Neʼe Natou Maʼu Te Mēsia!
Neʼe Natou Maʼu Te Mēsia!
“Kua mā maʼu te Mēsia.”—SOA. 1:41.
1. Koteā ʼaē neʼe hoko ʼo tupu ai te tala ʼo te logo ʼaenī: “Kua mā maʼu te Mēsia”?
NEʼE tutuʼu ia Soane Patita mo tana ʼu tisipulo e toko lua. ʼI te fakaovi age ʼaē ʼa Sesu, neʼe ʼui fēnei e Soane: “Koʼenī te ʼAkeno ʼa te ʼAtua!” Ko Atelea pea mo te tahi tisipulo neʼe nā muliʼi atu aipē ia Sesu pea mo nā nonofo mo ia ʼi te ʼaho ʼaia. Ki muli age, neʼe maʼu e Atelea tona tehina ko Simone Petelo, pea neʼe ina tala age te logo fakaofoofo ʼaenī: “Kua mā maʼu te Mēsia.” Pea neʼe taki leva e Atelea ia Petelo kiā Sesu.—Soa. 1:35-41.
2. ʼE fua lelei feafeaʼi anai kiā tātou tatatou haga vakavakaʼi ia te ʼu lea fakapolofetā ʼo ʼuhiga mo te Mēsia?
2 ʼAki te temi, ko Atelea, mo Petelo, pea mo ʼihi atu neʼe natou maʼu te ʼu faigamālie ke natou vakavakaʼi fakalelei ia te ʼu Folafola taputapu, pea mo natou tala ai ʼaki he tui papau ko Sesu ʼo Nasaleti ʼe ko te Mēsia ʼaē neʼe fakapapauʼi mai. Ko tatatou tui ki te Folafola ʼa te ʼAtua pea mo tana Fakanofo, ʼe toe mālohi age anai ʼi tatatou haga ʼaē ʼo vakavakaʼi ʼi te temi nei ia te ʼu lea fakapolofetā ʼo ʼuhiga mo te Mēsia.
“Koʼenī! Ko Tou Hau ʼe Haʼu”
3. Ko te ʼu lea fakapolofetā fea ʼaē neʼe hoko ʼaki te hū fakakolōlia ʼaē ʼa Sesu ki Selusalemi?
3 ʼE hū fakakolōlia anai te Mēsia ki Selusalemi. Neʼe ʼui fēnei ʼi te lea fakapolofetā ʼa Sakalia: “Ke ke fakafiafia, Ê taʼahine ʼo Sione. Kalaga fakafiafia, Ê taʼahine ʼo Selusalemi. Koʼenī! Ko tou hau ʼe haʼu tonu kiā te koe. ʼE faitotonu ia ia, ʼio, kua haofaki; ʼe agavaivai, pea ʼe heka ʼi te ʼāsino, ʼi he ʼāsino, te ʼuhi ʼo te ʼāsino fafine.” (Sakl. 9:9) Neʼe tohi fēnei e te tagata fai pesalemo: “ ʼE manūʼia ia ia ʼaē ʼe haʼele mai ʼi te huafa ʼo Sehova.” (Pes. 118:26) Neʼe kalaga fakafiafia ia te toe hahaʼi tokolahi ʼi te hū ʼaē ʼa Sesu ki Selusalemi. Neʼe mole ʼui age e Sesu te meʼa ʼaē neʼe tonu ke natou fai. Kae neʼe natou fai pē nātou te meʼa ʼaē neʼe tala ʼi te lea fakapolofetā. ʼI takotou lau ia te ʼu vaega Tohi-Tapu ʼaē ʼe fakamatala ai te ʼaluʼaga ʼaenī, kotou fakakaukau ʼe hagē ʼe kotou kau ai pea mo kotou logo ki te fakafiafia ʼa te hahaʼi tokolahi.—Lau ia Mateo 21:4-9.
