‘Kotou Tōkakaga Ki Te Faga Ovi ʼa Te ʼAtua ʼAē Neʼe Tuku Atu Ke Kotou Taupau’

“Kotou fafaga te faga ovi ʼa te ʼAtua ʼaē neʼe tuku atu ke kotou taupau, ʼo mole kotou fai ʼaki he fakamaʼua, kae ʼaki he lotolelei.”—1 PET. 5:2.

 1. Koteā te ʼu ʼaluʼaga ʼaē neʼe tau mo te kau Kilisitiano ʼi te temi ʼaē neʼe fai ai e Petelo ia tana ʼuluaki tohi?

 ʼI MUʼA ʼo te temi ʼaē neʼe fakatagaʼi ai e Nelone ia te kau Kilisitiano ʼi Loma, neʼe tohi e te ʼapositolo ko Petelo ia tana ʼuluaki tohi. Neʼe ina fia fakalotomālohiʼi ia tona ʼu tehina mo tuagaʼane fakalaumālie, heʼe ʼi te temi tonu ʼaia neʼe faigaʼi e te Tēvolo ke ina ʼohofi ia te kau Kilisitiano. Koia ke natou lava fakafeagai ki te Tēvolo, neʼe ʼaoga ai ke natou “nonofo tōkakaga” pea mo natou “agavaivai ʼi te lalo nima mālohi ʼo te ʼAtua.” (1 Pet. 5:6, 8) Neʼe toe ʼaoga foki kiā nātou ke natou maʼuli ʼi te logotahi. Neʼe mole ko he temi ʼaia kiā nātou ke natou “feʼusiʼusiʼaki pea mo fekaiʼaki” he neʼe feala ke natou ‘femaumauʼiʼaki iā nātou.’—Kal. 5:15.

2, 3. Ko ai ʼaē ʼe tonu ke tou tauʼi pea koteā ʼaē kā tou vakaʼi anai?

² Iā ʼaho nei, ʼe tou felāveʼi mo he ʼaluʼaga fēia. ʼE kumi e te Tēvolo he ʼu faigamālie ke ina ʼohofiʼi ai tātou. (Fakh. 12:12) Pea kua ʼamanaki hoko mai ia te “mamahi lahi, ʼaē ʼe mole hona tatau kua hoko talu mai te kamataʼaga ʼo te mālamanei.” (Mat. 24:21) Ohagē ko te kau Kilisitiano ʼo te ʼuluaki sēkulō ʼaē neʼe tonu ke natou tōkakaga naʼa natou fetauʼaki pē, ʼe tonu mo tātou ʼi te temi nei ke mole tou fetauʼaki. Ke tou fai ia te faʼahi ʼaia, ʼi ʼihi temi ʼe ʼaoga kiā tātou te tokoni ʼaē ʼa te ʼu tagata ʼāfea kua fakapotopoto ʼi te faʼahi fakalaumālie.

³ Tou vakaʼi age muʼa peʼe koteā ʼaē ʼe lava fai e te kau tagata ʼāfea ke lahi age ia tanatou loto fakafetaʼi ki te pilivilēsio ʼaē ko tanatou tōkakaga ki ‘te faga ovi ʼa te ʼAtua ʼaē neʼe tuku age kiā nātou ke natou taupau.’ (1 Pet. 5:2) Koia ʼe tou talanoa anai ki te faʼahiga fakahoko lelei ʼaē ʼo te gāue fakatauhi ovi. ʼI te ʼalatike ʼaē kā hoa mai, ʼe tou vakaʼi ai anai peʼe koteā ʼaē ʼe lava fai e te kōkelekāsio ke natou ‘aga fakaʼapaʼapa kiā nātou ʼaē ʼe gāue kinakina pea mo takitaki’ te faga ovi. (1 Tes. 5:12) Ko tatatou vakaʼi te ʼu manatu ʼaia, ʼe tokoni mai anai kiā tātou ke tou lava fakafeagai ki totatou Fili lahi, ʼo tou fakahā ai ʼe ko ia ʼaē ʼe tou tauʼi.—Efe. 6:12.

