Koteā Te Fakaʼuhiga ʼo Te Mālōlō ʼa Te ʼAtua?

“ ʼE kei toe te mālōlō fakasāpato maʼa te hahaʼi ʼa te ʼAtua.”—HEP. 4:9.

1, 2. Koteā ʼaē ʼe feala ke tou mahino kiai ʼaki ia Senesi 2:3 ʼo ʼuhiga te fitu ʼaho, pea koteā te ʼu fehuʼi ʼe lagaʼi ai?

 ʼI TE ʼuluaki kāpite ʼo Senesi, ʼe tou ako mai ai neʼe teuteuʼi e te ʼAtua ia te kele lolotoga te ʼu ʼaho fakatā e ono, ke nofoʼi e te tagata. ʼI te fakaʼosi ʼo te ʼu ʼaho takitahi ʼaia, neʼe fai te ʼu palalau ʼaenī: “Neʼe hoko mai te afiafi pea hoko mai mo te ʼuhu.” (Sen. 1:5, 8, 13, 19, 23, 31) Kae ʼo ʼuhiga leva mo te fitu ʼaho, ʼe mole fai kiai te ʼu palalau ʼaia kae ʼe ʼui fēnei ʼi te Tohi-Tapu: “Neʼe tapuakiʼi e te ʼAtua te fitu ʼaho pea mo ina fakaʼuhiga ʼe ko he ʼaho taputapu, heʼe ʼi te ʼaho ʼaia ʼe mālōlō ai mai tana ʼu gāue fuli ʼaē neʼe fakatupu e te ʼAtua.”—Sen. 2:3.

² Kotou fakatokagaʼi age muʼa ia te kupusiga palalau “ ʼe mālōlō.” ʼE hā ʼaki mai ai ko te fitu ʼaho, ia te “ ʼaho” mālōlō ʼa te ʼAtua, neʼe kei hoko atu pē ia ʼi te taʼu 1513 ʼi muʼa ʼo totatou temi, te taʼu ʼaē neʼe fai ai e Moisese ia te tohi ʼo Senesi. ʼE kei hoko atu pē nei koa ia te ʼaho mālōlō ʼa te ʼAtua? Kapau ʼe kei lolotoga hoko nei, ʼe feala koa mo tātou iā ʼaho nei ke tou kau ki te ʼaho mālōlō ʼaia? ʼE maʼuhiga ʼaupitō kiā tātou ia te ʼu tali ki te ʼu fehuʼi ʼaia.

ʼE Kei Lolotoga “Mālōlō” Nei Koa Ia Sehova?

 3. ʼE hā feafeaʼi mai ʼi te ʼu palalau ʼaē neʼe fai e Sesu ʼi te koga tohi ʼo Soane 5:16, 17, ko te fitu ʼaho neʼe kei hoko atu pē ia ʼi te ʼuluaki sēkulō?

³ ʼAki te ʼu fakamoʼoni e lua, ʼe tou ʼiloʼi ai ko te fitu ʼaho neʼe kei hoko atu pē ia ʼi te ʼuluaki sēkulō ʼo totatou temi. ʼUluaki fakamoʼoni, tou vakaʼi age muʼa te ʼu palalau neʼe fai e Sesu ki te hahaʼi fakafeagai, ia nātou ʼaē neʼe natou valokiʼi ia ia ʼi tana fakamālōlō te tagata mahaki ʼi te ʼaho ʼo te Sāpato, he neʼe natou fakaʼuhiga ia tana aga ʼaia ohagē pē neʼe ina fai hana gāue. Neʼe ʼui fēnei age e te ʼAliki kiā nātou: “Ko taku Tamai neʼe gāue tuʼumaʼu ʼo kaku mai ki te temi nei, pea mo au ʼe au gāue tuʼumaʼu.” (Soa. 5:16, 17) Neʼe koteā te fakaʼuhiga ʼo te ʼu palalau ʼaia neʼe ina fai? Neʼe fakalakahalaʼi ia Sesu ʼo ʼui neʼe gāue ʼi te ʼaho ʼo te Sāpato. Ko te tali ʼaenī neʼe ina fai ki tona fakalakahalaʼi ʼaia: “Ko taku Tamai neʼe gāue tuʼumaʼu.” ʼI tona fakahagatonu, neʼe hagē pē neʼe ʼui fēnei age e Sesu kiā nātou ʼaē neʼe natou valokiʼi ia ia: ‘Ko au mo taku Tamai ʼe mā fakahoko pē te gāue e tahi. Neʼe gāue tuʼumaʼu pē taku Tamai talu mai tona Sāpato ʼaē ʼe loaloaga iā taʼu e lauʼi afe, koia ʼe feala aipē kiā au ke au gāue, tatau aipē peʼe ko te ʼaho ʼo te Sāpato.’ Koia, neʼe fia talanoa ia Sesu ʼi te temi ʼaia, ko te fakatuʼutuʼu ʼaē neʼe fai ʼi te kamata ʼo ʼuhiga mo te kele, te ʼaho ʼo te Sāpato lahi ʼo te mālōlō ʼa te ʼAtua, ia te fitu ʼaho, neʼe heʼeki ʼosi ia ʼi tona temi. a