4. Neʼe hoko feafeaʼi ia te vaega ʼo Pesalemo 118:22, 23?
4 ʼE fakafisi anai ia te hahaʼi tokolahi kiā Sesu logolā te ʼu fakamoʼoni ʼaē ko ia te Mēsia, kae ʼe maʼuhiga pē anai ia ia ki te ʼAtua. Ohagē ko tona fakakikite, ko Sesu ‘neʼe fehiʼaʼinaʼi pea mo meʼa noaʼi ia ia’ e nātou ʼaē neʼe mole tui ki te ʼu fakamoʼoni. (Isa. 53:3; Mko. 9:12) Kae ʼaki te takitaki ʼa te ʼAtua, neʼe ʼui fēnei e te tagata fai pesalemo: “Ko te maka ʼaē neʼe liʼaki e te kau tufuga kua liliu ia ko te maka tāfito ʼo te agele. ʼE ko te meʼa ʼaia neʼe haʼu mai iā Sehova.” (Pes. 118:22, 23) Neʼe fakahā e Sesu ia te vaega Tohi-Tapu ʼaia ki te kau takitaki lotu fakafeagai, pea neʼe ʼui e Petelo neʼe fakahoko ia e Kilisito. (Mko. 12:10, 11; Gāue 4:8-11) Neʼe liliu ia Sesu ko te “maka agele ʼo te tafitoʼaga” ʼo te kōkelekāsio Fakakilisitiano. Neʼe fakafisi ki ai ia te hahaʼi ʼe mole tui, kae neʼe ko he tahi ia “neʼe fili, mo maʼuhiga iā mata ʼo te ʼAtua.”—1 Pet. 2:4-6.
Neʼe Lavakiʼi Pea Mo Liʼakina!
5, 6. Koteā ʼaē neʼe fakakikite pea mo fakahoko ʼo ʼuhiga mo te lavakiʼi ʼo te Mēsia?
5 Neʼe fakakikite ʼo ʼuhiga mo te Mēsia, ʼe lavakiʼi anai e tona kaumeʼa aga kākā. Neʼe fakakikite fēnei e Tavite: “Ko te tagata ʼaē neʼe mā tokalelei, ʼaē neʼe au falala ki ai, ʼaē neʼe kai ki taku moʼi pane, kua ina hiki ake tona muliʼi vaʼe ʼo fakafeagai kiā te au.” (Pes. 41:9) Kā kakai fakatahi e he tokolua he moʼi pane, pea neʼe fakaʼuhiga ia ʼe nā kaumeʼa. (Sen. 31:54) Koia ko te lavakiʼi ʼaē ʼo Sesu e Sutasi Isikaliote, neʼe ko te toe aga kākā lahi ʼaia. Neʼe fakatokagaʼi e Sesu ia te hoko ʼo te ʼu folafola fakapolofetā ʼa Tavite ʼi tana talanoa ʼo ʼuhiga mo te tagata kākā ʼaia pea mo ina ʼui fēnei ki tana kau ʼapositolo: “ ʼE mole talanoa ʼo ʼuhiga mo koutou fuli; ʼe au ʼiloʼi ia nātou ʼaē neʼe au fili. Kae ʼe fēia foki ke hoko te Tohi: ‘Ko ia ʼaē neʼe kai ki taku moʼi pane, kua ina hiki ake tona muliʼi vaʼe ʼo fakafeagai kiā te au.’ ”—Soa. 13:18.
6 ʼE foaki anai kiā ia ʼaē neʼe ina lavakiʼi te Mēsia te ʼu foʼi piesi siliva e 30, neʼe ko te totogi ʼaia ʼa te tagata kaugana! Neʼe ʼui e Mateo neʼe lavakiʼi e Suta ia Sesu kiā foʼi piesi siliva pē e 30 pea neʼe fakahoko ai ia te lea fakapolofetā ʼa Sakalia 11:12, 13. Kae he koʼē ʼe ʼui e Mateo neʼe fakakikite te faʼahi ʼaia “ ʼaki te polofetā ko Selemia”? ʼI te temi ʼo Mateo, neʼe lagi fakatuʼu ʼuluaki ia Selemia ʼi ʼu tohi ʼo te Tohi-Tapu ʼaē neʼe kau kiai ia Sakalia. (Vakaʼi ia Luka 24:44.) Neʼe mole fakaʼaogaʼi e Sutasi ia te paʼaga ʼaia, he neʼe ina liʼaki ki te fale lotu pea neʼe ʼalu ia ʼo fakamate.—Mat. 26:14-16; 27:3-10.
