ʼE Kotou Fakalogo Anai Koa Ki Te ʼu Fakatokaga ʼa Sehova?

“Koʼenī te ala. Kotou haʼele ai.”—ISA. 30:21.

1, 2. Koteā ʼaē ʼe loto moʼoni kiai ia Satana, pea ʼe tokoni feafeaʼi mai te Tohi-Tapu kiā tātou?

 KĀ KOTOU ʼolo ʼi te ala, ko he panō ʼe ina fakahā atu he ala kae neʼe fakahaga hala, ʼe feala ai ke kotou hehē pea mo kotou tuʼutāmaki ai. Kotou fakakaukauʼi age muʼa, ʼe fakatokaga atu e hokotou kaumeʼa, ʼe ko te tagata agakovi ʼaē neʼe ina fakahaga hala te panō, heʼe loto ke hehē ia te hahaʼi ʼaē ʼe mole natou nonofo tōkakaga. ʼE kotou fakalogo anai koa ki te fakatokaga ʼaia?

² ʼE mahino ia ko Satana ʼe ko he fili agakovi, ʼe loto moʼoni ke ina fakahalaʼi tātou. (Fakh. 12:9) ʼE ko Satana ʼaē ʼe ina fakatupu te ʼu fakaneke kovi ʼaē neʼe tou talanoa kiai ʼi te ʼuluaki ʼalatike ako, pea ʼe ina fakaʼaogaʼi tāfito te ʼu faʼahi ʼaia ke tupu ai hatatou talagataʼa kiā Sehova, pea mo tou hehē mai te ala ʼaē ʼe ina taki ki te maʼuli heʼegata. (Mat. 7:13, 14) Kae meʼa lelei foki, heʼe ko totatou kaumeʼa ʼaē ko Sehova ʼAtua, ʼe ina fakatokaga mai kiā tātou ʼo ʼuhiga mo te ʼu kākā ʼa Satana. ʼI te temi nei, ʼe tou talanoa anai ki te tahi age ʼu fakaneke kovi e tolu, ʼaē ʼe fakaʼaogaʼi e Satana moʼo kākāʼi ʼo tātou. ʼE tou vakaʼi anai peʼe tokoni feafeaʼi mai ia te Folafola ʼa te ʼAtua ke tou tekeʼi te ʼu fakahala ʼaia, pea ʼe feala ke tou fakakaukauʼi ʼe hagē ʼe tuʼu ia Sehova ʼi totatou tuʼa pea ʼe ina fakahā mai kiā tātou te ala ʼaē ʼe totonu, ʼo ina ʼui fēnei: “Koʼenī te ala. Kotou haʼele ai.” (Isa. 30:21) ʼI tatatou metitāsio ki te ʼu fakatokaga ʼa Sehova, ʼe tou fakatotonu mālohi anai ke tou fakalogo ki te ʼu fakatokaga ʼaia.

ʼAua Naʼa Kotou Muliʼi Te “Hahaʼi Faiakonaki Loi”

3, 4. (a) He koʼē ʼe fakatatau ia te ʼu hahaʼi faiakonaki loi ki he ʼu vai keli kua mamaha? (b) ʼE ʼomai maifea ia te ʼu hahaʼi faiakonaki loi pea koteā ʼaē ʼe natou loto kiai?

³ Ohagē lā, ʼi takotou fagona, ʼe kotou fakalaka ʼi te toafa. ʼE kotou sio mai mamaʼo ki he vai keli pea kotou fakatau atu kiai, ʼo kotou fakaʼamu ke ʼi ai he vai he kua kovi takotou fia ʼinu. Kae ʼi takotou tau atu ki te vai keli ʼaia, kua mamaha ia. ʼI meʼa fakalotovaivai foki! Ko te ʼu hahaʼi faiakonaki loi ʼe natou hagē ko te ʼu vai keli ʼaē kua mamaha. Ko he tahi pē ʼe haʼu ʼo kumi kiā nātou te ʼu vai ʼo te moʼoni, ʼe lotovaivai ʼaupitō anai. Ko Sehova, ʼaki te ʼu ʼapositolo ko Paulo pea mo Petelo, ʼe ina fakatokagaʼi tātou ʼo ʼuhiga mo te ʼu hahaʼi faiakonaki loi. (Lau ia Gāue 20:29, 30; 2 Petelo 2:1-3.) Ko ai koa te ʼu hahaʼi faiakonaki loi ʼaia? Ko te ʼu palalau ʼa Paulo pea mo Petelo, ʼe tokoni mai kiā tātou ke feala hatatou ʼiloʼi peʼe ʼomai maifea ia te ʼu hahaʼi faiakonaki loi ʼaia pea ʼe natou kākāʼi feafeaʼi ia te hahaʼi.