 4. Koteā te tahi fakamoʼoni ʼe foaki mai e Paulo ʼo ʼuhiga mo te fitu ʼaho ʼaē neʼe kei hoko atu pē ʼi tona temi?

⁴ ʼE ko te ʼapositolo ko Paulo ʼaē ʼe ina foaki mai te lua fakamoʼoni ʼo ʼuhiga mo te fitu ʼaho neʼe kei lolotoga hoko atu pē ʼi tona temi. ʼO ʼuhiga mo te mālōlō ʼa te ʼAtua ʼaē ʼe talanoa kiai ia Senesi 2:2, neʼe ʼui fēnei e te ʼapositolo ko Paulo ʼi tana tohi neʼe takitaki e te ʼAtua: “Ko tātou ʼaē neʼe tou tui, ʼe tou hū ki te mālōlō.” (Hep. 4:3, 4, 6, 9) Koia neʼe kei hoko atu pē te fitu ʼaho ʼi te temi ʼaē ʼo Paulo. Kae ko temi koa ʼe fia ʼaē ʼe tonu ai ke hoko atu ai ia te ʼaho mālōlō ʼaia ʼo te ʼAtua?

 5. He koʼē neʼe fakatuʼu te fitu ʼaho, pea ko te temi fea ʼaē kā fakahoko kātoa ai anai ia te faʼahi ʼaia?

⁵ Moʼo tali ki te fehuʼi ʼaia, ʼe tonu ke tou manatuʼi peʼe koʼē neʼe fakatuʼu ia te fitu ʼaho. ʼE fakamahino iā Senesi 2:3, peʼe koteā te fakaʼuhiga ʼo te ʼaho ʼaia: “Neʼe tapuakiʼi e te ʼAtua te fitu ʼaho pea mo ina fakaʼuhiga ʼe ko he ʼaho taputapu.” Neʼe ‘fakaʼuhiga  te ʼaho ʼaia ʼe taputapu,’ peʼe māʼoniʼoni, peʼe fakakeheʼi e Sehova te ʼaho ʼaia moʼo fakahoko kātoa ai ia tana fakatuʼutuʼu. Ko te fakatuʼutuʼu ʼaia ke nofoʼi te kele e ni hahaʼi tagata mo fafine fakalogo ʼe natou tōkakaga anai kiai pea mo meʼa fuli ʼe māʼuʼuli ai. (Sen. 1:28) ʼE ko te fakatuʼutuʼu lā ʼaia, ʼaē neʼe ‘gāue tuʼumaʼu ai ʼo kaku mai ki te temi nei’ ia Sehova ʼAtua pea mo Sesu Kilisito, ia te ‘ ʼAliki ʼo te sāpato.’ (Mat. 12:8) Ko te ʼaho mālōlō ʼa te ʼAtua ʼe hoholo mai anai ʼo aʼu ki te temi ʼaē kā fakahoko kātoa ai anai ia tana fakatuʼutuʼu ʼo ʼuhiga mo te ʼaho ʼaia, ʼi te fakaʼosi ʼo te ʼAfio ʼa Kilisito Iā Taʼu e Afe.

