Te Fakahā ʼo Te Tule Leʼo ʼe Faigafua Ai Te Lea Fakapilitānia

ʼE MATOU fiafia ʼi te fakahā atu ʼe ʼahiʼahi tā anai lolotoga he taʼu kātoa, ʼo kamata atu ʼaki Te Tule Leʼo ʼaenī, ʼe tā fakatahi anai ʼi te māhina fuli ia he Tule Leʼo ʼe mahino gafua ai ki te hahaʼi ia te lea Fakapilitānia. ʼE maʼu anai ʼi te nusipepa ʼaia, te ʼu ʼalatike ako pea kapau ʼe feʼauga ʼi Te Tule Leʼo, te tahi atu ʼu ʼalatike kua filifili. ʼE matou tui papau, ko te nusipepa ʼaia ʼe ʼaoga lahi anai ki te maʼuli fakalaumālie ʼo te kau Fakamoʼoni ʼa Sehova. Koteā tona tupuʼaga?

Ko te Fakapilitānia ʼe ko te lea māhani ʼaē ʼe fakaʼaogaʼi e totatou ʼu tehina ʼi te ʼu motu ʼaē ko Fisi, mo Kana, mo Kenia, mo Lipelia, mo Niselia mo Papua Niu Kini, pea mo te ʼu Motu ʼo Salomone. Logolā ʼi te ʼu fenua ʼaia ʼe lagi ko totatou ʼu tehina ʼe natou palalau he tahi age lea ʼo tonatou fenua, peʼe ko te fenua ʼaē neʼe natou tutupu ai, kae ʼi te agamāhani ʼe natou fakaʼaogaʼi ʼi te ʼaho fuli pē ia te lea Fakapilitānia ʼi tanatou ʼu fai palalau ʼaē ʼi te ʼu fono ʼo te kōkelekāsio pea mo te fai fakamafola. Kae ko tanatou Fakapilitānia ʼe faigafua age ia ʼi te Fakapilitānia ʼaē ʼi tatatou ʼu tohi Fakatohi-tapu. ʼE toe ʼi ai foki mo ʼihi hahaʼi ʼa Sehova ʼe natou ʼolo ki te tahi ʼu fenua, pea ʼe tonu ai ke natou palalau Fakapilitānia, ke feala hanatou felōgoi mo te hahaʼi, logolā tanatou mole mahino lelei ki te lea ʼaia. Tahi ʼaē, ʼe mole feala hanatou kau ki te ʼu fono ʼaē ʼe fai ʼi tanatou lea.

Ko te ʼu ʼalatike ako ʼo Te Tule Leʼo ʼaē ʼe tou vakaʼi ʼi te vāhaʼa fuli, ʼe ko he ʼu fakatuʼutuʼu tāfito ʼaia ke tou maʼu ai tatatou meʼa kai fakalaumālie ʼi tona temi totonu. Koia, moʼo tokoni ki te nofoʼaki ke natou maʼu te ʼu lelei fuli mai tanatou ako ʼo te ʼu ʼalatike ʼaia, neʼe fai te fakatuʼutuʼu ʼaē ke fakafaigafua te Fakapilitānia. Ko te nusipepa foʼou ʼaia ʼe kehe anai tona takafi. Ko te ʼu kupu tāfito ʼo te ʼu ʼalatike ako, mo tona ʼu palakalafe, mo tona ʼu fehuʼi fakamanatu, pea mo tona ʼu pāki ʼe tatau pē anai ia mo te ʼu ʼalatike ʼo Te Tule Leʼo māhani. ʼE feala ai leva ke tou muliʼi fuli he nusipepa pē ʼi te ʼu nusipepa ʼaia, pea mo tou kau ki te ako ʼo Te Tule Leʼo. Moʼo fakahā te kehekehe ʼo te lea Fakapilitānia ʼi te ʼu Tule Leʼo e lua, vakaʼi te faʼifaʼitaki ʼaē ʼe tuʼu ʼi lalo ʼo te palakalafe 2 ʼo te ʼuluaki ʼalatike ako ʼo te nusipepa ʼaenī.

ʼE matou fakaʼamu ʼe tali anai te fakatuʼutuʼu foʼou ʼaenī ki te ʼu faikole ʼa te tokolahi, ʼaē neʼe natou ʼui fēnei kiā Sehova: “Fakamahino mai kiā au ke au ako ia tau ʼu fakatotonu.” (Pes. 119:73) Koia ʼe matou falala ko nātou ʼaē ʼe mole mahino lelei ki te lea Fakapilitānia, ʼo toe fēia pē ki te fānau ʼaē ʼe palalau Fakapilitānia, ke lelei age tanatou teuteuʼi ia te ʼalatike ako ʼo Te Tule Leʼo ʼaē ʼe fai ʼi te vāhaʼa fuli. ʼE tou fakafetaʼi fuli kiā Sehova ʼaē ʼi tona ‘ ʼofa ki te fāmili kātoa ʼo te ʼu tehina,’ ʼe ina fakaʼaogaʼi ia te “tagata kaugana agatonu mo poto” moʼo foaki lahi mai ia te meʼa kai fakalaumālie.—1 Pet. 2:17; Mat. 24:45.

Te Kolesi Pule ʼa Te Kau Fakamoʼoni ʼa Sehova