ʼE Kotou Mulimuli Anai Koa Ki Te Takitaki ʼOfa ʼa Sehova?
ʼE Kotou Mulimuli Anai Koa Ki Te Takitaki ʼOfa ʼa Sehova?
“Neʼe au fehiʼa ki te ʼu ala fuli pē ʼo te loi.”—PES. 119:128.
1, 2. (a) ʼI takotou kumi he tahi ke ina takitaki koutou ki te koga meʼa ʼaē ʼe kotou fia ʼolo kiai, ko te faʼahiga fakatokaga fea ʼaē ʼe feala ke kotou loto fakafetaʼi kiai pea koteā tona tupuʼaga? (b) Koteā te ʼu faʼahiga fakatokaga ʼe foaki e Sehova kiā nātou ʼaē ʼe tauhi kiā te ia pea koteā tona tupuʼaga?
KOTOU fakakaukauʼi age muʼa ia te ʼaluʼaga ʼaenī: ʼE tonu ke kotou ʼolo ki he koga meʼa. Pea ʼe kotou fakalavelave ki hokotou kaumeʼa ʼe kotou falala ki ai, ke ina takitaki koutou heʼe ina ʼiloʼi te ala. ʼI tana fakahā atu ia te ʼu ala fuli moʼo kaku kiai, ʼe feala pē anai ke ina ʼui fēnei atu: “Ke ke tokaga ki te pikoga ʼaenī. ʼE hala te panō ʼaē ʼe tuʼu ai. Tokolahi te hahaʼi neʼe natou mulimuli kiai pea natou hehē ai.” ʼE kotou loto fakafetaʼi koa ki tana loto tokaga ʼaia kiā koutou, pea ʼe kotou fakalogo lelei anai koa ki te fakatokaga ʼaia? ʼE feala pē ke tou ʼui ko Sehova ʼe hagē ko tokotou kaumeʼa ʼaia. ʼE ina fakahā lelei mai kiā tātou peʼe feafeaʼi hatatou kaku ki te maʼuli heʼegata, kae ʼe ina toe fakatokagaʼi foki ia tātou, ʼo ʼuhiga mo te ʼu fakaneke kovi ʼaē ʼe feala ai ke tou toʼo he ala ʼe mole lelei.—Teu. 5:32; Isa. 30:21.
2 ʼI te ʼalatike ʼaenī pea mo te ʼalatike ʼaē ʼe hoa mai, ʼe tou talanoa anai ki ʼihi fakaneke ʼaē ʼe fakatokagaʼi mai tātou kiai e totatou Kaumeʼa ko Sehova ʼAtua. Tou manatuʼi, ʼe foaki mai e Sehova ia te ʼu fakatokaga ʼaia, heʼe tuʼania pea mo ʼofa kiā tātou. ʼE loto ke tou kākusia ki te maʼuli heʼegata. Ko he meʼa fakalotomamahi kiā ia tana sio ʼaē ki te higa ʼa te hahaʼi ki te ʼu fakaneke kovi pea mo natou hēʼia ai. (Esk. 33:11) ʼI te ʼalatike ʼaenī, ʼe tou talanoa anai ki te ʼu fakaneke kovi e tolu. ʼUluaki, ko te fakaneke ʼaē ʼe haʼu mai te mālama ʼa Satana, pea lua ko te ʼu holi ʼaē ʼi totatou loto. Pea tolu leva, ko te ʼu meʼa ʼe feala ke tou falala kiai kae ʼe vaʼiganoa ia pea ʼe feala pē ke tou tuʼutāmakiʼia ai. ʼE ʼaoga ke tou ʼiloʼi te ʼu fakaneke ʼaia, pea mo te ako ʼaē ʼe foaki mai e tatatou Tamai ʼaē ʼi selō moʼo tauʼi ia te ʼu ʼaluʼaga ʼaia. Neʼe ʼui fēnei e te tagata fai pesalemo kiā Sehova: “Neʼe au fehiʼa ki te ʼu ala fuli pē ʼo te loi.” (Pes. 119:128) ʼE kotou maʼu koa ia te taʼi manatu ʼaia? Tou vakaʼi age muʼa peʼe lava feafeaʼi ke mālohi iā tātou te manatu ʼaia pea mo tou fakahā ʼi te ʼu meʼa ʼaē ʼe tou fai.
