Kua Kotou Hū Koa Ki Te Mālōlō ʼa Te ʼAtua?

“Ko te folafola ʼa te ʼAtua ʼe maʼuli pea mo mālohi.”—HEP. 4:12.

 1. Koteā ʼaē kā tokoni mai ke feala ai hatatou hū ki te mālōlō ʼa te ʼAtua iā ʼaho nei, kae he koʼē ʼe lagi faigafua age ia tona palalauʼi ʼi tona fakahoko?

 ʼI TE ʼalatike ako ʼaē kua ʼosi, neʼe tou vakaʼi ai ʼe feala hatatou hū ki te mālōlō ʼa te ʼAtua, mo kapau ʼe tou fakalogo pea mo tou gāue ki tana ʼu fakatuʼutuʼu. ʼE lagi faigafua age ia tona palalauʼi ʼi tona fakahoko. Ohagē lā, kā tou ʼiloʼi ʼe loto e Sehova ke tou tuku te fai ʼo he meʼa ʼe tou leleiʼia, pea ʼe lagi tou kamata ʼita ai leva ʼo tou talagataʼa kiā te ia. ʼO hā ʼaki mai ai, ʼe kei ʼaoga kiā tātou ke tou hikihiki age ia tatatou “fia fakalogo.” (Sake 3:17) ʼI te ʼalatike ʼaenī, ʼe tou vakaʼi anai he ʼu faʼahi ʼe feala ai ke faigataʼa kiā tātou ia tatatou lagolago kātoa ki te fakatuʼutuʼu ʼa te ʼAtua, ʼaē ke tou fakalogo kiā te ia mo totatou loto kātoa.

2, 3. Koteā ʼaē ʼe tonu ke tou haga fai ke leleiʼia tuʼumaʼu ai tātou e Sehova?

² ʼE kotou feafeaʼi mo kapau ʼe fai atu he tokoni Fakatohi-tapu? ʼE ʼui mai ʼi te Tohi-Tapu, ko te finegalo ʼo te ʼAtua ke ina fakamāʼopoʼopo mai kiā te ia “te ʼu meʼa ʼaē ʼe manakoʼia ʼo te ʼu puleʼaga fuli.” (Asea 2:7) ʼE moʼoni, ʼe tokolahi iā tātou ʼi tatatou kamata ako te moʼoni neʼe mole lelei totatou maʼuli. Kae ʼaki totatou ʼofa ʼaē ki te ʼAtua pea mo tona ʼAlo ʼofaina, neʼe tou lava fetogi ai ia totatou faʼahiga maʼuli pea mo tatatou ʼu agamāhani, ke leleiʼia ʼaupitō ai tātou e te ʼAtua. Pea ki muli age, ʼaki tatatou ʼu faikole tuʼumaʼu ʼaē ki te ʼAtua pea mo tatatou ʼu faiga mālohi ke tou fetogi, neʼe kua feala leva ke tou foaki ia totatou maʼuli ki te ʼAtua ʼaki te papitema.—Lau ia Kolose 1:9, 10.

 ³ Kae ʼaua leva naʼa tou manatu ʼe mole kei tou tauʼi totatou ʼuhiga agahala ʼi te temi ʼaē ʼe papitema ai tātou. ʼE kei tou tauʼi pē totatou ʼuhiga agahala, ʼe hoki gata pē anai te tau ʼaia mokā kua tou ʼāteaina ʼosi mai te agahala. Kae ʼe tou tui papau, kapau ʼe tou tauʼi tuʼumaʼu totatou ʼuhiga agahala pea mo tou fakatotonu ke lahi age ia totatou leleiʼia ʼaē e te ʼAtua, pea ko Sehova ʼe ina tapuakina anai tatatou ʼu faiga.