⁴ Neʼe ʼui fēnei e Paulo ki te ʼu tagata ʼāfea ʼo te kōkelekāsio ʼo Efesi: “ ʼI te lotolotoiga ʼo koutou ʼe mafuta ake anai te ʼu tagata ʼe natou palalau ki te ʼu meʼa pikopiko.” ʼI tana palalau ki te ʼu Kilisitiano, neʼe tohi fēnei e Petelo: “ ʼE toe ʼi ai anai mo he hahaʼi faiakonaki loi iā koutou.” Koia, ʼe ʼomai koa maifea ia te ʼu hahaʼi faiakonaki loi ʼaia? ʼE natou mafuta ake mai te kōkelekāsio. Ko te ʼu hahaʼi faiakonaki loi ʼe ko he kau ʼapositā. a Koteā ʼaē ʼe natou loto kiai? ʼE mole natou mavae pē ʼi te kautahi ʼaē neʼe lagi natou leleiʼia ʼi te kamata. Neʼe fakamahino mai e Paulo, ʼe natou fakatuʼutuʼu ke “natou toho te [ʼu] tisipulo ke mulimuli iā nātou.” Kotou tokagaʼi te kupusiga palalau “te ʼu tisipulo.” Ko te kau ʼapositā ʼe mole natou mavae pea mo natou fai hanatou ʼu tisipulo, kailoa, kae ʼe natou kumi ke natou toho mo nātou te ʼu tisipulo ʼa Kilisito. Ohagē ko he ʼu “lupo fekai,” ko te ʼu hahaʼi faiakonaki loi ʼe natou kumi ke natou kai te hahaʼi ʼo te kōkelekāsio, ke natou maumauʼi tanatou tui pea ke natou fakahehē ia nātou mai te moʼoni.—Mat. 7:15; 2 Tim. 2:18.

 5. ʼE kākāʼi feafeaʼi e te ʼu hahaʼi faiakonaki loi ia te hahaʼi?

⁵ ʼE kākāʼi feafeaʼi e te ʼu hahaʼi faiakonaki loi ia te hahaʼi? ʼE hā ʼi tanatou faʼahiga fai ia he faiva kākā. Ko te kau ʼapositā ʼe natou “fakahū fakafufū” tanatou ʼu manatu ki te kōkelekāsio. Ohagē ko he ʼu hahaʼi ʼe natou fakahū fakafufū he ʼu meʼa ki he kolo, ko te  kau ʼapositā ʼe natou fakahū fakafufū he ʼu manatu fakaʼapositā. Pea ohagē pē ko he tagata faiva pea mo kākā ʼe faiga ke ina fakaʼaogaʼi he ʼu pepa ʼe mole moʼoni, ʼe fakaʼaogaʼi e te kau ʼapositā ia te “ ʼu palalau kākā,” ʼo natou faigaʼi ke ʼui ʼe moʼoni tanatou ʼu manatu. ʼE natou fakamafola ia te “ ʼu faiakonaki kākā,” ʼo natou ‘fakaʼaogaʼi hala te Tohi-Tapu’ ke ʼalutahi mo tanatou ʼu manatu. (2 Pet. 2:1, 3, 13; 3:16) ʼE mole tokaga ia te kau ʼapositā kiā tātou. Kapau ʼe tou mulimuli iā nātou, pea ʼe tou hehē anai mai te ala ʼaē ʼe ina taki ki te maʼuli heʼegata.