Kotou Tōkakaga Ki Te Faga Ovi ʼa Te ʼAtua

4, 5. ʼE tonu ke feafeaʼi te manatu ʼa te ʼu tagata ʼāfea ʼo ʼuhiga mo te faga ovi? Kotou tuku mai he faʼifaʼitaki.

⁴ Neʼe fakalotomālohiʼi e Petelo ia te ʼu tagata ʼāfea ʼo te kau Kilisitiano ʼo te ʼuluaki sēkulō, ke natou maʼu te manatu ʼa te ʼAtua ʼo ʼuhiga mo te faga ovi ʼaē neʼe tuku age kiā nātou. (Lau 1 Petelo 5:1, 2.) Logolā neʼe ʼui ko Petelo ʼe ko he pou ʼi te kōkelekāsio, kae neʼe mole hā ʼi tana ʼu palalau ʼaē neʼe ina fai ki te ʼu tagata ʼāfea neʼe fialahi, he neʼe ina fakalotomālohiʼi pē nātou ohagē ko hona ʼu tehina tagata ʼāfea. (Kal. 2:9) Ohagē pē ko Petelo, iā ʼaho nei ʼe uga e te Kolesi Pule te ʼu tagata ʼāfea ʼo te kōkelekāsio ke natou fakahoko fakalelei ia tonatou maʼua maʼuhiga ʼaē ko te tokaga ki te faga ovi ʼa te ʼAtua.

⁵ Neʼe tohi ʼe te ʼapositolo, ʼe tonu ki te ʼu tagata ʼāfea ke natou ‘tōkakaga ki te faga ovi ʼa te ʼAtua.’ Neʼe ʼaoga tāfito ke mahino kiā nātou, ʼe ʼa Sehova pea mo Sesu Kilisito ia te faga ovi. Neʼe feala pē ke fakaʼuhiga ʼe tonu ke fakamatala e te ʼu tagata ʼāfea ki te ʼAtua ia tanatou faʼahiga tokaga ʼaē ki tana faga ovi. Ohagē lā, kotou fakakaukauʼi age muʼa te faʼifaʼitaki ʼaenī: ko hokotou kaumeʼa ʼe ina kole atu ke kotou taupau ia tana ʼu tamaliki ʼi te temi ʼaē ʼe puli ai. ʼE lagi kotou tokaga fakalelei anai kiā nātou pea mo kotou fafaga nātou. Kapau neʼe mahaki he tahi, ʼe lagi kotou tokaga anai ki ai ke ina maʼu hona faitoʼo lelei. ʼE toe fēia pē ki te ʼu tagata ʼāfea ʼo te kōkelekāsio, ʼe tonu ke natou “fafaga te kōkelekāsio ʼa te ʼAtua, ʼaē neʼe ina totogi ʼaki te taʼataʼa ʼo tona ʼAlo totonu.” (Gāue 20:28) ʼE manatuʼi e te ʼu tagata ʼāfea neʼe totogi ia te ovi takitahi e te taʼataʼa maʼa ʼo Kilisito Sesu. Mai tona ʼaluʼaga ʼaē neʼe ko te ʼAtua ʼaē neʼe ina tuku ki te ʼu  tagata ʼāfea te maʼua ʼaē ke natou tōkakaga ki te faga ovi, koia ʼe natou fafaga ai te faga ovi, mo puipui nātou pea mo taupau ia nātou.