ʼAua Naʼa Kotou Muliʼi Ia “Te Hahaʼi Tokolahi”
3. (a) He koʼē ʼe fakatupu tuʼutāmaki hatatou muliʼi ʼihi hahaʼi fai fagona mokā ʼe mole tou faʼa ʼiloʼi lelei peʼe ko te ala fea ʼaē ʼe tonu ke tou ʼolo ai? (b) Koteā te pelesepeto maʼuhiga ʼaē ʼe tou maʼu iā Ekesote 23:2?
3 ʼI hakotou fai he fagona loaloaga, koteā ʼaē kā kotou fai anai mokā ʼe mole kotou faʼa ʼiloʼi lelei peʼe ko te ala fea ʼaē ʼe tonu ke kotou ʼolo ai? Lagi ʼe kotou fia muliʼi anai ʼihi hahaʼi fai fagona, tāfito lā mokā kotou tokagaʼi ʼe tokolahi ia nātou ʼe natou fagona ʼi te ala ʼaia. Ko te manatu ʼaia ʼe feala ke kotou tuʼutāmakiʼia ai, mai tona ʼaluʼaga ʼaē ko te hahaʼi ʼaia ʼe mole lagi natou ʼolo ki te koga meʼa ʼaē ʼe kotou fia kaku kiai, peʼe lagi toe hehē foki mo nātou. ʼO ʼuhiga mo te faʼahi ʼaia, tou vakaʼi he pelesepeto ʼe fakatafito kiai te lao ʼi te ʼu lao ʼaē neʼe foaki ki Iselaele ʼi te temi muʼa. ʼI te ʼu faifakamāu, ko te ʼu tuʼi fakamāu peʼe ko te kau fakamoʼoni, neʼe fakatokagaʼi age kiā nātou te tuʼutāmaki ʼaē ʼe feala ke hoko mokā natou ‘muliʼi ia te hahaʼi tokolahi.’ (Lau ia Ekesote 23:2.) ʼE mahino ia, ʼe toe faigafua pē foki ki te tagata agahala hana ‘muliʼi ia te hahaʼi,’ ʼo mole ina fakahoko lelei ia te faitotonu. Kae ko te pelesepeto ʼaē ke ʼaua naʼa tou muliʼi ia te hahaʼi tokolahi, neʼe fakatuʼakoi pē koa ki te ʼu faifakamāu? Kailoa ia.
4, 5. Neʼe fakaneke feafeaʼi ia Sosue mo Kalepe ke nā muliʼi ia te hahaʼi tokolahi, kae koteā ʼaē neʼe fakafealagia ke nā lava tauʼi te faʼahi ʼaia?
4 ʼI tona fakahagatonu, ʼe feala ke hoko kiā tātou ʼi te temi fuli pē te fakaneke ʼaē ke tou ‘muliʼi ia te hahaʼi tokolahi.’ Lagi ʼe ko he ʼaluʼaga ʼe feala ke hoko fakapunamaʼuli, pea ʼe feala ke faigataʼa ʼaupitō hatatou tekeʼi. Ohagē lā, tou fakakaukauʼi age muʼa te lakaga ʼaē neʼe fakaneke ai e te hahaʼi ia Sosue pea mo Kalepe. Neʼe nā kau ʼi te toko 12 kau malomu ʼaē neʼe ʼolo ʼo vakavakaʼi ia te Kele ʼo Te Fakapapau. ʼI tanatou toe liliu mai, ko te toko hogofulu ʼi te ʼu tagata ʼaia neʼe mole lelei ia te logo ʼaē neʼe natou tala pea neʼe fakalotovaivai. Neʼe natou toe ʼui ko ʼihi hahaʼi ʼo te fenua ʼaia, ko te ʼu tagata lalahi ʼaupitō neʼe hihifo mai te hōloga ʼo te ʼu Nefilime, te ʼu fānau ʼaia ʼa te ʼu ʼāselo agatuʼu pea mo te ʼu fafine. (Sen. 6:4) ʼE mahino ia neʼe mole fakapotopoto tanatou ʼu palalau ʼaia, heʼe ko te ʼu tagata lalahi agakovi ʼaia, neʼe kua fakaʼauha nātou ʼi te Tulivio ʼi ni ʼu sēkulō ki muʼa atu, ʼo puli kātoa ai tonatou ʼu hako. Kae neʼe malave mālohi te ʼu manatu hala ʼaia kiā nātou he neʼe kua vaivai ia tanatou tui. Ko te ʼu logo kovi ʼaia, ʼaē neʼe tala e te ʼu malomu e toko hogofulu, neʼe tupu ai te mātataku pea mo te loto hoha ʼa te hahaʼi. Mole tuai pea neʼe tui pau ai e te tokolahi ʼe mole ko he fakatuʼutuʼu lelei hanatou hū ki te Kele ʼo Te Fakapapau, ohagē ko tona fakatotonu age e Sehova kiā nātou. ʼI te fihifihia ʼaia, koteā ʼaē neʼe fai e Sosue pea mo Kalepe?—Fkau. 13:25-33.
