Ko Tatatou Falala ʼAē Kiā Sehova ʼe Tou Maʼu Ai Te Maʼuli Fīmālie

“Ko Sehova totonu ʼe fagono mai anai ʼi te temi ʼaē ʼe au pāui anai ki ai.”—PES. 4:3.

1, 2. (a) Koteā te ʼaluʼaga fakaʼofaʼofa ʼaē neʼe taʼu mo Tavite? (b) Ko te ʼu pesalemo fea ʼaē kā tou talanoa anai kiai?

 NEʼE hili kiai ni ʼu temi neʼe pule ia te Hau ko Tavite ki Iselaele, kae kua hoko leva ki ai ia te ʼaluʼaga faigataʼa. Neʼe fonofono ia tona foha ko Apisalome ke ina faʼao tona hekaʼaga hau ʼo ina tala ko ia totonu te hau pea koia ʼaē neʼe tonu ai ke mavae ia Tavite mai Selusalemi. Neʼe toe kākāʼi ia ia e tana tagata fai tokoni ʼaē neʼe falala ki ai pea ʼi te temi leva ʼaē kua tokosiʼi te hahaʼi ʼe natou lagolago age ki ai, neʼe haʼele tagi pea mo kiliʼi vae ʼi te Moʼuga ʼo Oliveto. Pea ki muli age ko Simei ʼaē ʼe kau ʼi te fāmili ʼo te Haʼu ko Saulo, neʼe ina tuki makaʼi pea mo ina lī te efu kiā Tavite mo faitutuku kiā Tavite.—2 Sam. 15:30, 31; 16:5-14.

² ʼI te ʼahiʼahi ʼaia ʼe fia hifo anai koa ia Tavite ki te Seole ʼi tona lotomamahi pea mo tona fakalainoaʼi? Kailoa ia, he neʼe tuku tana falala kiā Sehova. ʼE ʼiloga lelei te faʼahi ʼaia ʼi te 3 Pesalemo, ʼaē neʼe ina tohi ʼo ʼuhiga mo tana feholaʼaki ʼaē iā Apisalome. Neʼe ina toe tohi foki mo te 4 Pesalemo. ʼI te ʼu hiva ʼaia e lua ʼe fakahā ai te tui papau ʼaē ʼe fagono mai ia te ʼAtua ki te ʼu faikole pea mo ina tali kiai. (Pes. 3:4; 4:3) Ko te ʼu pesalemo ʼaia ʼe fakapapau mai kiā tātou ʼe nofo ia Sehova mo tana ʼu kaugana agatonu ʼi te ʼaho mo te pō, ʼo tapuakina ia nātou ʼaki tana tokoni ʼo ina foaki kiā nātou ia te tokalelei pea mo te maʼuli fīmālie. (Pes. 3:5; 4:8) Koia tou vakaʼi age muʼa ia te ʼu pesalemo ʼaia pea mo tou fakasiosio ke tou maʼu ia te maʼuli fīmālie pea mo tou fakatuputupu tatatou falala ʼaē ki te ʼAtua.

Kā ‘Fakafeagai Mai Te Tokolahi Kiā Tātou’

 3. Ohagē ko tona fakahā mai iā Pesalemo 3:1, 2 koteā te ʼaluʼaga neʼe felāveʼi mo Tavite?

³ Neʼe ʼui fēnei e te tagata ʼave logo: “Kua mulimuli te loto ʼo te hahaʼi ʼo Iselaele iā Apisalome.” (2 Sam. 15:13) ʼI te feʼekeʼaki ʼa Tavite pe neʼe lava fakalotoʼi feafeaʼi e Apisalome ia te hahaʼi kaugamālie ke natou lagolago kiā te ia, neʼe ʼui fēnei e Tavite: “Ê Sehova, he koʼē koa kua kaugamālie toku ʼu fili? He koʼē koa ʼe natou fakafeagai mai kiā au? ʼE ʼui e te tokolahi ʼo ʼuhiga mo toku nefesi: ‘ ʼE mole maʼu hona haofaki mai te ʼAtua.’ ” (Pes. 3:1, 2) Neʼe manatu ia te tokolahi ʼo te hahaʼi ʼo Iselaele ʼe mole haofaki anai e Sehova ia Tavite mai te ʼu malaʼia ʼe tupu mai ia Apisalome pea mo tana ʼu hahaʼi ʼaē neʼe lagolago ki ai.

