Ke Tou Kumi Te Tokalelei

“Tou kumi te ʼu meʼa ʼaē ʼe lagolago ki te tokalelei.”—LOMA 14:19.

1, 2. He koʼē ʼe maʼu te tokalelei ʼi te lotolotoiga ʼo te kau Fakamoʼoni ʼa Sehova?

 IĀ ʼAHO nei, ko te tokalelei moʼoni ʼe faigataʼa tona maʼu ʼi te mālamanei. Māʼia mo te hahaʼi ʼaē ʼe fenua tahi pea mo lea tahi, ʼi te agamāhani ʼe mole natou logotahi ʼi te faʼahi fakalotu, fakapolitike, mo te faʼahi ʼo te paʼaga, pea mo te ako ʼaē ʼe fai ʼi te ʼu faleako. Kae ko te hahaʼi ʼa Sehova ʼe natou logotahi logolā tanatou ʼomai ʼaē mai “te ʼu fenua fuli, mo te ʼu telepī, mo te ʼu hahaʼi pea mo te ʼu lea fuli.”—Fakh. 7:9.

² ʼI te agamāhani ko te tokalelei ʼaē ʼe tou maʼu neʼe mole hoko fēia pē. ʼE tupu tāfito heʼe tou “tokalelei mo te ʼAtua” ʼaki tatatou tui ki tona ʼAlo, ʼaē neʼe ina liligi tona taʼataʼa moʼo fakamolemole tatatou ʼu agahala. (Loma 5:1; Efe. 1:7) Tahi ʼaē, ʼe foaki e te ʼAtua moʼoni ia tona laumālie māʼoniʼoni ki tana ʼu kaugana agatonu, pea ko te tokalelei ʼe ko he agaaga ia ʼo te fua ʼo te laumālie māʼoniʼoni. (Kal. 5:22) Ko te tahi tupuʼaga ʼo tatatou tokalelei pea mo logotahi, heʼe ‘mole tou kau ʼi te mālamanei.’ (Soa. 15:19) ʼE mole tou lagolago ki te ʼu fihi fakapolitike peʼe ki te tau. Ohagē ko tona ʼui ʼi te Tohi-Tapu, ko te hahaʼi ʼa Sehova ʼe “natou tuki tanatou ʼu heletā ke liliu ko he ʼu huo laga kele.”—Isa. 2:4.

 3. Koteā ʼaē ʼe feala ke tou fai ʼaki te tokalelei ʼaē ʼe tou maʼu, pea koteā kā talanoa anai kiai ia te ʼalatike ʼaenī?

³ ʼE feala ke tou tokalelei mo ʼotatou tehina mo tuagaʼane mole ʼuhi pē heʼe mole tou fia fai he meʼa ʼe kovi kiā nātou. ʼE tou ‘feʼofaʼofaniʼaki pē’ logolā te kehekehe ʼo te ʼu lanu mo te ʼu agaʼi fenua ʼo nātou ʼaē ʼe kau mo tātou ʼi te kōkelekāsio ʼa te kau Fakamoʼoni ʼa Sehova. (Soa. 15:17) ʼAki tatatou tokalelei ʼaia, ʼe feala ai ke “tou fai te meʼa ʼaē ʼe lelei ki te hahaʼi fuli pē, kae tāfito foki kiā nātou ʼaē ko ʼotatou ʼu kāiga ʼi te tui.” (Kal. 6:10) Ko tatatou palatiso fakalaumālie ʼaē ʼe maʼu ai te tokalelei, ʼe ko he meʼa ia ʼe tonu ke tou taupau fakalelei pea mo puipui. Koia, tou vakaʼi age muʼa peʼe feafeaʼi hatatou lava kumi ia te tokalelei ʼi te loto kōkelekāsio.