ʼAua Naʼa Tou ‘Tō Ki Te Talagataʼa ʼAia’

 6. Koteā te ʼu faʼifaʼitaki kovi ʼe tou maʼu, pea koteā te ako ʼe tou lava tāʼofi mai ai?

⁶ Neʼe fakamahino lelei kiā Atama mo Eva ia te fakatuʼutuʼu ʼa te ʼAtua, kae neʼe mole nā fia lagolago kiai. ʼE mahino ia, neʼe ko Atama pea mo Eva ʼaē neʼe nā ʼuluaki talagataʼa. Talu mai iā nāua, neʼe ʼi ai mo te ʼu toko lauʼi miliona hahaʼi neʼe natou talagataʼa. Māʼiapē lā mo te hahaʼi ʼa te ʼAtua, ia te puleʼaga ʼo Iselaele, neʼe natou talagataʼa mo nātou. Koia ʼaē neʼe fakatokagaʼi ai e Paulo ki te kau Kilisitiano ʼo te ʼuluaki sēkulō, ʼe ʼi ai pē anai ʼihi iā nātou ʼe natou tō ki te hele ʼaia ohagē ko te kau Iselaele ʼo te temi muʼa. Neʼe ina tohi fēnei: “Koia tou faiga kātoa ke tou hū ki te mālōlō ʼaia, naʼa feala pē ke tō he tahi ki te talagataʼa ʼaia.” (Hep. 4:11) Kotou tokagaʼi ʼe fakapipiki tahi e Paulo ia te talagataʼa pea mo te mole hū ʼaē ki te mālōlō ʼa te ʼAtua. Koteā tona fakaʼuhiga kiā tātou? Kapau ʼe tou fakafeagai ki te fakatuʼutuʼu ʼa te ʼAtua ʼi he ʼaluʼaga pē, ʼe feala anai koa ke tou hū ki te mālōlō ʼa te ʼAtua? ʼE mahino ia, ʼe maʼuhiga ʼaupitō kiā tātou ia te tali ʼaē ki te fehuʼi ʼaia, pea ʼe hoki tou vakaʼi anai tona tali ki muli age. Kae tou vakaʼi age muʼa peʼe koteā he tahi ako ʼe tou lava tāʼofi mai te hū ʼaē ki te mālōlō ʼa te ʼAtua, ʼaki te faʼifaʼitaki kovi ʼaē neʼe tuku mai e te kau Iselaele.

“ ʼE Mole Natou Hū Anai Ki Taku Mālōlō”

 7. Koteā ʼaē neʼe fakatuʼutuʼu kiai ia Sehova ʼi te temi ʼaē neʼe ina haofaki ai te kau Iselaele mai tanatou maʼuli ʼaunofo ʼi Esipito, pea koteā leva ʼaē neʼe tonu ke natou fai?

⁷ ʼI te taʼu 1513 ʼi muʼa ʼo totatou temi, neʼe fakahā e Sehova ki tana kaugana ko Moisese ia tana fakatuʼutuʼu ʼaē ʼo ʼuhiga mo te kau Iselaele. Neʼe ʼui fēnei e te ʼAtua: “ ʼE au hifo moʼo haofaki ʼo nātou mai te nima ʼo te kau Esipito pea mo fakahake mai ia nātou mai te fenua ʼaia [ʼo Esipito] ki he fenua lelei pea mo lahi, ki he fenua ʼe tafe ai te huʼa pipi pea mo te meli.” (Eke. 3:8) Ohagē pē ko te fakapapau ʼaē neʼe fai e Sehova ki tanatou kui ko Apalahamo, ʼaki tana haofaki ʼaē ia te kau Iselaele “mai te nima ʼo te kau Esipito,” ko te fakatuʼutuʼu ʼa te ʼAtua ʼi te temi ʼaia ke natou liliu ko tana hahaʼi. (Sen. 22:17) Neʼe foaki e te ʼAtua ki te kau Iselaele ia te ʼu lao ke feala ai hanatou felōgoi lelei mo ia. (Isa. 48:17, 18) Neʼe ina ʼui fēnei ki te kau Iselaele: “Kapau ʼe kotou fakalogo lelei ki toku leʼo pea mo kotou taupau fakalelei taku fuakava [ʼaē ʼe tuʼu ʼi te Lao], pea ʼe kotou liliu moʼoni anai ko toku koloa makehe ʼi te lotolotoiga ʼo te hahaʼi fuli ʼaē, koteʼuhi ʼe ʼaʼaku te kele kātoa.” (Eke. 19:5, 6) Koia, ke maʼu e te kau Iselaele te pilivilēsio ʼaē ke natou felōgoi lelei mo te ʼAtua, neʼe fakalogo ki tanatou talagafua ʼaē ki tana lao.