5 Neʼe mole nā muliʼi ia te hahaʼi tokolahi. Logolā te mole fia logo ʼa te hahaʼi tokolahi, kae ko te ʼu tagata ʼaia e toko lua neʼe nā tala te moʼoni pea neʼe nā tui pau kiai—māʼiapē lā ʼi te temi ʼaē neʼe natou fakamatakuʼi ke natou taumakaʼi ia nāua ke nā mamate ai! Neʼe tupu maifea tanā lototoʼa ʼaia? ʼE mahino ia, neʼe nā lototoʼa tāfito he neʼe nā tui kiā Sehova. Ko te hahaʼi tui, ʼe natou mahino lelei ki te kehekehe ʼo te ʼu fakamatala hala ʼa te ʼu tagata pea mo te ʼu fakapapau taputapu ʼa Sehova ʼAtua. Ki muli age, ko te ʼu tagata toko lua ʼaia neʼe nā fakahā te ʼu meʼa ʼaē neʼe malave iā nāua ʼo ʼuhiga mo te fakahoko tuʼumaʼu pē e Sehova tana ʼu fakapapau fuli. (Lau ia Sosue 14:6, 8; 23:2, 14.) Ko Sosue mo Kalepe neʼe nā taupau maʼu tanā agatonu ʼaē ki te ʼAtua, pea neʼe mole feala kiā nāua ke nā fakamamahiʼi ia Sehova, ʼo nā muliʼi ia te hahaʼi tokolahi ʼaē neʼe mole tui. Kae neʼe nā pipiki maʼu kiā Sehova, ʼo nā tuku mai he faʼifaʼitaki lelei kiā tātou iā ʼaho nei.—Fkau. 14:1-10.
6. Ko te ʼu ʼaluʼaga fea ʼaē ʼe feala ai ke fakaneke tātou ke tou muliʼi ia te hahaʼi tokolahi?
6 Neʼe mole heʼeki ʼi ai koa he ʼaho neʼe kotou manatu ai ke kotou muliʼi ia te hahaʼi tokolahi? ʼE tokolahi te hahaʼi iā ʼaho nei ʼe natou mamaʼo mai iā Sehova, pea mo natou meʼa noaʼi ia tana ʼu lēkula ʼo ʼuhiga mo te aga ʼaē ʼe tonu ke fai. Ko te hahaʼi tokolahi ʼaia ʼe natou maʼu te ʼu manatu hala ʼo ʼuhiga mo te ʼu fakafiafia pea mo te ʼu temi mālōlō. Lagi ʼe natou ʼui ʼe mole kovi te ʼu aga heʼeʼaoga, mo te agamālohi, pea mo te fai fakalauʼakau ʼaē kua mafola ʼaupitō ʼi te temi nei ʼi te ʼu polokalama televisio, ʼi te ʼu ʼata, pea mo te ʼu gaoʼi viteo. (2 Tim. 3:1-5) Koteā ʼaē kā ina uga anai koutou mokā kotou filifili he ʼu fakafiafia maʼa koutou pea mo tokotou fāmili? ʼE kotou fakaʼuhigaʼi koa ko he meʼa ʼe lelei peʼe kovi, ʼuhi ko te meʼa ʼaē ʼe ʼui e ʼihi peʼe ko te ʼu meʼa ʼaē ʼe natou fai? Kapau ʼe kotou fai takotou ʼu tonu ʼo mulimuli ki te ʼu faʼahi ʼaia, pea ʼe kotou muliʼi ai ia te hahaʼi tokolahi.
