ʼE ʼIloʼi Koa Koutou e Sehova?

“ ʼE ʼiloʼi e Sehova ia nātou ʼaē ʼaʼana.”—2 TIM. 2:19.

1, 2. (a) Koteā ʼaē neʼe tokaga tāfito kiai ia Sesu? (b) Koteā te ʼu fehuʼi ʼaē kā tou vakaʼi anai?

 ʼI TE tahi ʼaho, neʼe fakaovi te Faliseo kiā Sesu pea mo ina fehuʼi age fēnei kiā te ia: “Ko te folafola fea ʼaē ʼe lahi tokotahi ʼo te Lao?” Neʼe tali fēnei age e Sesu: “ ʼE tonu ke ke ʼofa kiā Sehova, tou ʼAtua, ʼaki tou loto kātoa, pea mo tou nefesi kātoa, pea mo tou ʼatamai kātoa.” (Mat. 22:35-37) Neʼe ʼofa lahi ia Sesu ki tana Tamai ʼaē ʼi selō pea neʼe hā moʼoni ia tana ʼu palalau ʼaia ʼi tona maʼuli. Neʼe toe tokaga tāfito foki ia Sesu ki tona ʼuhiga iā muʼa ʼo Sehova, pea neʼe ina fakahā te faʼahi ʼaia ʼaki tana nofo agatonu ʼi tona maʼuli kātoa. Koia, ʼi muʼa ʼo tona mate, neʼe feala ai ke ina ʼui ko te ʼAtua neʼe ina ʼiloʼi ia ia ohagē ko he tahi neʼe fakalogo agatonu ki Tana ʼu fakatotonu. Neʼe nofo aipē Sesu ʼi te ʼofa ʼo Sehova.—Soa. 15:10.

² Iā ʼaho nei, tokolahi ʼe natou lau ʼe natou ʼoʼofa ki te ʼAtua. ʼE mahino ia ʼe tou kau iā nātou ʼaia. Kae, ʼe ʼi ai te ʼu fehuʼi maʼuhiga ʼe tonu ke tou vakaʼi: ‘ ʼE ʼiloʼi koa au e te ʼAtua? Koteā te manatu ʼa Sehova ʼo ʼuhiga mo au? ʼE manatu koa ia Sehova ko au ko he tahi ʼaʼana?’ (2 Tim. 2:19) ʼE ko he pilivilēsio hatatou manatu ʼe feala tatatou maʼu te ʼu taʼi felōgoi lelei fēia mo te Tuʼi ʼo te ʼatulaulau!

 3. He koʼē ʼe faigataʼa ki ʼihi hanatou tui ʼe feala ke natou liliu ko he hahaʼi ʼa Sehova? Koteā ʼaē ʼe feala ke tokoni kiā nātou ke natou fetogi tanatou faʼahiga manatu?

³ Kae, iā nātou ʼaē ʼe ʼoʼofa lahi kiā Sehova ʼe faigataʼa ki ʼihi tanatou tui ʼaē ʼe feala ki te ʼAtua ke ina leleiʼia nātou. Ko ʼihi ʼe natou manatu ʼe mole honatou ʼaoga, koia ʼe faigataʼa kiā nātou hanatou manatu ʼe feala ke natou liliu ko he hahaʼi ʼa Sehova. Kae ʼe tou fiafia ʼaupitō heʼe ko te faʼahiga sio ʼa te ʼAtua ʼo ʼuhiga mo tātou ʼe kehe ia! (1 Sam. 16:7) Neʼe ʼui fēnei e te ʼapositolo ko Paulo ki tona ʼu tehina mo tuagaʼane Kilisitiano: “Kapau ʼe ʼofa he tahi ki te ʼAtua, ʼe ʼiloʼi ia ia ʼaia [e te ʼAtua].” (1 Ko. 8:3) Ko tokotou ʼofa ʼe ko he fakamaʼua maʼuhiga ia ke ʼiloʼi ai koutou e te ʼAtua. Kotou fakakaukauʼi age muʼa te ʼu fehuʼi ʼaenī: He koʼē ʼe kotou lolotoga lau ia te nusipepa ʼaenī? He koʼē ʼe kotou faiga ke kotou tauhi kiā Sehova ʼaki tokotou loto, mo tokotou nefesi, mo tokotou ʼatamai pea mo tokotou mālohi kātoa? Kapau kua kotou foaki tokotou maʼuli ki te ʼAtua pea mo kotou papitema, koteā ʼaē neʼe tupu ai takotou fai te ʼu faʼahi ʼaia? ʼE fakamahino mai ʼi te Tohi-Tapu ko Sehova, ʼaē ʼe ina sivisivi te loto, ʼe ina taki mai kiā te ia te ʼu hahaʼi ʼaē ʼe manakoʼia. (Lau ia Asea 2:7; Soane 6:44.) Koia ʼe feala ke kotou mahino ʼe kotou tauhi kiā Sehova he neʼe ina taki mai koutou kiā te ia. ʼE mole ina siʼaki anai ʼi he temi ia nātou ʼaē neʼe ina taki mai kiā te ia, mo kapau ʼe natou nonofo agatonu. ʼE natou maʼuhiga ʼaupitō kiā mata ʼo te ʼAtua, pea ʼe ʼofa ʼaupitō ia kiā nātou ʼaia.—Pes. 94:14.