4, 5. (a) Koteā ʼaē neʼe tui papau ki ai ia Tavite? (b) Koteā te fakaʼuhiga ʼo te kupusiga palalau ia “Ia ʼaē ʼe ina lagaʼi ake toku ʼulu”?

⁴ Kae neʼe fīmālie te loto ʼo Tavite heʼe neʼe falala kātoa ki te ʼAtua. Neʼe hiva fēnei: “Kae ko koe, Ê Sehova ʼe ko taku meʼa tali tau, mo toku kolōlia pea mo Ia ʼaē ʼe ina lagaʼi ake toku ʼulu.” (Pes. 3:3) Neʼe tui papau ia Tavite ʼe puipui anai ia ia e Sehova. ʼEī neʼe feholaʼaki ia te hau ʼi tona temi matuʼa, neʼe ina pūlouʼi tona ʼulu ʼo sio ki lalo ʼo fakahā ai tona lainoa. Kae ko te Māfimāfi ʼe ina fetogi anai te ʼaluʼaga ʼo Tavite ʼo fakakolōliaʼi ia ia. Neʼe fakafealagia e Sehova ke fakatuʼu ake ia ia, ʼo ina toe lagaʼi ake tona ʼulu, pea ke toe tuʼu tonu. ʼE kotou maʼu koa te taʼi falala ʼaia kiā Sehova?

⁵ ʼAki te ʼu palalau ʼaenī ia “Ia ʼaē ʼe ina lagaʼi ake toku ʼulu,” neʼe mahino kiā Tavite ʼe ko Sehova ʼe tokoni anai ki ai. ʼE fakaliliu fēnei te vaega ʼaia ʼi te Tohi-Tapu Today’s English Version: “Kae ko koe Ê ʼALIKI, ʼe ko taku meʼa tali tau mai te ʼu tuʼutāmaki; ʼe ke foaki mai kiā au te mālo pea ʼe ke foaki mai kiā au he lototoʼa.” ʼO ʼuhiga mo te kupusiga palalau ʼaenī ia “Ia ʼaē ʼe ina lagaʼi ake toku ʼulu,” ʼe ʼui fēnei ʼi te tohi: “Kā lagaʼi ake e te ʼAtua . . . ‘he ʼulu’ ʼo he tahi, ʼe ina foaki age ia he  ʼamanaki pea mo he loto fīmālie.” Neʼe lotomamahi ia Tavite ʼi te faʼao fakakinau ʼo tona hekaʼaga fakahau. Kae ko te ‘lagaʼi ake ʼo tona ʼulu’ ʼe fakaʼuhiga anai ki hana toe maʼu ia te lototoʼa, mo he loto fīmālie pea mo hana falala kātoa ki te ʼAtua.

‘ ʼE Tali Anai Ia Sehova!’

 6. He koʼē neʼe fakaʼuhiga e Tavite ke tali age ki tana faikole ʼi te moʼuga taputapu ʼa Sehova?

⁶ ʼI tana falala pea mo tui papau kiā Sehova, neʼe toe hoko atu ia Tavite ʼo ina hivaʼi fēnei: “ ʼAki toku leʼo ʼe au pāui anai kiā Sehova totonu, pea ʼe ina tali mai anai mai tona moʼuga taputapu.” (Pes. 3:4) ʼO mulimuli ki te fakatotonu ʼa Tavite, ko te ʼaleka ʼo te fuakava ʼaē ʼe ina fakafofoga te ʼafio ʼo te ʼAtua neʼe ʼave ki te Moʼuga ʼo Sione. (Lau ia 2 Samuele 15:23-25.) Koia neʼe fakaʼuhiga e Tavite ke tali ki tana faikole ʼi te moʼuga taputapu ʼa Sehova.