 Mokā Tou Tūkia

 4. Koteā ʼaē ʼe feala ke tou fai moʼo kumi te tokalelei mokā ʼe lotomamahi he tahi kiā tātou?

⁴ Neʼe tohi fēnei e te tisipulo ko Sake: “ ʼE lahi te ʼu lakaga ʼe tou tūkia fuli ai. Kapau ʼe mole tūkia he tahi ʼi tana ʼu palalau, ʼe ko he tagata haohaoa ia.” (Sake 3:2) Koia, ʼe feala ke mole manatu tahi pea mo femahinohalaʼaki te ʼu tehina mo tuagaʼane. (Filp. 4:2, 3) Kae kapau ʼe hoko he fihifihia, pea ʼe feala pē hanatou fakatokatoka pea mo natou taupau ia te tokalelei ʼi te kōkelekāsio. Ohagē lā, tou vakaʼi age muʼa te tokoni ʼaē ʼe tonu ke tou maʼuliʼi mo kapau ʼe tou tokagaʼi ʼe lagi lotomamahi he tahi kiā tātou.—Lau ia Mateo 5:23, 24.

 5. ʼE lava feafeaʼi hatatou kumi ia te tokalelei mokā neʼe lakahala mai he tahi?

⁵ ʼE feafeaʼi mo kapau neʼe agakovi mai he tahi? ʼE tonu koa ke tou fakaʼamu ke haʼu pea mo fai fakalelei mai? ʼE ʼui fēnei iā 1 Kolonito 13:5: “[Ko te ʼofa] ʼe mole ina tokagaʼi te kovi ʼaē neʼe fai age kiā te ia.” Mokā tou lotomamahi ki he tahi, ʼe tou kumi ia te tokalelei ʼo tou fakamolemole pea mo galoʼi ia te faʼahi ʼaia, ko tona fakaʼuhiga ʼaē ke ‘mole tou tokagaʼi te kovi ʼaē neʼe ina fai mai kiā tātou.’ (Lau ia Kolose 3:13.) ʼE ko te faʼahi maʼuhiga ʼaia ke tou fai mokā ko he ʼu kiʼi lakahala ʼe fai mai kiā tātou, heʼe tou taupau ai ia te tokalelei mo te ʼu tehina mo tuagaʼane fakalaumālie pea mo tou maʼu ai te tokalelei ʼo tokita ʼatamai. ʼE ʼui fēnei e te tāʼaga lea poto: “ ʼE ko he meʼa matalelei . . . [te] fakamolemole [ʼo] te lakahala.”—Taag. 19:11.

 6. Koteā ʼaē ʼe tonu ke tou fai mo kapau ʼe faigataʼa takita fakamolemole ia te lakahala ʼaē neʼe fai mai kiā tātou?

⁶ ʼE feafeaʼi mo kapau neʼe lakahala mai he tahi kiā tātou kae ʼe faigataʼa hatatou fakamolemole? ʼE mole ko he aga fakapotopoto mokā kita palalauʼi te faʼahi ʼaia ki ʼihi atu. Ko te taʼi fai fatufatu ʼaia ʼe feala ke ina pulihi ia te tokalelei ʼo te kōkelekāsio. Koteā ʼaē ʼe tonu ke tou fai moʼo fakatokatoka te fihifihia ʼaia ʼi te tokalelei? ʼE ʼui fēnei iā Mateo 18:15: “Kapau ʼe fai e tou tehina he agahala, ʼalu ʼo fakahā age kiā te ia tana hala iā koe pē mo ia tokotahi. Kapau ʼe fakalogo kiā te koe, pea kua ke maʼu tou tehina.” Logopē lā ʼe fakaʼaogaʼi ia Mateo 18:15-17 ʼo ʼuhiga mo he agahala mamafa, kae ʼe feala ke fakaʼaogaʼi te pelesepeto ʼaē ʼe tuʼu ʼi te vaega 15, ke tou palalau ʼāteaina pē mo ia ʼaē neʼe lakahala mai pea mo tou faiga ke tou toe maʼu he ʼu felōgoi ʼi te tokalelei. a