Mokā ʼe ʼAoga Ke Tokoniʼi Tātou

 4. Koteā te ʼu faʼahi e tolu ʼe feala ai ke tou maʼu he ʼu tokoni Fakatohi-tapu?

⁴ ʼE lagi lelei ʼi muʼa ʼaē ʼo te talanoa ki totatou ʼuhiga heʼe haohaoa, ke tou ʼiloʼi te ʼu faʼahi ʼaē ʼe tou tōtō ai. ʼE feala ke kita logo ki he akonaki ʼe fakalave loto ʼi te Fale ʼo Te Puleʼaga peʼe kita lau he ʼalatike lelei ʼi tatatou ʼu nusipepa, ʼe talanoa ai ki hokita vaivaiʼaga. ʼI te tahi age faʼahi, kapau ʼe mole tou faʼa mahino lelei ki te puani ʼaē neʼe ʼaoga kiā tātou ʼi he akonaki, peʼe mole tou ʼiloʼi te maʼuliʼi ʼo he tokoni neʼe tou lau ʼi he ʼalatike, pea ʼe lagi fakaʼaogaʼi anai e Sehova hotatou tehina mo tuagaʼane ke ina fakahā mai te ʼu faʼahi ʼaē ʼe tou tōtō ai.—Lau ia Kalate 6:1.

 5. Kotou tuku mai he ʼu ʼaluʼaga ʼe lagi feala ai ke mole tou tali mokā tokoniʼi tātou, pea kotou fakamahino pe koʼē ʼe tonu ke faʼa kātaki ia te ʼu tagata tauhi ovi Kilisitiano ʼi tanatou ʼu faiga ʼaē ke natou tokoniʼi ia tātou.

⁵ ʼE mole tou tali gafua he tokoni ʼe fai mai e he tagata heʼe haohaoa, tatau aipē pe neʼe fai ʼaki he aga fakaʼapaʼapa te fai tokoni pea mo fai ʼaki te ʼofa. Kae ohagē ko tona fakahā lelei mai iā Kalate 6:1, ko Sehova ʼe ina fakatotonu kiā nātou ʼaē ʼe natou maʼu te ʼu kalitātē fakalaumālie, ke natou “faigaʼi” ʼo fakatonutonuʼi tātou, “ ʼaki he agamalū.” Kapau ʼe tou tali lelei, pea ʼe lahi age anai totatou leleiʼia ʼaē e te ʼAtua. Pea ʼi te agamāhani kā tou fai fēia, ʼe tou logoʼi ai leva ʼi te temi ʼaē ʼe tou faikole ai, ʼe tou tali fakalelei ai ia totatou ʼuhiga heʼe haohaoa. Kae kā fakatokagaʼi mai e he tahi hotatou vaivaiʼaga, ko te faʼahi ʼe tautau hoko ʼe tou fia fakalakatonuʼi tatatou aga, peʼe tou meʼa noaʼi te fihifihia, peʼe tou fakafihiʼi te fai tokoni ʼaē ʼa te tehina peʼe ko te tuagaʼane kiā tātou, peʼe tou ʼiʼita ki te faʼahiga foaki mai ʼaē ʼo te tokoni kiā tātou. (2 Hau 5:11) Pea ʼe feafeaʼi lā mo kapau ʼe fai mai he tokoni ʼe mamahi ai totatou loto heʼe fakahā mai ko he aga ʼa he tahi ʼi totatou fāmili ʼe kovi, peʼe ko tatatou faʼahiga faiteuteu pea mo te faʼu ʼo totatou ʼulu, peʼe ko te fakamaʼa ʼo tokita sino, peʼe ko he faʼahiga fakafiafia ʼe tou leleiʼia kae ʼe fehiʼa kiai ia Sehova. ʼE lagi mole tou tali lelei anai, he neʼe mole tou ʼamanaki ki he faʼahi fēia, ʼo toe fēia pē kiā ia ʼaē ʼe fai tokoni ʼe toe punamaʼuli mo ia ki tatatou mole tali lelei ʼaē ʼo tana tokoni! Kae ʼi te agamāhani, kā kua malū ifo totatou ʼita, pea ʼe tou mahino ai leva neʼe ʼaoga kiā tātou totonu ia te tokoni ʼaē neʼe foaki mai.

 6. ʼE feafeaʼi te haga ʼa te folafola ʼa te ʼAtua ʼo fakaʼasi ki tuʼa “te ʼu manatu pea mo te ʼu fakatuʼutuʼu ʼo te loto”?