 6. Koteā te fakatokaga lelei ʼe foaki mai ʼi te Tohi-Tapu kiā tātou ʼo ʼuhiga mo te ʼu hahaʼi faiakonaki loi?

⁶ ʼE feala ke puipui feafeaʼi tātou mai te ʼu hahaʼi faiakonaki loi? ʼE fakahā lelei mai ʼi te Tohi-Tapu te meʼa ʼaē ʼe tonu ke tou fai. (Lau ia Loma 16:17; 2 Soane 9-11.) ʼE ʼui fēnei ʼi te Tohi-Tapu: “Kotou fakamamaʼo mai iā nātou.” Ko tona fakaʼuhiga ʼaē ke ʼaua naʼa tou fakaovi kiā nātou. Ko te fakatokaga ʼaē mai te Tohi-Tapu ʼe hagē ko he fakatokaga mai he tōketā, neʼe ina tala atu ke ʼaua naʼa kotou fakaovi ki he tahi ʼe mahaki, heʼe feala ke kotou pikisia ʼi tona mahaki. ʼE mahino ki te tōketā ʼaia kapau ʼe kotou maʼu tona mahaki pea ʼe kotou mate ai anai. ʼE kotou mahino lelei ki te fakatokaga ʼaia pea ʼe kotou mulimuli anai kiai. ʼE ʼui ʼi te Tohi-Tapu ko te kau ʼapositā ‘ ʼe māhahaki ʼi tonatou ʼatamai’ pea ʼe natou fakaʼaogaʼi tanatou ʼu akonaki ke liliu ʼihi ʼo natou manatu ohagē ko nātou. (1 Tim. 6:3, 4) ʼE hagē ia Sehova ko te tōketā lelei ʼaia. Neʼe ina fakamahino lelei mai ke tou fakamamaʼo mai te ʼu hahaʼi faiakonaki loi. ʼE tonu ke tou fakatotonu ke tou mulimuli tuʼumaʼu ki tana fakatokaga ʼaia.

7, 8. (a) Koteā ʼaē ʼe tonu ke tou fai ke tou fakamamaʼo ai mai te ʼu hahaʼi faiakonaki loi? (b) He koʼē ʼe kotou fakatotonu ke kotou fakafeagai ki te kau faiakonaki loi?

⁷ Koteā ʼaē ʼe tonu ke tou fai ke tou fakamamaʼo ai mai te ʼu hahaʼi faiakonaki loi? ʼE mole tou fai palalau mo nātou peʼe tou fakaafe ia nātou ki totatou loto fale. ʼE mole tou toe lau foki mo tanatou ʼu tohi, mo tou sioʼi ia nātou ʼi te televisio, mo lau tanatou ʼu manatu ʼi te Neti peʼe tou tohi tatatou ʼu manatu ʼi te Neti ʼo ʼuhiga mo te ʼu meʼa ʼaē neʼe natou tohi. He koʼē ʼe tou fakatotonu ke tou fakamamaʼo mai iā nātou ʼaia? Ko tona tupuʼaga tāfito ʼaē heʼe tou ʼofa ki “te ʼAtua ʼo te moʼoni.” Koia, ʼe mole tou fia logo ki te ʼu akonaki loi ʼaē ʼe natou fakafeagai ki te moʼoni, ʼaē ʼe tuʼu ʼi te Folafola ʼa te ʼAtua. (Pes. 31:5; Soa. 17:17) ʼE tou toe ʼofa ki te kautahi ʼa Sehova, ʼaē neʼe ina akoʼi mai kiā tātou te ʼu moʼoni taulekaleka ohagē lā ko te huafa ʼo Sehova pea mo te fakaʼuhiga ʼo te huafa ʼaia, tana fakatuʼutuʼu ʼaē ʼo ʼuhiga mo te kele, mo te ʼaluʼaga ʼo te kau mate, pea mo te ʼamanaki ʼaē ko te fakatuʼuake. ʼE kei kotou manatuʼi koa pe neʼe feafeaʼi tokotou loto ʼi takotou kamata ako ʼaē ia te moʼoni pea mo ʼihi atu ʼu moʼoni ʼi te Tohi-Tapu? Koia, ʼaua naʼa kotou tuku ki te ʼu loi ʼa te ʼu hahaʼi faiakonaki loi ke kotou fakafeagai ai ki te kautahi ʼaē neʼe ina akoʼi atu te ʼu moʼoni ʼaia.—Soa. 6:66-69.

⁸ Tatau aipē peʼe koteā ʼaē ʼe ʼui e te ʼu hahaʼi faiakonaki loi, kae ʼe mole tou muliʼi anai ia nātou! He koʼē ʼe kotou ʼolo anai ki te ʼu vai keli ʼaia ʼaē ʼe mamaha, ʼuhi pē ke kotou lotovaivai ai? Tou fakatotonu ke tou nonofo agatonu kiā Sehova pea mo tana kautahi, heʼe talu mai fualoa tana fakafīmālie ia tātou ʼi te faʼahi fakalaumālie, ʼaki tana foaki mai he ʼu vai maʼa pea mo mokomoko ʼo te moʼoni ʼaki te Folafola ʼa te ʼAtua.—Isa. 55:1-3; Mat. 24:45-47.