 7. He koʼē ʼe tonu ke tou fakatokatoka fakavilivili te ʼu fihifihia?

⁷ Neʼe tohi fēnei e te ʼapositolo ko Paulo: “Kotou ʼiʼita, kae ʼaua naʼa kotou agahala; ke ʼaua naʼa tō te laʼā ki tokotou ʼita, pea ʼaua naʼa kotou tuku he faigamālie ki te Tēvolo.” (Efe. 4:26, 27) Neʼe ʼui fēnei e Sesu: “Foimo fakatokatoka vave mo ia ʼaē ʼe ina ʼave koe ki te fakamāu.” (Mat. 5:25) Koia, kā tou kumi te tokalelei pea ʼe fakamaʼua ai ke tou fakatokatoka fakavilivili te ʼu fihifihia. Koteā tona tupuʼaga? Heʼe feala pē ke ʼāʼāsili ia te ʼu fihifihia pea mo kovi age, ohagē pē ko he mataʼi lavea ʼe feala ke ʼaukau mokā ʼe mole foimo faitoʼo. ʼAua naʼa tou tuku ia te fialahi, peʼe ko te maheka, peʼe ko te manako ʼaē ki te falā ke ina tāʼofi tātou ke tou fakatokatoka te ʼu fihifihia mo totatou ʼu tehina.—Sake 4:1-6.

Mokā Pipiki He Tokolahi Ki Te Fihifihia

8, 9. (a) Neʼe koteā te fetalanoaʼaki ʼaē neʼe hoko ʼi te kōkelekāsio ʼo Loma? (b) Neʼe tokoniʼi feafeaʼi e Paulo ia te kau Kilisitiano ʼo Loma?

⁸ ʼI ʼihi temi ʼe mole ko he toko lua pē ʼaē ʼe pipiki ki te ʼu fihifihia ʼaē ʼe feala ke hoko ʼi te kōkelekāsio, kae ko te tokolahi. Neʼe hoko te ʼaluʼaga fēia ki te kau Kilisitiano ʼo Loma ʼaē neʼe faitohi ki ai ia te ʼapositolo ko Paulo, ʼaki te takitaki ʼa te ʼAtua. Neʼe fetalanoaʼaki ia te kau Sutea pea mo te kau Kilisitiano Senitile. Ko ʼihi ʼi te kōkelekāsio ʼaia neʼe natou manukiʼi ia nātou ʼaē neʼe mole heʼeki akoʼi fakalelei tonatou leʼo ʼo loto ki te Folafola ʼa te ʼAtua, ʼaē neʼe natou tapuʼi ia meʼa fuli. Pea ko nātou leva ʼaia, neʼe natou fakamāuʼi hala nātou ʼaē neʼe kua akoʼi fakalelei tonatou leʼo ʼo loto, ʼo ʼuhiga mo he ʼu faʼahi neʼe fakalogo pē ia kiā nātou totonu. Koteā te tokoni ʼaē neʼe foaki e Paulo ki te kōkelekāsio?—Loma 14:1-6.

 ⁹ Neʼe tokoniʼi e Paulo ia nātou ʼaē neʼe fetalanoaʼaki. Neʼe ina ʼui kiā nātou ʼaē neʼe mahino ʼe mole kei tonu ke natou fakalogo ki te Lao ʼa Moisese, ke ʼaua tanatou manukiʼi tonatou ʼu tehina mo tuagaʼane. (Loma 14:2, 10) Neʼe feala ke fakatupu tūkia ki totatou ʼu tehina mo tuagaʼane te taʼi aga ʼaia ʼaē neʼe ko he meʼa fakalialia hanatou kai te ʼu meʼa ʼaē neʼe tapuʼi ʼi te Lao. Neʼe tokoniʼi fēnei nātou e Paulo: “Tuku tau maumauʼi te gāue ʼa te ʼAtua ʼuhi ko he meʼa kai. . . . ʼE lelei takotou mole kai ki he kanoʼi manu peʼe ko takotou mole ʼinu ki te vino, peʼe ko takotou fai he meʼa ʼe fakatupu tūkia ai ki tokotou tehina.” (Loma 14:14, 15, 20, 21) ʼI te tahi age faʼahi, neʼe tokoniʼi e Paulo ia te kau Kilisitiano ʼaē neʼe tapuʼi age e tonatou leʼo ʼo loto ia meʼa fuli, ke ʼaua naʼa natou fakamāuʼi ʼo natou lau ʼe heʼe agatonu ia nātou ʼaē neʼe kua akoʼi fakalelei tonatou leʼo ʼo loto ki te Folafola ʼa te ʼAtua. (Loma 14:13) Neʼe ina ʼui ‘ke ʼaua naʼa natou manatu ʼe natou māʼoluga age nātou.’ (Loma 12:3) ʼI tana ʼosi tokoniʼi ia nātou ʼaē neʼe fetalanoaʼaki, neʼe tohi fēnei e Paulo: “Koia, tou kumi te ʼu meʼa ʼaē ʼe lagolago ki te tokalelei pea mo te ʼu meʼa ʼaē ʼe natou lagalaga ia tātou takitokotahi.”—Loma 14:19.