⁶ Ko te koga tohi ʼaē ʼe fakatafito kiai te ʼalatike ʼaenī, ʼe ina fakamanatuʼi mai kiā tātou ko te folafola ʼa te ʼAtua ʼe “mālohi.” ʼEī, ko te folafola ʼa te ʼAtua ʼe mālohi moʼo fetogi ia te maʼuli ʼaē ʼo te hahaʼi. ʼE ina lava tokoniʼi tātou ʼi tatatou kua ʼosi papitema, ke tou fetogi te ʼu faʼahi ʼo totatou maʼuli ʼaē ʼe kei tou tōtō ai, ohagē pē ko tana tokoniʼi ʼaē ʼo tātou ʼi muʼa atu ʼo tatatou papitema. ʼI tana tohi ʼaē ki te kau Hepeleo, ʼe toe ʼui ai foki e Paulo ko te folafola ʼa te ʼAtua “ ʼe ʼulu ia ʼo kaku ki tana vaheʼi te nefesi pea mo te laumālie, pea mo te ʼu hōkoga hui mo ʼonatou gakoʼi hui, pea ʼe feala ke ina ʼiloʼi lelei te ʼu manatu pea mo te ʼu fakatuʼutuʼu ʼo te loto.” (Hep. 4:12) ʼE fakaʼuhiga te nefesi ʼi henī ki te ʼu meʼa ʼaē ʼe hā iā tātou, ʼaē ʼe feala ke sio kiai te hahaʼi. ʼE fakaʼuhiga te laumālie ʼi henī ki te ʼu meʼa ʼaē ʼi totatou loto, ʼaē ʼe mole feala ke sio kiai te hahaʼi. Koia neʼe ʼui ai e Paulo, kā tou mahino ki te manatu ʼa te ʼAtua ʼaē mai te Tohi-Tapu ʼo ʼuhiga mo te meʼa ʼaē ʼe ina loto ke tou fai, pea ʼe hā anai ʼi tatatou ʼu aga. ʼE ʼi ai koa ʼi niʼihi temi he kehekehe ʼo te ʼu meʼa ʼaē ʼe tokagaʼi e ʼihi pea mo te ʼu meʼa ʼaē ʼi totatou loto? (Lau ia Mateo 23:27, 28.) Kotou vakaʼi age muʼa peʼe koteā anai kā kotou fai ʼi te ʼu ʼaluʼaga ʼaenī.

Tou Haʼele Tahi Mo Te Kautahi ʼa Sehova

7, 8. (a) Koteā ʼaē neʼe lagi ina uga ʼihi Kilisitiano Sutea ke natou hoko atu ʼihi gāue ʼo te Lao ʼa Moisese? (b) Koteā ʼaē neʼe mole feala ai ke felōgoi tahi tanatou ʼu faiga pea mo te haʼele ki muʼa ʼaē ʼo te fakatuʼutuʼu ʼa te ʼAtua?

⁷ Tokolahi iā tātou ʼe tou lava lau fakaʼatamai ia te koga tohi ʼaenī ʼo Tāʼaga Lea 4:18: “Ko te ala ʼo te kau faitotonu ʼe hagē ko te mālama gigila ʼaē ʼe fakahaʼuhaʼu tona mālama ʼo aʼu ki te mafoa lelei ʼo te ʼaho.” Ko tona fakaʼuhiga, ʼe ʼaki te temi ʼe lahi age anai ia tatatou mahino ki te ʼu meʼa ʼaē ʼe loto kiai ia  Sehova, pea ʼe lelei age anai tatatou fai te meʼa ʼaē ʼe ina leleiʼia.