ʼAua Naʼa Kotou Muliʼi “He ʼu Fāgana”

9, 10. Koteā te fakatokaga ʼaē neʼe foaki e Paulo kiā Timoteo ʼo ʼuhiga mo te “ ʼu fāgana,” pea koteā ʼaē neʼe lagi manatuʼi e Paulo ʼo ʼuhiga mo te faʼahi ʼaia? (Vakaʼi mo te kiʼi nota.)

⁹ ʼI ihi temi, lagi ʼe faigafua hakita ʼiloʼi neʼe fakahaga  hala e he tahi te panō ʼaē ʼe tuʼu ʼi te ala. Kae ʼi ʼihi temi, lagi ʼe faigataʼa takita ʼiloʼi te aga fakakākā ʼaia. ʼE toe fēia mo te ʼu fakaneke kovi ʼa Satana; ko ʼihi fakaneke ʼe tou lava ʼiloʼi lelei age ʼi ʼihi. ʼE fakatokagaʼi tātou e te ʼapositolo ko Paulo ʼo ʼuhiga mo te fakaneke fakakākā ʼa Satana, ʼaē ko te “ ʼu fāgana.” (Lau ia 1 Timoteo 1:3, 4.) Ke ʼaua naʼa tou hehē mai te ala ʼo te maʼuli, ʼe ʼaoga ke tou ʼiloʼi pe koteā te ʼu fāgana ʼaia pea koteā ʼaē ʼe tonu ke tou fai ke ʼaua naʼa tou mulimuli kiai.

¹⁰ Neʼe fai e Paulo te fakatokaga ʼo ʼuhiga mo te ʼu fāgana ʼi tana ʼuluaki tohi kiā Timoteo, te tagata taupau Kilisitiano, ʼaē neʼe tonu ke ina taupau ke maʼa te kōkelekāsio pea mo tokoni ki te ʼu tehina ke natou nonofo agatonu. (1 Tim. 1:18, 19) ʼE fakaʼaogaʼi e Paulo ia te kupu “fāgana” ʼi te Fakakeleka, ko tona fakaʼuhiga ko he meʼa ʼe mole moʼoni, ʼe ko he talatuku peʼe ko he fakamatala neʼe faʼu pē ia e he tahi. Ohagē ko tona ʼui ʼi te tohi (The International Standard Bible Encyclopaedia), ʼe fakaʼuhiga ia te kupu ʼaia ki “he fakamatala (fakalotu) ʼe mole hona pikipikiga mo te ʼu meʼa ʼaē ʼe hoko moʼoni.” Lagi neʼe manatuʼi e Paulo ia te ʼu loi fakalotu neʼe toʼo mai te ʼu fakamatala ʼo te temi muʼa neʼe faʼu e te hahaʼi, pea tupu ai te fia ʼiloʼi meʼa fuli ʼa ʼihi. b Ko te ʼu taʼi fakamatala ʼaia ʼe “natou lagaʼi he ʼu fehuʼi ke fai ai he ʼu kumi,” ko tona fakaʼuhiga ʼe lagaʼi ai he ʼu fehuʼi ʼe mole maʼuhiga, ʼe tupu ai te fai ʼo he ʼu kumi ʼe mole hona ʼaoga. Ko te ʼu fāgana ʼe ko he fakaneke fakakākā ʼa ia ʼaē ʼe faiva ʼi te loi, ia Satana, pea ʼe ina fakaʼaogaʼi te ʼu loi ʼaē ʼe tala e te lotu pea mo te ʼu fāgana ʼa ni hahaʼi heʼe lotu, moʼo fakahehē te hahaʼi ʼaē ʼe mole nonofo tōkakaga. ʼE fakahā lelei mai e Paulo te meʼa ʼaē ʼe tonu ke tou fai: Ke ʼaua naʼa tou fakalogo ki te ʼu fāgana ʼaia!

11. Neʼe feafeaʼi ia te faiva ʼaē ʼa Satana ʼi tana fakaʼaogaʼi ia te ʼu lotu hala moʼo kākāʼi te hahaʼi, pea koteā ia te fakatokaga ʼe tokoni anai kiā tātou ke ʼaua naʼa fakahalaʼi tātou mo kapau ʼe tou fakalogo lelei kiai?