10. Ohagē ko te kōkelekāsio ʼo Loma ʼo te ʼuluaki sēkulō, koteā ʼaē ʼe ʼaoga moʼo fakatokatoka te ʼu fihifihia iā ʼaho nei?

¹⁰ ʼE feala ke tou tui papau neʼe tali leleiʼi e te kōkelekāsio ʼo Loma ia te tokoni ʼa Paulo, pea neʼe natou fai te ʼu fetogi ʼaoga. Mokā hoko he ʼu fihifihia ʼi te kau Kilisitiano iā ʼaho nei, ʼe mole toe maʼua koa lā ke tou fakatokatoka ʼaki te ʼofa te ʼu fihi, ʼo tou kumi ʼaki he agavaivai te ʼu tokoni Fakatohi-tapu pea mo tou maʼuliʼi? Ohagē pē ko te ʼu fetogi ʼaē neʼe fai e te kau Loma, ko nātou ʼaē ʼe fetalanoaʼaki iā ʼaho nei, ʼe ʼaoga ke natou fai he ʼu fetogi “ke [natou] femaʼuliʼaki ʼi te tokalelei.”—Mko. 9:50.

ʼE Feala Ke Tokoni Feafeaʼi Ia Te Kau Tagata ʼĀfea?

11. Koteā ʼaē ʼe tonu ke tokaga kiai he tagata ʼāfea mo kapau ʼe fia palalau age he Kilisitiano neʼe fetalanoaʼaki mo he tehina peʼe ko he tuagaʼane?

¹¹ Kae ʼe feafeaʼi mo kapau ʼe fia palalau he Kilisitiano ki he tagata ʼāfea ʼo ʼuhiga mo hona fihifihia mo he tahi ʼo tona fāmili peʼe mo he tehina  peʼe ko he tuagaʼane ʼi te moʼoni? ʼE ʼui fēnei iā Tāʼaga Lea 21:13: “Ki ʼaē ʼe ina māpunuʼi tona taliga ki te tagi fakaʼofaʼofa ʼo ia ʼaē ʼe veliveli, mo ia pē foki lā ʼe pāui anai pea ʼe mole tali age anai kiā ia.” ʼE mahino papau ia, ko he tagata ʼāfea ʼe ina ‘māpunuʼi anai tona ʼu taliga’ mo kapau ʼe mole fakalogo ki he tahi ʼe kole tokoni age kiā ia. Kae ʼe fakatokagaʼi fēnei ʼi te tahi age tāʼaga lea: “Ko ʼaē ʼe ʼuluaki palalau ʼi tona fakamāuʼi ʼe hagē ʼe matatonu ia ʼo aʼu ki te temi ʼaē ʼe fakafeagai age ki ai tona fili.” (Taag. 18:17, La Bible en français courant) ʼE tonu ki he tagata ʼāfea ke manavaʼofa ʼi tana fakalogo, kae ʼe toe ʼaoga foki ke tokaga naʼa lagolago ki te faʼahi ʼo ia ʼaē neʼe ina tala age te agakovi ʼaē neʼe fai. ʼI tana ʼosi fakalogo ki te fihifihia, ʼe ʼaoga ke fehuʼi age e te tagata ʼāfea kiā ia ʼaē ʼe lotomamahi, peʼe kua palalau kiā ia ʼaē neʼe agakovi age. ʼE toe feala pē foki ki te tagata ʼāfea ke ina toe vakaʼi mo ia pe koteā ʼaē ʼe ʼui ʼi te Tohi-Tapu ke tou fai, moʼo taupau te tokalelei mo totatou ʼu tehina mo tuagaʼane.

12. Kotou tuku mai he ʼu faʼifaʼitaki ʼe fakahā ai te tuʼutāmaki ʼaē ʼo te fai fakavilivili ʼo he tonu ʼi te ʼosi fakalogo ki he tahi ʼe meo ʼo ʼuhiga mo he fihifihia.