 7. He koʼē neʼe mole maʼuli tuʼania ia Tavite?

⁷ ʼI te ʼiloʼi lelei e Tavite ʼe mole fua noa anai tana faikole ʼaē ki te ʼAtua, koia ʼaē neʼe mole tuʼania ai. Koia ʼaē neʼe hiva fēnei ai: “Kiā au ʼe au fia takoto ke au moe, ʼeī ʼe au ʼala ake anai, he ko Sehova totonu pē ʼaē ʼe haga lagolago kiā au.” (Pes. 3:5) Māʼia mo te pōʼuli ʼaē ʼe ko he lakaga ʼe faigafua age ai te hoko ʼo he ʼohofi fakapunamaʼuli, neʼe mole tuʼania ia Tavite ʼi te ʼalu ʼo moe. Neʼe ina ʼiloʼi papau ʼe ʼala ake anai, heʼe ʼi te ʼu ʼaluʼaga ʼaē neʼe hoko kiā ia ʼi te temi muʼa, neʼe tui papau ʼe feala ke falala kātoa ʼe ina maʼu moʼoni anai he tokoni mai te ʼAtua. ʼE lava hoko fēia kiā tātou mo kapau ʼe tou mulimuli ki “te ʼu ala ʼa Sehova” ʼo mole tou fakamamaʼo mai ia ia ʼi he temi.—Lau ia 2 Samuele 22:21, 22.

 8. ʼE hā feafeaʼi iā Pesalemo 27:1-4 ia te falala ʼa Tavite ki te ʼAtua?

⁸ Neʼe ʼiloga te tui papau ʼa Tavite pea mo tana falala kātoa ki te ʼAtua ʼi tana ʼu tahi pesalemo, ʼaē ʼe tou maʼu ai te ʼu palalau ʼaenī: “Ko Sehova ʼe ko toku mālama pea mo toku fakamaʼuli. Ko ai anai ʼe au mataku ai? Ko Sehova te tule mālohi ʼo toku maʼuli. Ko ai anai ʼe au tuʼania ki ai? . . . Kapau ʼe laga e he kūtuga he ʼu falelā ʼo fakafeagai kiā au, ʼe mole tuʼania anai toku loto. . . . Ko te meʼa e tahi neʼe au kole kiā Sehova—ko te meʼa ʼaia ʼaē ʼe au kumi anai: ke au nofo ʼi te fale ʼo Sehova ʼi te ʼaho fuli ʼo toku maʼuli, ke au sio ki te taulekaleka ʼo Sehova pea mo au mamata ʼaki he fakavikiviki ki tona fale lotu.” (Pes. 27:1-4) Kapau ʼe kotou logoʼi te ʼu meʼa ʼaia pea mo kapau ʼe kotou fealagia, ʼe kotou kau tuʼumaʼu anai ʼi te ʼu fono ʼo te kōkelekāsio mo ʼokotou ʼu tehina mo tuagaʼane ʼaē ʼe tauhi kiā Sehova.—Hep. 10:23-25.

9, 10. Logolā te ʼu palalau ʼaē ʼe tuʼu iā Pesalemo 3:6, 7, he koʼē ʼe tou ʼui neʼe mole lagavaka ia Tavite?

⁹ Logolā neʼe tauʼi e Tavite ia te fakafeagai ʼa Apisalome pea mo te tokolahi ʼaē neʼe mole agatonu kiā ia kae neʼe hiva fēnei: “ ʼE mole au tuʼania anai ki te ʼu toko hogofulu afe hahaʼi ʼaē neʼe natou fakaʼatu ʼo fakafeagai mai kiā te au. Tuʼu ake Ê Sehova! Haofaki au Ê toku ʼAtua! Heʼe tonu ke ke tāʼi toku ʼu fili ʼi te kaugao. ʼE tonu ke ke fasifasiʼi te ʼu nifo ʼo te kau agakovi.”—Pes. 3:6, 7.

