼihi atu. ʼE mole he faʼahi ʼe hā mai neʼe fai te faʼahi ʼaia ʼaki pē tana fakatuʼutuʼu ʼa ia totonu. Ko te fakahoko ʼo te ʼu lea fakapolofetā fuli ʼaia iā Sesu ʼe fakamoʼoni ai ko ia neʼe fekauʼi moʼoni mai e te ʼAtua. b

Kae he koʼē neʼe tonu ke mamahi pea ke mate ia Sesu?

▪ Neʼe mate ia Sesu moʼo fakatokatoka te ʼu fakafifihi maʼuhiga ʼaē neʼe fai Neʼe ʼiloʼi lelei e Sesu te ʼu fakafifihi maʼuhiga ʼaupitō ʼaē neʼe lagaʼi ʼi te ʼōloto ʼo Eteni. I tonā fakahalaʼi e te laumālie agatuʼu, neʼe filifili e Atama mo Eva ke nā talagataʼa ki te ʼAtua. Neʼe fakafihiʼi e te agatuʼu ʼa te taumātuʼa ʼaia ia te tāu ʼaē ke pule faʼitaliha te ʼAtua, peʼe ko tana faʼahiga takitaki. Neʼe toe lagaʼi foki e tanā agahala te potu maʼuhiga ʼaē peʼe nofo agatonu anai he tagata ki te ʼAtua mokā hoko ki ai he ʼahiʼahi.—Senesi 3:1-6; Sopo 2:1-5.

Neʼe foaki e Sesu ia he tali ʼe kātoa ki te ʼu fehuʼi ʼaia e lua ʼo ʼuhiga mo te pule faʼitaliha ʼa Sehova pea mo te nofo agatonu ʼa te tagata. ʼAki tana fakalogo  kātoa “ ʼo aʼu ki te mate, . . . ʼi te pou fakamamahi,” neʼe lagolago ia Sesu ki te pule faʼitaliha ʼa te ʼAtua. (Filipe 2:8) Neʼe toe fakamoʼoni foki e Sesu ʼe feala ki he tagata haohaoa ke ina taupau maʼu tana nofo agatonu kātoa kiā Sehova mokā hoko ki ai te ʼu ʼahiʼahi tatau aipē peʼe faigataʼa ʼaupitō.

▪ Neʼe mate ia Sesu moʼo totogi te mālamanei Neʼe fakakikite e te polofetā ko Isaia ʼe foaki mai anai e te mamahi pea mo te mate ʼo te Mēsia ʼaē neʼe fakapapauʼi mai ia he fakamolemole ki te ʼu agahala ʼa te hahaʼi. (Isaia 53:5, 10) Neʼe mahino lelei ia Sesu ki te faʼahi ʼaia, pea neʼe lotolelei ke ina foaki “tona nefesi moʼo totogi ʼaki ʼo te tokolahi.” (Mateo 20:28) Neʼe tofa e tana mate fakasākilifisio te ala ʼaē ke feala ai ki te hahaʼi heʼe haohaoa ke natou maʼu he ʼu felōgoi lelei mo Sehova pea ke natou hao mai te agahala pea mo te mate. ʼE foaki mai e te mate ʼa Sesu kiā tātou te faigamālie ʼaē ke tou toe maʼu te ʼamanaki ʼaē neʼe puli iā Atama mo Eva, ko he maʼuli ʼo heʼegata ʼi he ʼu ʼaluʼaga haohaoa ʼi te kele. c—Fakahā 21:3, 4.

▪ Te meʼa ʼaē ʼe kotou lava fai ʼI te ʼu ʼalatike ʼaenī e fā, neʼe tou vakavakaʼi ai peʼe koteā ʼaē ʼe ʼui ʼi te Tohi-Tapu ʼo ʼuhiga mo Sesu—pe neʼe haʼu mai fea, pe neʼe feafeaʼi ia tona faʼahiga maʼuli, pea mo te tupuʼaga ʼo tana mate. Ko te ʼiloʼi ʼo te ʼu moʼoni ʼaia ʼo ʼuhiga mo Sesu ʼe feala ke puli ai te ʼu manatu hala ʼo ʼuhiga mo ia. Ko te fakaʼalutahi ʼo tatatou ʼu gāue mo te ʼu moʼoni ʼaia ʼe feala ke tou maʼu ai he ʼu tapuakina—he maʼuli ʼe lelei age ʼi te temi nei pea mo te maʼuli heʼegata ʼi te kā haʼu. ʼE tala mai ʼi te Tohi-Tapu peʼe koteā ʼaē ʼe tonu ke tou fai mokā ʼe tou fia maʼu te ʼu taʼi tapuakina ʼaia.

▪ Ke lahi takotou ako ʼo ʼuhiga mo Sesu Kilisito pea mo tana gāue ʼi te fakatuʼutuʼu ʼa Sehova.—SOANE 17:3.

▪ Kotou tui kiā Sesu, ʼo kotou fakahā ʼaki tokotou faʼahiga maʼuli ʼe kotou tali ia ia ko tokotou Fakamaʼuli.—SOANE 3:36; GĀUE 5:31.

ʼE fiafia anai te kau Fakamoʼoni ʼa Sehova ʼi te tokoni atu ke lahi age takotou ako ʼo ʼuhiga mo Sesu Kilisito, te “ ʼAlo ʼulu tokotahi” ʼo te ʼAtua, ʼaki ia ia ʼaē ʼe feala anai ke tou maʼu ai te meʼa ʼofa ʼaē ko “te maʼuli heʼegata.”—Soane 3:16.

[ʼU nota]