 4. He koʼē ʼe tonu ke tou haga fakakaukauʼi tatatou ʼu felōgoi ʼaē mo te ʼAtua?

⁴ ʼI te kua taki mai e Sehova ia tātou kiā te ia, ʼe tonu ke tou tōkakaga ke tou nonofo ʼi tona ʼofa. (Lau ia Suta 21.) Kotou manatuʼi ʼe fakahā mai ʼi te Tohi-Tapu ʼe feala ke tou tafea ʼo mamaʼo peʼe ke tou mavae mai te ʼAtua. (Hep. 2:1; 3:12, 13) Ohagē lā, ʼi muʼa ʼo tana fai ia te ʼu palalau ʼaē ʼe tou maʼu iā 2 Timoteo 2:19, neʼe talanoa ia te ʼapositolo ko Paulo ʼo ʼuhiga mo Imeneo pea mo Fileto. ʼE mahino ia, ko te ʼu tagata ʼaia e lua ʼi te tahi temi neʼe ko he ʼu hahaʼi ʼa Sehova, kae ki muli age neʼe nā hehē mai te moʼoni. (2 Tim. 2:16-18) Kotou toe manatuʼi foki, ko ʼihi ʼi te ʼu kōkelekāsio ʼi Kalate ʼaē neʼe kua ʼiloʼi nātou e te ʼAtua, neʼe mole natou taupau tanatou mālama fakalaumālie ʼaia ʼaē neʼe natou mahino kiai ʼi muʼa atu. (Kal. 4:9) ʼE tonu ke tou manatuʼi tuʼumaʼu  ʼe maʼuhiga ʼaupitō ia tatatou ʼu felōgoi ʼaē mo te ʼAtua.

 5. (a) Koteā ʼihi kalitātē ʼe maʼuhiga ki te ʼAtua? (b) Koteā te ʼu faʼifaʼitaki ʼaē kā tou vakaʼi anai?

⁵ ʼE ʼi ai ʼihi kalitātē ʼe maʼuhiga ʼaupitō kiā Sehova. (Pes. 15:1-5; 1 Pet. 3:4) Neʼe ʼiloga kehe nātou ʼaē neʼe ʼiloʼi e te ʼAtua, he neʼe natou maʼu te tui pea mo te agavaivai. Tou vakaʼi age muʼa te ʼu faʼifaʼitaki ʼo te ʼu tagata e toko lua, ke tou mahino ai pe neʼe ʼofainaʼi feafeaʼi nāua e Sehova he neʼe nā maʼu te ʼu kalitātē ʼaia. ʼE tou toe vakaʼi anai te faʼifaʼitaki ʼo te tagata neʼe manatu ia neʼe ʼiloʼi ia ia e te ʼAtua, kae ʼi tana fialahi neʼe liʼakina leva ia e Sehova. ʼE tou lava maʼu he ʼu ako maʼuhiga mai te ʼu faʼifaʼitaki ʼaia.

Ko Te Tamai ʼo Nātou ʼAē ʼe Natou Tui

 6. (a) Mai tona ʼaluʼaga ʼaē neʼe tui ia Apalahamo ki te ʼu fakapapau ʼa Sehova, koteā ʼaē neʼe ina fai? (b) Neʼe feafeaʼi te ʼiloʼi e Sehova ia Apalahamo?