 8. Koteā te faʼahiga maʼuli neʼe lava maʼu e te kau Iselaele mo kanapau lā neʼe natou fakalogo ki te ʼAtua?

⁸ Kotou fakakaukauʼi age muʼa peʼe feafeaʼi anai te maʼuli ʼo te kau Iselaele, mo kanapau lā neʼe natou fakalogo ki te lao ʼa te ʼAtua! Neʼe feala pē kiā Sehova ke ina tapuakinaʼi ia tanatou ʼu gāueʼaga, mo tanatou ʼu gāueʼaga vite, mo tanatou faga ovi, pea mo tanatou faga pipi. Pea neʼe mole feala anai ki ʼonatou fili ke natou mālo iā nātou. (Lau ia 1 Hau 10:23-27.) ʼI te temi ʼaē neʼe haʼu ai ia te Mēsia, neʼe feala pē anai ke ina maʼu he kau Iselaele neʼe natou faʼufaʼu he puleʼaga ʼe mole puleʼi e he tahi puleʼaga, ʼe mole gaohi koviʼi e te puleʼaga Loma. Kanaʼaualā neʼe tuku pē anai e te puleʼaga ʼo Iselaele ia he faʼifaʼitaki lelei ki te ʼu puleʼaga ʼaē, ʼo ina foaki ai kiā nātou he fakamoʼoni, ko te fakalogo ʼaē ki te ʼAtua moʼoni ʼe maʼu ʼaki ai he ʼu tapuakina ʼi te faʼahi fakalaumālie pea mo te faʼahi fakakoloa.

9, 10. (a) He koʼē neʼe ko he fihifihia lahi ia te loto ʼaē ʼa te kau Iselaele ke natou toe liliu ki Esipito? (b) Koteā ʼaē neʼe feala ke hoko ki te tauhi ʼa te kau Iselaele mo kapau ʼe natou toe liliu ki Esipito?

⁹ ʼE ko he pilivilēsio neʼe maʼu e te kau Iselaele ʼi tanatou lagolago ʼaē ki te fakatuʼutuʼu ʼa Sehova, ʼo iku ai ki he ʼu tapuakina ʼo mole gata pē iā nātou kae ki te ʼu puleʼaga fuli ʼo te kele ki muli age! (Sen. 22:18) Kae ko te taʼiake fuli ʼaē neʼe talagataʼa, neʼe  mole natou tokaga nātou ke natou liliu ko he puleʼaga ʼe ina tuku he faʼifaʼitaki lelei ʼi te fakalogo ʼaē ki te takitaki ʼa te ʼAtua. Neʼe natou toe tagi pē foki ke natou toe liliu ki Esipito! (Lau ia Faka au 14:2-4.) ʼE feafeaʼi anai mo kapau ʼe natou toe liliu ki Esipito, hanatou lagolago ki te fakatuʼutuʼu ʼa te ʼAtua, ʼaē ke natou liliu ko he puleʼaga ke faʼifaʼitakiʼi? ʼE lagi mole feala anai hanatou fai ia te faʼahi ʼaia. ʼI tona fakahagatonu, kapau ʼe toe liliu ia te kau Iselaele ki te ʼu agaʼi fenua ʼa te hahaʼi ʼaē neʼe natou fakaʼaunofo ia nātou, pea ʼe mole feala anai ke natou muliʼi ia te Lao ʼa Moisese pea mo maʼu te fakatuʼutuʼu ʼa Sehova ʼaē ki te fakamolemole ʼo tanatou ʼu agahala. Neʼe natou agavale pea mo puli iā nātou te fakasiosio poto! Koia lā ʼaē neʼe ʼui fēnei ai e Sehova ki te hahaʼi talagataʼa ʼaia: “Neʼe au fakalialia ai ki te taʼiake ʼaia, pea neʼe au ʼui: ‘ ʼE natou hehē tuʼumaʼu pē ʼi ʼonatou loto, pea neʼe mole natou ako ke natou ʼiloʼi toku ʼu ala.’ Koia neʼe au fakapapau ai ʼi toku ʼita: ‘ ʼE mole natou hū anai ki taku mālōlō.’ ”—Hep. 3:10, 11; Pes. 95:10, 11.