 6. Koteā te ʼu gāue ʼaē neʼe tonu ke fai e te ʼu tauhi ovi ʼo te temi muʼa?

⁶ Kotou fakakaukauʼi age muʼa te ʼu gāue ʼaē neʼe tonu ke fai e te ʼu tagata tauhi ovi ʼo te temi muʼa. Moʼo taupau te faga ovi, neʼe tonu ke natou kātakiʼi te vevela ʼo te ʼaho pea mo te momoko ʼo te pōʼuli. (Sen. 31:40) Neʼe natou toe tali ke tuʼutāmakiʼia ia tonatou maʼuli moʼo haofaki te faga ovi. Ko te tama tauhi ovi ko Tavite, neʼe ina haofaki e ia tana faga ovi mai te ʼu manu fekai, ʼo kau ai ia te laione pea mo te uluso. ʼO ʼuhiga mo te faʼahi ʼaia, neʼe ʼui e Tavite ‘neʼe ina puke te kava ʼo te laione mo taʼi, pea mo matehi.’ (1 Sam. 17:34, 35) ʼI tama toʼa leva! ʼE lagi neʼe feōvi ʼosi ia mo te kaulamu ʼo te manu fekai ʼaia! Kae neʼe ina fai ia meʼa fuli neʼe ina lavaʼi moʼo haofaki ia tana ovi.

 7. ʼI hona ʼaluʼaga fakatā, ʼe lava toʼo feafeaʼi mai e te ʼu tagata ʼāfea ia he ovi mai te kaulamu ʼo Satana peʼe ko tana ʼu fakahala?

⁷ Iā ʼaho nei, ʼe tonu mo te ʼu tagata ʼāfea ke natou puipui te faga ovi mai te ʼu ʼohofi ʼa te Tēvolo ʼaē ʼe hagē ko he laione. ʼE lagi kotou tokoniʼi anai ni ʼu tehina neʼe mole nofo tokaga ʼi te faʼahi fakalaumālie pea neʼe tō ki te ʼu fakahala ʼa Satana. (Lau ia Suta 22, 23.) ʼE mahino ia, ʼe hoki lava fakahoko te gāue ʼaia e te ʼu tagata ʼāfea ʼaki te tokoni ʼa Sehova. ʼE natou gaohi fakalelei he ovi neʼe lavea, ʼo natou haʼi tona ʼu mataʼi lavea pea mo faitoʼo ʼaki te lolo fakafīmālie ʼaē ko te Folafola ʼa te ʼAtua.

 8. ʼE taki te faga ovi ki fea e te ʼu tagata ʼāfea, pea ʼe natou fakahoko feafeaʼi te faʼahi ʼaia?

⁸ Ko te tagata tauhi ovi neʼe ina toe taki foki ia tana faga ovi ki te ʼu koga meʼa lunaʼia pea ʼe maʼu ai mo hanatou meʼa ʼinu. ʼE toe fēia mo te ʼu tagata ʼāfea, ʼe natou taki mai te faga ovi ki te kōkelekāsio, pea ʼe natou fakalotomālohiʼi ia nātou ke natou kau tuʼumaʼu ki te ʼu fono, heʼe fafaga fakalelei ai nātou ʼi te faʼahi fakalaumālie pea mo natou maʼu ai “tanatou meʼa kai ʼi tona temi totonu.” (Mat. 24:45) ʼE lagi tonu anai ki te ʼu tagata ʼāfea ke natou fakaʼaogaʼi he temi ʼe lahi age, moʼo fakapelepeleʼi ia nātou ʼaē ʼe māhahaki ʼi te faʼahi fakalaumālie, ke natou tali te meʼa kai ʼaē ʼe haʼu mai te Folafola ʼa te ʼAtua. ʼE lagi faigaʼi e he ovi neʼe hēhē ke toe liliu mai ki te faga ovi. ʼE mole fai e te ʼu tagata ʼāfea he ʼu palalau moʼo fakamatakuʼi tonatou tehina ʼo ʼuhiga mo tona ʼu vaivaiʼaga, kae ʼaki te ʼofa, ʼe natou fakamahino age te ʼu pelesepeto Fakatohi-tapu, pea mo fakahā ki ai peʼe feafeaʼi hana maʼuliʼi te ʼu pelesepeto ʼaia ʼi tona maʼuli.