¹¹ Koteā ʼihi fāgana ʼaē ʼe feala ke hehē ai ia te hahaʼi ʼaē ʼe mole nonofo tōkakaga? ʼI te agamāhani, ko te kupu “ ʼu fāgana” ʼe feala ke fakaʼuhiga ki he loi ʼe faʼu e te lotu peʼe ko he ʼu talatuku ʼaē ʼe feala ke natou fakamaliu tātou “mai te moʼoni.” (2 Tim. 4:3, 4) Ko Satana, ʼaē ʼe ina ʼui ko ia ko “he ʼāselo ʼo te mālama,” ʼe faiva ʼi te fakaʼaogaʼi ʼo te ʼu lotu hala moʼo kākāʼi ia te hahaʼi. (2 Ko. 11:14) Ohagē lā, ko te ʼu lotu ʼo te Keletiate ʼe natou ʼui ʼe natou muliʼi ia Kilisito, kae ʼe natou akoʼi te ʼu akonaki ohagē ko te Tahitolu Tapu, te ʼifeli, pea mo te maʼuli tuputupua ʼo te nefesi ʼaē ʼe toʼo mai te ʼu fāgana pea mo te ʼu fakamatala neʼe faʼu. ʼE natou toe fakatuʼutuʼu he ʼu ʼaho lalahi, ohagē lā ko te Pō Tapu pea mo te Pāsikate, ʼaē ʼe fai ai he ʼu toʼotoʼoga ʼe hagē ʼe mole kovi, kae ʼi tona fakahagatonu neʼe toʼo ia mai te mitolosia pea mo te lotu pagani. ʼI tatatou fakalogo lelei ki te fakatokaga ʼa te ʼAtua ke tou mavae kehe pea ke “ ʼaua naʼa [tou] fāfā ki te meʼa ʼaē ʼe heʼemaʼa,” ʼe mole fakahalaʼi anai tātou ʼaki te ʼu fāgana.—2 Ko. 6:14-17.

12, 13. (a) Koteā te ʼu loi ʼe fakatupu e Satana pea koteā ia te manatu moʼoni ʼo ʼuhiga mo te ʼu loi takitahi ʼaia? (b) Koteā ʼaē ʼe feala ke tou fai ke mole fakahalaʼi tātou ʼaki te ʼu fāgana ʼa Satana?

¹² Neʼe fakatupu e Satana ʼihi age ʼu loi ʼaē ʼe feala ke fakahalaʼi ai tātou mo kapau ʼe mole tou nonofo tōkakaga. Tou vakaʼi he ʼu faʼifaʼitaki. Ko meʼa fuli pē ʼe fakagafua ke kotou fai, peʼe lelei peʼe kovi. ʼE fakalogo kiā koutou te ʼu faʼahi ʼaia. ʼE mafola ia te manatu ʼaia ʼi te televisio, mo te lātio, mo te ʼu nusipepa pea mo te ʼu fakafiafia. Ko te taʼi manatu hala ʼaia ʼo ʼuhiga mo te ʼu pelesepeto ʼa te ʼAtua ʼe ina fakaneke tātou ke tou lītuʼa ki te ʼu aga fuli ʼaē ʼe tonu ke tou fai. Ko te manatu ia ʼaē ʼe moʼoni, ʼe ko te ʼaoga ʼaupitō kiā tātou he takitaki ʼo ʼuhiga mo te aga ʼaē ʼe tonu ke tou fai, pea ʼe ko Sehova tokotahi pē ʼaē ʼe feala ke ina foaki mai te takitaki ʼaia. (Sel. 10:23) ʼE mole fetogi anai e te ʼAtua te ʼu meʼa ʼaē ʼe hoko ʼi te kele. ʼE feala ke malave kiā tātou te manatu ʼaia ʼaē ʼe hā ʼi te maʼuli ʼo te hahaʼi ʼi te temi ʼaenī, pea ʼe feala ke tou liliu “ ʼo fakaʼaoʼaoganoa peʼe heʼe fua.” (2 Pet. 1:8) Ko te manatu ia ʼaē ʼe moʼoni, ʼe ko te ʼaho ʼo Sehova ʼe kua ovi mai pea ʼe tonu ke tou fakatalitali kiai. (Mat. 24:44) ʼE mole tokaga te ʼAtua kiā koutou takitokotahi. Kapau ʼe tou tui ki te loi ʼaia ʼa Satana, pea ʼe feala ke tou liʼakina tatatou tauhi ʼaē kiā Sehova, ʼo tou manatu ai ʼe mole tāu ke ʼofainaʼi tātou e te ʼAtua. Ko te manatu ia ʼaē ʼe moʼoni, ʼe ko Sehova ʼe ʼofa ki tana kau ʼatolasio takitokotahi pea ʼe natou maʼuhiga kiā te ia.—Mat. 10:29-31.