¹⁰ ʼI tanatou faiga ʼaē ke natou toe liliu ki Esipito, neʼe fakahā e te hahaʼi talagataʼa ʼaia ia tanatou mole fakamaʼuhigaʼi ʼaē ia te ʼu tapuakina fakalaumālie ʼaē neʼe natou maʼu, ʼo natou leleiʼia age nātou te pualō, mo te onioni pea mo te lai ʼaē neʼe maʼu ʼi Esipito. (Fkau. 11:5) Ohagē ko Esau ʼaē neʼe mole loto fakafetaʼi, neʼe tali e te hahaʼi talagataʼa hanatou fetogi ia tonatou tofiʼa maʼuhiga fakalaumālie ke natou maʼu hanatou meʼa kai ʼe kano lelei.—Sen. 25:30-32; Hep. 12:16.

11. Koteā tona fua ki te fakatuʼutuʼu ʼa Sehova ia te mole nofo agatonu ʼaē ʼa te kau Iselaele ʼi te temi ʼo Moisese?

¹¹ Logolā te mole nofo agatonu ʼaē ʼo te taʼiake ʼo Iselaele ʼaē neʼe mavae mai Esipito, kae ko Sehova neʼe faʼa kātaki ʼo “gāue tuʼumaʼu” ki te fakahoko ʼaē ʼo tana fakatuʼutuʼu, pea mo tokaga tāfito leva ia ki te taʼiake ʼaē kā hoa mai. Pea neʼe fakalogo age te taʼiake foʼou ʼaia ʼi tanatou ʼu tamai. ʼO mulimuli ki te fakatotonu ʼaē ʼa Sehova, neʼe natou hū ki te Kele ʼo Te Fakapapau pea neʼe natou mālo iā nātou ʼaē neʼe nonofo ʼi te kele ʼaia. Iā Sosue 24:31, ʼe tou lau fēnei ai: “Neʼe hoko atu ia te tauhi ʼaē e Iselaele ia Sehova ʼi te ʼu ʼaho fuli ʼaē ʼo Sosue pea mo te ʼu ʼaho fuli ʼaē ʼo te ʼu tagata mātutuʼa, ʼaē neʼe hoko atu tonatou ʼu ʼaho ʼi te ʼosi mate ʼo Sosue, pea neʼe natou ʼiloʼi ia te ʼu gāue fuli ʼa Sehova ʼaē neʼe ina fai maʼa Iselaele.”

12. Koteā ʼaē ʼe kita ʼiloʼi ai ʼe kita lava hū ki te mālōlō ʼa te ʼAtua?

¹² Kae ʼaki te temi, ko te taʼiake fakalogo ʼaia neʼe mamate fuli leva pea fetogi e te tahi taʼiake “neʼe mole natou ʼiloʼi ia Sehova peʼe ko te ʼu gāue ʼaē neʼe ina fai maʼa Iselaele.” Koia ʼaē, “neʼe fai [ai leva] e te ʼu foha ʼo Iselaele ia te meʼa ʼaē ʼe kovi kiā mata ʼo Sehova pea mo natou tauhi ki te ʼu Paale.” (Ktf. 2:10, 11) Neʼe mole liliu ia te Kele ʼo Te Fakapapau ko he “mālōlōʼaga” moʼoni maʼa nātou. Pea neʼe mole fualoa tanatou ʼu felōgoi lelei ʼaē mo te ʼAtua ʼuhi ko tanatou talagataʼa. ʼO ʼuhiga mo te meʼa ʼaē neʼe hoko ki muli age ʼo te temi ʼo Sosue, neʼe tohi fēnei e Paulo: “Kanapau lā neʼe fakahū nātou [te kau Iselaele] e Sosue ki he mālōlōʼaga, kanaʼaualā neʼe mole talanoa te ʼAtua ki muli age, ki he tahi age ʼaho. Koia ʼe kei toe te mālōlō fakasāpato maʼa te hahaʼi ʼa te ʼAtua.” (Hep. 4:8, 9) Ko “te hahaʼi ʼa te ʼAtua” ʼaē neʼe fakahagahaga ki ai te ʼu palalau ʼa Paulo, neʼe ko te kau Kilisitiano. Ko tona fakaʼuhiga koa neʼe feala ki te kau Kilisitiano ke natou hū ki te mālōlō ʼa te ʼAtua? ʼEī, neʼe feala ki te  kau Kilisitiano Sutea pea mo te kau Kilisitiano ʼaē neʼe mole ko he kau Sutea, ke natou hū ki te mālōlō ʼa te ʼAtua!