9, 10. Koteā ʼaē ʼe tonu ke fai e te ʼu tagata ʼāfea moʼo tokaga kiā nātou ʼaē ʼe māhahaki ʼi te faʼahi fakalaumālie?

 ⁹ Kā kotou mahaki, ko ai koa te faʼahiga tōketā ʼaē kā kotou loto anai ki ai? Ko he tahi koa ʼe ina vākai koutou ʼi he kiʼi temi siʼi pē, pea mo ina tohi fakavilivili atu he ʼu faitoʼo kae ke ʼāteaina lā ke feala hana vākai he tahi age mahaki? Peʼe lagi kotou ʼolo anai ki he tōketā ʼe tokaga lelei atu ki takotou ʼu fakamahino age tokotou mahaki, mo ina fakahāhā lelei atu te ʼaluʼaga ʼo tokotou mahaki pea mo ina foaki atu leva te ʼu faitoʼo ʼaē ʼe ʼaoga ki tokotou mahaki? ʼI ʼihi temi, ʼe mole ko te ikuʼaga ʼo he meʼa ʼaē ʼe maʼuhiga age, kae ko te faʼahiga fai ʼaē ʼo te palalau pea mo te faʼahiga fai ʼaē ʼo he meʼa, ʼaē ʼe maʼuhiga tāfito age.

¹⁰ ʼE toe fēia pē ki te ʼu tagata ʼāfea, ʼe feala ke natou fagono ki he tahi ʼe mahaki ʼi te faʼahi fakalaumālie pea mo fakafīmālieʼi tona ʼu mamahi, heʼe kapau ʼe natou fai te faʼahi ʼaia, pea ʼe hagē pē ʼe natou “tākai ia ia ʼaki te lolo ʼi te huafa ʼo Sehova.” (Lau ia Sake 5:14, 15.) Ohagē ko te lolo magoni ʼo Kileate, ʼe feala ki te Folafola ʼa te ʼAtua ke ina fakafīmālie ia ia ʼaē ʼe mahaki. (Sel. 8:22; Esk. 34:16) Kā maʼuliʼi te ʼu pelesepeto Fakatohi-tapu e ia ʼaē kua vaivai fakalaumālie pea ʼe tokoni anai ki ai ke toe mālohi ʼi te faʼahi fakalaumālie. ʼEī, kā tokagaʼi e te ʼu tagata ʼāfea te ʼu fihifihia ʼo te tehina mo te tuagaʼane ʼaē ʼe mahaki ʼi te faʼahi fakalaumālie, pea mo natou faikole mo ia, ʼe fua lelei anai kiā ia ʼaia.

ʼAua Tona Fai ʼAki He Fakamaʼua Kae ʼAki He Lotolelei

11. Koteā ʼaē ʼe ina uga te ʼu tagata ʼāfea ke natou tōkakaga ʼaki he lotolelei ki te faga ovi ʼa te ʼAtua?

¹¹ Neʼe toe fakamanatuʼi age e Petelo ki te ʼu tagata ʼāfea te ʼu meʼa ʼaē ʼe tonu ke natou fai ʼo ʼuhiga mo tanatou gāue fakatauhi ovi pea mo te ʼu meʼa ʼaē ʼe mole tonu ke natou fai. ʼE tonu ki te ʼu tagata ʼāfea ke natou tōkakaga ki te faga ovi ʼa te ʼAtua, “ ʼo mole [natou] fai ʼaki he fakamaʼua, kae ʼaki he lotolelei.” Koteā ʼaē kā ina uga ia te ʼu tagata ʼāfea ke natou tauhi ʼonatou tehina ʼaki he lotolelei? Koia, koteā ʼaē neʼe ina uga ia Petelo ke tokaga pea mo fafaga te ʼu ovi ʼa Sesu? Neʼe ko tona ʼofa mamahi ʼaē ki te ʼAliki. (Soa. 21:15-17) ʼI te ʼofa ʼaē ʼa te ʼu tagata ʼāfea ki tonatou ʼAliki, koia ʼaē ʼe “mole [kei] natou māʼuʼuli maʼa nātou totonu pē, kae maʼa ia ʼaē neʼe mate maʼa nātou.” (2 Ko. 5:14, 15) Ko te ʼofa ʼaia, ʼo fakatahiʼi mai kiai tonatou ʼofa ki te ʼAtua pea mo tonatou ʼu tehina, ʼaē ʼe ina uga te ʼu tagata ʼāfea ke natou tauhi te faga ovi, ʼo natou fakaʼaogaʼi tonatou ʼu fealagia, mo te ʼu koloa pea mo tonatou temi ke natou fai ia te faʼahi ʼaia. (Mat. 22:37-39) ʼE natou fakamuʼamuʼa ʼonatou tehina iā nātou totonu pē ʼo mole natou fai ʼaki he lotomamahi kae ʼaki he lotolelei.