⁸ ʼI te ʼalatike ako ʼaē kua ʼosi, neʼe tou vakaʼi ai ʼi te kua ʼosi mate ʼa Sesu, neʼe faigataʼa ki te tokolahi ʼo te kau Kilisitiano Sutea hanatou tuku ia tanatou fakalogo ʼaē ki te Lao ʼa Moisese. (Gāue 21:20) Logolā te ʼu fakamahino lelei ʼa Paulo ʼaē ʼe mole kei fakamaʼua ki te kau Kilisitiano ʼaia ke natou mulimuli ki te Lao, kae ko ʼihi iā nātou neʼe mole natou tali ia tana ʼu fakamahino ʼaia ʼaē neʼe haʼu mai te ʼAtua. (Kol. 2:13-15) Lagi ʼi tanatou manatu, kapau neʼe hoko atu pē ia tanatou fakalogo ʼaē ki he ʼu faʼahi ʼo te Lao, ʼe natou hao anai mai te fakataga. Tatau aipē pe neʼe koteā tanatou manatu ʼi te temi ʼaia, kae neʼe faitohi ia Paulo ki te kau Kilisitiano Hepeleo pea mo ina ʼui fakahagatonu kiā nātou, ʼe hoki natou lava hū anai ki te mālōlō ʼa te ʼAtua, mo kapau ʼe natou gāue fakatahi ki Tana fakatuʼutuʼu ʼaē neʼe kua ina fakahā. a (Hep. 4:1, 2, 6; lau ia Hepeleo 4:11.) Ke natou maʼu te ʼofa ʼo Sehova, neʼe tonu ke mahino kiā nātou, neʼe haga ia Sehova ʼo taki ia tana hahaʼi ki he tahi age ala.

 9. Koteā anai te manatu ʼaē ʼe tonu ke tou maʼu mokā fai he ʼu fakamahino foʼou ki he ʼu manatu Fakatohi-tapu?

⁹ ʼI totatou temi, neʼe ʼi ai te ʼu fetogi ʼi tatatou mahino ʼaē ki ʼihi akonaki Fakatohi-tapu. ʼAua naʼa tou hoha kiai, kae ke lahi age ia tatatou falala ʼaē ki te kalasi ʼo te tagata kaugana agatonu mo poto. Kā fakafuafua e te ʼu tehina ʼaē ʼe natou fakafofoga te “tagata kaugana,” ʼe ʼaoga ke fakamahino peʼe ke fakatonutonuʼi tatatou manatu ʼo ʼuhiga mo he ʼu puani ʼo te moʼoni, pea ʼe natou fakahā fakalelei te ʼu manatu foʼou ʼo ʼuhiga mo te faʼahi ʼaia. Ko te faʼahi ʼaē ʼe maʼuhiga tāfito age ki te kalasi ʼo te tagata kaugana, ʼe ko tana lagolago ʼaē ki te fakatuʼutuʼu ʼa te ʼAtua logolā ia te ʼu valoki ʼaē ʼe fai mai kiā nātou ʼo ʼuhiga mo he fakamahino foʼou. Koteā anai takotou manatu mokā ʼe fai he fakamahino foʼou ki he vaega Tohi-Tapu neʼe tou maʼu he faʼahiga mahino ʼāfea kiai? ʼE mole tou fia hagē ko te kau Faliseo ʼaē neʼe natou leleiʼia age nātou te vino ʼāfea ʼi te ʼu akonaki fakafīmālie ʼaē ʼa Sesu ʼaē neʼe fakatatau ki he vino foʼou.—Lau ia Luka 5:39.

10, 11. Koteā te ʼu ako ʼe tou maʼu mai te faʼahiga tali ʼaē neʼe fai e ʼihi ʼi te temi ʼaē neʼe fakahā ai te ʼu fakatuʼutuʼu foʼou ki te fakamafola ʼo te logo lelei?

¹⁰ Kotou vakaʼi age muʼa te tahi faʼifaʼitaki. Kua hili nei kiai te sēkulō, ʼi te manatu ʼa ʼihi kau Ako Tohi-Tapu ʼaē neʼe ko he ʼu tehina faiva ʼi te faiakonaki, ko te fai ʼaē ʼo he ʼu akonaki neʼe ko he puleʼaki lelei pē ʼaia e tahi kiā nātou ʼo ʼuhiga mo te fai fakamafola. Neʼe natou leleiʼia ia tanatou palalau ʼaē ʼi muʼa ʼo te kaugamālie. Ko ʼihi iā nātou neʼe natou leleiʼia ia tonatou laupisiʼi ʼaē e te hahaʼi ki tanatou ʼu faiakonaki. Kae ki muli age, neʼe fakahā lelei e Sehova ia tana loto ʼaē ke kau ia tana hahaʼi ki te ʼu faʼahiga fai fakamafola kehekehe, ʼo kau ai mo te fai fakamafola ʼaē ʼi te ʼu ʼapi. Ko ʼihi ʼi te ʼu tehina faiakonaki faiva, neʼe mole natou tali ʼosi ke fetogi he meʼa ʼi te ʼu meʼa ʼaē neʼe kua natou māhani kiai. ʼI muʼa ʼo te hahaʼi, neʼe hagē ko he ʼu tagata neʼe mālolohi ʼi te faʼahi fakalaumālie, pea mo tauhi ʼāteaina pē ki te ʼAliki. Kae ʼi te temi leva ʼaē neʼe kua fakahā fakalelei ai e te ʼAtua ia tona finegalo ʼo ʼuhiga mo te gāue fai fakamafola, neʼe hā lelei ai leva ia tanatou ʼu manatu moʼoni, mo tanatou ʼu fakatuʼutuʼu pea mo te ʼu meʼa ʼaē ʼi tonatou loto. Neʼe koteā ʼapē te manatu ʼa Sehova ʼo ʼuhiga mo nātou? Neʼe mole ina tapuakiʼi ia nātou. Neʼe natou mavae ʼi te kautahi.—Mat. 10:1-6; Gāue 5:42; 20:20.