 ¹³ ʼE tonu ke tou nonofo tōkakaga, heʼe ko te ʼu manatu pea mo te ʼu aga ʼo te mālama ʼa Satana ʼe feala ke hagē ʼe ko he ʼu meʼa ʼe moʼoni. Kae tou manatuʼi ʼe ko Satana ʼe faiva lahi ʼi te kākā. ʼAki pē te fakalogo ki te ʼu tokoni pea mo te ʼu fakamanatu ʼa te Folafola ʼa te ʼAtua, ʼe feala ai ke mole fakahalaʼi tātou ʼaki “he ʼu fāgana neʼe fakakaukauʼi lelei.”—2 Pet. 1:16.

ʼAua Naʼa Kotou ‘Mulimuli Iā Satana’

14. Koteā te fakatokaga neʼe fai e Paulo ki te ʼu fafine vītua, pea he koʼē ʼe ʼaoga ke tou fakalogo lelei fuli ki tana ʼu palalau?

¹⁴ Kotou fakakaukauʼi age muʼa he panō ʼi te ala ʼe tohi fēnei ai: “Kotou ʼolo ʼi te ala ʼaenī ke kotou mulimuli ai iā Satana.” ʼE ʼi ai koa he tahi iā tātou ʼe fakalogo anai ki te taʼi panō ʼaia? Kae ʼe fakatokagaʼi tātou e Paulo ʼo ʼuhiga mo te ʼu tuʼuga ala ʼe feala ai kiā tātou kau Kilisitiano, ke tou ‘maliu kehe ʼo tou muliʼi ia Satana.’ (Lau ia 1 Timoteo 5:11-15.) Neʼe fai te ʼu palalau ʼaenī ʼa Paulo ki te “ ʼu fafine vītua,” kae ko te ʼu pelesepeto ʼaē ʼe talanoa kiai ʼe toe fakaʼuhiga pē foki kiā tātou fuli. Ko te ʼu fafine Kilisitiano ʼaia ʼo te ʼuluaki sēkulō, neʼe mole lagi natou manatu neʼe natou muliʼi ia Satana, kae neʼe hā ʼi tanatou ʼu aga tanatou fai ia te faʼahi ʼaia. ʼE lava feafeaʼi hatatou tōkakaga ke ʼaua naʼa tou muliʼi ia Satana kae ʼe mole tou ʼiloʼi? Tou vakaʼi ia te fakatokaga ʼa Paulo ʼo ʼuhiga mo te fai fatufatu.