7. Neʼe hoko feafeaʼi te ʼu palalau ʼaē iā Sakalia 13:7?
7 Māʼia mo te kau tisipulo ʼa te Mēsia ʼe natou mavetevete anai. Neʼe tohi fēnei e Sakalia: “Tāʼi te tagata tauhi ovi, pea ke mavetevete te ʼu ovi ʼo te faga ovi.” (Sakl. 13:7) ʼI te ʼaho 14 ʼo Nisani ʼo te taʼu 33 ʼo totatou temi, neʼe ʼui fēnei e Sesu ki tana kau tisipulo: “ ʼE kotou tūkia fuli anai ʼo ʼuhiga mo au ʼi te pō ʼaenī, he neʼe tohi fēnei: ‘ ʼE au tāʼi anai te tagata tauhi ovi, pea ʼe mavetevete ai anai te ʼu ovi ʼo te faga ovi.’ ” Pea neʼe ko te meʼa pē ʼaia ʼaē neʼe hoko, he neʼe tohi e Mateo “neʼe liʼaki ai ia [Sesu] e te kau tisipulo fuli kae natou feholaki.”—Mat. 26:31, 56.
Neʼe Tukugākoviʼi Pea Mo Gaohi Koviʼi
8. Neʼe hoko feafeaʼi ia te ʼu palalau ʼaē iā Isaia 53:8?
8 ʼE fakamāuʼi anai te Mēsia pea mo fakatūʼā. (Lau ia Isaia 53:8.) ʼI te māfoatā ʼo te ʼaho 14 ʼo Nisani, ko te Sanetualio kātoa neʼe natou fakatahitahi, mo natou haʼi ia Sesu pea mo natou tuku ia ia ki te Kōvanā Loma ko Posio Pilato. Neʼe ina fakafehufehuʼi ia Sesu pea neʼe mole ina maʼu he hala iā te ia. Kae ʼi te temi ʼaē neʼe kole ai e Pilato ke fakaʼāteaina ia Sesu, neʼe kalaga fēnei ia te hahaʼi tokolahi: “Haʼi ia ia ki he pou!” pea mo natou kole ke fakaʼāteaina ia te tagata fai fakapō ko Palapasi. ʼI tana fia fakafīmālieʼi ia te hahaʼi kaugamālie, neʼe tuku age e Pilato kiā nātou ia Palapasi, mo ina huipiʼi ia Sesu, pea mo ina tuku ke tutuki ki he pou.—Mko. 15:1-15.
9. Neʼe hoko feafeaʼi ʼi te temi ʼo Sesu ia te ʼu palalau ʼaē iā Pesalemo 35:11?
9 ʼE fai anai he ʼu fakamoʼoni loi ʼe fakafeagai ki te Mēsia. Neʼe ʼui fēnei e te tagata fai pesalemo ko Tavite: “Neʼe tutuʼu ake te kau fakamoʼoni agamālohi, ʼe natou fehuʼi mai he ʼu meʼa ʼe mole au ʼiloʼi.” (Pes. 35:11) Neʼe hoko te lea fakapolofetā ʼaia, he “neʼe kumi e te kau pelepitelō pule mo te Sanetualio kātoa he fakamoʼoni loi ʼe fakafeagai kiā Sesu, ke fakatupu ʼaki ai hona matehi.” (Mat. 26:59) ʼI tona fakahagatonu, “neʼe tokolahi ia nātou ʼaē neʼe natou fai te ʼu fakamoʼoni loi ʼo fakafeagai kiā te ia, kae neʼe mole felōgoi tanatou ʼu fakamoʼoni.” (Mko. 14:56) Neʼe mole koviʼia e te ʼu fili ʼa Sesu te ʼu loi ʼaē neʼe tala e te kau fakamoʼoni ʼaia ʼo ʼuhiga mo ia, he neʼe natou loto pē nātou ke matehi ia Sesu.