¹¹ Neʼe mole ko he meʼa faigafua kiā nātou fuli ʼaē neʼe nonofo agatonu ʼi te kautahi, hanatou kau ki te fai fakamafola ʼaē ki te hahaʼi. Tokolahi iā nātou ʼaia neʼe faigataʼa kiā nātou te taʼi fai ʼaia, tāfito lā ʼi tanatou kamakamata fai fakamafola. Kae neʼe natou fakalogo ki te fakatotonu. ʼAki te temi, neʼe natou tauʼi tonatou mataku, pea neʼe lahi ʼaupitō ia tonatou tapuakinaʼi ʼaē e Sehova. Koteā anai takotou tali mokā ʼe fakaafe atu koutou ke kotou kau ki he ʼu faʼahiga gāue kehekehe ʼo te fai fakamafola, ʼaē ʼe lagi mole kotou faʼa leleiʼia? ʼE kotou lotolelei anai koa ke kotou fai ia he faʼahiga fakatuʼutuʼu foʼou ʼo te fai fakamafola?

Mokā Mavae He Tahi Mai Iā Sehova Kae ʼe Tou ʼOfa Ai

12, 13. (a) He koʼē ʼe ʼui mai e Sehova kiā tātou ke “toʼo te tagata agakovi” ʼi te lotolotoiga ʼo tātou? (b) Ko te ʼahiʼahi fea ʼe feala ke felāveʼi mo ʼihi mātuʼa Kilisitiano, pea koteā ʼaē ʼe feala ai ke faigataʼa ʼaupitō ai tanatou tauʼi ia te fihifihia ʼaia?

¹² ʼE mahino ia, ʼe tou mulimuli fuli ki te pelesepeto ʼaē ke tou maʼa ʼi te faʼahi fakasino, ʼi te aga  ʼaē ʼe tonu ke tou fai pea mo te faʼahi fakalaumālie, ke leleiʼia ai tātou e te ʼAtua. (Lau ia Tito 2:14.) Kae ʼe feala anai ke ʼi ai he ʼu ʼaluʼaga, ʼe faigataʼa ai anai hatatou lagolago ki te faʼahi ʼaia ʼo te finegalo ʼo te ʼAtua. Ohagē lā, ko te tama ʼulutokotahi ʼa te taumātuʼa Kilisitiano ʼe nā tuku he faʼifaʼitaki lelei, pea ʼe mavae leva ia tanā tama ʼi te moʼoni. ʼI tana leleiʼia age “te fakafiafia fakatemi ʼo te agahala” ʼi hana maʼu he ʼu felōgoi lelei mo Sehova pea mo tana ʼu mātuʼa ʼaē ʼe nā manavasiʼi ki te ʼAtua, neʼe fakamavae ia ʼi te kōkelekāsio.—Hep. 11:25.