12. ʼE feafeaʼi te fakamuʼamuʼa ʼaē e Paulo ia te faga ovi iā ia totonu pē?

¹² ʼE feafeaʼi te fakamuʼamuʼa ʼaē e te ʼu tagata ʼāfea ia te faga ovi iā nātou totonu pē? ʼI te tokaga ʼaē ʼa te ʼu tagata ʼāfea ki te faga ovi ʼe natou muliʼi te faʼifaʼitaki ʼa te ʼapositolo ko Paulo, ʼaē mo ia pē foki neʼe ina toe muliʼi te faʼifaʼitaki ʼa Sesu. (1 Ko. 11:1) ʼI te ʼofa mamahi ʼaē ʼa Paulo mo tona ʼu tehina ki te ʼu tehina mo tuagaʼane ʼaē ʼo Tesalonika, neʼe mole natou fiafia pē ʼi tanatou fakahā age kiā nātou ‘te logo lelei ʼo te ʼAtua, kae neʼe natou toe foaki age kiā nātou mo ʼonatou nefesi totonu.’ ʼI tanatou fai ia te faʼahi ʼaia, neʼe natou agamalū “ohagē ko he faʼē ʼe tokaga fakalelei ki tana fānau ʼaē ʼe ina fafaga.” (1 Tes. 2:7, 8) Neʼe mahino ia Paulo ki te meʼa ʼaē neʼe logoʼi e te loto ʼo he faʼē ʼe tokaga fakalelei ki hana fānau. ʼE ina fai anai ia meʼa fuli ʼe ina lavaʼi maʼa nātou, ʼe feala pē hana ʼala ʼi te pōʼuli ʼo fafaga tana fānau.

13. Koteā ʼaē ʼe tonu ke fakaʼaogaʼi fakapotopoto e te ʼu tagata ʼāfea?

¹³ ʼE tonu ki te ʼu tagata ʼāfea ke natou fakaʼaogaʼi fakapotopoto tonatou temi ʼaē ki tanatou ʼu gāue fakatauhi ovi pea mo tonatou ʼu maʼua fakafāmili. (1 Tim. 5:8) Ko te temi ʼaē ʼe fakaʼaogaʼi e te ʼu tagata ʼāfea ki te kōkelekāsio ʼe ko he toe temi maʼuhiga ʼaia neʼe feala ke natou fakaʼaogaʼi maʼa tonatou fāmili. Ko he puleʼaki lelei ki te faʼahi ʼaia, ke natou fakaafe niʼihi ʼi ʼihi temi ki tanatou Tauhi Fakafāmili ʼi te afiafi. Talu mai fualoa, ko te tagata ʼāfea ko Masanao ʼi Saponia neʼe ina fakaafe ki tana ako fakafāmili ia te kau selipatea pea mo te ʼu fāmili ʼaē ʼe hala mo tamai ʼi te faʼahi fakalaumālie ki tana ako fakafāmili. ʼAki te temi ko ʼihi iā nātou ʼaia, neʼe natou liliu mo nātou ko te ʼu tagata ʼāfea pea neʼe natou muliʼi ia te faʼifaʼitaki ʼaia neʼe tuku age e Masanao.