15. Koteā te fakatuʼutuʼu ʼa Satana, pea neʼe fakahā feafeaʼi e Paulo ia te ʼu faʼahiga fai ʼa Satana?

¹⁵ ʼE ko te fakatuʼutuʼu ʼa Satana ke fakagata tatatou palalau ʼo ʼuhiga mo tatatou tui, ʼe ina loto ke tuku tatatou fakamafola te logo lelei. (Fakh. 12:17) Moʼo fakahoko te faʼahi ʼaia, ʼe ina faigaʼi ke tou fai he ʼu gāue ʼe puli ai totatou temi peʼe ke puli ai tatatou logotahi. Kotou tokagaʼi peʼe fakahā feafeaʼi e Paulo ia te ʼu faʼahiga fai ʼa Satana. Neʼe ʼui e Paulo ko te ʼu fafine vītua ʼi tona temi neʼe natou “fakapulinoa tonatou temi, ʼo feʼoloʼaki.” ʼI te temi ʼaenī ʼo te tekenolosia, ʼe faigafua te pulihi ʼo totatou temi pea mo te temi ʼo niʼihi, ohagē lā ʼaki te fefaitohiʼaki ʼi te Neti peʼe tou fakatahitahi moʼo palalau ki he ʼu meʼa ʼe mole maʼuhiga peʼe mole moʼoni. Neʼe toe ʼui e Paulo ko te ʼu fafine vītua ʼaia neʼe natou “gutu palalau.” Ko te fai fatufatu ʼe feala ke iku ki he fasituʼu, ʼaē ʼi te agamāhani ʼe fakatupu kē. (Taag. 26:20) Peʼe natou mahino kiai peʼe kailoa, kae ko te hahaʼi fasituʼu ʼe natou faʼifaʼitakiʼi ia Satana, te Tēvolo. c Pea neʼe ʼui e Paulo ko te ʼu fafine vītua ʼaia “ ʼe natou palalau ki te ʼu meʼa ʼe mole tonu ke natou palalau kiai.” ʼE mole ʼa tātou te ʼui age ki ʼihi peʼe tonu ke feafeaʼi tonatou maʼuli. Ko te ʼu taʼi aga fuli ʼaia, ʼaē ʼe mole honatou ʼaoga pea mo fakatupu maveuveu, ʼe feala ke natou fakaleluʼi tātou mai te gāue ʼaē neʼe foaki mai e te ʼAtua, ko te fakamafola ʼo te Puleʼaga. Kapau ʼe tou tuku tatatou lagolago mālohi ki te gāue ʼa Sehova, pea ʼe tou kamata muliʼi ai ia Satana. ʼE mole feala ke tou lotonoa ki te faʼahi ʼaia.—Mat. 12:30.

16. Ko te fakatokaga fea ʼaē ʼe tou fakalogo kiai kā tokoni kiā tātou ke ʼaua naʼa tou “maliu kehe ʼo . . . muliʼi ia Satana”?

¹⁶ ʼI tatatou fakalogo lelei ki te ʼu tokoni ʼa te Tohi-Tapu, ʼe feala ke tokoni kiā tātou ke ʼaua naʼa tou “maliu kehe ʼo . . . muliʼi ia Satana.” Tou vakaʼi age muʼa he ʼu tokoni poto neʼe fai e Paulo. “Ke lahi tuʼumaʼu takotou ʼu gāue ʼi te ʼAliki.” (1 Ko. 15:58) ʼI tatatou maʼumaʼua ʼi te ʼu gāue ʼo te Puleʼaga, ʼe puipui anai tātou ʼi te ʼu tuʼutāmaki ʼaē ʼo te fakaʼaoʼaoganoa pea mo te fai ʼo he ʼu gāue ʼe pulinoa ai totatou temi. (Mat. 6:33) Kotou fai he ʼu palalau “ ʼe lelei moʼo laga.” (Efe. 4:29) Tou fakatotonu ke ʼaua naʼa tou fakalogo ki he ʼu fai fatufatu pea ke ʼaua naʼa tou fakamafola ia te ʼu palalau ʼaia. d Tou falala pea mo tou fakaʼapaʼapa ki totatou ʼu tehina mo tuagaʼane. ʼE tou fai pē anai he ʼu palalau ʼe natou fakalotomālohiʼi ʼihi kae mole tou fai he ʼu palalau fakalotovaivai. “[Kotou] tokaga ki ʼakotou ʼu meʼa totonu.” (1 Tes. 4:11) Tou tokaga ki ʼihi, kae tou fai te faʼahi  ʼaia ʼo tou fakaʼapaʼapa ki tonatou maʼuli fakaloto fale pea mo tonatou ʼu matagafua. Tou manatuʼi foki, ʼe mole tonu ke tou fakakinauʼi ʼihi ke natou mulimuli ki tatatou ʼu manatu, ʼo ʼuhiga mo he ʼu ʼaluʼaga ʼe feala ke natou fai ai he tonu e nātou totonu.—Kal. 6:5.

17. (a) He koʼē neʼe fakatokaga mai e Sehova ʼo ʼuhiga mo te ʼu faʼahi ʼaē ʼe mole tonu ke tou muliʼi? (b) Koteā ʼaē ʼe kotou fakatotonu ke kotou fai ʼo ʼuhiga mo te ala ʼaē ʼe loto e Sehova ke kotou haga haʼele ai?