7, 8. (a) ʼE feafeaʼi te akoʼi ʼo totatou “ ʼu fealagia fakakaukau” pea he koʼē ko te taʼi ako ʼaia ʼe lelei age ia ʼi hatatou muliʼi he ʼu lēkula ʼe fefeka? (b) He koʼē ko he meʼa fakalotofīmālie kiā koutou ia te ʼu faʼifaʼitaki lelei ʼo te ʼu tūpulaga Kilisitiano?
7 Neʼe foaki mai e Sehova ia te meʼa ʼofa maʼuhiga ke tokoni mai kiā tātou ke tou fai he ʼu tonu: ʼe ko totatou “ ʼu fealagia fakakaukau.” Kae ʼe tou akoʼi totatou ʼu fealagia ʼaia mokā ʼe tou “fakaʼaogaʼi.” (Hep. 5:14) Kapau ʼe tou muliʼi te hahaʼi tokolahi pea ʼe mole tou akoʼi ai totatou ʼu fealagia fakakaukau, pea ʼi te tahi age faʼahi, ʼe mole tou toe akoʼi anai totatou ʼu fealagia fakakaukau mo kapau ʼe tou fakatuʼu he ʼu lēkula fefeka ʼo ʼuhiga mo he ʼu faʼahi ʼe fakalogo ia ki tokita leʼo ʼo loto. Koia lā ʼaē ʼe mole foaki ai ki te hahaʼi ʼa Sehova he lisi ʼo he ʼu ʼata, mo he ʼu tohi, pea mo he ʼu tuʼasila ʼi te Neti ke natou tekeʼi. Ko te manatu ʼo te mālama ʼaenī ʼe fetogi vave, koia ʼe mole ʼaoga ai ke fakatuʼu he lisi fēia. (1 Ko. 7:31) Ko te faʼahi ʼaē ʼe kovi age, heʼe mole feala ai leva ke tou fai ia te gāue maʼuhiga ʼaē ke tou vakavakaʼi fakalelei te ʼu pelesepeto, ke tou faikole fakamālotoloto pea ke tou fai he ʼu tonu ʼe fakatafito ki te ʼu pelesepeto ʼaia.—Efe. 5:10.
8 ʼE moʼoni, ʼi ʼihi temi ʼe mole leleiʼia tātou e te hahaʼi ʼuhi ko te ʼu tonu ʼaē ʼe tou fai, ʼaē ʼe fakatafito ki te Tohi-Tapu. Ko te kau tūpulaga Kilisitiano, ʼe lagi feala ʼi te fale ako ke fakaneke mālohi ia nātou ke natou muliʼi ia te hahaʼi tokolahi, ke natou sioʼi pea mo fai te aga ʼaē ʼe natou fai ke natou liliu ohagē ko nātou. (1 Pet. 4:4) Koia, ʼe ko he meʼa taulekaleka tatatou sio ʼaē ki te ʼu tūpulaga Kilisitiano pea mo te ʼu hahaʼi kua mātutuʼa, ʼe natou faʼifaʼitakiʼi ia te tui ʼaē neʼe maʼu e Sosue pea mo Kalepe, ʼo natou fakafisi ke natou muliʼi ia te hahaʼi tokolahi.
ʼAua Naʼa Kotou Muliʼi “Tokotou Loto Pea Mo Tokotou ʼu Mata”
9. (a) ʼI takita fagona ʼi te ala, he koʼē ʼe fakatupu tuʼutāmaki takita mulimuli pē ki te ʼu meʼa ʼaē ʼe kita loto kiai? (b) He koʼē neʼe maʼuhiga ki te hahaʼi ʼa te ʼAtua te lao ʼaē ʼe tuʼu iā Faka au 15:37-39?