⁶ Ko Apalahamo neʼe ko te tagata “neʼe tui kiā Sehova.” ʼI tona fakahagatonu, ʼe fakahigoaʼi ia “ko te tamai ʼo nātou fuli ʼaē ʼe natou tui.” (Sen. 15:6; Loma 4:11) ʼAki te tui, neʼe mavae ia Apalahamo ʼi tona ʼapi, mo tona ʼu kaumeʼa, pea neʼe ina tuku tona ʼu koloa pea ʼalu ia ki he fenua mamaʼo. (Sen. 12:1-4; Hep. 11:8-10) Neʼe kei mālohi pē te tui ʼaē ʼa Apalahamo māʼia ʼi ni ʼu taʼu ki muli age. Neʼe hā lelei te faʼahi ʼaia ʼi te temi ʼaē ‘neʼe ina loto lelei ai ke ina momoli ia Isaake,’ tona foha, moʼo fakalogo ki te fakatotonu ʼa Sehova. (Hep. 11:17-19) Neʼe fakahā e Apalahamo ia tana tui ʼaē ki te ʼu fakapapau ʼa Sehova, koia ʼaē neʼe makehe ia kiā mata ʼo te ʼAtua. Ko Sehova neʼe ina ʼiloʼi moʼoni ia Apalahamo. (Lau ia Senesi 18:19.) Neʼe mole gata pē te ʼiloʼi e Sehova ia te maʼuli ʼo Apalahamo, kae neʼe ʼofa mamahi kiā Apalahamo ohagē ko hona kaumeʼa.—Sake 2:22, 23.

 7. Koteā ʼaē ʼe lelei ke tou tokagaʼi ʼo ʼuhiga mo te fakahoko ʼo te ʼu fakapapau ʼa Sehova, pea neʼe malave feafeaʼi te faʼahi ʼaia kiā Apalahamo?

⁷ ʼE lelei ke tou tokagaʼi, neʼe mole maʼu e Apalahamo te tofiʼa ʼo te kele ʼaē neʼe fakapapauʼi age ʼi te temi ʼaē neʼe kei maʼuli ai. Neʼe mole ina toe sio foki ia ki te liliu ʼaē ʼo tona hākoga ohagē “ko te ʼu fisiʼi ʼone ʼo te matātai.” (Sen. 22:17, 18) Logolā neʼe mole hoko te ʼu fakapapau ʼaia ʼi te temi ʼaē neʼe kei maʼuli ai ia Apalahamo, kae neʼe mālohi aipē ia tana tui kiā Sehova. Neʼe ina ʼiloʼi ko te ʼu fakapapau ʼa te ʼAtua ʼe hoko tuʼumaʼu pē ia, pea neʼe ina fakahā ia tana tui ʼaia ʼi tona maʼuli kātoa. (Lau ia Hepeleo 11:13.) ʼE ʼiloʼi koa tātou e Sehova ko he ʼu hahaʼi ʼe hagē tanatou tui ko Apalahamo?

Ko Te Fakatalitali ʼAē Kiā Sehova ʼe Ko He Fakaʼiloga Ia ʼo Te Tui

 8. Koteā te ʼu fakaʼamu lelei ʼe loto e ʼihi ke hoko?

⁸ ʼE lagi tou fakaʼamu ki he ʼu meʼa ʼe tou loto ke hoko. Ko te ʼu fakaʼamu ʼaē ke kita ʼohoana, mo maʼu fānau, pea mo hao mai te mahaki, ʼe ko he ʼu fakaʼamu māhani ia pea mo lelei. Kae maʼa te tokolahi, ʼe lagi ʼi ai anai he fakaʼamu e tahi peʼe laka atu ʼi te ʼu fakaʼamu ʼaia ʼe mole hoko  anai. Kapau ʼe tou felāveʼi mo te ʼaluʼaga ʼaia, pea ko te meʼa ʼaē kā tou fai ʼe fakahā ai peʼe mālohi tatatou tui.

9, 10. (a) Koteā ʼaē neʼe fai e ʼihi ke natou maʼu te ʼu meʼa ʼaē ʼe natou loto kiai? (b) Koteā takotou manatu ʼo ʼuhiga mo te fakahoko ʼo te ʼu fakapapau ʼa te ʼAtua?

⁹ ʼE ko he agavale hatatou fakafeagai ki te takitaki ʼa te ʼAtua ke tou maʼu te ʼu meʼa ʼaē ʼe tou loto kiai. ʼE feala ke fakatupu kovi ki tatatou ʼu felōgoi ʼaē mo Sehova. Ohagē lā ko ʼihi neʼe natou filifili he ʼu faitoʼo ʼe fakafeagai ki te ʼu tokoni ʼa Sehova. Ko ʼihi neʼe natou tali he gāue ʼe tupu ai tanatou nonofo mamaʼo mai tonatou ʼu fāmili, peʼe mole kei natou kau ki te ʼu fono ʼo te kōkelekāsio. Pea ko ʼihi ʼe natou manako ki he tahi ʼe mole tauhi kiā Sehova. Kapau ʼe mulimuli he Kilisitiano ki te taʼi maʼuli ʼaia, pea ʼe ina kumi moʼoni koa ke ʼiloʼi ia ia e Sehova? Neʼe feala ke malave feafeaʼi kiā Sehova mo kanapaulā neʼe loto e Apalahamo ke foimo hoko te ʼu fakapapau ʼa te ʼAtua? Pea ʼe feafeaʼi age lā mo kanapaulā neʼe fai e Apalahamo te ʼu meʼa ʼo mulimuli pē ki te ʼu meʼa ʼaē neʼe loto kiai, pea mo ina maʼu hona ʼapi ʼe lahi pea mo ina fakalogona tona higoa kae mole fakatalitali ia kiā Sehova? (Vakaʼi ia Senesi 11:4.) Neʼe feala anai koa ke hoko atu ia tana ʼu felōgoi lelei ʼaē mo Sehova?