ʼAua Tona Fai Ke Maʼu ʼAki Ai Hakotou Meʼa, Kae Fai ʼAki He Faʼafai

14, 15. He koʼē ʼe tonu ki te ʼu tagata ʼāfea ke natou tōkakaga naʼa natou fai tanatou gāue ʼaki ‘te holi ʼaē ke maʼu hanatou meʼa,’ pea he koʼē ʼe lelei ke natou muliʼi ia te faʼifaʼitaki ʼa Paulo ʼo ʼuhiga mo te faʼahi ʼaia?

¹⁴ Neʼe toe fakalotomālohiʼi e Petelo ia te ʼu tagata ʼāfea ke natou tōkakaga ki te faga ovi, ‘ ʼo mole natou  fai ke maʼu ʼaki ai hanatou meʼa, kae ke natou fai ʼaki he faʼafai.’ ʼE lahi ʼaupitō te temi ʼaē ʼe fakamaʼua ki te gāue ʼaē ʼe fakahoko e te ʼu tagata ʼāfea, kae ʼe mole natou fakaʼamu nātou ke totogi age tanatou ʼu gāue ʼaia. Neʼe mahino kiā Petelo te ʼaoga ʼaē ke ina fakatokaga te ʼu tagata ʼāfea naʼa natou tokaga ki te faga ovi ke natou ‘maʼu ai hanatou meʼa.’ ʼE hā lelei ia te taʼi agakovi ʼaia, ʼi te maʼuli koloaʼia ʼaē ʼe maʼu e te kau takitaki lotu ʼo “Papiloni Lahi,” kae tokolahi te hahaʼi ʼe natou māʼuʼuli māsisiva. (Fakh. 18:2, 3) Iā ʼaho nei, ʼe tonu ki te ʼu tagata ʼāfea ke natou tōkakaga naʼa natou fai te aga ʼaia.

¹⁵ Neʼe tuku e Paulo ia he faʼifaʼitaki lelei ki te ʼu tagata ʼāfea Kilisitiano. Logolā, neʼe ko he ʼapositolo pea neʼe feala pē ke liliu ko “he kavega mamafa” ki te ʼu Kilisitiano ʼo Tesalonika, kae neʼe mole ina “kai noa ia he meʼa kai mai he tahi.” Neʼe ‘gāue kinakina ia ʼi te pō mo te ʼaho.’ (2 Tes. 3:8) Tokolahi te ʼu tagata ʼāfea iā ʼaho nei, ʼo kau ai mo te ʼu taupau feʼoloʼaki, ʼe natou tuku he faʼifaʼitaki lelei ʼi tanatou mole liliu ʼaē ko he kavega ki ʼonatou tehina. ʼE moʼoni ʼe natou leleiʼia ia te tali kāiga ʼaē ʼe fai age e ʼonatou tehina, kae ʼe mole natou liliu “ko he kavega mamafa” ki he tahi.—1 Tes. 2:9.

16. Koteā te fakaʼuhiga ʼo te ʼui ʼaē ke tokaga te ʼu tagata ʼāfea ki te faga ovi “ ʼaki he lotolelei”?

¹⁶ “ ʼAki he lotolelei” ko te ʼu tagata ʼāfea ʼe natou tōkakaga ki te faga ovi. ʼE hā ia tanatou tōkakaga fakamālotoloto ʼaē ki te faga ovi ʼi te ʼu sākilifisio ʼaē ʼe natou fai moʼo tokoni ki te faga ovi. Kae ʼe mole fakaʼuhiga leva, ʼe natou uga fakamālohi te faga ovi ke natou tauhi kiā Sehova. ʼE mole haga leva ia te ʼu tagata ʼāfea ʼofa ʼo fakaneke niʼihi ke natou kaugana ki te ʼAtua ʼaki he manatu fakataupiepie. (Kal. 5:26) ʼE mahino ki te ʼu tagata ʼāfea ko te ʼu ovi takitahi ʼe mole natou tatau. ʼE natou fia tokoni ki tonatou ʼu tehina ke natou tauhi fakafiafia kiā Sehova.