9 ʼE tou talanoa anai ki te lua fakaneke ʼaē ʼe feala ke ina fakatupu ʼi totatou loto he ʼu meʼa ʼe kovi. ʼE feala ke tou toʼo te faʼifaʼitaki ʼaenī: Kapau ʼe kotou ʼolo ki he koga meʼa, ʼe feala koa ke mole kei kotou fia fakaʼaogaʼi takotou mape, ʼo kotou mulimuli pē koutou ki te ala ʼaē ʼe kotou fia ʼolo ai—ʼe lagi kotou afe anai ʼi te ʼu ala ʼaē ʼe hagē ʼe kotou sio ai ki he ʼu koga meʼa matalelei? ʼE mahino mai, kapau ʼe kotou fia mulimuli pē ʼi te ala ʼaē ʼe kotou fia ʼolo ai, ʼe feala ke mole kotou kaku ki te koga meʼa ʼaē neʼe tonu ke kotou ʼolo kiai. ʼO ʼuhiga mo te faʼahi ʼaia, tou vakaʼi ia te tahi lao ʼa Sehova ʼi te ʼu lao ʼaē neʼe ina foaki ki te hahaʼi ʼo Iselaele. Lagi tokolahi iā ʼaho nei, ʼe faigataʼa kiā nātou tanatou mahino ki te lao ʼaē neʼe fakatotonu ai, ke natou tui he ʼu tapaʼi kofu ʼi tonatou ʼu teu ʼaki he ʼu filo ʼuʼui. (Lau ia Faka au 15:37-39.) Kae ʼe kotou fakatokagaʼi koa ia te maʼuhiga ʼo te lao ʼaia? Ko te fakalogo ki te lao ʼaia, neʼe tokoni ai ki te hahaʼi ʼa te ʼAtua ke natou manatuʼi ʼe natou makehe pea ke natou mavae kehe mai te ʼu puleʼaga pagani ʼi ʼonatou tafaʼaki. Neʼe maʼuhiga ia te faʼahi ʼaia, ke feala hanatou maʼu pea mo taupau ia te ʼofa ʼo Sehova. (Lev. 18:24, 25) Kae, ko te lao ʼaia ʼe ina toe fakahā mai te fakaneke ʼe tupu ʼi totatou loto, pea ʼe feala ke ina taki mamaʼo tātou mai te maʼuli heʼegata. ʼO feafeaʼi?
10. ʼE mahino feafeaʼi ia Sehova ki te nātulā ʼo te tagata?
10 Kotou tokagaʼi ia te tupuʼaga ʼo te foaki e Sehova ki tana hahaʼi ia te lao ʼaia: “ ʼE mole tonu ke kotou mulimuli ki tokotou loto pea mo tokotou ʼu mata, ʼaē kā ina taki ai koutou ki he ʼu felāveʼi fakasino heʼeʼaoga.” ʼE mahino lelei ia Sehova ki te nātulā ʼo te tagata. ʼE ina ʼiloʼi lelei ʼe fakahalaʼi gafua totatou loto ʼaki totatou ʼu mata. Koia ʼe fakatokagaʼi fēnei tātou ʼi te Tohi-Tapu: “ ʼE kākā te loto, ʼo laka iā meʼa fuapē, pea mo kovi ʼaupitō. Ko ai ʼaē ʼe ina lava ʼiloʼi?” (Sel. 17:9) Kua kotou mahino ki te tupuʼaga ʼo te fai e Sehova te fakatokaga ʼaia ki te kau Iselaele? Neʼe mahino lelei kiā te ia, neʼe feala ki te hahaʼi ʼo Iselaele ke natou fia sioʼi te hahaʼi pagani ʼi ʼonatou ʼu tafaʼaki, pea ke fakahalaʼi ai nātou ʼaki te ʼu meʼa ʼaē neʼe natou sisio kiai. Neʼe feala ke natou fia faʼifaʼitakiʼi ia te ʼu hahaʼi heʼe tui ʼaia, pea ke natou manatu ohagē ko nātou, pea mo faʼifaʼitakiʼi tanatou ʼu aga.—Taag. 13:20.