10. Kotou fakamahino pe neʼe hoko feafeaʼi te ʼu palalau ʼaē iā Isaia 53:7.
10 ʼE nofo fakalogologo anai te Mēsia ʼi muʼa ʼo nātou ʼaē neʼe natou tukugākoviʼi ia ia. Neʼe fakakikite fēnei e Isaia: “Neʼe gaohi koviʼi ʼaupitō, kae neʼe ina tuku ke fakamamahiʼi ia ia; ʼo mole ina ʼavahi pē lā tona gutu. Ohagē ko he ʼakeno neʼe taki ki te tāmateʼiʼaga manu; pea ohagē ko he ovi kua gutu mate ʼi muʼa ʼo nātou ʼaē ʼe natou tele tona ʼu fulu, ʼo toe fēia mo ia neʼe mole ina ʼavahi pē lā tona gutu.” (Isa. 53:7) ʼI te temi ʼaē neʼe “talaʼakiʼi [ai ia Sesu] e te kau pelepitelō pule pea mo te kau tagata ʼāfea, neʼe mole ina fai hana tali.” Neʼe fehuʼi fēnei age e Pilato: “ ʼE mole ke logo koa lā koe ki te tuʼuga meʼa ʼaē ʼe natou fakamoʼoni ʼo fakafeagai kiā te koe?” Kae, ko Sesu “neʼe mole ina tali age kiā te ia, kailoa, māʼiapē lā pe ko he kupu e tahi, ʼo punamaʼuli ʼaupitō ai ia te kōvanā.” (Mat. 27:12-14) Neʼe mole laukoviʼi e Sesu tona ʼu fili.—Loma 12:17-21; 1 Pet. 2:23.
11. Neʼe hoko feafeaʼi ia Isaia 50:6 pea mo Mikea 5:1?
11 Neʼe fakakikite e Isaia ko te Mēsia ʼe gaohi koviʼi anai. Neʼe tohi fēnei e te polofetā: “Neʼe au tuku toku tuʼa kiā nātou ʼaē neʼe natou haha au, pea ko ʼoku kauʼahe kiā nātou ʼaē neʼe natou fusi toku ʼu fulu. Neʼe mole au fufū toku fofoga ki te fakalainoa pea mo te ʼu ʼanuʼanuhi.” (Isa. 50:6) Neʼe fakakikite fēnei e Mikea: “ ʼAki te kauʼi ʼakau ʼe natou tāʼi anai te kauʼahe ʼa te tuʼi fakamāu ʼo Iselaele.” (Mik. 5:1) ʼI tana fakamoʼoni ʼaē ki te hoko ʼo te ʼu lea fakapolofetā ʼaia, neʼe ʼui fēnei e te tagata faitohi evaselio ko Maleko: “Ko ʼihi neʼe natou kamata ʼanuʼanuhi ia [Sesu] pea mo pūlouʼi tona fofoga kātoa, mo natou hoka ia ia pea mo ʼui maʼa nātou kiā te ia: ‘Fakakikite mai!’ Pea ko te kau tagata faifekau ʼo te telepinale, neʼe natou tali ia ia, ʼo natou fepāʼaki.” ʼE ʼui e Maleko ko te kau sōlia “neʼe natou tāʼi tona ʼulu ʼaki te kaho pea neʼe natou ʼanuʼanuhi ia ia, pea neʼe natou tuʼutuli, ʼo natou hū kiā te ia.” (Mko. 14:65; 15:19) ʼE mahino ia, neʼe mole fai e Sesu he meʼa ʼe kovi ke tupu ʼaki ai tona gaohi koviʼi fēia.
ʼE Nofo Agatonu ʼo Aʼu Ki Te Mate
12. Neʼe hoko feafeaʼi ia Pesalemo 22:16 pea mo Isaia 53:12?
12 Neʼe fakakikite ni ʼu agaaga ʼo te tutuki ʼaē ʼo te Mēsia ki te pou. Neʼe ʼui fēnei e te tagata fai pesalemo ko Tavite: “Neʼe ʼātakai au e te hahaʼi agakovi. Ohagē ko he laione ʼe natou ʼohofi toku ʼu nima pea mo toku ʼu vaʼe.” (Pes. 22:16) ʼI tana talanoa ʼo ʼuhiga mo te ʼaluʼaga ʼe ʼiloʼi lelei e te kau lautohi ʼo te Tohi-Tapu, ʼe ʼui fēnei e te tagata faitohi Evaselio ko Maleko: “Neʼe ko te tolu hola ʼaia, [lagi ko te hola hiva ʼuhu] pea neʼe natou haʼi ai ia ia ki te pou.” (Mko. 15:25) Neʼe toe fakakikite foki ko te Mēsia ʼe lau anai ʼi te hahaʼi agahala. Neʼe tohi fēnei e Isaia: “Neʼe ina folahi tona nefesi ʼi te mate, pea neʼe lau ia ia ʼi te kau agahala.” (Isa. 53:12) Neʼe hoko te ʼu palalau ʼaia he “neʼe haʼi fakatahi mo [Sesu], ʼi te ʼu pou, te ʼu tagata kaihaʼa e toko lua, ko te tahi ʼi tona toʼomataʼu pea ko te tahi ʼi tona toʼohema.”—Mat. 27:38.