¹⁰ Neʼe mole lagavaka ia Tavite. Kapau neʼe tonu ‘ke tāʼi tona ʼu fili ʼi te kaugao,’ pea ʼe ko te ʼAtua ʼaē kā ina fakahoko te faʼahi ʼaia. Neʼe tohi e te Hau ko Tavite ʼo ina hiki maʼa ia te Lao pea neʼe mahino kiā ia te faʼahi ʼaia ʼaē neʼe ʼui ai e Sehova: “ ʼA ʼaku te lagavaka, pea mo te totogi.” (Teu. 17:14, 15, 18; 32:35) ʼE toe fakahoko pē foki anai e te ʼAtua ia te ‘fasifasiʼi ʼo te ʼu nifo ʼo te kau agakovi.’ Ko te fasiʼi ʼo te ʼu nifo, ko tona fakaʼuhiga ko te toʼo ʼo tonatou mālohi ke ʼaua naʼa natou fakatupu he mamahi. ʼE ʼiloʼi e Sehova ko ai ia te kau agakovi heʼe “sio ki te loto.” (1 Sam. 16:7) ʼE tonu ke tou loto fakafetaʼi ʼi te foaki mai e te ʼAtua kiā tātou ia te tui mo te mālohi ke tou tuʼu ke maʼu ʼo fakafeagai ki te pule agakovi ʼaē ko Satana, ʼaē kā lī anai ki te vanu ohagē ko he laione ʼe gugulu kae mole kei ʼi ai hona ʼu nifo pea ʼe tuha pē ia ki tona fakaʼauha!—1 Pet. 5:8, 9; Fakh. 20:1, 2, 7-10.

“Ko Te Haofaki ʼe ʼa Sehova”

11. He koʼē ʼe tonu ke tou hūfakiʼi totatou ʼu tehina mo tuagaʼane?

¹¹ Neʼe mahino kiā Tavite ʼe ko Sehova tokotahi pē ʼe ina lava foaki age kiā ia te haofaki ʼaē neʼe ʼaoga tāfito kiā ia. Kae neʼe mole manatu pē te tagata pesalemo kiā ia totonu. Kae ʼe feafeaʼi ki te hahaʼi kātoa ʼaē neʼe ʼofa ki ai ia Sehova? Neʼe fakaʼosi lelei e Tavite tana tohi ʼaki te ʼu palalau ʼaenī: “Ko te haofaki ʼe ʼa Sehova. ʼE ina tapuakinaʼi tana hahaʼi.” (Pes. 3:8) ʼE moʼoni neʼe lahi te ʼu fihifihia neʼe tau mo Tavite, kae ʼi tona fai māhani  ʼe ina manatuʼi te hahaʼi ʼa Sehova pea mo falala ʼe tapuakinaʼi anai ia nātou e te ʼAtua. ʼE mole koa lā tonu mo tātou ke tou manatuʼi totatou ʼu tehina mo tuagaʼane? Tou manatuʼi ia nātou ʼi tatatou ʼu faikole, ʼo tou kole kiā Sehova ke ina foaki age kiā nātou tona laumālie māʼoniʼoni ke natou lototoʼa pea mo natou gāue ʼaki he loto falala ki te tala ʼo te logo lelei.—Efe. 6:17-20.

12, 13. Koteā ʼaē neʼe hoko kiā Apisalome, pea neʼe feafeaʼi ia Tavite ʼi tana maʼu te logo ʼuhiga mo te mate ʼo tona foha?