¹³ Kua mamahi ʼaupitō ʼosi te loto ʼo tana ʼu mātuʼa! ʼE nā ʼiloʼi lelei pē te fakatuʼutuʼu ʼaē ʼo ʼuhiga mo te fakamavae ʼo he tahi ʼi te kōkelekāsio, heʼe ʼui fēnei ʼi te Tohi-Tapu: “Ke ʼaua naʼa kotou fakatahi mo he tagata pē ʼe fakahigoaʼi ko he tehina kae ʼe ko he tagata fai folonikāsio, peʼe ko he tagata mānumānu, peʼe ko he tagata ʼe tauhi tamapua, peʼe ko he tagata ʼe gutu tauvele, peʼe ʼinu fakavale, peʼe ko he tagata agakākā, pea ke ʼaua pē lā naʼa kotou kai fakatahi mo te taʼi tagata ʼaia.” (1 Ko. 5:11, 13) ʼE nā toe ʼiloʼi pē foki, ohagē ko tona ʼui ʼi te vaega ʼaia, ko te kupusiga palalau ʼaē ko he “tagata pē ʼe fakahigoaʼi ko he tehina” ʼe toe fakaʼuhiga ki he tahi ʼo te fāmili ʼe mole natou maʼuli tahi. Kae ʼe nā ʼofa mamahi ʼosi ki tanā tama! ʼI te lahi fau ʼaē ʼo tonā ʼofa, ʼe feala pē ke nā manatu fēnei: ‘ ʼE feafeaʼi anai hamā tokoni ki tamā tama ke toe liliu mai kiā Sehova mo kapau ʼe fefeka fau te ʼu tuʼakoi ʼaē ʼe mā fai? ʼE mole feala ke mā tokoni ki ai ke toe liliu mai mo kapau ʼe mole mā felōgoi mo ia.’ b

14, 15. Koteā te tonu lelei ʼe tonu anai ke fai e te ʼu mātuʼa ʼa he fānau neʼe fakamavae ʼi te kōkelekāsio?

¹⁴ ʼE malave ki totatou loto ia te lotomamahi ʼa te taumātuʼa Kilisitiano ʼaia ʼi te fakamavae ʼaē ʼo tanā tama ʼi te moʼoni. Neʼe feala pē ki tanā tama ke fetogi tana aga, kae neʼe ina fili ia te faʼahiga maʼuli ʼaē ʼe mole tuha mo he Kilisitiano, neʼe mole kei fia fakatahi ia mo tana ʼu mātuʼa pea mo tona ʼu tehina mo tuagaʼane ʼo te kōkelekāsio. Neʼe nā fia tokoni ki tanā tama, kae neʼe mole nā lava puleʼi te meʼa ʼaē kua ina fili. Koia lā ʼaē ʼe tou mahino ai pe koʼē ʼe lotomamahi ʼaupitō ai tana ʼu mātuʼa.

¹⁵ Kae koteā ʼapē ʼaē kā fai anai e te ʼu mātuʼa ʼaia? ʼE nā fakalogo anai koa ki te takitaki ʼa te ʼAtua ʼo ʼuhiga mo te faʼahi ʼaia? Peʼe nā faiga anai ke nā fakatahi tuʼumaʼu pē mo tanā tama ʼaē kua fakamavae, pea mo nā tuku logo ke haʼu ki te ʼu “fono fakafāmili”? ʼI te ʼu tonu ʼaē ʼe nā fai, ʼe tonu ke nā manatuʼi peʼe koteā te manatu ʼa Sehova ʼo ʼuhiga mo te meʼa ʼaē ʼe nā fai. Ko te fakatuʼutuʼu ʼa te ʼAtua, ke maʼa te kautahi, pea ke tupu ʼaki ai he uga ʼo nātou ʼaē neʼe agahala ke natou toe liliu mai kiā te ia. ʼE lava feafeaʼi ki te ʼu mātuʼa Kilisitiano hanatou lagolago ki te fakatuʼutuʼu ʼaia?

16, 17. Koteā te ako ʼe tou maʼu mokā tou metitāsioʼi te faʼifaʼitaki ʼaē neʼe tuku mai e Alone?