¹² Ko te ʼu faʼifaʼitaki e tolu ʼi te Tohi-Tapu ʼe natou fakahā lelei mai te tuʼutāmaki ʼaē ʼo te fai fakavilivili ʼo he tonu ʼi te ʼosi fakalogo pē kiā ia ʼaē neʼe haʼu ʼo palalau ki te fihifihia. Neʼe tui ia Potifale ki te tala age ʼaē e tona ʼohoana neʼe faigaʼi e Sosefo ke ina fakaʼalikiʼi ia ia. ʼI te lahi ʼaē ʼo tona ʼita, neʼe pilisoniʼi ai e Potifale ia Sosefo. (Sen. 39:19, 20) Neʼe tui ia te Hau ko Tavite kiā Sipa ʼaē neʼe ina ʼui ko tona pule, ia Mefiposete, neʼe kau ia mo te ʼu fili ʼo Tavite. Neʼe tali fēnei atu aipē e Tavite: “Koʼenī! ʼE ʼa koe te ʼu meʼa fuli ʼa Mefiposete.” (2 Sam. 16:4; 19:25-27) Neʼe tala age ki te Hau ko Atasease ko te kau Sutea neʼe natou toe laga te ʼu kaupā ʼo Selusalemi pea neʼe natou fakafeagai ki te Puleʼaga ʼo Pelesia. Neʼe tui ia te hau ki te fakamatala loi ʼaia pea neʼe ina fakatotonu ke fakagata ia te toe laga ʼo Selusalemi. Koia, neʼe fakatuʼu ai e te kau Sutea te gāue ʼo te fale lotu ʼa te ʼAtua. (Esita. 4:11-13, 23, 24) ʼE mulimuli fakapotopoto e te kau tagata ʼāfea ki te tokoni ʼa Paulo kiā Timoteo, ke ʼaua naʼa vave fau te fai ʼo te ʼu fai fakamāu.—Lau ia 1 Timoteo 5:21.

13, 14. (a) Mokā ʼe fetalanoaʼaki he foʼi toko lua, koteā ʼaē ʼe tonu ke tou manatuʼi? (b) Koteā ʼaē ʼe lava tokoni ki te kau tagata ʼāfea ke natou fai he ʼu fai fakamāu ʼe totonu?

¹³ Māʼiapē lā mokā lagi tou manatu kua tou ʼiloʼi te ʼu faʼahi fuli ʼaē neʼe tupu ai te fihi ʼa he foʼi toko lua, kae ʼe maʼuhiga ke tou ʼiloʼi “kapau ʼe manatu e he tahi kua ina ʼiloʼi he meʼa, ʼe mole heʼeki ina ʼiloʼi ia te faʼahi ohagē pē ko te meʼa ʼaē ʼe tonu ke ina ʼiloʼi.” (1 Ko. 8:2) ʼE tou ʼiloʼi moʼoni koa te ʼu faʼahi fuli ʼaē neʼe tupu ai te fihi? ʼE feala koa ke tou mahino kiā meʼa fuli ʼo ʼuhiga mo nāua ʼaē neʼe fihi? ʼI te temi ʼaē ʼe natou fai fakamāu ai, ʼe maʼuhiga ki te kau tagata ʼāfea ke mole natou tui ki ni ʼu loi peʼe ko ni ʼu logo ʼe lau ʼo ʼuhiga mo te ʼu meʼa ʼaē neʼe hoko! Ko Sesu Kilisito, te Tuʼi Fakamāu ʼaē neʼe fili e te ʼAtua, ʼe fai fakamāu ʼaki te faitotonu. ʼE mole “ina fakamāuʼi anai ʼaki te meʼa ʼaē neʼe hā ki ʼona mata, pea ʼe mole ina fai anai tana fakatonutonu ʼaki pē te meʼa ʼaē neʼe fagono kiai ʼona taliga.” (Isa. 11:3, 4) ʼE takitaki ia Sesu e te laumālie ʼo Sehova. ʼO toe fēia foki mo te kau tagata ʼāfea, ʼe tonu ke takitaki nātou e te laumālie ʼo te ʼAtua.

¹⁴ ʼI muʼa ʼo tanatou fakamāuʼi he fihifihia, ʼe ʼaoga ke kole e te kau tagata ʼāfea te laumālie ʼo Sehova. ʼE natou tuku ke takitaki nātou e te laumālie ʼo te ʼAtua ʼaki tanatou fakaʼaogaʼi te Tohi-Tapu pea mo te ʼu tohi ʼa “te tagata kaugana agatonu mo poto.”—Mat. 24:45.