¹² Neʼe mate fakalainoa ia Apisalome—ko he fakatokaga kiā nātou fuli ʼaē ʼe natou gaohi koviʼi ʼihi, tāfito ia nātou ʼaē neʼe fakanofo e te ʼAtua ohagē ko Tavite. (Lau ia Tāʼaga Lea 3:31-35.) ʼI temi ʼaē neʼe hoko ai te tau, neʼe tō te kautau ʼa Apisalome. ʼI te hola ʼa Apisalome ʼi te ʼāsino neʼe fakalaka ʼi te ʼu lalo vaʼa ʼakau ʼo te fuʼu ʼakau maga lua. Pea neʼe tautau ai tona ʼulu—ko tona maʼuli neʼe mole i ai he tahi neʼe tokoni age ki ai—ʼo kaku ki tona matehi e Soape, neʼe ina hokaʼi tona mafu ʼaki te ʼu tao e tolu.—2 Sam. 18:6-17.

¹³ Neʼe fiafia koa ia Tavite ʼi tana ʼiloʼi te meʼa ʼaē neʼe hoko ki tona foha? Kailoa ia. Neʼe feʼaluʼaki ʼi te koga fale ʼo tagi pea mo kalaga fēnei: “Toku foha ko Apisalome, toku foha, toku foha ko Apisalome! Â he koʼē neʼe mole au mate au kae ke maʼuli koe, Apisalome toku foha, toku foha!” (2 Sam. 18:24-33) Kae ʼaki te ʼu palalau ʼaē neʼe fai age e Soape kiā Tavite, neʼe feala ai leva ke malū ifo te toe mamahi lahi ʼaē neʼe nofo mo Tavite ki tona foha. ʼI fakaʼofaʼofa leva ʼo te fakaʼosi ʼo te maʼuli ʼo Apisalome, heʼe ʼi tona fialahi neʼe fakafeagai ki tana tamai ʼaē neʼe fakanofo e Sehova, ʼo ina fakatupu pē ʼe ia totonu ia tona maʼuli mamahi!—2 Sam. 19:1-8; Taag. 12:21; 24:21, 22.

ʼE Toe Fakahā e Tavite Tana Falala ʼAē Ki Te ʼAtua

14. Koteā te manatu ʼe tou maʼu ʼo ʼuhiga mo te 4 Pesalemo?

¹⁴ Ohagē pē ko te 3 Pesalemo, ko te 4 Pesalemo ʼe ko he faikole fakamālotoloto ʼe fakahā lelei ai e Tavite tana falala kātoa kiā Sehova. (Pes. 3:4; 4:3) Neʼe lagi tohi e Tavite te hiva ʼaia mo fakahā te fīmālie pea mo tana loto fakafetaʼi ʼaē ki te ʼAtua ʼi te hili pē ʼo te tō noa ʼo te agatuʼu ʼa Apisalome kiā ia. Peʼe neʼe lagi ina tohi te hiva ʼaia ʼo ina manatuʼi ia te kau hiva Levite. Ko te meʼa pē ʼaē ʼe tou ʼiloʼi papau, mokā tou metitāsio ki te faikole ʼaia ʼe feala ai ke mālohi tatatou falala ʼaē kiā Sehova.

15. He koʼē ʼe feala ke tou falala ʼo tou faikole kiā Sehova ʼaki tona ʼAlo?

¹⁵ Neʼe toe fakahā e Tavite tana falala kātoa ki te ʼAtua pea ina fakahā ai ʼe tui papau ʼe fagono pea mo tali e te ʼAtua tana ʼu faikole. Neʼe hiva fēnei: “Kā au pāuiʼi tali mai Ê toku ʼAtua faitotonu! ʼI te mamahi ʼe tonu ke ke teuteuʼi he toe nofoʼaga moʼoku. Fakahā mai tou ʼofa pea mo fagono mai ki taku faikole.” (Pes. 4:1) ʼE feala ke maʼu te loto falala ʼaia mo kapau ʼe tou maʼuliʼi te faitotonu. ʼI tatatou ʼiloʼi ʼaē ko Sehova ko te “ ʼAtua faitotonu” ʼe ina tapuakina tana hahaʼi agatonu, ʼe feala ke tou falala ʼo tou faikole kiā Sehova ʼaki tona ʼAlo, ʼo tou tui ki te sākilifisio faitotogi ʼa Sesu. (Soa. 3:16, 36) ʼE ko he fakafīmālie ʼaia ʼe tou maʼu ai!