Ko ʼIhi Neʼe Mole Natou Hū Ki Te Mālōlō ʼa Te ʼAtua

13, 14. Neʼe koteā te pikipikiga ʼo te muliʼi ʼo te Lao ʼa Moisese pea mo te hū ʼaē ki te mālōlō ʼa te ʼAtua (a) ʼi te temi ʼo Moisese? (b) ʼi te ʼuluaki sēkulō?

¹³ ʼI te temi ʼaē neʼe faitohi ai ia Paulo ki te kau Kilisitiano Hepeleo, neʼe ina ʼiloʼi ko ʼihi iā nātou neʼe mole natou lagolago ki te fakatuʼutuʼu ʼa te ʼAtua ʼaē ʼe hoholo atu pē tona ʼalu ki muʼa. (Lau ia Hepeleo 4:1.) Koteā ʼaē neʼe mole natou lagolago kiai? Ko te fakatuʼutuʼu ʼaē ʼo ʼuhiga mo te Lao. Lolotoga taʼu e 1 500, ko te tagata Iselaele ʼaē neʼe ina fia fakaʼalutahi ia tona maʼuli pea mo te fakatuʼutuʼu ʼa te ʼAtua, neʼe tonu ke fakalogo ki te Lao. Kae ʼaki te mate ʼaē ʼa Sesu neʼe molehi ai leva ia te Lao. Koia ko ʼihi Kilisitiano neʼe mole natou lagolago ki te faʼahi ʼaia, pea neʼe natou fakamaʼua ke hoko atu pē te fakalogo ʼaē ki ʼihi faʼahi ʼo te Lao. b

¹⁴ Neʼe fakamahino e Paulo ki te kau Kilisitiano ʼaē neʼe kei natou muliʼi te Lao, ʼe māʼoluga age ia te pelepitelō lahi ʼaē ko Sesu, mo te fuakava foʼou, pea mo te fale lotu fakalaumālie ʼi te ʼu naunau ʼaē neʼe fai ʼi muʼa atu ʼo te haʼu ʼa Sesu. (Hep. 7:26-28; 8:7-10; 9:11, 12) ʼE lagi ʼi te faitohi ʼa Paulo neʼe ina manatuʼi te Sāpato ʼaē neʼe fai ʼi te vāhaʼa fuli ʼi te Lao, koia neʼe ina fakamahino ai peʼe lava feafeaʼi ki te kau Kilisitiano hanatou hū ki te ʼaho mālōlō ʼo Sehova: “ ʼE kei toe te mālōlō fakasāpato maʼa te hahaʼi ʼa te ʼAtua. Ko ʼaē kua hū ki te mālōlō ʼa te ʼAtua kua toe mālōlō mo ia mai tana ʼu gāue ohagē pē ko te mālōlō ʼa te ʼAtua mai tana ʼu gāue.” (Hep. 4:8-10) Neʼe tonu ki te kau Kilisitiano Hepeleo ʼaia ke natou tuku ia tanatou manatu ʼaē neʼe feala ke natou maʼu ia te ʼofa ʼo Sehova ʼaki tanatou fai he ʼu gāue ʼe fakatafito ki te Lao ʼa Moisese. Talu mai te Penikositē ʼo te taʼu 33 ʼo totatou temi, neʼe foaki fakalahi ia te ʼofa ʼo te ʼAtua kiā nātou ʼaē ʼe natou tui kiā Sesu Kilisito.

15. He koʼē ʼe maʼuhiga te fakalogo mo kapau ʼe tonu ke tou hū ki te mālōlō ʼa te ʼAtua?

¹⁵ He koʼē neʼe mole hū ai ia te kau Iselaele ʼo te temi ʼo Moisese ki te Kele ʼo Te Fakapapau? Koteʼuhi neʼe mole natou fakalogo kiā Sehova. He koʼē neʼe mole hū ai ʼihi Kilisitiano ʼo te temi ʼo Paulo ki te mālōlō ʼa te ʼAtua? Ohagē pē ko te kau Iselaele, neʼe mole natou fakalogo kiā Sehova. Neʼe mole  mahino kiā nātou neʼe fakaʼaogaʼi e Sehova te Lao moʼo fakahoko tana fakatuʼutuʼu, pea neʼe lolotoga taki e Sehova tana hahaʼi ki he tahi age ala.