¹⁷ ʼE tou loto fakafetaʼi ʼaupitō ki te fakahā lelei mai e Sehova kiā tātou te ʼu faʼahi ʼaē ʼe mole tonu ke tou muliʼi! Kae ʼaua naʼa galo kiā tātou ko te ʼu fakatokaga ʼaē neʼe tou talanoa kiai ʼi te ʼalatike ʼaenī pea mo te ʼuluaki ʼalatike ako, ʼe foaki mai e Sehova koteʼuhi ʼe ʼofa lahi kiā tātou. ʼE ina fia puipui tātou mai te maʼuli fakaʼofaʼofa pea mo te lotomamahi ʼaē ʼe feala ke hoko mokā tou muliʼi te ʼu fakahala ʼa Satana. Ko te ala ʼaē ʼe loto e Sehova ke tou haga haʼele ai ʼe lagi faigataʼa, kae ʼe ina taki ki te tauʼaga ʼaē ʼe lelei age, ia te maʼuli heʼegata. (Mat. 7:14) ʼAua naʼa tou lotolotolua ki tatatou fakatotonu ʼaē ke tou fakalogo lelei ki te fakalotomālohi ʼaenī ʼa Sehova: “Koʼenī te ala. Kotou haʼele ai.”—Isa. 30:21.

[ʼU nota]

Koteā Takotou Tali?

ʼE feafeaʼi hakotou lava maʼuliʼi ia te ʼu fakatokaga ʼaē ʼe tuʼu ʼi te ʼu vaega Tohi-Tapu ʼaenī?

• 2 Petelo 2:1-3

• 1 Timoteo 1:3, 4

• 1 Timoteo 5:11-15

[ʼU fehuʼi ʼo te ako]

[Talanoa/Paki ʼo te pāsina 19]

 Ke Mavetevete Te ʼu Fuluʼi Moa ʼi Te Matagi

ʼE hā lelei ʼi te hisitolia ʼāfea Fakasutea te ʼu fua kovi ʼo te fakamafola ʼo he fai fatufatu. Neʼe lahi te faʼahiga fakamatala ʼo te hisitolia ʼaia, kae koʼenī te manatu tāfito ʼo te hisitolia:

Neʼe ʼalu te tagata ki te kolo ʼo fasituʼu ʼo ʼuhiga mo te tagata poto ʼo te kolo ʼaia. Ki muli age neʼe mahino ki te tagata fai fatufatu ʼaia neʼe kovi tana aga pea neʼe toe liliu ki te tagata poto ʼo kole ke fakamolemole age ki ai, ʼo ina ʼui age ʼe ina fai anai ia meʼa fuli pē ke feala ai hanā fakatokatoka. Ko te faʼahi e tahi neʼe kole age e te tagata poto: Neʼe ina ʼui age ki te tagata fai fatufatu ke ʼalu ʼo toʼo he pila fuluʼi moa pea ke ina sipiʼi ke mavetevete ai te ʼu fuluʼi moa ʼi te matagi. Logolā neʼe mole mahino te tagata fai fatufatu ki te kole ʼaia, kae neʼe mulimuli kiai pea neʼe toe liliu age ki te tagata poto ʼaia.

Neʼe ina kole age fēnei: “ ʼI te temi ʼaenī kua ke fakamolemole mai koa lā?”

Neʼe tali fēnei e te tagata poto: “ ʼAlu muʼa ʼo tānaki mai ia te ʼu fuluʼi moa fuli.”

“Kae ʼe lava feafeaʼi haku fai ia te faʼahi ʼaia? Kua mavetevete ia te ʼu fuluʼi moa ʼi te matagi.”

“ ʼE faigataʼa te fakatokatoka ʼo te kovi ʼaē neʼe ke fai ohagē pē ko te faigataʼa ʼo tau toe ʼalu ʼo tae mai ia te ʼu fuluʼi moa.”

ʼE tou mahino lelei ki te ako ʼe feala ke tou tāʼofi ʼi te hisitolia ʼaenī. ʼI takita ʼosi fai he ʼu palalau, ʼe mole kei feala hakita toe liliu mai moʼo fetogi te ʼu palalau ʼaia, pea ʼe feala ke faigataʼa te pulihi ia te mamahi ʼaē neʼe fakatupu e te ʼu palalau ʼaia. ʼI muʼa ʼo te fakamafola ʼo he ʼu fasituʼu, ʼe tou agapoto anai mokā ʼe tou manatuʼi, ʼi hona ʼaluʼaga fakatā, ʼe tou haga fakamavetevete te ʼu fuluʼi moa ʼi te matagi.

[Paki ʼo te pāsina 16]

ʼE lava fakaafe feafeaʼi e ʼihi he kau ʼapositā ki tonatou loto fale?