16. Koteā ʼapē ʼaē neʼe lagi lotovaivai ai ia Tavite?

¹⁶ ʼI ʼihi temi ʼe lagi ʼe tou tau mo he ʼaluʼaga fakalotovaivai ʼe feala ai ke puli iā tātou ia te loto falala. Neʼe lagi hoko moʼoni he ʼaluʼaga fakatemi fēia kiā Tavite, he neʼe hiva fēnei: “ ʼU foha ʼo te ʼu tagata, ʼe kaku ki ʼāfea ʼaē ʼe tonu ai anai ke liliu toku kolōlia ko he meʼa ʼe laukoviʼi, kae kotou haga ʼofa aipē ki te ʼu meʼa ʼe vaʼiganoa pea mo kotou haga kumi aipē te loi?” (Pes. 4:2) Ko te kupusiga palalau “ ʼu foha ʼo te ʼu tagata” ʼe fakaʼuhiga tāfito ki te hahaʼi kae ʼi hona ʼaluʼaga ʼe mole lelei. Ko te ʼu fili ʼo Tavite neʼe natou ‘ ʼoʼofa ki te ʼu meʼa ʼe vaʼiganoa.’ Neʼe fakaliliu fēnei ʼi te Tohi-Tapu New International Version: “ ʼO kaku ki ʼāfea takotou  ʼoʼofa ki te meʼa ʼe mole moʼoni pea mo kotou kumi te ʼu ʼatua loi?” Tatau aipē peʼe tou lotovaivai ʼuhi ko te ʼu aga ʼaē ʼe fai e ʼihi, kae ko tātou ʼe tou haga faikole fakamālotoloto pea mo fakahā ʼe tou falala kātoa ki te ʼAtua moʼoni pē e tahi.

17. Kotou fakamahino peʼe tonu ke feafeaʼi tatatou aga ke mulimuli kiā Pesalemo 4:3.

¹⁷ ʼE ʼiloga lelei te falala ʼaē ʼa Tavite ki te ʼAtua ʼi tana ʼu palalau ʼaenī: “Koia kotou ako ʼe ko Sehova ʼe ina fakakeheʼi anai tana tagata agatonu; ko Sehova totonu ʼe fagono mai anai ʼi te temi ʼaē ʼe au pāui anai ki ai.” (Pes. 4:3) Ke tou haga nonofo ia Sehova, ʼe fakamaʼua mai ke tou maʼu ia te lototoʼa pea mo te falala kātoa ʼaē kiā te ia. Ohagē lā ʼe ʼaoga te ʼu kalitātē ʼaia ki he fāmili Kilisitiano kua fakamavae he tahi ʼi tona loto fale neʼe mole fakahemala. ʼE tapuakina e Sehova ia nātou ʼaia ʼaē ʼe nonofo agatonu kiā te ia pea mo tona ʼu ala. Pea ko te nofo agatonu pea mo te falala kātoa ʼaē kiā Sehova ʼe fakatupu ai te fiafia ʼi tana hahaʼi.—Pes. 84:11, 12.

18. ʼO ʼalutahi mo te Pesalemo 4:4, koteā ʼaē ʼe tonu ke tou fai mo kapau ʼe fai mai kiā tātou he ʼu palalau peʼe ko he aga ʼe kovi?