ʼAua Te Fai ʼo Takotou Pule ʼAki He Loto Fefeka Kae Ke Kotou Liliu Ko He ʼu Faʼifaʼitaki

17, 18. (a) He koʼē neʼe faigataʼa ʼi ʼihi temi ki te kau ʼapositolo hanatou mahino ki te faiakonaki ʼa Sesu ʼo ʼuhiga mo te agavaivai? (b) ʼE tou felāveʼi koa mo he ʼaluʼaga fēia?

¹⁷ Ko te faʼahi neʼe kua tou ʼosi talanoa pē kiai, ʼe tonu ke manatuʼi tuʼumaʼu e te ʼu tagata ʼāfea ko te faga ovi ʼe ʼa te ʼAtua kae ʼe mole ʼa nātou. ʼE natou tōkakaga ke ‘ ʼaua naʼa natou pule ʼaki he loto fefeka ki te tofiʼa ʼa te ʼAtua.’ (Lau ia 1 Petelo 5:3.) ʼI ʼihi te temi, neʼe fakaʼamu ia te kau ʼapositolo ʼa Sesu ke natou fia maʼuhiga fau, kae neʼe mole lelei te ʼu manatu ʼaē neʼe natou maʼu ʼo ʼuhiga mo te tuʼulaga ʼaia. Neʼe natou fia maʼu he tuʼulaga maʼuhiga ohagē ko nātou ʼaē neʼe natou puleʼi te hahaʼi.—Lau ia Maleko 10:42-45.

¹⁸ Iā ʼaho nei, ko te ʼu tehina ʼaē ʼe natou “fakaʼamu . . . ki he gāue fakataupau,” ʼe lelei ke natou tahi vakavakaʼi iā nātou totonu, pe koʼē e natou fakaʼamu ki te gāue ʼaia. (1 Tim. 3:1) Ko nātou ʼaē kua tagata ʼāfea iā ʼaho nei, ʼe lagi lelei ke natou fai te fehuʼi ʼaenī kiā nātou totonu: ʼE natou fakaʼamu koa ke natou pule ki niʼihi peʼe ke natou māʼoluga ohagē ko ʼihi ʼi te kau ʼapositolo ʼo te temi muʼa? Koia kapau neʼe ko he fihifihia ki te kau ʼapositolo, pea ʼe lagi ʼaoga anai ki te kau tagata ʼāfea ke natou tōkakaga naʼa natou maʼu te taʼi holi ʼaia ʼaē ke natou puleʼi niʼihi.

19. Koteā ʼaē ʼe tonu ke manatuʼi e te ʼu tagata ʼāfea mokā tonu ke puipui te faga ovi?

¹⁹ ʼE moʼoni, ʼi ʼihi temi ʼe tonu ki te ʼu tagata ʼāfea ke natou fakaʼaogaʼi ia tonatou ʼuhiga pule mokā ko he faʼahi ke puipui ai te faga ovi mai “te ʼu lupo pule fakamālohi.” (Gāue 20:28-30) Koia neʼe ʼui e Paulo kiā Tito ke ina haga “fakalotomālohiʼi pea mo fakatonutonuʼi ʼaki he pule kātoa.” (Tito 2:15) Tatau aipē peʼe tonu ke natou tokoniʼi fakahagatonu niʼihi peʼe ke natou fakatonutonuʼi, kae ʼe natou fakaʼapaʼapa aipē kiā nātou. ʼE mahino kiā nātou ʼe lelei age ia te taʼi faʼahiga fai ʼaia, ʼi hanatou valokiʼi fau tonatou ʼu vaivaiʼaga, pea ʼi te agamāhani ʼe fua lelei age te taʼi faʼifaʼitaki lelei ʼaia, ke malave ki ʼonatou loto te ʼu tokoni pea mo toe taki mai ia nātou ʼaia ki te ala ʼaē ʼe lelei.