11. Ko te faʼahi fea ʼaē ʼe feala ai ke fakahalaʼi tātou e totatou ʼu logoʼaga sino?
11 ʼI totatou temi, ʼe toe faigafua age te fakahalaʼi ʼo totatou loto ʼaē ʼe kākā ʼaki totatou ʼu logoʼaga sino. ʼE tou maʼuli nei ʼi he mālama ʼe mulimuli tāfito ki te ʼu holi fakasino. ʼE feafeaʼi hatatou maʼuliʼi te pelesepeto ʼaē iā Faka au 15:39? Tou fakakaukauʼi age muʼa te faʼahi ʼaenī: Kapau lā ko tokotou ʼu kaugā ako, peʼe ko tokotou ʼu kaugā gāue, peʼe ko te hahaʼi ʼi te koga meʼa ʼaē ʼe kotou māʼuʼuli ai ʼe mole natou faiteuteu fakapoipoi, ʼe feala koa ke malave kiā koutou? ʼE kotou fia ‘muliʼi koa ia tokotou loto pea mo tokotou ʼu mata’ pea mo fakahalaʼi koutou e te ʼu meʼa ʼaē ʼe kotou sio kiai? Pea ʼe kotou fia meʼa noaʼi koa te ʼu pelesepeto ʼa te ʼAtua ʼo ʼuhiga mo te faiteuteu, ʼo kotou muliʼi te faʼahiga faiteuteu ʼo te mālama?—Loma 12:1, 2.
12, 13. (a) Koteā ʼaē ʼe tonu ke tou fai mokā ʼe tou tuku totatou ʼu mata ke sio ki he ʼu meʼa ʼe mole tonu ke sio kiai? (b) Koteā ʼaē ʼe feala ke ina uga tātou ke mole tou liliu ko he fakahala ki ʼihi?
12 ʼE maʼuhiga ke tou maʼu ia te loto lolomi. Kapau ʼe tou tuku totatou ʼu mata ke sio ki he ʼu meʼa ʼe mole tonu ke sio kiai, tou manatuʼi te fakatotonu mālohi ʼaē ʼa Sopo ke nofo agatonu, ʼo ina fai te fuakava mo tona ʼu mata—neʼe ina fakatotonu ke mole sio ki he tahi fafine ʼe mole ko tona ʼohoana ʼaki he holi ki ai. (Sopo 31:1) ʼE toe fēia mo te Hau ko Tavite neʼe ina fakatotonu fēnei: “ ʼE mole au tuku anai he meʼa ʼe kovi iā muʼa ʼo toku ʼu mata.” (Pes. 101:3) Ko meʼa fuli pē ʼaē ʼe feala ke natou ʼulihi totatou leʼo ʼo loto pea mo tatatou ʼu felōgoi mo Sehova, ʼe ko ‘he meʼa ia ʼe kovi’ kiā tātou. ʼE kau ki te ʼu meʼa ʼaia, ia te ʼu fakahala fuli ʼe natou uga totatou ʼu mata pea mo uga totatou loto ke tou fai he aga ʼe kovi.
13 ʼI te tahi age faʼahi, ʼe mole tou fia liliu anai ʼi he temi ko “he meʼa ʼe kovi” ki ʼihi, ʼo fakahalaʼi nātou ke natou fai he aga ʼe kovi. Koia, ʼe tonu ke tou fakalogo ki te tokoni ʼaē ʼe tuʼu ʼi te Tohi-Tapu, ke tou faiteuteu lelei ‘ ʼaki he aga fakapoipoi.’ (1 Tim. 2:9) Kapau ʼe tou faiteuteu ‘ ʼaki he aga fakapoipoi,’ ʼe mole tou manatu pē ki te ʼu meʼa ʼaē ʼe tou leleiʼia. ʼE tou fakaʼapaʼapa ki te manatu ʼa ʼihi. ʼE tou fia fakafiafia ʼuluaki te loto ʼo ʼihi, ʼo laka age iā tātou. (Loma 15:1, 2) ʼE tapuakinaʼi te kōkelekāsio Fakakilisitiano, ʼuhi ko te ʼu toko lauʼi afe kau tūpulaga ʼaē ʼe natou tuku he ʼu faʼifaʼitaki lelei ʼi te faʼahi ʼaia. ʼE tou fiameʼameʼa ʼo ʼuhiga mo nātou heʼe natou fakafisi ke natou ‘mulimuli ki tonatou loto pea mo tonatou ʼu mata,’ kae natou filifili ke natou fakafiafia ia te loto ʼo Sehova ʼi te ʼu meʼa fuli ʼaē ʼe natou fai, ʼo toe fēia pē mo tanatou ʼu faʼahiga faiteuteu!