¹⁸ Koteā ʼaē kā tou fai mo kapau neʼe fai mai e he tahi ia he ʼu palalau peʼe ko he aga neʼe tou lotomamahi ai? ʼE feala ke tou taupau totatou fiafia mo kapau ʼe tou mulimuli ki te meʼa ʼaē neʼe ʼui Tavite: “Kotou hoha, kae ʼaua naʼa kotou agahala. Kotou palalau ʼi tokotou loto, ʼi tokotou moeʼaga, pea kotou nonofo fakalogologo.” (Pes. 4:4) Kapau neʼe fai mai he ʼu palalau peʼe ko he aga ʼe kovi kiā tātou, ʼaua naʼa tou agahala ʼo tou liufaki te kovi ʼaki te kovi. (Loma 12:17-19) ʼE feala ke tou fakahā te ʼu meʼa ʼaē ʼe tou logoʼi ʼi te temi ʼaē ʼe tou faikole tokotahi ai ʼi totatou moeʼaga. Kapau ʼe tou faikoleʼi te faʼahi ʼaia, ʼe lagi fetogi tatatou faʼahiga sio pea ʼe uga ai tātou ke tou fakamolemole ʼi te ʼofa. (1 Pet. 4:8) ʼE lelei ke tou fakatokagaʼi te tokoni ʼa te ʼapositolo ko Paulo ʼaē ʼe fakatafito ki te Pesalemo 4:4: “Kotou ʼiʼita, kae ʼaua naʼa kotou agahala; ke ʼaua naʼa tō te laʼā ki tokotou ʼita. Pea ʼaua naʼa kotou tuku he faigamālie ki te Tēvolo.”—Efe. 4:26, 27.

19. ʼE feala ke tokoni feafeaʼi mai kiā tātou ia Pesalemo 4:5 ʼo ʼuhiga mo tatatou tauhi ʼaē ki te ʼAtua?

¹⁹ ʼI tana fakahā lelei mai te ʼaoga ʼaē ke tou falala ki te ʼAtua, neʼe hiva fēnei Tavite: “Kotou momoli te ʼu sākilifisio ʼo te faitotonu, pea mo kotou tuku takotou falala kiā Sehova.” (Pes. 4:5) Ko te ʼu  sākilifisio ʼaē neʼe momoli e te kau Iselaele neʼe hoki tali leleiʼi mo kapau neʼe natou maʼu he ʼu fakakaukau ʼe lelei. (Isa. 1:11-17) Ke leleiʼia tatatou tauhi ʼaē ki te ʼAtua, mo tātou foki ʼe tonu ke tou maʼu he ʼu fakakaukau ʼe lelei pea mo tou falala kātoa kiā te ia.—Lau ia Tāʼaga Lea 3:5, 6; Hepeleo 13:15, 16.

20. Koteā te fakaʼuhiga ʼo ‘te mālama ʼo te fofoga ʼo Sehova’?

²⁰ Neʼe toe hoko atu ia Tavite ʼo ʼui fēnei: “ ʼE ʼui e te tokolahi: ‘Ko ai anai kā ina fakahā mai te meʼa ʼaē ʼe lelei?’ Fakatuʼu kiā mātou ia te mālama ʼo tou fofoga Ê Sehova.” (Pes. 4:6) Ko ‘te mālama ʼo te fofoga ʼo Sehova’ ʼe fakaʼuhiga ki te ʼofa ʼo te ʼAtua. (Pes. 89:15) Koia ʼaē ʼi te faikole fēnei ʼa Tavite: “Fakatuʼu kiā mātou ia te mālama ʼo tou fofoga,” ko tona fakaʼuhiga ‘Ke ke ʼofa mai kiā mātou.’ Mai tona ʼaluʼaga ʼaē ʼe tou falala kiā Sehova, ʼe ʼofa mai kiā tātou pea mo fiafia lahi heʼe tou fakahoko tona finegalo mo he loto fīmālie.