¹⁶ Ko Alone, ia te tehina ʼo Moisese, neʼe tau mo te fihifihia ʼo ʼuhiga mo tona ʼu foha e lua. Kotou fakakaukauʼi age muʼa pe neʼe feafeaʼi ia tona loto ʼi te temi ʼaē neʼe momoli ai e tona ʼu foha ko Natape mo Apiu ia te afi kiā Sehova kae neʼe mole ina fakatotonu age, pea mo te haga ʼaē ʼa Sehova ʼo matehi ia nāua. ʼE moʼoni, neʼe mole kei feala ai leva hanatou toe felōgoi. Kae neʼe mole gata aipē. Neʼe fakatotonu fēnei e Sehova kiā Alone pea mo tona ʼu foha agatonu: “ ʼAua naʼa kotou tuku ke maveuveu tokotou ʼulu, pea ʼe mole tonu anai ke kotou hae tokotou ʼu mutuʼi meʼa [ʼi te temi putu], ke mole kotou mamate ai pea ke mole ʼita ai [ia Sehova] ki te hahaʼi fuli.”  (Lev. 10:1-6) ʼE hā lelei mai ʼi te fakatotonu ʼaenī, ʼe tonu ke lahi age ia totatou ʼofa ʼaē kiā Sehova ʼi totatou ʼofa ʼaē ki totatou ʼu fāmili ʼaē ʼe mole agatonu kiā Sehova.

¹⁷ ʼI te temi nei, ʼe mole haga leva ia Sehova ʼo foimo matehi atu aipē ia nātou ʼaē ʼe natou maumauʼi ia tana ʼu lao. ʼAki te ʼofa ʼe ina tuku kiā nātou ia te fealagia ʼaē ke natou fakahemala mai tanatou ʼu gāue heʼe faitotonu. Kae ʼe feafeaʼi anai te loto ʼo Sehova mo kapau ʼe mole fakalogo te ʼu mātuʼa ki tana fakatotonu, pea mo natou manatu ʼe lahi te ʼu takuʼaki ke hoko atu pē tanatou ʼu felōgoi mo tanatou fānau ʼaē kua fakamavae ʼi te moʼoni?

18, 19. Koteā te ʼu tapuakina ʼe maʼu e te ʼu fāmili ʼaē ʼe natou mulimuli ki te fakatotonu ʼa Sehova ʼo ʼuhiga mo nātou ʼaē kua fakamavae?

¹⁸ Tokolahi ia nātou ʼaē neʼe fakamavae ʼi muʼa atu ʼi te kōkelekāsio, ʼi te temi nei ʼe natou tala fakahagatonu, ko te faʼahi ʼaē neʼe tokoni kiā nātou ke natou toe liliu mai kiā Sehova, neʼe ko te nofo agatonu ʼaē ʼo tonatou ʼu kaumeʼa pea mo tonatou fāmili ki te ʼu fakatotonu ʼa Sehova ʼo ʼuhiga mo nātou ʼaē kua fakamavae. Ohagē lā neʼe ʼui e te fafine kei finemui ki te ʼu tagata ʼāfea, ko te faʼahi ʼaē neʼe tupu ai ia te fetogi ʼo tona maʼuli, “neʼe ko te fakaʼapaʼapa ʼaē ʼo tona tokolua lahi ki te fakatuʼutuʼu ʼo ʼuhiga mo te fakamavae.” Neʼe ʼui fēnei e te tuagaʼane ʼaia: “Ko tana agatonu ʼaē ki te ʼu pelesepeto Fakatohi-tapu ʼaē neʼe tokoni mai kiā au ke au toe fia liliu mai ki te kōkelekāsio.”

¹⁹ Koteā anai te tonu kā tou fai? ʼE tonu ke tou tekeʼi ia tatatou fia talagataʼa ʼaē ki he tokoni Fakatohi-tapu. ʼE tonu ke tou tui papau, ʼe lelei tuʼumaʼu age pē ia te ʼu tokoni ʼaē ʼe foaki mai e te ʼAtua moʼo fakatokatoka ia totatou ʼu fihifihia.