13. Neʼe hoko feafeaʼi ia te ʼu palalau ʼaē iā Pesalemo 22:7, 8?
13 Neʼe fakakikite e Tavite ko te Mēsia ʼe lea koviʼi anai. (Lau ia Pesalemo 22:7, 8.) Neʼe lea koviʼi Sesu ʼi tana lolotoga mamahi ʼaē ʼi te pou fakamamahi, heʼe ʼui fēnei e Mateo: “Ko nātou ʼaē neʼe fakalaka ʼi ai, neʼe natou laukovi kiā te ia, ʼo kalokalo ʼonatou ʼu ʼulu pea mo ʼui maʼa nātou: ‘Ia koe ʼaē neʼe ke fia holoʼi te fale lotu pea mo toe lagaʼi iā ʼaho e tolu, haofaki ia koe totonu! Kapau ko te ʼAlo koe ʼo te ʼAtua, pea ke hifo ifo ʼi te pou fakamamahi!’ ” ʼO toe fēia pē mo te kau pelepitelō pule, mo te kau sekelipa, pea mo te ʼu tagata ʼāfea neʼe natou manukinuki ia ia pea mo natou ʼui fēnei: “Neʼe ina haofaki te tahi ʼu hahaʼi; ka mole ina lavaʼi te haofaki ʼo ia totonu! Kapau ko ia ko te Hau ʼo Iselaele; pea ke hifo ifo lā ʼi te pou fakamamahi pea ʼe hoki tou tui ai leva kiā te ia. Neʼe ina tuku tana falala ki te ʼAtua, ke ina haofaki lā ia ia ʼi te lakaga ʼaia mo kapau ʼe loto kiā te ia, he neʼe ʼui māʼana: ‘Ko te ʼAlo au ʼo te ʼAtua.’ ” (Mat. 27:39-43) Neʼe mamahi ia Sesu, kae neʼe nofo fakatokatoka pē ia pea neʼe mole ina fai he ʼu palalau kovi. ʼE ko he faʼifaʼitaki lelei ʼaia maʼa tātou.
14, 15. Kotou fakahā mai pe ko te ʼu lea fakapolofetā fea ʼaē neʼe hoko ʼo ʼuhiga mo te kofu ʼo te Mēsia, pea mo te foaki age ʼaē kiā te ia he moʼi vinika.
14 Neʼe natou mate ki te kofu ʼo te Mēsia. Neʼe tohi fēnei e te tagata fai pesalemo: “ ʼE natou vae iā nātou toku ʼu mutuʼi meʼa, pea ʼo ʼuhiga mo toku kofu ʼe natou mate kiai.” (Pes. 22:18) Ko te faʼahi ʼaia neʼe hoko, heʼe “ ʼi te ʼosi . . . haʼi [ʼo Sesu e te kau sōlia Loma] ki te pou, neʼe natou tufa ʼona kofu tuʼa ʼo mate kiai.”—Mat. 27:35; lau ia Soane 19:23, 24.
15 ʼE foaki age anai ki te Mēsia he moʼi vinika pea mo he ʼahu. Neʼe ʼui fēnei e te tagata fai pesalemo: “Neʼe foaki mai te ʼakau kona ke au kai, pea neʼe natou fia fakaʼinu au ʼaki he moʼi vinika.” (Pes. 69:21) ʼE ʼui fēnei mai e Mateo kiā tātou: “Neʼe natou ʼavage kiā [Sesu] te vino kua fio ʼaki te ʼahu ke ina ʼinu; pea ʼi tana ʼosi ʼahiʼahiʼi, neʼe fakafisi ia ki tona ʼinu. Pea [ki muli age,] neʼe tafusi . . . te tahi iā nātou ʼaia ʼo toʼo te ʼeposi pea neʼe ina fakapala ʼaki te vinika pea ʼi tana ʼosi ʼai ki te kaho, neʼe ina ʼavake ke ina ʼinu.”—Mat. 27:34, 48.
