Tou Ako Mai Te Folafola ʼa Te ʼAtua

ʼE ʼi Ai Koa He ʼAmanaki Ki Te Kau Mate?

ʼE lagaʼi ʼi te ʼalatike ʼaenī te ʼu fehuʼi neʼe lagi kua kotou ʼosi fai pea mo te ʼu vaega ʼi takotou Tohi-Tapu fea ʼaē ʼe feala ke kotou maʼu ai te ʼu tali. ʼE fiafia anai te kau Fakamoʼoni ʼa Sehova ʼi te fai palalau mo koutou ki te ʼu fehuʼi ʼaenī.

 1. Koteā koa te ʼamanaki ki te kau mate?

ʼI te tau age ʼa Sesu ki Petania ʼaē neʼe tuʼu ovi ki Selusalemi, neʼe kua mate tona kaumeʼa ko Lasalo kua hili kiai ʼaho e fā. Neʼe ʼalu leva ia Sesu ki te ʼana mo Maleta pea mo Malia, te ʼu tuagaʼane ʼo te tagata ʼaē kua mate. Mole faʼa fualoa kiai pea neʼe fakatahitahi te hahaʼi. ʼE feala koa hakotou fakakaukauʼi ia te fiafia ʼa Maleta pea mo Malia ʼi te fakatuʼuake e Sesu ia Lasalo?—Lau ia Soane 11:20-24, 38-44.

Neʼe tui ia Maleta ʼe fakatuʼuake anai te kau mate. ʼE kua ʼiloʼi talu mai fualoa e te ʼu kaugana agatonu ʼa Sehova, ʼi te temi kā haʼu, ʼe toe fakatuʼuake anai te kau mate e te ʼAtua ke natou māʼuʼuli ʼi te kele.—Lau ia Sopo 14:14, 15.

 2. ʼE feafeaʼi te ʼaluʼaga ʼo te kau mate?

Ko te tagata ʼe mole hona nefesi tuputupua. (Esekiele 18:4) Ko tātou neʼe fakatupu mai te efu. (Senesi 2:7; 3:19) Kā mate totatou ʼuto, pea ʼe pulinoa ai tatatou ʼu fakakaukau. Koia ʼi tona ʼosi fakatuʼuake, neʼe mole fakamatala he meʼa e Lasalo ʼo ʼuhiga mo tana mate, heʼe ko te kau mate ʼe mole natou ʼiloʼi he meʼa.—Lau ia Pesalemo 146:4; Tagata Tānaki 9:5, 10.

ʼE mahino mai ʼe mole feala ke maʼuli mamahi te kau mate. Pea ko te akonaki ʼaē ʼe ʼui ko te ʼAtua ʼaē ʼe ina fakamamahiʼi te kau mate ʼe ko he loi ia. Ko te akonaki ʼaia ʼe ko he fasituʼu ia ki te ʼAtua. Ko te fakamamahiʼi ʼo te hahaʼi ʼi he afi, ʼe ko he manatu ʼe fehiʼa ʼaupitō kiai te ʼAtua.—Lau ia Selemia 7:31.

  3. ʼE feala koa ke tou palalau mo te kau mate?

ʼE mole feala ke palalau te kau mate. (Pesalemo 115:17) Kae kā palalau te ʼu ʼāselo agakovi ki te hahaʼi ʼe feala pē ke natou ʼui ko nātou ko te u laumālie ʼo nātou ʼaē kua mamate. (2 Petelo 2:4) ʼE tapuʼi mai e Sehova tatatou faiga ʼaē ke tou palalau mo te kau mate.—Lau ia Teutalonome 18:10, 11.

 4. Ko ai koa ʼaē kā fakatuʼuake?

ʼI te mālama foʼou ʼaē kā haʼu, ko te ʼu toko lauʼi miliona hahaʼi ʼaē ʼe nonofo ʼi te ʼu falemaka, ʼe toe fakatuʼuake anai ia nātou. Māʼia mo nātou ʼaē neʼe natou fai te ʼu meʼa ʼaē ʼe kovi ʼuhi ko tanatou mole ʼiloʼi ia Sehova, ʼe fakatuʼuake anai mo nātou ʼaia.—Lau ia Luka 23:43; Gāue 24:15.

ʼE feala anai kiā nātou ʼaē neʼe fakatuʼuake ke natou akoʼi te moʼoni ʼo ʼuhiga mo te ʼAtua, pea mo natou fakahā tanatou tui kiā Sesu ʼaki tonatou fakalogo kiā te ia. (Fakahā 20:11-13) Ko nātou ʼaē ʼe fakatuʼuake pea mo natou fai ia te ʼu meʼa ʼaē ʼe lelei, ʼe feala anai ke natou māʼuʼuli fiafia ʼo talu ai ʼi te kele. Kae, ko ʼihi ʼi te fakatuʼuake ʼe natou haga fai anai ia te ʼu meʼa ʼe kovi. Pea ko tonatou fakatuʼuake ʼe liliu anai ko “he fakatuʼuake ʼo te fakamāu.”—Lau ia Soane 5:28, 29.

 5. Koteā ʼaē ʼe fakahā mai ʼi te fakatuʼuake ʼo ʼuhiga mo Sehova?

ʼE feala ke hoko ia te fakatuʼuake he neʼe fekauʼi e te ʼAtua ia tona ʼAlo ke ina foaki tona maʼuli maʼa tātou. Ko te ʼofa ʼo Sehova pea tona ʼofa makehe.—Lau ia Soane 3:16; Loma 6:23.

Kapau ʼe kotou fia maʼu he tahi ʼu fakamahino, vakaʼi te ʼu kāpite 6 pea mo te 7 ʼo te tohi ʼaenī, Koteā ʼAē ʼe Akoʼi Moʼoni Mai ʼi Te Tohi-Tapu?, neʼe tā e te kau Fakamoʼoni ʼa Sehova.

[Paki ʼo te pāsina 20]

Neʼe fakatupu ia Atama mai te efu