ʼE ʼi Ai Koa He ʼUhiga Moʼoni ʼo Te Maʼuli?

“ ʼE ʼI AI koa he ʼuhiga ʼo te maʼuli?” ʼE tokolahi te hahaʼi ʼaē kua natou fai ia te fehuʼi ʼaia. Kae meʼa fakaʼofaʼofa, heʼe tatau aipē peʼe koteā tanatou faʼahiga sio ki te maʼuli, ʼe maʼu e te tokolahi te manatu ʼaē neʼe fakamatalatala e te tōketā Ositalalia ʼo te ʼu ivi ko Viktor E. Frankl, ʼaē “ ʼe mole he ʼuhiga pea ʼe mole he ʼaoga” ia ʼo tonatou maʼuli.

He koʼē ʼe manatu fēia ia te tokolahi? Ko tona tupuʼaga tāfito ʼaē heʼe ko te ʼu toko lauʼi miliona hahaʼi ʼi te mālamanei kātoa ʼe natou māʼuʼuli fakaʼofaʼofa ʼaupitō pea ʼi he ʼu ʼaluʼaga fakalotomamahi. ʼI te ʼaho fuli pē, ʼe natou tau mo te masiva, mo te mahaki, mo te agamālohi fakavale pea mo tonatou gaohi koviʼi. Ko tonatou maʼuli “ ʼe fonu [moʼoni] ʼi te lotohoha,” ohagē ko tona ʼui ʼaē e Sopo ʼi muʼa atu ʼo ʼuhiga mo te mamahi ʼa te tagata. (Sopo 14:1) Ko te faʼahi tāfito ʼaē ʼe natou faiga kiai, ke natou māʼuʼuli ʼi te ʼaho fuli pē.

Ko te tahi atu ʼu toko lauʼi miliona hahaʼi ʼe natou maʼu koloa. ʼE hagē ia ʼe natou maʼu ia meʼa fuli pē ʼaē ʼe ʼaoga ke feala ai hanatou fiafia moʼoni. Kae, tokolahi heʼeki natou maʼu te fiafia moʼoni. Koteā tona tupuʼaga? He neʼe mole hoko tuʼumaʼu ia tanatou ʼu ʼamanaki pea mo tanatou ʼu fakaʼamu ʼaē ʼe maʼuhiga, ʼuhi ko “te malaʼia pea mo te ʼu meʼa kovi,” ia te ʼu faigataʼaʼia fakaekonomika peʼe ko te ʼu tuʼutāmaki, ohagē lā ko te mate ʼa he fānau.—Pesalemo 90:10.

Ko te tahi faʼahi ʼe ina fakaʼāsili te mafola ʼo te manatu ʼaē ʼe “mole he ʼuhiga pea ʼe mole he ʼaoga” ʼo te maʼuli. Koteā te faʼahi ʼaia? Ko te nounou ʼaē ʼo te maʼuli. Maʼa te tokolahi, ko te hahaʼi ʼaē ʼe lahi tonatou ʼu fealagia, ʼe tonu ia ke natou maʼuli fualoa. ʼE mole feala ke natou mahino ki te ʼaluʼaga faigataʼa moʼoni ʼaenī ʼe tau mo tātou fuli: Tatau aipē peʼe tou hao mai te ʼu tuʼutāmaki ʼaē ʼe feala ke hoko, kae ʼe ʼi ai pē anai he ʼaho ko meʼa fuli ʼaē ʼe tou maʼu ʼe puli anai ia ʼi te mate.—Tagata Tānaki 3:19, 20.

Ko Te Mole He ʼUhiga ʼo Te Maʼuli ʼe Fēia Tuʼumaʼu Pē Koa Anai?

Ko te Hau ʼo Iselaele ʼo te temi muʼa ʼaē ko Salomone, neʼe ina fakahā fakanounou te ʼaluʼaga ʼaia. Neʼe sio ia ki te gāue kinakina ʼa te hahaʼi ʼaē ʼo tona temi, ʼi tanatou fakaʼaogaʼi ia tonatou poto pea mo tonatou ʼu fealagia ki te tō ʼakau, ki te gāue kele, ki te laga fale, pea mo te tokaga ʼaē ki ʼonatou fāmili, ohagē pē ko tatatou fai ʼaē iā ʼaho nei. Koia neʼe feala ke ina fai ia te fehuʼi ʼaē peʼe ‘Koteā te ʼaoga ki muli age ʼo te ʼu meʼa fuli ʼaia?’  Neʼe ina fakaʼosi fēnei, ko meʼa fuli pē ʼaē ʼe fai e te hahaʼi “ ʼe mole hona ʼaoga ohagē pē ko te tuli ʼo te matagi.”—Tagata Tānaki 2:17, Bible en français courant.

Kae neʼe manatu koa e te Hau ko Salomone ʼe fēia tuʼumaʼu pē anai, ko meʼa fuli pē ʼaē ʼe fai e te hahaʼi ʼi te mālamanei “ ʼe mole hona ʼaoga ohagē pē ko te tuli ʼo te matagi”? Kailoa ia. Neʼe ina fakahā pē ia he manatu fakapotopoto ʼo ʼuhiga mo te ʼu meʼa ʼaē ʼe hoko ʼi te maʼuli ʼi te mālama heʼe haohaoa ʼaenī. Kae, ʼaki te Folafola ʼa te ʼAtua ʼe feala ke kotou falala ʼe mole fēia tuʼumaʼu pē anai ia te ʼaluʼaga ʼaia!

ʼE feafeaʼi hakotou lava maʼu ia te falala ʼaia? Kotou lau age muʼa te ʼu ʼalatike ʼaē e lua kā hoa mai. Ko te ʼu ʼalatike ʼaia e lua, ʼe lava tokoni atu kiā koutou ke kotou mahino pe koʼē ʼe hagē ia ʼe mole he ʼuhiga ʼo te maʼuli, peʼe feafeaʼi anai te fakatokatoka ʼo te ʼaluʼaga ʼaia, pea ʼe toe fakamahino ai peʼe kotou lava maʼu feafeaʼi he ʼuhiga moʼoni ʼo tokotou maʼuli ʼi te temi nei.