ʼAua Naʼa Kotou Muliʼi Ia “He ʼu Meʼa ʼe Vaʼiganoa”
14. Koteā te fakatokaga ʼaē neʼe tala e Samuele ʼo ʼuhiga mo te muliʼi ia “he ʼu meʼa ʼe vaʼiganoa”?
14 Kotou fakakaukauʼi age muʼa ʼe kotou fagona ʼo kotou fakalaka ʼi he toe toafa. Koteā ʼaē ʼe feala ke hoko mokā ʼe kotou toʼo he tahi ala ʼo kotou muliʼi he meʼa ʼe mole moʼoni? ʼI takotou muliʼi ia te meʼa ʼaia ʼe feala ke tuʼutāmaki ai tokotou maʼuli! ʼE ʼiloʼi lelei e Sehova te tuʼutāmaki ʼaia ʼe feala ke hoko kiā tātou. Tou vakaʼi age muʼa he faʼifaʼitaki: Neʼe loto ia Iselaele ke natou fia tatau mo te ʼu fenua ʼo tonatou ʼu tafaʼaki, ʼaē neʼe puleʼi nātou e te ʼu hau tagata. ʼI tona fakahagatonu, neʼe ko he agahala mamafa ia, he neʼe hagē pē ko hanatou fakafisi ke Pule Sehova kiā nātou. Logolā neʼe fakagafua age e Sehova kiā nātou ke natou fakanofo he hau tagata, kae neʼe ina fakatotonu ki tana polofetā ko Samuele ke ina tala he fakatokaga maʼuhiga kiā nātou ʼo ʼuhiga mo te muliʼi ia “he ʼu meʼa ʼe vaʼiganoa.”—Lau ia 1 Samuele 12:21.
15. Neʼe muliʼi feafeaʼi e te kau Iselaele ia he ʼu meʼa ʼe vaʼiganoa?
15 Lagi neʼe manatu e te kau Iselaele ʼe feala ke natou falala ki he hau tagata, ʼi hanatou falala kiā Sehova. Kapau neʼe natou manatu fēia, pea neʼe natou muliʼi ia “he ʼu meʼa ʼe vaʼiganoa.” ʼI tanatou fakatui ki he meʼa ʼe vaʼiganoa, neʼe faigafua ai kiā nātou hanatou tui ki te tahi atu ʼu meʼa ʼe vaʼiganoa ʼe haʼu mai iā Satana. Ohagē lā, neʼe feala ki he hau tagata ke ina taki nātou ki te tauhi tamapua! Ko te hahaʼi ʼaē ʼe tauhi ki te ʼu fakatātā, ʼe natou faihala ʼi tanatou manatu ʼaē ko he ʼu meʼa ʼe natou sio kiai, he ʼu tamapua neʼe faʼu ʼaki te ʼakau peʼe ko te maka, ʼe natou moʼoni age nātou, mo lahi age te falala ʼaē kiā nātou ʼi te ʼAtua fakapulipuli ʼaē ko Sehova, ia ia ʼaē neʼe ina fakatupu ia meʼa fuli. Kae ohagē ko tona ʼui e te ʼapositolo ko Paulo, ko te ʼu fakatātā ‘ ʼe mole ʼi ai honatou ʼuhiga.’ (1 Ko. 8:4) ʼE mole feala ke natou sisio, mo logo, mo palalau pea mo gaugaue. ʼE moʼoni, ʼe feala ke kotou sio ki te ʼu fakatātā pea mo kotou fāfā kiai, kae kapau ʼe kotou ʼatolasio kiai, pea ʼe kotou muliʼi he meʼa ʼe vaʼiganoa, ʼe mole hona ʼuhiga heʼe feala pē ke hoko kiā koutou he tuʼutāmaki.—Pes. 115:4-8.
16. (a) Iā ʼaho nei, ʼe fakahalaʼi feafeaʼi e Satana ia te tokolahi ke natou kumi ia te ʼu meʼa ʼaē ʼe vaʼiganoa? (b) He koʼē ʼe feala ke tou ʼui ko te ʼu koloa ʼe ko he ʼu meʼa ʼe vaʼiganoa, tāfito lā mokā ʼe tou fakatatau mo Sehova ʼAtua?