Te Hū ʼAē Ki Te Mālōlō ʼa Te ʼAtua Iā ʼAho Nei

16, 17. (a) Koteā te fakaʼuhiga ʼo te hū ʼaē ki te mālōlō ʼa te ʼAtua iā ʼaho nei? (b) Koteā ʼaē kā talanoa anai kiai ʼi te ʼalatike ʼaē kā hoa mai?

¹⁶ ʼE fakamaʼua anai e ʼihi Kilisitiano iā ʼaho nei ke fakaʼaogaʼi ʼihi faʼahi ʼo te Lao ʼa Moisese, ke feala ai honatou haofaki. Ko te ʼu palalau ʼaenī ʼa Paulo ki te kau Efesi, ʼaē neʼe takitaki e te ʼAtua neʼe tāsilo lelei: “ ʼE mahino ia, ʼaki te ʼofa makehe ʼaenī, neʼe haofaki ai koutou ʼaki te tui; pea ʼe mole haʼu ia mai iā koutou, kae ʼe ko te meʼa ʼofa ia ʼo te ʼAtua. Pea ʼe mole haʼu ia mai he ʼu gāue, ke ʼaua naʼa haga pē he tahi ʼo fakakolōliaʼi ia ia totonu.” (Efe. 2:8, 9) Pea ʼe fakaʼuhiga feafeaʼi ki te kau Kilisitiano ia te hū ʼaē ki te mālōlō ʼa te ʼAtua? Neʼe tuku keheʼi e Sehova ia te fitu ʼaho, ia tona ʼaho mālōlō, ke ina fakahoko fakakolōlia ai ia tana fakatuʼutuʼu ʼo ʼuhiga mo te kele. ʼE tou lava hū ki te mālōlō ʼa te ʼAtua, peʼe ke tou fakatahi mo ia ʼi tana mālōlō, ʼaki tatatou gāue tahi mo he loto fakalogo ki te fakahaʼele ki muʼa ʼo tana fakatuʼutuʼu ohagē ko tona fakahā mai e tana kautahi.

¹⁷ ʼI te tahi age faʼahi, kapau ʼe tou meʼa noaʼi te ʼu tokoni Fakatohi-tapu ʼaē ʼe fai mai e te kalasi ʼo te tagata kaugana agatonu mo poto, ʼo tou fia maʼuli faʼifaʼitaliha, pea ʼe tou fakafeagai anai ki te fakatuʼutuʼu ʼa te ʼAtua ʼaē neʼe kua ina fakahā mai. ʼE feala ke fakatupu kovi ki tatatou ʼu felōgoi lelei ʼaē mo Sehova. ʼI te ʼalatike ʼaē kā hoa mai, ʼe tou vakaʼi ai anai he ʼu ʼaluʼaga ʼe feala ke tou fakahā ai peʼe tou fakalogo. Ko te ʼu tonu ʼaē kā tou fai anai ʼi te ʼu ʼaluʼaga ʼaia, ʼe tou fakahā ai anai peʼe kua tou hū ki te mālōlō ʼa te ʼAtua.

[ʼU nota]

Te ʼu Fehuʼi Ke Tou Metitāsioʼi

• He koʼē neʼe fakatuʼu te fitu ʼaho ʼo te mālōlō ʼa te ʼAtua?

• ʼE tou ʼiloʼi feafeaʼi ko te fitu ʼaho ʼe kei hoko atu pē nei ʼi totatou temi?

• He koʼē neʼe mole hū ai ia te kau Iselaele ʼo te temi ʼo Moisese pea mo ʼihi Kilisitiano ʼo te ʼuluaki sēkulō, ki te mālōlō ʼa te ʼAtua?

• Koteā te fakaʼuhiga ʼo te hū ʼaē ki te mālōlō ʼa te ʼAtua iā ʼaho nei?

[ʼU fehuʼi ʼo te ako]

[Fakamatala ʼo te pāsina 27]

ʼE tou lava hū ki te mālōlō ʼa te ʼAtua, peʼe ke tou fakatahi mo ia ʼi tana mālōlō, ʼaki tatatou gāue tahi mo he loto fakalogo ki te fakahaʼele ki muʼa ʼo tana fakatuʼutuʼu ohagē ko tona fakahā mai e tana kautahi

[Paki ʼo te pāsina 26]

Koteā ʼaē ʼe kei ʼaoga ke fai e te hahaʼi ʼa te ʼAtua ke feala ai hanatou hū ki tana mālōlō?