Ko Sesu—Tona Faʼahiga Maʼuli

“Ko taku meʼa kai ko te fai ʼo te finegalo ʼo ia ʼaē neʼe ina fekauʼi mai au, pea mo au fakaʼosi tana gāue.”—SOANE 4:34.

KO TE ʼaluʼaga ʼaē neʼe ʼui ai e Sesu te ʼu palalau ʼi ʼoluga, ʼe hā lelei ai peʼe koteā ʼaē ʼe maʼuhiga tāfito ʼi tona maʼuli. Ko Sesu mo tana ʼu tisipulo neʼe natou fagona ʼi te ʼuhu pē ʼo natou fakalaka ʼi te fenua moʼugaʼia ʼo Samalia. (Soane 4:6) ʼI tanatou manatu ʼaē ko Sesu neʼe kua fia kai, neʼe foaki age e te ʼu tisipulo ki ai tana meʼa kai. (Soane 4:31-33) ʼI tana tali, neʼe fakahā fakanounou e Sesu te fakatuʼutuʼu ʼo tona maʼuli. Kiā ia ko te fakahoko ʼo te gāue ʼa te ʼAtua neʼe maʼuhiga age ia ʼi te kai. ʼAki tana ʼu palalau pea mo tana ʼu aga, neʼe maʼuli ia Sesu moʼo fakahoko te finegalo ʼo te ʼAtua ʼo ʼuhiga mo ia. Koteā ʼaē neʼe fakamaʼua kiai?

▪ Neʼe fai fakamafola pea mo faiako ʼo ʼuhiga mo te Puleʼaga ʼo te ʼAtua ʼE fakamahino fēnei ʼi te Tohi-Tapu te gāue tāfito ʼo te maʼuli ʼo Sesu: “Neʼe feʼaluʼaki ia ʼi Kalilea kātoa, ʼo akonaki . . . pea mo fakamafola te logo lelei ʼo te puleʼaga.” (Mateo 4:23) Ko Sesu neʼe mole ina fakamafola pē peʼe ina tala pē te Puleʼaga ʼo te ʼAtua ki ʼihi. Neʼe ina toe akoʼi foki te hahaʼi, ko tona fakaʼuhiga, neʼe ina fakamahino kiā nātou te Puleʼaga pea neʼe ina fakalotoʼi nātou ʼaki he ʼu palalau fakapotopoto. Ko te Puleʼaga neʼe ko te kupu tāfito ʼo te logo ʼaē neʼe tala e Sesu.

ʼI tona minisitelio kātoa, neʼe ina akoʼi ki te hahaʼi ʼaē neʼe natou fakalogo peʼe koteā te Puleʼaga ʼo te ʼAtua pea koteā ʼaē kā fai anai e te Puleʼaga. Kotou tokagaʼi age te ʼu moʼoni ʼaenī ʼo ʼuhiga mo te Puleʼaga, ʼaki te ʼu vaega Tohi-Tapu ʼe tuʼu ai te ʼu folafola ʼa Sesu ʼo ʼuhiga mo te Puleʼaga.

▪ Ko te Puleʼaga ʼo te ʼAtua ʼe ko he Puleʼaga ʼe tuʼu ʼi selō, pea ko Sesu ʼaē neʼe fakanofo ke hau e Sehova.—MATEO 4:17; SOANE 18:36.

▪ ʼE fakatapuhā anai e te Puleʼaga ia te huafa ʼo te ʼAtua pea ʼe fakahoko anai e te Puleʼaga ia te finegalo ʼo te ʼAtua ʼi te kele ohagē ko selō.—MATEO 6:9, 10.

▪ ʼAki te takitaki ʼaē ʼo te Puleʼaga ʼo te ʼAtua, ʼe liliu anai te kele kātoa ko he palatiso.—LUKA 23:42, 43.

▪ Kua vave haʼu pē anai te Puleʼaga ʼo te ʼAtua ʼo fakahoko te finegalo ʼo te ʼAtua ki te kele. a—MATEO 24:3, 7-12.

▪ Neʼe ina fakahoko te ʼu gāue lalahi Neʼe logona tāfito ia Sesu ko he tagata “Faiakonaki.” (Soane 13:13) Kae, lolotoga tona minisitelio iā taʼu e tolu vaelua, neʼe ina fakahoko foki mo te ʼu gāue lalahi. Neʼe fakahoko e Sesu te ʼu gāue ʼaia kiā fakatuʼutuʼu e lua. ʼUluaki, neʼe tokoni te ʼu gāue ʼaia ke fakamoʼoni ki te hahaʼi ko ia neʼe fekauʼi moʼoni mai e te ʼAtua. (Mateo 11:2-6) Lua, neʼe fakamelomelo e te ʼu gāue ʼaia peʼe koteā ʼaē kā ina fai anai ʼi tona ʼuhiga Hau ʼo te Puleʼaga ʼo te ʼAtua ʼi hona ʼaluʼaga ʼe lahi age ʼi te kā haʼu. Kotou fakatokagaʼi age muʼa ʼihi ʼo tana ʼu milakulo ʼaē neʼe ina fakahoko.

▪ Neʼe ina fakamalū ifo te tai neʼe kua hou pea mo ina fakagona te ʼu matagi lalahi.—MALEKO 4:39-41.