16. Kotou fakamahino pe neʼe hoko feafeaʼi ia te ʼu folafola fakapolofetā ʼaē iā Pesalemo 22:1.
16 ʼE hagē anai neʼe liʼakina te Mēsia e te ʼAtua. (Lau ia Pesalemo 22:1.) ʼO ʼalutahi mo te lea fakapolofetā, “ ʼi te hiva hola [lagi ʼi te hola tolu hili hoʼatā], neʼe kalaga leʼolahi ia Sesu ʼo fēnei: ‘Eli, Eli, lama sabachthani?’ ko tona fakaʼuhiga, mokā ʼe fakaliliu: ‘Ê toku ʼAtua, toku ʼAtua, koteā ʼaē kua ke liʼaki ai au?’ ” (Mko. 15:34) Neʼe mole puli te tui ʼa Sesu ki tana Tamai ʼaē ʼi selō. Neʼe tuku e te ʼAtua ia Sesu ki tona ʼu fili, ko tona fakaʼuhiga ʼaē neʼe ina toʼo Tana puipui ke feala ai te ʼahiʼahiʼi kātoa ʼo te nofo agatonu ʼa Kilisito. Pea ʼi tana kalaga fēia, neʼe fakahoko ai e Sesu ia Pesalemo 22:1.
17. Neʼe hoko feafeaʼi ia Sakalia 12:10 pea mo Pesalemo 34:20?
17 ʼE hokaʼi anai te Mēsia, kae ʼe mole fasi anai tona ʼu hui. Ko te hahaʼi ʼaē neʼe nonofo ʼi Selusalemi “ ʼe natou sisio ake anai kiā ia ʼaē neʼe natou hokaʼi.” (Sakl. 12:10) Pea ʼe ʼui fēnei iā Pesalemo 34:20: “[Ko te ʼAtua] ʼe ina taupau te ʼu hui fuli ʼo ia ʼaia; ʼe mole pē fasi hona hui e tahi.” ʼI tana fakamoʼoni ia te ʼu faʼahi ʼaia, neʼe tohi fēnei e te ʼapositolo ko Soane: “Ko te tahi ʼi te kau sōlia, neʼe ina hokaʼi [te] vakavaka [ʼo Sesu] ʼaki te tao, pea ʼi te moʼi temi pē ʼaia, neʼe tafe mai ai te taʼataʼa mo te vai. Pea neʼe fakamoʼoni ia ia ʼaē neʼe sio [ki te meʼa ʼaia], pea ʼe moʼoni tana fakamoʼoni. . . . Neʼe hoko te ʼu meʼa ʼaia koteʼuhi ke hoko te folafola ʼaenī ʼo te Tohi: ‘ ʼE mole hona hui e tahi ʼe fasiʼi anai.’ Pea ko te tahi folafola ʼo te Tohi ʼe ina ʼui fēnei: ‘ ʼE natou sisio ake anai kiā Ia ʼaē neʼe natou hokaʼi.’ ”—Soa. 19:33-37.
18. He koʼē neʼe tuku te falemaka ʼo Sesu mo te hahaʼi maʼu koloa?
18 ʼE tuʼu anai te falemaka ʼo te Mēsia ʼi te ʼu falemaka ʼa te hahaʼi maʼu koloa. (Lau ia Isaia 53:5, 8, 9.) ʼI te afiafi ʼo te ʼaho 14 ʼo Nisani, ko “te tagata maʼu koloa mai Alimatea, ʼe higoa ko Sosefo” neʼe haʼu ʼo kole kiā Pilato te sino ʼo Sesu, pea neʼe tali tana kole. ʼE toe hoko atu fēnei te fakamatala ʼa Mateo: “Neʼe toʼo ai e Sosefo te sino, ʼo ina fakakoloa ʼaki te kie lino mānifi maʼa, pea neʼe ina tuku ia ki tona falemaka fakamanatu foʼou, ʼaia neʼe ina keli ʼi te fuga maka. Pea ʼi tana ʼosi fuli ʼo te foʼi maka fua lahi ki te muʼa matapā ʼo te falemaka fakamanatu, pea ʼalu leva ia.”—Mat. 27:57-60.
Tou Vikiʼi Te Hau Mesianike!
