Ko He Logo Lelei Ki Te Hahaʼi Māsisiva

ʼE FAKAPAPAUʼI fēnei mai ʼi te Folafola ʼa te ʼAtua: “Ko te tagata masiva ʼe mole galoʼi tuʼumaʼu anai.” (Pesalemo 9:18) Pea ʼe toe ʼui fēnei ʼi te Tohi-Tapu ʼo ʼuhiga mo totatou Tupuʼaga: “ ʼE ke ʼavahi tou nima pea ʼe ke fafaga te loto ʼo te meʼa maʼuli fuli pē.” (Pesalemo 145:16) Ko te ʼamanaki ʼaenī ʼe fakahā ʼi te Folafola ʼa te ʼAtua, ʼe mole ko he moemisi ia. ʼE feala ki te ʼAtua Māfimāfi ke ina foaki ia meʼa fuli ʼe ʼaoga moʼo pulihi ia te maʼuli masiva. Koteā ʼaē ʼe ʼaoga ke pulihi ai te maʼuli masiva?

Ko te fafine fai sivi ʼo te maʼuli fakaekonomika neʼe ina ʼui ʼe ʼaoga ki te ʼu fenua māsisiva ia he “tagata pule ʼe manavaʼofa.” Ko tana manatu: ke fakanofo he tahi ʼe ina maʼu te mālohi ʼaē moʼo fai te ʼu puleʼaki moʼo pulihi te maʼuli masiva pea ʼe toe manavaʼofa moʼo fakahoko te faʼahi ʼaia. ʼE feala ke tou toe hilifaki atu ki tana manatu, ko he pule ʼe ina lava pulihi ia te maʼuli masiva ʼe feala ke pule ki te kele kātoa, heʼe ʼi te agamāhani ʼe maʼuli masiva fakaʼofaʼofa te hahaʼi ʼuhi ko ʼihi pē fenua ʼaē ʼe maʼu meʼa kae māsisiva ʼosi ʼihi fenua. Tahi ʼaē, ko he pule ʼe ina lava pulihi ia te maʼuli masiva, ʼe feala pē anai ke ina fai he puleʼaki moʼo toʼo te tupuʼaga ʼaē ʼo te maʼuli masiva—totatou ʼuhiga tagata heʼe haohaoa ʼaē ʼe ina uga tātou ke tou tahi manatu pē kiā tātou totonu. Kae ʼe feala ke tou maʼu ʼifea ia te taʼi tagata pule lelei ʼaia?

Neʼe fekauʼi mai e te ʼAtua ia Sesu ʼaki te logo lelei ki te kau māsisiva. ʼI te temi ʼaē neʼe tuʼu ai ia Sesu ʼo lau ia te fakatotonu ʼaē neʼe foaki age e te ʼAtua, neʼe ina ʼui fēnei: “Ko te laumālie ʼo Sehova ʼe iā te au, koteʼuhi kua ina fakanofo au ke au fakahā te logo lelei ki te kau māsisiva.”—Luka 4:16-18.

Koteā Ia Te Logo Lelei?

Neʼe fakanofo e te ʼAtua ia Sesu ke Hau. Pea ʼe ko he logo lelei ʼaia. ʼE ko Ia te Pule lelei ʼaē moʼo pulihi ia te maʼuli masiva, (1) heʼe ina maʼu ia te mālohi moʼo takitaki ia te mālamanei kātoa; pea (2) ʼe gāue ʼaki he loto manavaʼofa maʼa te kau māsisiva pea ʼe ina akoʼi ia tana ʼu tisipulo ke natou tōkakaga kiā nātou ʼaia; pea (3) ʼe ina lava pulihi te tupuʼaga ʼo te maʼuli masiva, ʼaē ko te tahi manatu pē ʼaē kiā ia totonu, pea neʼe tou tutupu fuli ake mo ia. Tou vakaʼi age muʼa ia te ʼu ʼaluʼaga e tolu ʼo ʼuhiga mo te logo lelei ʼaia.

1. Te pule ʼa Sesu ki te ʼu puleʼaga fuli ʼE ʼui fēnei ʼi te Folafola ʼa te ʼAtua ʼo ʼuhiga mo Sesu: “Neʼe foaki kiā te ia te pule . . . koteʼuhi ke tauhi kiā te ia te hahaʼi, pea mo te ʼu fenua, pea mo te ʼu faʼahiga lea kehekehe.” (Taniela 7:14) ʼE kotou lava fakafuafua age muʼa te ʼu lelei ʼaē kā maʼu anai e te mālamanei mokā takitaki pē e he puleʼaga e tahi? ʼE mole toe ʼi ai anai he ʼu fihi ki te ʼu lelei ʼaē ʼe maʼu mai te kele. ʼE tou maʼu tatau fuli anai te ʼu lelei ʼaia. Neʼe fakapapau e Sesu totonu, ʼe ko ia anai ko he Pule ʼo te mālamanei ʼe ina maʼu te mālohi moʼo fakahoko te ʼu gāue kehekehe. Neʼe ina ʼui fēnei: “Kua tuku mai kiā te au te pule kātoa, ʼi te lagi pea mo te kele.”—Mateo 28:18.