ʼE Tonu Ke Tou Taupau Te Tokalelei Mo Te ʼAtua

15. Ko te temi fea ʼaē ʼe tonu ai ke tou tala ia he agahala mamafa neʼe tou ʼiloʼi?

¹⁵ ʼI totatou ʼuhiga Kilisitiano, ʼe fakalotomālohiʼi tātou ke tou kumi te tokalelei. Kae, ʼe toe ʼui fēnei foki ʼi te Tohi-Tapu: “Ko te poto mai ʼoluga, ʼuluaki ʼe maʼa ia, pea ʼe tokalelei.” (Sake 3:17) ʼE fakamuʼamuʼa ia te aga ʼaē ʼe maʼa ʼi te tokalelei, ko tona fakaʼuhiga ʼaē, ke tou lagolago ki te ʼu lēkula maʼa ʼa te ʼAtua ʼo ʼuhiga mo te aga ʼaē ʼe tonu ke fai pea mo tou mulimuli ki tana ʼu fakamaʼua faitotonu. Kapau ʼe ʼiloʼi e he Kilisitiano neʼe fai e he tehina peʼe ko he tuagaʼane he agahala  mamafa, pea ʼe tonu ke ina fakalotomālohiʼi ia ia ke ʼalu ʼo vetevete tana agahala ki te kau tagata ʼāfea. (1 Ko. 6:9, 10; Sake 5:14-16) Kapau leva ko ia ʼaē neʼe agahala ʼe mole ina fai te faʼahi ʼaia, pea ʼe tonu ki te Kilisitiano ʼaē neʼe ina ʼiloʼi te agahala ke ʼalu ʼo tala ki te kau tagata ʼāfea. Kapau ʼe mole ʼalu ia ʼo tala heʼe fia tokalelei mo ia ʼaē neʼe agahala, pea ʼe toe agahala foki mo ia.—Lau ia  Levitike 5:1; Taag. 29:24.

16. Koteā ʼaē ʼe tou ako mai te fetaulaki ʼaē ʼa Seu pea mo te Hau ko Lopoame?

¹⁶ Ko te fakamatala ʼo ʼuhiga mo Seu ʼe ina fakahā mai ʼe ko te faitotonu ʼo te ʼAtua ʼaē ʼe tonu ke tou fakamuʼamuʼa ʼi hatatou fia taupau te tokalelei mo he tahi neʼe agahala. Neʼe fekauʼi e te ʼAtua ia Seu ke ina fakahoko Tona fakamāu ki te ʼapi ʼo te Hau ko Akape. Ko te Hau agakovi ko Lopoame, ia te foha ʼo Akape pea mo Sesapele, neʼe ʼalu ʼi tana sāliote moʼo fakafelāveʼi mo Seu pea mo ʼui māʼana: “ ʼE ʼi ai koa te tokalelei Seu?” Neʼe koteā te tali ʼa Seu? Neʼe ina tali fēnei: “Ke hoko feafeaʼi lā te tokalelei kae kei fai pē e tau faʼē ia Sesapele tana ʼu fai folonikāsio pea mo tana ʼu gaohi meʼa fakatemonio?” (2 Hau 9:22) ʼI tana ʼosi tali age, neʼe toʼo e Seu tana nahau pea neʼe ina nahauʼi ia Lopoame ʼi tona mafu. Ohagē ko tona fai e Seu, ʼe tonu ki te ʼu tagata ʼāfea ke natou fakatūʼā te tagata agahala ʼaē ʼe mole fakahemala. ʼE mole natou fakagafua kiā nātou ʼaē ʼe mole fia fakahemala ke natou nonofo ʼi te kōkelekāsio moʼo taupau pē ia te tokalelei. Ko te kau tagata ʼāfea ʼe natou fakamavae ia nātou ʼaē ʼe mole fia fakahemala, ke hoko atu te tokalelei ʼa te kōkelekāsio mo te ʼAtua.—1 Ko. 5:1, 2, 11-13.