19. Koteā ʼaē neʼe hoko ʼo ʼuhiga mo te ʼu folafola fakapolofetā iā Pesalemo 16:10?
19 ʼE fakatuʼuake anai te Mēsia. Neʼe tohi fēnei e Tavite: “ ʼE mole ke [ia Sehova] liʼakina anai toku nefesi ʼi te Seole.” (Pes. 16:10) ʼI te ʼaho 16 ʼo Nisani, neʼe ʼomai te ʼu hahaʼi fafine ki te falemaka ʼaē neʼe tuku ai te sino ʼo Sesu. Kotou fakakaukauʼi age muʼa tanatou punamaʼuli ʼi tanatou sisio ʼaē ki te ʼāselo ʼe heka ʼi te loto falemaka. Neʼe ʼui fēnei age e te ʼāselo kiā nātou: “ ʼAua naʼa kotou mātataku. ʼE kotou kumi ia Sesu te Nasalea, ʼaē neʼe haʼi ki te pou. Kua fakatuʼuake ia, pea ʼe mole ʼi henī ia. Kotou sisio ki te potu ʼaē neʼe tuku ia ia kiai.” (Mko. 16:6) Iā muʼa ʼo te hahaʼi tokolahi ʼaē neʼe ʼi Selusalemi ʼi te Penikositē ʼo te taʼu 33 ʼo totatou temi, neʼe tala fēnei e te ʼapositolo ko Petelo: “Neʼe . . . sio fakatomuʼa [ia Tavite ki] te fakatuʼuake ʼa Kilisito pea mo talanoa kiai, ʼo ina ʼui neʼe mole liʼakina ia ia ʼi te Hatesi pea neʼe mole popo ia tona sino.” (Gāue 2:29-31) Neʼe mole tuku e te ʼAtua ke popo te sino ʼo tona ʼAlo ʼofaina. Tahi ʼaē meʼa, neʼe fakatuʼuake fakamilakulo ia Sesu ki te maʼuli fakalaumālie!—1 Pet. 3:18.
20. Neʼe hoko feafeaʼi ia te fakakikite ʼo ʼuhiga mo te pule ʼa te Mēsia?
20 Ohagē ko tona fakakikite, neʼe tala e te ʼAtua ko Sesu ʼe ko tona ʼAlo. (Lau ia Pesalemo 2:7; Mateo 3:17.) Neʼe toe vikiʼi foki e te hahaʼi tokolahi ia Sesu pea mo tona Puleʼaga. Iā ʼaho nei, ʼe tou toe palalau ʼaki he loto fiafia ʼo ʼuhiga mo Sesu pea mo tona pule. (Mko. 11:7-10) Kua ovi mai pē te temi ʼaē kā fakaʼauha ai anai e Sesu tona ʼu fili, heʼe “lele [ia] ʼi te hōsi ʼi te tau ki te moʼoni, mo te agavaivai, pea mo te faitotonu.” (Pes. 2:8, 9; 45:1-6) ʼE fakatuʼu ai anai e tana pule ia te tokalelei pea mo te temi mahu ʼi te kele kātoa. (Pes. 72:1, 3, 12, 16; Isa. 9:6, 7) Ko te ʼAlo ʼofaina ʼo Sehova, ia Sesu Kilisito, kua ʼafio ia ʼi selō ʼi tona ʼuhiga Hau. ʼE ko he toe pilivilēsio lahi hatatou kau ki te kau Fakamoʼoni ʼa Sehova pea mo tala ki te hahaʼi te ʼu moʼoni ʼaenī!
ʼE Kotou Tali Feafeaʼi Anai?
• Neʼe lavakiʼi pea mo liʼakina feafeaʼi ia Sesu?
• Neʼe koteā ʼihi faʼahi neʼe fakakikite ʼo ʼuhiga mo te tutuki ʼo Sesu Kilisito ki te pou?
• He koʼē ʼe kotou tui papau ko Sesu ʼe ko te Mēsia ʼaē neʼe fakapapauʼi mai?
[ʼU fehuʼi ʼo te ako]
[Paki ʼo te pāsina 15]
Ko te hū fakakolōlia ʼaē ʼa Sesu ki Selusalemi, neʼe ina fakahoko te ʼu lea fakapolofetā fea?
[Paki ʼo te pāsina 17]
Neʼe mate ia Sesu maʼa tatatou ʼu agahala, kae ʼi te temi nei ʼe ʼafio ʼi tona ʼuhiga Hau Mesianike
