Kotou Fakaovi Ki Te ʼAtua

Te Fakafīmālie Maʼa Ia ʼAē ʼe Mafasia Tona Loto

ʼE MOLE feafeala ia kiā Sehova ke ʼofa mai kiā au.’ Neʼe ko te ʼui ʼaia ʼa te fafine Kilisitiano ʼaē neʼe tau mo te lotomamahi lolotoga tona maʼuli. Neʼe tui papau ia ʼe nofo mamaʼo ia Sehova iā ia. ʼE mamaʼo moʼoni koa ia Sehova ʼi tana kau ʼatolasio ʼaē ʼe lotomamahi? ʼE tou maʼu te tali fakalotofīmālie iā Pesalemo 34:18, ko he ʼu palalau neʼe tohi e te tagata fai pesalemo ko Tavite ʼaki te takitaki ʼa te ʼAtua.

Neʼe ʼiloʼi e Tavite ia te mamafa ʼaupitō ʼo he mamahi ʼe feala ke tau mo he tagata ʼe ʼatolasio agatonu kiā Sehova. ʼI tana kei tūpulaga, neʼe feholaʼaki ia Tavite, he neʼe tuli ia ia e te hau maheka ko Saulo, ʼaē neʼe ina fia matehi ia ia. Neʼe kumi haofaki ia Tavite ki Kate te kolo ʼo te ʼu fili, ʼi te telituale Filisitini, heʼe ʼi tana manatu ʼe lagi mole kumi ai anai ia ia e Saulo. Kae ʼi te kua ʼiloʼi leva ʼo ia, neʼe faikākā ia Tavite ke ʼui ko ia ko he tagata vale pea neʼe hoki feala ai tana hao. Neʼe falala ia Tavite ko te ʼAtua ʼaē ʼe ina haofaki ia ia pea ʼaki te meʼa ʼaē neʼe hoko kiā ia, neʼe ina tohi ai ia te Pesalemo 34.

Neʼe manatu koa ia Tavite ʼe mamaʼo te ʼAtua iā nātou ʼaē ʼe tau mo ni ʼu tuʼutāmaki pea kua natou lotovaivai, peʼe natou ʼui ʼe mole tāu mo nātou ke tokagaʼi ia nātou e te ʼAtua? Neʼe tohi fēnei e Tavite: “Ko Sehova ʼe ovi kiā nātou ʼaē kua lavea tonatou loto pea ʼe ina haofaki ia nātou ʼaē kua taʼomia tonatou ʼatamai.” (Vaega 18) Tou vakaʼi age muʼa peʼe foaki feafeaʼi mai e te ʼu palalau ʼaia ia te lotofīmālie pea mo te ʼamanaki.

“Ko Sehova ʼe ovi [ki tana hahaʼi].” Neʼe ʼui fēnei ʼi te tohi ʼo ʼuhiga mo te kupusiga palalau ʼaenī: “ ʼE hagē ʼe tou ʼui ko te ʼAliki ʼe tokaga pea mo leʼoleʼo ki tana hahaʼi, pea ʼe nofo teuteu tuʼumaʼu ke tokoni pea mo ina haofaki nātou.” ʼE ko he meʼa fakalotofīmālie ia tatatou ʼiloʼi ʼaē ko Sehova ʼe ina leʼoleʼo tana hahaʼi. ʼE sio ki te ʼu fihifihia ʼaē ʼe hoko kiā nātou “ ʼi te ʼu temi maʼuhiga ʼaupitō” ʼaenī, pea ʼe ina ʼiloʼi te ʼu meʼa ʼaē ʼe ʼi tonatou loto.—2 Timoteo 3:1; Gāue 17:27.

“Nātou ʼaē kua lavea tonatou loto.” ʼI ʼihi fenua, ko te kupusiga palalau “te loto lavea” ʼe fakaʼuhiga ko he tama ʼe manako ki he taʼahine kae ʼe mole ʼofa te taʼahine kiā ia. Kae neʼe ʼui e te tagata poto ko te ʼu palalau ʼa te tagata fai pesalemo, ʼi te agamāhani “ ʼe fakaʼuhiga ki te lotomamahi ʼaupitō.” ʼEī, māʼiapē lā mo te kau ʼatolasio agatonu ʼa te ʼAtua, ʼe feala pē ʼi ʼihi temi ke natou tau mo he ʼu fihifihia lahi, ʼo mamahi ai tonatou loto.

“Nātou ʼaē kua taʼomia tonatou ʼatamai.” Ko nātou ʼaē ʼe lotovaivai ʼe feala pē ke natou ʼui ʼe mole honatou ʼuhiga, koia ʼe feala ai ʼi ʼihi temi ke natou ʼui ʼe mole kei ʼi ai he puleʼaki. ʼE ʼui ʼi te tohi tokoni maʼa te kau fakaliliu ʼo te Tohi-Tapu, ko te kupusiga palalau ʼaia ʼe feala ke fakaliliu fēnei: “Nātou ʼaē ʼe mole kei ʼi ai honatou falalaʼaga.”

ʼE tali feafeaʼi e Sehova kiā nātou ʼaē ʼe “kua lavea tonatou loto” pea mo nātou ʼaē ʼe “kua taʼomia tonatou ʼatamai”? ʼE mamaʼo koa ia Sehova iā nātou ʼaia, ʼo natou manatu ai ʼe mole tāu mo nātou ke natou maʼu tona ʼofa pea mo tana tokaga age kiā nātou? Kailoa ia! Ohagē ko he tamai ʼofa ʼe ina fakapelepeleʼi pea mo fakalotofīmālieʼi hana tamasiʼi ʼe lotomamahi, ko Sehova ʼe ovi ki tana kau ʼatolasio ʼaē ʼe kole tokoni age kiā te ia. ʼE loto ʼaupitō ia ke ina fakalotofīmālieʼi tonatou loto ʼaē ʼe kua lavea pea mo tonatou ʼatamai ʼaē ʼe kua taʼomia. ʼE feala ke ina foaki age kiā nātou te poto pea mo te mālohi ʼaē ʼe ʼaoga kiā nātou moʼo tauʼi te ʼu ʼahiʼahi ʼaē ʼe hoko kiā nātou.—2 Kolonito 4:7; Sake 1:5.

He koʼē ʼe mole kotou kumi peʼe lava feafeaʼi hakotou fakaovi kiā Sehova? ʼE fakapapau fēnei ia te ʼAtua manavaʼofa: “ ʼE au nofo . . . mo te tagata ʼaē ʼe taʼomia pea mo loto agavaivai moʼo toe fakamaʼuli te ʼatamai ʼo te kau agavaivai, moʼo toe fakamaʼuli te loto ʼo nātou ʼaē ʼe taʼomia.”—Isaia 57:15.