“Ko Te Folafola ʼa Te ʼAtua ʼe Maʼuli”

20. Koteā te ʼu faʼahi e lua ʼe talanoa kiai te koga tohi ʼo Hepeleo 4:12? (Vakaʼi te kiʼi nota ʼi te lalo pāsina.)

²⁰ ʼI temi ʼaē neʼe tohi ai e Paulo “ko te Folafola ʼa te ʼAtua ʼe maʼuli,” neʼe mole fia talanoa ia ki te Folafola ʼa te ʼAtua, ia te Tohi-Tapu. c Ko te ʼu vaega ki muʼa atu pea ki muli mai ʼo te koga tohi ʼo tana ʼu palalau ʼaenī, ʼe talanoa ia ki te ʼu folafola fakapapau ʼa te ʼAtua. Ko te manatu ʼaē neʼe fia fakahā e Paulo, ko te ʼAtua ʼe ina fai he fakapapau pea ʼe mole galo iā te ia ke ina fakahoko. Neʼe fakamoʼoni e Sehova ia te faʼahi ʼaia ʼaki te polofetā ko Isaia, ʼo ina ʼui fēnei: “[Ko] taku folafola . . . ʼe mole toe liliu mai anai kiā te au kae mole hona ʼu fua, . . . [kae] ʼe lava lelei anai te meʼa ʼaē neʼe au fekauʼi kiai.” (Isa. 55:11) Koia ʼaua naʼa puli tatatou faʼa kātaki mokā ʼe mole hoko fakavilivili mai te meʼa ʼaē ʼe tou fakaʼamu kiai. Ko Sehova ʼe “gāue tuʼumaʼu” ʼaki te manatu ʼaē ke māui mālie ia tana fakahoko kātoa ʼaē ʼo tana fakatuʼutuʼu.—Soa. 5:17.

21. He koʼē ʼe feala ke lotomālohi te hahaʼi mātutuʼa ʼo “te toe hahaʼi tokolahi” ʼaki te koga tohi ʼo Hepeleo 4:12?

²¹ Ko te hahaʼi mātutuʼa agatonu ʼo “te toe hahaʼi tokolahi,” ʼe natou tauhi kiā Sehova talu mai fualoa. (Fakh. 7:9) Tokolahi neʼe mole natou ʼamanaki ʼe natou mātutuʼa anai ʼi te tuʼu ʼo te ʼu faʼahiga meʼa ʼaenī. Kae neʼe mole natou lotovaivai ai. (Pes. 92:14) ʼE mahino kiā nātou ko te ʼu fakapapau ʼaē ʼa te ʼAtua ʼi tana folafola ʼe hoko moʼoni ia, heʼe maʼuli ia, pea ʼe kei lolotoga gāue nei pē ia Sehova moʼona fakahoko. Mai tona ʼaluʼaga ʼaē ʼe maʼuhiga ki te ʼAtua ia tana fakatuʼutuʼu, koia ʼaē ʼe tou fakafiafia ai Tona loto mokā ʼe tou taupau maʼu ʼi totatou ʼatamai te māʼoluga ʼaupitō ʼaē ʼo tana fakatuʼutuʼu. Lolotoga te fitu ʼaho ʼe mālōlō ia Sehova, heʼe tokalelei ia ʼi tana ʼiloʼi ʼaē ʼe hoko anai tana fakatuʼutuʼu, pea ko tana hahaʼi ʼi tonatou ʼuhiga kūtuga ʼe natou lagolago anai ki te fakahoko ʼaē ʼo tana fakatuʼutuʼu. ʼE feafeaʼi kiā koutou? Kua kotou hū koa ki te mālōlō ʼa te ʼAtua?

[ʼU nota]

ʼE Kei Kotou Manatuʼi Koa?

• Koteā ʼaē ʼe tonu ke tou fai ke feala ai hatatou hū ki te mālōlō ʼa te ʼAtua iā ʼaho nei?

• Mokā tou mahino ki te meʼa ʼaē ʼe loto e te ʼAtua ke tou fai ʼi te Tohi-Tapu, pea ʼe feafeaʼi hatatou fakahā ʼe tou fia fakafiafia te ʼAtua?

• Ko te ʼu faʼahi fea ʼaē ʼe feala ai ke faigataʼa ia tatatou fakalogo ki te takitaki ʼa te Tohi-Tapu, pea he koʼē ʼe maʼuhiga ke tou fakalogo?

• Koteā te ʼu faʼahi e lua ʼe talanoa kiai te koga tohi ʼo Hepeleo 4:12?

[ʼU fehuʼi ʼo te ako]

[Paki ʼo te pāsina 31]

Kua mamahi ʼaupitō ʼosi te loto ʼo tana ʼu mātuʼa!