2. Te manavaʼofa ʼo Sesu ki te hahaʼi māsisiva Lolotoga ia tana minisitelio ʼaē ʼi te kele, neʼe manavaʼofa ia Sesu ki te hahaʼi māsisiva. Ohagē lā, ko te fafine neʼe ina fakaʼaogaʼi tona ʼu koloa fuli moʼo totogi ʼaki tona ʼu faitoʼo, neʼe fāfā ki te kofu ʼo Sesu ʼi tana fakaʼamu ʼaē ʼe maʼu ai anai hona fīmālie. Ko te mahaki ʼo te fafine neʼe ʼalu te toto iā te ia, iā taʼu e 12, pea lagi neʼe kua gaʼegaʼe ʼaupitō ʼi te maligi ʼaia ʼo te toto iā te ia. ʼI te lao, neʼe mole tonu ke ina fāfā he tahi naʼa liliu ʼo heʼemaʼa. Kae neʼe agalelei ia Sesu kiā ia. Neʼe ina ʼui fēnei: “ ʼOfafine, kua fakamālōlō koe e tau tui. ʼAlu ʼi te fīmālie, pea ke ke mālōlō ʼi tou mahaki.”—Maleko 5:25-34.

Neʼe malave mālohi te ʼu akonaki ʼa Sesu ʼo tupu ai te fetogi ʼo te loto ʼo te hahaʼi, ʼo feala mo nātou ke natou toe manavaʼofa ki ʼihi. Ohagē lā, tou vakaʼi age muʼa te tali ʼaē neʼe fai e Sesu ki te tagata neʼe ina fia ʼiloʼi peʼe koteā ʼaē ke ina fai ke ʼofa te ʼAtua iā ia. Neʼe ʼiloʼi e te tagata ʼe loto e te ʼAtua ke tou ʼofa ki totatou kāiga, kae neʼe ina fehuʼi fēnei kiā Sesu: “Ko ai toku kāiga?”

Moʼo tali ki tana fehuʼi, neʼe fakamatala age e Sesu ia te hisitolia ʼo te tagata ʼaē neʼe fagona mai Selusalemi ki Seliko pea neʼe kaihaʼa ia ia pea mo tāmateʼi ʼo tuku ai ia ia kua “teitei mate.” Neʼe hifo mai te ala ʼaia ia te pelepitelō pea neʼe fetogi kau ala ia. ʼO toe  fēia pē mo te Levite. “Kae neʼe ʼi ai leva te tagata Samalitana, neʼe haʼu tona fagona ʼi te ala ʼaia, pea ʼi tana kaku mai ki te potu ʼaia, pea mo tana sio ki ai, neʼe tupu atu aipē iā te ia te manavaʼofa.” Neʼe ina haga ʼo fakamaʼa ia tona ʼu lavea, pea neʼe ina ʼave ia ia ki te fale tali fagona, pea neʼe ina totogi ia te tagata taupau ʼo te fale ke tokaga fakalelei ki ai. Pea neʼe fehuʼi fēnei e Sesu: “Ko ai . . . ʼaē neʼe ko te kāiga ʼo te tagata ʼaē neʼe fetaulaki mo te kau kaihaʼa?” Neʼe ina tali age: “Ko ia ʼaē neʼe manavaʼofa kiā te ia.” Pea neʼe ʼui fēnei age e Sesu: “Ke toe fai fēia mo koe.”—Luka 10:25-37.

Ko te hahaʼi ʼaē kua liliu ko he ʼu Fakamoʼoni ʼa Sehova ʼe natou ako ia te ʼu akonaki ʼaia ʼa Sesu pea ʼe natou fetogi ai ia tanatou faʼahiga manatu ʼaē ʼo ʼuhiga mo te tokoni ʼaē ke foaki ki te hahaʼi. Ohagē lā, ʼi te tohi (Women in Soviet Prisons) neʼe fakamatala ai e te fafine faitohi ʼo te fenua ʼo Lettonie, ia tona mahaki lolotoga tana gāue ʼi te fale pilisoni ʼo Potma ʼi te vaelua ʼo te ʼu taʼu 1960. Neʼe ina ʼui fēnei: “ ʼI te temi ʼaē neʼe au mahaki ai, [ko te kau Fakamoʼoni ʼa Sehova] neʼe ko te ʼu afilimie gāue lelei. Neʼe mole he tahi age faʼahiga taupau mahaki neʼe lelei age neʼe au fakaʼamu kiai.” Neʼe ina toe ʼui fēnei: “Maʼa te kau Fakamoʼoni ʼa Sehova neʼe ko honatou maʼua ke natou tokoni ki te hahaʼi, tatau aipē pe ko te lotu fea mo te fenua fea ʼaē ʼe pipiki kiai te hahaʼi.”