16 ʼE kei faiva ia Satana ʼi te fakalotoʼi ʼo te hahaʼi ke natou muliʼi te ʼu meʼa ʼe vaʼiganoa. Ohagē lā, ʼe ina fakahalaʼi te hahaʼi tokolahi ke natou haga kumi te ʼu koloa ke natou maʼu ai he fīmālie. Lagi ko te falā, mo te maʼu koloa pea mo he lī totogi ʼe lelei ʼaē ʼe hagē ʼe natou foaki he faʼahiga fīmālie kiā nātou. Kae ʼe feala koa ke haofaki e te ʼu koloa te hahaʼi mokā natou māhahaki, mokā hoko he lākilisi ʼi te faʼahi fakaekonomika, peʼe mokā hoko he tuʼutāmaki fakanātulā? Koteā ʼaē ʼe feala ke foaki e te falā mo te ʼu koloa moʼo tokoni ki te hahaʼi mokā kua natou lotovaivai, mo ʼaoga kiā nātou he ʼamanaki, mo he takitaki pea mo he ʼu tali ki tanatou ʼu fehuʼi maʼuhiga? Koteā te lotofīmālie ʼaē ʼe feala ke natou foaki ki he tahi kā mate? ʼE tou lotovaivai pē anai mo kapau ʼe tou falala ki te ʼu koloa ke tou maʼu ai ia te ʼu meʼa ʼaē ʼe ʼaoga kiā tātou ʼi te faʼahi fakalaumālie. ʼE mole feala ki te ʼu koloa ke natou haofaki tātou heʼe ko he ʼu meʼa ia ʼe vaʼiganoa. Ki muli age, ʼe mole feala ke foaki mai e te ʼu koloa he fīmālie fakasino, heʼe mole tologa te ʼu lelei ʼaē ʼe tou maʼu mai ai ʼuhi ʼe nounou totatou maʼuli peʼe lagi tou māhahaki pea mo tou mamate. (Taag. 23:4, 5) Kae ko Sehova, totatou ʼAtua, ʼe maʼuli moʼoni ia! ʼE feala hatatou maʼu he fīmālie moʼoni mo kapau ʼe mālohi totatou ʼu felōgoi mo ia. ʼE ko he toe tapuakina lahi ʼaia! ʼAua naʼa tou liʼaki ʼi he temi ia Sehova moʼo kumi ia te ʼu meʼa ʼaē ʼe vaʼiganoa.
17. Koteā ʼaē ʼe kotou fakatotonu ke kotou fai ʼo ʼuhiga mo te ʼu fakaneke kovi ʼaē neʼe tou talanoa kiai?
17 ʼE mole tapuakinaʼi koa tātou e Sehova ʼi tana liliu ʼaē ko hotatou Kaumeʼa pea mo hotatou Takitaki ʼi totatou maʼuli kātoa? ʼE mahino papau ia, ʼe tou kaku anai ki te maʼuli heʼegata mo kapau ʼe tou haga mulimuli ki tana ʼu fakatokaga ʼofa ʼo ʼuhiga mo te ʼu fakaneke kovi e tolu, ʼaē ko te muliʼi ia te hahaʼi tokolahi, mo totatou loto pea mo te ʼu meʼa ʼe vaʼiganoa. ʼI te ʼalatike ʼaē kā hoa mai, ʼe tou vakaʼi ai anai te tahi ʼu fakatokaga ʼe foaki mai e Sehova moʼo tokoni kiā tātou ke tou fehiʼa ki te ʼu ala ʼaē ʼe kovi, ʼaē ʼe hehē ai te tokolahi pea ke ʼaua naʼa tou muli ai.—Pes. 119:128.
Koteā Takotou Manatu?
ʼE feafeaʼi koa hakotou maʼuliʼi takitokotahi te ʼu pelesepeto ʼi te ʼu vaega ʼaenī?
[ʼU fehuʼi ʼo te ako]
[Paki ʼo te pāsina 11]
Neʼe mole heʼeki kotou fia muliʼi koa ia te hahaʼi tokolahi?
[Paki ʼo te pāsina 13]
He koʼē ʼe fakatupu tuʼutāmaki hakotou muliʼi ia te ʼu meʼa ʼaē ʼe kotou loto kiai?
[Paki ʼo te pāsina 14]
ʼE kotou lolotoga kumi koa he ʼu meʼa ʼe vaʼiganoa?