20. Ko te ʼu faʼahi fea ʼaē ʼe feala ai ki te ʼu tagata ʼāfea ke natou faʼifaʼitakiʼi ia Sesu mokā ʼe natou tuku he faʼifaʼitaki lelei?

 ²⁰ Ko te faʼifaʼitaki lelei ʼa Kilisito ʼe ina uga te ʼu tagata ʼāfea ke natou ʼofa ki te faga ovi pea ke natou faʼifaʼitakiʼi ia ia. (Soa. 13:12-15) Neʼe malave ki ʼotatou loto ʼi tatatou lau ʼaē pe neʼe ina akoʼi feafeaʼi ia tana ʼu tisipulo ʼi te gāue fai fakamafola pea mo te fai ʼaē ʼo he ʼu tisipulo. Neʼe malave ki te loto ʼo tana ʼu tisipulo ia tana agavaivai, koia ʼaē neʼe natou ‘agavaivai ai ʼi tonatou maʼuli pea neʼe natou fakaʼuhiga ia nātou ʼaē ʼe natou māʼoluga age iā nātou totonu.’ (Filp. 2:3) ʼE toe fēia ki te ʼu tagata ʼāfea ʼo te temi ʼaenī, ʼe natou muliʼi te faʼifaʼitaki ʼa Sesu, pea ʼe natou toe fia tuku mo nātou ia he “faʼifaʼitaki [lelei ki] te faga ovi.”

21. Koteā te fakapale ʼaē ʼe fakaʼamu kiai te ʼu tagata ʼāfea?

²¹ Neʼe fakaʼosi e Petelo ia tana tokoni ʼaē ki te ʼu tagata ʼāfea, ʼaki te fakapapau ʼo ʼuhiga mo te kā haʼu. (Lau ia 1 Petelo 5:4.) Ko te kau taupau fakanofo ʼe natou “[maʼu] anai te kolona heʼe popo ʼo te kolōlia” pea mo Kilisito ʼi te lagi. Ko te kau tauhi ovi lagolago ʼaē ʼe tokaga ki te “tahi ʼu ovi,” ʼe natou maʼu anai te pilivilēsio ʼaē ke natou tōkakaga ki te faga ovi ʼa te ʼAtua ʼi te kele ʼi te takitaki ʼa te “pule tauhi ovi.” (Soa. 10:16) ʼE talanoa anai te ʼalatike ʼaē kā hoa mai ki te ʼu tokoni ʼaē ʼe lava fai e nātou fuli ʼaē ʼi te kōkelekāsio moʼo lagolago kiā nātou ʼaē ʼe natou takitaki te kōkelekāsio.

Moʼo Fakamanatu

• He koʼē neʼe tuha mo Petelo ke ina fakalotomālohiʼi tona ʼu tehina tagata ʼāfea ke natou tōkakaga ki te faga ovi ʼaē neʼe tuku age ke natou taupau?

• Koteā ʼaē ʼe tonu ke fai e te ʼu tagata ʼāfea moʼo tokaga kiā nātou ʼaē ʼe māhahaki ʼi te faʼahi fakalaumālie?

• Koteā ʼaē ʼe ina uga te ʼu tagata ʼāfea ke natou tōkakaga ki te faga ovi ʼa te ʼAtua ʼaē neʼe tuku age ke natou taupau?

[ʼU fehuʼi ʼo te ako]

[Paki ʼo te pāsina 25]

Ohagē ko te ʼu tauhi ovi ʼo te temi muʼa, ʼe tonu ki te ʼu tagata ʼāfea ʼo te temi ʼaenī ke natou puipui te “ ʼu ovi” ʼaē neʼe tuku age ke natou taupau