ʼI te hoko ʼo te lākilisi fakaekonomika ʼi te kolo ko Ancon, ʼi Équateur, ʼo tupu ʼaki ai te mole kei ʼi ai he gāue pea mo he totogi ʼa ʼihi kau Fakamoʼoni ʼa Sehova, neʼe fakatuʼutuʼu ai leva tonatou ʼu tehina mo tuagaʼane ke natou fai he puleʼaki moʼo tānaki he falā maʼa nātou ʼaia; neʼe natou teuteuʼi te meʼa kai ke natou fakatau ki te kau tautai mokā natou liliu mai tanatou gelu pōʼuli (pāki ʼi te faʼahi mataʼu). Neʼe lagolago te kōkelekāsio kātoa ki te fakatuʼutuʼu ʼaia, ʼo kau ai mo te tamaliki liliki. ʼI te ʼuhu fuli, neʼe natou kamata teuteuʼi ia te meʼa kai ʼi te hola tahi, ke tau mai lā te ʼu vaka gelu ʼi te hola fā kua tokalelei te meʼa kai. Ko te falā ʼaē neʼe maʼu e te kau fakamoʼoni, neʼe vae ki ʼonatou tehina mo tuagaʼane ʼaē neʼe fihifihia, ʼo mulimuli pē ki te meʼa ʼaē neʼe ʼaoga kiā nātou.

ʼE hā ʼaki mai ʼi te ʼu taʼi ʼaluʼaga ʼaia ia te mālohi ʼaē ʼo te faʼifaʼitaki ʼa Sesu pea mo tana ʼu akonaki moʼo fetogi ia te manatu ʼa te hahaʼi ʼo ʼuhiga mo te tokoni ʼaē ke foaki kiā nātou ʼaē ʼe maʼuli fakaʼofaʼofa.

3. Te mālohi ʼaē ʼe maʼu e Sesu moʼo fetogi ia te ʼuluagaaga ʼo te tagata Ko te agaaga ʼaē ʼo te tagata ke manatu pē kiā ia totonu, ʼe ko he faʼahi ia ʼe kita mahino kiai pea mo kita tali. ʼE fakahigoaʼi ʼi te Tohi-Tapu ʼe ko te agahala. Māʼiapē lā mo te ʼapositolo ko Paulo, neʼe ina ʼui fēnei: “ ʼE au maʼu foki ia te lao ʼaenī ʼo ʼuhiga mo au: ka [ʼe] au fakaʼamu ke au fai ia te meʼa ʼaē ʼe totonu, ko te meʼa ia ʼaē ʼe kovi ʼe iā au.” Pea neʼe ina toe ʼui fēnei: “Ko ai kā ina haofaki anai au mai te sino ʼaē kua tuku ki te mate ʼaia? ʼE au fakafetaʼi ki te ʼAtua ʼaki ia Sesu Kilisito.” (Loma 7:21-25) ʼE talanoa ʼi henī ia Paulo peʼe feafeaʼi anai te haga ʼa te ʼAtua, ʼaki ia Sesu, ʼo haofaki te kau ʼatolasio moʼoni mai tonatou ʼuhiga tagata agahala ʼaē neʼe tutupu ake mo nātou, ʼaē ʼe kau kiai tanatou manatu pē ʼaē kiā nātou totonu, pea ko te tupuʼaga tāfito lā ʼaia ʼo te maʼuli masiva ʼa te hahaʼi. ʼE feafeaʼi anai te fakahoko e te ʼAtua ia te haofaki ʼaia?

ʼI te hili ʼaē ʼo te papitema ʼo Sesu, neʼe ʼui fēnei e Soane Patita ʼo ʼuhiga mo Sesu: “Koʼenī te ʼAkeno ʼa te ʼAtua ʼaē ʼe ina toʼo te agahala ʼo te mālamanei!” (Soane 1:29) Kua vave pē pea nofoʼi anai te kele kātoa e te hahaʼi neʼe kua fakaʼāteaina nātou mai te agahala, ʼo kau ai mo te agaaga ʼaē ko te tahi manatu pē kiā kita totonu. (Isaia 11:9) ʼE pulihi anai e Sesu ia te tupuʼaga ʼo te maʼuli masiva.

ʼE ko he meʼa fakafiafia hakita ʼamanaki ki te temi ʼaē kā maʼu ai anai e te hahaʼi fuli ia te ʼu meʼa fuli ʼaē ʼe ʼaoga anai kiā nātou! ʼE ʼui fēnei ʼi te Folafola ʼa te ʼAtua: “ ʼE natou tahi heka anai ʼi tona lalo fuʼu vite pea mo tona lalo fuʼu fiku, pea ʼe mole ʼi ai anai he tahi ʼe ina fakamanavaheʼi ia nātou.” (Mikea 4:4) Ko te ʼu palalau fakatuketuke ʼaia ʼe ina fakamatalatala ia te temi ʼaē kā maʼu ai anai e te hahaʼi fuli hanatou gāue lelei, honatou maʼuli fīmālie, pea mo te ʼu faigamālie fuli ʼaē ke natou māʼuʼuli ʼi he mālama ʼe mole kei ʼi ai te maʼuli masiva, ke natou fakakolōliaʼi ia Sehova.