Tou Ako Mai Te Folafola ʼa Te ʼAtua

Koteā Te Puleʼaga ʼo Te ʼAtua?

ʼE lagaʼi ʼi te ʼalatike ʼaenī te ʼu fehuʼi neʼe lagi kua kotou ʼosi fai pea mo te ʼu vaega ʼi takotou Tohi-Tapu ʼaē ʼe feala ke kotou maʼu ai te ʼu tali. ʼE fiafia anai te kau Fakamoʼoni ʼa Sehova ʼi te fai palalau mo koutou ki te ʼu fehuʼi ʼaenī.

 1. Koteā te Puleʼaga ʼo te ʼAtua?

Ko te Puleʼaga ʼo te ʼAtua ko he puleʼaga ʼe tuʼu ʼi selō. ʼE ina fetogi anai te ʼatu puleʼaga pea ʼe ina fakahoko anai te finegalo ʼo te ʼAtua ʼi selō pea mo te kele. Koia ko te Puleʼaga ʼo te ʼAtua ʼe ko te puleʼaki ki te ʼaoga ʼaē kiā tātou ʼo he puleʼaga ʼe lelei age.—Lau ia Taniela 2:44; Mateo 6:9, 10.

Ko he puleʼaga ʼe tonu ke ʼi ai hona hau. Pea ko Sehova neʼe ina fakanofo ia tona ʼAlo ko Sesu, ke Hau ʼi Tona Puleʼaga.—Lau ia Luka 1:30-33.

 2. He koʼē ko Sesu ʼe ko te Pule ʼaē ʼe lelei age?

Ko te ʼAlo ʼo te ʼAtua ʼe ko te Hau ʼaē ʼe lelei age heʼe agalelei, mo pipiki maʼu ki te faitotonu, pea ʼe ina maʼu he mālohi feʼauga moʼo tokoni ki te hahaʼi. (Mateo 11:28-30) ʼI te hili ʼo tona fakatuʼuake, neʼe mavae Sesu ki selō pea mo kamata talitali ʼi te toʼomataʼu ʼo Sehova. (Hepeleo 10:12, 13) Pea neʼe foaki age ki ai e te ʼAtua tona mālohi moʼo kamata ʼaki tana pule mai selō.—Lau ia Taniela 7:13, 14.

 3. Ko ai koa ʼaē kā pule anai mo Sesu?

Ko he kiʼi kūtuga ʼe fakahigoaʼi ko “te kau māʼoniʼoni” ʼe filifili e te ʼAtua ke natou pule mo Sesu ʼi selō. (Taniela 7:27) Ko nātou ʼaē neʼe ʼuluaki filifili ke liliu ko he kau māʼoniʼoni neʼe ko te kau ʼapositolo agatonu ʼa Sesu. Neʼe hoko atu pē e Sehova ʼo aʼu ki te temi nei, ia tana filifili ʼaē he ʼu hahaʼi tagata pea mo fafine agatonu ke natou liliu ko he kau māʼoniʼoni. Ohagē pē ko Sesu, ʼe fakatuʼuake anai nātou ʼaki he sino fakalaumālie—Lau ia Soane 14:1-3; 1 Kolonito 15:42-45.

Ko te toko fia koa ʼaē ʼe ʼolo ki selō? Neʼe fakahigoaʼi nātou e Sesu ko te “kiʼi faga ovi.” (Luka 12:32) Ko te kātoa ʼo tana hahaʼi ʼe ko te toko 144 000, pea ʼe natou puleʼi anai mo Sesu ia te kele.—Lau ia Fakahā 5:9, 10; 14:1.

  4. Ko ʼāfea koa ʼaē kā kamata pule ai te Puleʼaga ʼo te ʼAtua?

Neʼe fakanofo Hau ia Sesu i te taʼu 1914. a Hili kiai te kiʼi temi nounou, pea neʼe ina lī ifo ia Satana mo tana ʼu temonio ki te kele. (Fakahā 12:7-10, 12) Talu mai ai ko te ʼu tokakovi ʼo te mālamanei kua ʼāsilisili kovi age. Ko te ʼu tau, mo te ʼu mafuike, mo te ʼu hoge, mo te ʼu taʼi mahaki, pea mo te manukiʼi ʼo te lao ʼe kau ki te fakaʼiloga ʼo te ʼu ʼaho fakaʼosi ʼo te tuʼu ʼo te ʼu faʼahiga meʼa ʼaenī. (2 Timoteo 3:1-5) Ko nātou fuli ʼe natou fia maʼu te ʼu fua lelei ʼo te Puleʼaga ʼo te ʼAtua ʼe tonu ke natou ako peʼe feafeaʼi hatatou liliu ko he ʼu tisipulo ʼo te Hau ko Sesu.—Lau ia Luka 21:7, 10, 11, 31, 34, 35.

 5. Koteā ʼe fakahoko anai e te Puleʼaga ʼo te ʼAtua?

ʼAki he gāue fai fakamafola fakamālamanei, ko te Puleʼaga ʼo te ʼAtua kua tokoni ki te toko miliona hahaʼi mai te ʼu puleʼaga kehekehe ke natou ako te ʼu moʼoni ʼo te ʼAtua. (Mateo 24:14) Ko te Puleʼaga ʼo te ʼAtua ʼe ina puipui anai te “toe hahaʼi tokolahi,” ʼaē ʼe ko te hahaʼi fakalogo agatonu ʼa Sesu, ʼi te temi ʼaē kā ina fakaʼauha ai anai ia te tuʼu ʼo te ʼu faʼahiga meʼa agakovi ʼo te kele.—Lau ia Fakahā 7:9, 10, 13-17.

Lolotoga taʼu e 1 000, ʼe fakaliliu māmālie anai e te Puleʼaga ia te kele ko he palatiso. Pea ʼe toe liufaki age anai e Sesu te Puleʼaga ki tana Tamai. (1 Kolonito 15:24-26) ʼE kotou ʼiloʼi koa he tahi ʼe kotou fia palalau ki ai ʼo ʼuhiga mo te Puleʼaga ʼo te ʼAtua?—Lau ia Pesalemo 37:10, 11, 29.

Kapau ʼe kotou fia maʼu he tahi ʼu fakamahino, vakaʼi te ʼu kāpite 8 pea mo te 9 ʼo te tohi ʼaenī Koteā ʼAē ʼe Akoʼi Moʼoni Mai ʼi Te Tohi-Tapu?, neʼe tā e te kau Fakamoʼoni ʼa Sehova.

[Nota]