17. Koteā ʼaē ʼe tonu ke fai e te kau Kilisitiano fuli moʼo taupau te tokalelei?

¹⁷ ʼI te agamāhani, ko te ʼu fihifihia ʼaē ʼe hoko iā tātou mo totatou ʼu tehina mo tuagaʼane ʼe mole ko he ʼu agahala mamafa ia. Koia ʼaē ʼe lelei age hatatou fakahā te ʼofa pea mo fakamolemole te ʼu hala ʼaē ʼe fai mai. ʼE ʼui fēnei ʼi te Folafola ʼa te ʼAtua: “Ko ʼaē ʼe ina ʼuʼufi te hala ʼe ina kumi te ʼofa, kae ko ia ʼaē ʼe haga talanoa ki he meʼa, ʼe ina veteki ia nātou ʼaē ʼe femāhaniʼaki.” (Taag. 17:9) Kapau ʼe tou mulimuli ki te ʼu palalau ʼaenī, pea ʼe tokoni mai anai kiā tātou fuli ke tou taupau ia te tokalelei ʼi te kōkelekāsio pea mo tatatou ʼu felōgoi lelei mo Sehova.—Mat. 6:14, 15.

Ko Te Kumi ʼo Te Tokalelei ʼe Maʼu Ai Te ʼu Tapuakina

18, 19. Koteā te ʼu tapuakina ʼe tou maʼu mai tatatou kumi ia te tokalelei?

¹⁸ ʼI tatatou kumi “te ʼu meʼa ʼaē ʼe lagolago ki te tokalelei” ʼe tou maʼu ai ia he ʼu tapuakina lahi. ʼE tou maʼu he ʼu felōgoi lelei mo Sehova ʼi tatatou mulimuli ki tana ʼu ala, pea mo tou lagolago ki te tokalelei pea mo te logotahi ʼi tatatou palatiso fakalaumālie. ʼI tatatou taupau ia te tokalelei ʼi te kōkelekāsio, ʼe tou toe ako ai peʼe feafeaʼi hatatou taupau te tokalelei mo nātou ʼaē ʼe tou fakamafola ki ai ia “te logo lelei ʼo te tokalelei.” (Efe. 6:15) Pea ʼe faigafua age hatatou “agamalū ki te hahaʼi fuli,” pea mo tou “lava lolomi ʼo [tātou] ʼi te agakovi.”—2 Tim. 2:24.

¹⁹ Tou toe manatuʼi foki ʼe hoko anai “he fakatuʼuake ʼo te kau faitotonu pea mo te kau heʼe faitotonu.” (Gāue 24:15) Kā hoko moʼoni anai ia te ʼamanaki ʼaia ʼi te kele, ʼe ko te toko lauʼi miliona hahaʼi mai te ʼu fenua kehekehe, mo tonatou ʼu agaaga ʼaē kā fakatuʼuake anai, pea mai te ʼu temi kehekehe māʼiapē lā mo nātou ʼaē neʼe māʼuʼuli “talu mai te kamataʼaga ʼo te mālamanei”! (Luka 11:50, 51) Ko te akoʼi ʼo nātou ʼaē kā fakatuʼuake ki te ʼu ala ʼo te tokalelei, ʼe ko he toe pilivilēsio lahi anai ia. Ko te ako ʼaē ʼe tou maʼu ʼi te temi nei, ʼe tokoni lahi mai anai kiā tātou ʼi te temi ʼaia!

[Nota]

Koteā ʼAē Neʼe Kotou Ako?

• ʼE feafeaʼi hatatou lava kumi te tokalelei mokā ʼe lotomamahi he tahi kiā tātou?

• Koteā ʼaē ʼe tonu ke tou fai moʼo kumi ia te tokalelei mokā neʼe lakahala mai he tahi?

• Kā fetalanoaʼaki he foʼi toko lua, he koʼē ʼe mole ko he aga fakapotopoto hatatou lagolago ki he tahi iā nāua?

• He koʼē ʼe maʼuhiga age te fai ʼo te meʼa ʼaē ʼe totonu ʼi takita faiga ʼaē ke kita taupau te tokalelei mo he tahi ʼe ina fai te agahala?

[ʼU fehuʼi ʼo te ako]

[Paki ʼo te pāsina 25]

ʼE ʼofa ia Sehova kiā nātou ʼaē ʼe fakamolemole ki ʼihi ʼaki he loto ʼe lelei