▪ Neʼe ina fakamālōlō te hahaʼi māhahaki, ʼo kau ai mo te kau kivi, mo te kau tuli pea mo te kau ketu.—LUKA 7:21, 22.

▪ Neʼe ina fakatuputupu te meʼa kai, ʼo ina fafaga ai te toe hahaʼi kaugamālie neʼe fia kakai.—MATEO 14:17-21; 15:34-38.

▪ Iā lakaga e tolu neʼe fakatuʼuake e Sesu te kau mate.—LUKA 7:11-15; 8:41-55; SOANE 11:38-44.

Kotou fakakaukauʼi age muʼa peʼe feafeaʼi anai te maʼuli ʼi te kele ʼi te pule ʼaē ʼo te taʼi Hau mālohi fēia!

 ▪ Neʼe ina fakahā te ʼuluagaaga ʼo Sehova ʼAtua ʼI te faʼahi ʼaē ʼo te akoʼi ʼo te hahaʼi ʼo ʼuhiga mo Sehova, ʼe mole he tahi ʼe poto age ʼi te ʼAlo ʼo te ʼAtua, ia ia ʼaē neʼe higoa ki muli age ko Sesu Kilisito. ʼI tona ʼuhiga “ ʼuluaki tupu ʼo te ʼu meʼa fuli ʼaē neʼe fakatupu,” neʼe nofo ia Sesu iā tafa ʼo Sehova ʼi te lagi, ʼi he ʼu taʼu ʼe loaloaga ʼaupitō age ia ʼi te ʼu laumālie ʼaē. (Kolose 1:15) Kotou fakakaukauʼi age muʼa te ʼu faigamālie ʼaē neʼe ina maʼu ke mahino ai ki te ʼu manatu ʼo tana Tamai pea mo ako ia Tona finegalo, mo tana ʼu lēkula, pea mo tona ʼu ala.

Koia neʼe feala ai ke ʼui fēnei e Sesu: “ ʼE mole ʼi ai he tahi ʼe ina ʼiloʼi pe ko ai te ʼAlo, gata pē ki te Tamai; pea ʼe mole ʼi ai he tahi ʼe ina ʼiloʼi pe ko ai te Tamai, gata pē ki te ʼAlo, pea mo ia ʼaē ʼe lotolelei te ʼAlo ke ina fakahā ki ai.” (Luka 10:22) ʼI tana maʼuli ʼaē ʼi te kele ohagē he tagata, neʼe loto lelei pea mo loto fiafia ia Sesu, ke ina fakahā te ʼu agaaga ʼo tana tamai. Neʼe palalau ia Sesu pea mo faiakonaki ʼaki te manatu e tahi; neʼe ina fakaʼaogaʼi te ʼu meʼa ʼaē neʼe ina ako tonu ʼi te potu fakalaumālie pea mo te ʼafioʼaga fakakolōlia ʼo te ʼAtua Māʼoluga.—Soane 8:28.

ʼAki te meʼa ʼaē neʼe fai e Sesu ʼi tana fakahā te ʼu agaaga ʼo tana Tamai neʼe feala ke fakatā ki te gāue ʼa he puha hila. ʼE feala ke puke e te taʼi meʼa gāue ʼaia he hila ʼe mālohi ʼaupitō pea ina fetogi te hila ʼaia ʼo ina fakasiʼisiʼi ifo ia tona mālohi, ke feala ai hona fakaʼaogaʼi fakalelei e te hahaʼi. ʼI tana kei maʼuli ʼi te kele, neʼe fakahā e Sesu te ʼu meʼa ʼaē neʼe ina ako ʼi te lagi ʼo ʼuhiga mo tana Tamai ʼi he ʼu ʼaluʼaga ʼe feala ai ki te hahaʼi fuli pē ʼi te kele ke natou mahino gafua kiai pea mo natou maʼuliʼi gafua.

Tou vakaʼi age muʼa ia ʼaluʼaga maʼuhiga e lua neʼe fakahā ai e Sesu te ʼu agaaga ʼo tana Tamai.

▪ ʼI tana faiakonaki, neʼe fakahā e Sesu te moʼoni ʼo ʼuhiga mo Sehova, ia Tona huafa, mo tana fakatuʼutuʼu, pea mo tona ʼu ala.—SOANE 3:16; 17:6, 26.

▪ ʼAki tana ʼu aga, neʼe lahi te ʼu faʼahi matalelei ʼo te ʼu agaaga ʼo Sehova neʼe fakahā e Sesu. Neʼe fakahā lelei e Sesu ia te ʼu agaaga ʼo tana Tamai ʼo feala ai ke ina ʼui fēnei: ‘Kapau ʼe kotou fia ʼiloʼi peʼe feafeaʼi ia taku Tamai, kotou sio mai pē kiā au.’—SOANE 5:19; 14:9.

ʼE tou ōfo ʼo ʼuhiga mo te faʼahiga maʼuli ʼaē ʼo Sesu. ʼE tou lava maʼu he ʼu tapuakina ʼe mole malau mo kapau ʼe tou vakavakaʼi peʼe koteā te tupuʼaga ʼo te mate ʼa Sesu pea mokā tou mulimuli ki te ʼu meʼa ʼaē ʼe tou ako.

[Nota]