21. Koteā ʼaē ʼe tou tui papau kiai mokā tou kau kātoa iā ʼaho nei ki te taʼukai fakalaumālie?

²¹ ʼI tana fakatalitali ʼaē ki te fiafia ʼe haʼu mai te ʼAtua ʼe fakalaka age ʼi te fiafia ʼe logoʼi ʼi te ʼu temi taʼukai, neʼe hiva fēnei ia Tavite kiā Sehova: “ ʼE mahino papau ia, ʼe ke ʼai anai ia te fiafia ki toku loto, ʼe lahi age ʼi te fiafia ʼo te temi ʼaē neʼe mahu ai tanatou ʼu pulapula pea mo tanatou vino foʼou.” (Pes. 4:7) ʼE tou ʼiloʼi papau ʼe fiafia totatou loto mokā tou kau kātoa iā ʼaho nei ki te taʼukai fakalaumālie, ia te fai fakamafola. (Luka 10:2) ʼAki ‘te puleʼaga ʼaia kua hahaʼi’ ʼa te kau Kilisitiano fakanofo ʼaē ʼe natou takitaki te gāue, ʼe tou fiafia iā ʼaho nei ki te tuputupu ʼo kaugamālie ia te ‘kau gāue ʼo te taʼukai.’ (Isa. 9:3) ʼE kotou lagolago mālohi koa ki te taʼukai fakafiafia ʼaia?

Tou Tui Papau ʼo Tou Haga Faiga ʼAki He Falala Kātoa Ki Te ʼAtua

22. ʼO ʼalutahi mo te Pesalemo 4:8, neʼe feafeaʼi te maʼuli ʼa te kau Iselaele ʼi te temi ʼaē neʼe natou taupau maʼu ai te Lao ʼa te ʼAtua?

²² Neʼe fakaʼosi e Tavite te pesalemo ʼaia ʼaki te ʼu palalau ʼaenī: “ ʼE au fia takoto ʼi te tokalelei pea mo moe ai, he ko koe tokotahi pē, Ê Sehova, ʼe ke fakanofo au ʼi te fīmālie.” (Pes. 4:8) ʼI te temi ʼaē neʼe taupau maʼu e te kau Iselaele ia te Lao ʼa Sehova, neʼe natou maʼuli tokalelei pea mo maʼuli fīmālie. Ohagē lā ko ‘Suta mo Iselaele neʼe nā maʼuli fīmālie’ lolotoga te temi ʼo te ʼafioʼaga ʼo Salomone. (1 Hau 4:25) Ko nātou ʼaē neʼe falala ki te ʼAtua neʼe natou maʼuli tokalelei, tatau aipē peʼe neʼe agakovi te ʼu puleʼaga ʼi te ʼu tafaʼaki. Ohagē ko Tavite ʼe tou momoe fīmālie heʼe ko te ʼAtua ʼe ina foaki mai te fīmālie.

23. Koteā ʼaē kā tou maʼu anai mokā tou falala kātoa ki te ʼAtua?

²³ Tou tui papau ʼo tou haga faiga ʼi te gāue ʼaē kiā Sehova. ʼOfa pē mo tātou ke tou faikole ʼi te tui pea tou maʼu ai ia “te tokalelei ʼo te ʼAtua, ʼaē ʼe māʼoluga ake ʼi te ʼu manatu fuapē.” (Filp. 4:6, 7) ʼE ko he toe fiafia lahi pea mo he maʼuli fīmālie ʼe tou maʼu! Pea ʼe mahino ia, ʼe feala ke tou ʼamanaki ki te kā haʼu ʼo tou tui papau mo kapau ʼe tou taupau tatatou falala kātoa kiā Sehova.

ʼE Kotou Tali Feafeaʼi Anai?

• Koteā te ʼu fihifihia neʼe tau mo Tavite ʼuhi ko Apisalome?

• ʼE tou maʼu feafeaʼi he fīmālie ʼi te 3 Pesalemo?

• Ko te ʼu ʼaluʼaga fea ʼe feala ke mālohi ai tatatou falala ʼaē kiā Sehova ʼi te 4 Pesalemo?

• Koteā te ʼu fua lelei ʼe tou maʼu mokā tou falala kātoa ki te ʼAtua?

[ʼU fehuʼi ʼo te ako]

[Paki ʼo te pasina 31]

Māʼia mo te temi ʼaē neʼe feholaʼaki ai ia Tavite iā Apisalome, neʼe haga falala aipē kiā Sehova

[Paki ʼo te pasina 32]

ʼE kotou falala kātoa kiā Sehova?