ʼE Fia ʼIloʼi e Te Kau Lautohi . . .

ʼE ʼOlo Fuli Koa Te Kau Kilisitiano Agatonu Ki Selō?

▪ Tokolahi neʼe natou lau te ʼu palalau fakalotofīmālie ʼaenī neʼe fai e Sesu: “Ko te ʼAtua, ʼi tona ʼofa lahi ki te mālamanei, neʼe ina foaki . . . tona ʼAlo ʼulutokotahi, [ke feala ki te tagata fuapē] ʼe tui kiā te ia, ke ʼaua naʼa fakaʼauha kae ke ina maʼu ia te maʼuli heʼegata.” (Soane 3:16) Neʼe fakaʼuhiga koa ia te ʼu palalau ʼa Sesu ko te hahaʼi fuli ʼaē ʼe tauhi agatonu ki tana Tamai, ia Sehova ʼAtua ʼe ʼolo anai ki selō ʼo māʼuʼuli ʼo heʼegata ʼi he fiafia moʼoni?

Kotou tokagaʼi age muʼa te ʼu palalau ʼaenī neʼe fai e Sesu ʼe ina uga ai tātou ke tou fakakaukau: “Heʼeki ʼi ai he tagata kua hake ki selō, gata pē ki ʼaē neʼe hifo mai te lagi, ia te Foha ʼo te tagata.” (Soane 3:13) Ko te fakaʼuhiga ʼo te ʼu palalau ʼaenī, ko nātou fuli ʼo te temi muʼa ʼaē neʼe tauhi agatonu ohagē ko Noe, ko Apalahamo, ko Moisese, peʼe ko Tavite, neʼe mole ʼalu he tahi iā nātou ʼaia ki selō. (Gāue 2:34) Kae neʼe ʼolo fuli nātou kifea ʼi tanatou mamate? Moʼo fakanounou: Ko te hahaʼi ʼo te temi muʼa ʼaē neʼe tauhi agatonu ki te ʼAtua ʼe nonofo nei ʼi te faitoka, peʼe natou mālōlō ʼi te mate, ʼo mole kei natou ʼiloʼi he meʼa, ʼo natou fakatalitali ki te fakatuʼuake.—Tagata Tānaki 9:5, 6; Gāue 24:15.

Ko Sesu totonu pē ʼaē neʼe ʼuluaki palalau ʼi te Tohi-Tapu ki te maʼuli ʼaē ʼe ʼi selō ʼi te hili ʼo te mate. Neʼe ina ʼui ki tana ʼu tisipulo ʼe ina teuteuʼi anai honatou ʼu nofoʼaga ʼi selō. (Soane 14:2, 3) Neʼe ko he manatu foʼou ia ki te hahaʼi ʼa te ʼAtua. Neʼe hoki fakamahino e te ʼapositolo ko Paulo ki muli age, ʼi te hili ʼo te mate pea mo te fakatuʼuake ʼo Sesu ki Selō, neʼe ʼavahi ai e Sesu maʼa tana ʼu tisipulo he ala foʼou ki te maʼuli—ko he ala ia neʼe heʼeki alaʼi e he tagata ʼi muʼa atu.—Hepeleo 10:19, 20.

ʼE fakaʼuhiga ai koa ko te hahaʼi agatonu fuli ʼe ʼolo ki selō ? Kailoa ia, ko te fakatuʼuake ʼaē ki selō neʼe fakatuʼakoi pē ia ki te tokosiʼi. ʼI tanatou fakatahitahi ʼi te afiafi fakaʼosi, neʼe ʼui age e Sesu ki tana kau ʼapositolo ʼe natou ‘heheka anai ʼi tona Puleʼaga ʼaē ʼi selō ʼi he ʼu hekaʼaga fakahau moʼo faifakamāu.’ Koia ko nātou neʼe hinoʼi ke natou ʼafio ʼi selō mo Sesu.—Luka 22:28-30.

ʼI tuʼa atu ʼo te kau ʼapositolo, neʼe hinoʼi ʼihi hahaʼi ki te pilivilēsio makehe ʼaia. ʼI te meʼa ʼaē neʼe hā ki te ʼapositolo ko Soane, neʼe sio ia kiā Sesu mo te kūtuga kua fakatuʼuake ʼi selō, ʼe talanoa ʼo ʼuhiga mo nātou ʼaia ʼe ko ‘he puleʼaga pea mo he ʼu pelepitelō ʼe natou pule ki te kele.’ (Fakahā 3:21; 5:10) ʼE natou tokofia? Ohagē pē ko te puleʼaga fuli, ʼe tokosiʼi pē ia nātou ʼaē kā takitaki ʼi te puleʼaga. ʼE fēia pē mo te puleʼaga ʼaē ʼi selō. Ko Sesu, te ʼAkeno ʼo te ʼAtua ʼe kaugā hau anai mo te toko 144 000 ʼaē “neʼe totogi mai te hahaʼi.”—Fakahā 14:1, 4, 5.

ʼI tona fakahagatonu, ʼe mole kaugamālie ia te toko 144 000 mo kapau ʼe fakatatau ki te kaugamālie ʼo te kau agatonu fuli ʼo te temi muʼa pea mo te temi nei. Kae ʼe faigafua pē hatatou mahino kiai, koteʼuhi ko te toko 144 000 ʼe fakatuʼuake ia nātou ki selō ki he gāue taputapu ʼe makehe. Kanapau lā neʼe tonu ke kotou laga he fale, ʼe kotou kumi anai koa te kau tufuga faʼu fale fuli ʼo tokotou kolo? Kailoa ia. ʼE mahino ia ʼe kotou fakafuafua pē te kaugamālie ʼo te kau tufuga faʼu fale ki te lahi ʼaē ʼo te gāue ke fai. ʼO toe fēia pē, ʼe mole ko te hahaʼi agatonu fuli ʼaē neʼe filifili e te ʼAtua ki te pilivilēsio makehe ʼaē ke kaugā gāue mo Sesu ʼi selō.

ʼE fakahoko anai e te puleʼaga ʼaia ʼi selō ia te fakatuʼutuʼu olisinale ʼa te ʼAtua maʼa te mālamanei kātoa. Ko Sesu mo tona ʼu kaugā hau ʼaē e toko 144 000, ʼe natou gāue fakatahi anai ki te fakafoʼou ʼaē ʼo te kele ke liliu ko he palatiso ʼi te potu fuli pē, pea ʼe maʼuli fiafia ai anai ʼo heʼegata ia te kau agatonu ʼaē ʼe mole malau tonatou kaugamālie. (Isaia 45:18; Fakahā 21:3, 4) ʼE kau ai anai ia nātou fuli ʼaē ʼe manatuʼi e te ʼAtua, ʼaē kā fakatuʼuake anai.—Soane 5:28, 29.

Ko te tagata fuli pē ʼe tauhi agatonu kiā Sehova—ʼo te temi muʼa peʼe ko te temi nei—ʼe feala ia ke ina maʼu te meʼa ʼofa taulekaleka ʼaē ko te maʼuli heʼegata. (Loma 6:23) Ko he tokosiʼi pē kā māʼuʼuli ʼi selō ki he gāue makehe, pea ko te toe hahaʼi tokolahi ʼaē kā māʼuʼuli ʼi te kele kua liliu ko he palatiso.