¹⁰ Koteā te ʼu fakaʼamu ʼaē ʼe kotou loto ke hoko? Kiā koutou ʼe mālohi koa takotou tui ke kotou fakatalitali kiā Sehova, ʼaē ʼe ina fakapapau mai ke ina foaki atu te ʼu meʼa fuli ʼaē ʼe kotou loto kiai? (Pes. 145:16) Ohagē pē ko Apalahamo, ʼe mole lagi foimo hoko ʼihi fakapapau ʼa te ʼAtua ohagē ko tatatou loto ʼaē kiai. Kae ʼe maʼuhiga kiā Sehova ke tou fakamālohi ia tatatou tui ohagē ko te tui ʼa Apalahamo, pea mo tou gāue ʼo mulimuli kiai. ʼI tatatou fai te faʼahi ʼaia, ʼe mahino papau ia ʼe fua lelei pē anai kiā tātou.—Hep. 11:6.

Te Kehekehe ʼo Te Agavaivai Mo Te Fialahi

11. Koteā te ʼu pilivilēsio ʼaē neʼe lagi maʼu e Kole, pea koteā ʼaē neʼe hā ʼaki ai ʼo ʼuhiga mo tana aga ki te ʼAtua?

¹¹ Neʼe kehekehe ia Moisese pea mo Kole ʼi tanā fakahā ia tanā fakaʼapaʼapa ki te ʼu fakatuʼutuʼu pea mo te ʼu tonu ʼa Sehova. Ko tanā aga neʼe malave ki te faʼahiga manatu ʼaē ʼa Sehova kiā nāua. Ko Kole neʼe ko he Levite Koatite, pea neʼe lahi te ʼu pilivilēsio ʼaē neʼe ina maʼu, ʼaē neʼe lagi kau kiai tana sio ki te fakaʼāteaina ʼo te puleʼaga ʼi te Tai Kula, mo tana lagolago ki te fakamāuʼi ʼaē e Sehova te kau Iselaele talagataʼa ʼi te Moʼuga ʼo Sinai, pea mo tana kau ki te ʼamo ʼaē ʼo te ʼaleka ʼo te fuakava. (Eke. 32:26-29; Fkau. 3:30, 31) ʼE hā mai neʼe nofo agatonu ia kiā Sehova lolotoga ni ʼu taʼu pea neʼe fakaʼapaʼapaʼi ai e te tokolahi ʼi te nofoʼaga ʼo Iselaele.

12. Ohagē ko tona fakahā ʼi te pāki ʼo te pāsina 31, neʼe malave feafeaʼi te fialahi ʼaē ʼa Kole ki tana ʼu felōgoi ʼaē mo te ʼAtua?

¹² Kae ʼi te lolotoga fagona ʼaē ʼo te puleʼaga ʼo Iselaele ki te Kele ʼo Te Fakapapau, neʼe hagē ia kiā Kole neʼe mole lelei te faʼahiga takitaki ʼaē e Sehova ia te puleʼaga. Pea ko te ʼu tagata pule e toko 250 neʼe natou kau leva mo Kole ʼo natou faigaʼi ke natou fai he ʼu fetogi. Ko Kole pea mo ʼihi neʼe lagi natou manatu neʼe lelei tanatou ʼu felōgoi ʼaē mo Sehova. Neʼe natou ʼui fēnei kiā Moisese pea mo Alone: “Kua matou fiu iā koulua, heʼe ko te hahaʼi kātoa, ʼe natou māʼoniʼoni fuli, pea ko Sehova ʼe nofo ʼi tonatou lotolotoiga.” (Fkau. 16:1-3) ʼI lahi leva ʼo tanatou falala fau ʼaē kiā nātou totonu pea mo tanatou fialahi! Neʼe ʼui fēnei age e Moisese kiā nātou: “ ʼE fakahā anai e Sehova pe ko ai ʼaē ʼaʼana.” (Lau ia Faka au 16:5.) Pea ʼi te fakaʼosi ʼo te ʼaho ake, ko Kole pea mo nātou fuli ʼaē neʼe kau mo ia ʼi tana agatuʼu, neʼe natou mamate.—Fkau. 16:31-35.

13, 14. Neʼe fakahā feafeaʼi e Moisese ia tana agavaivai?

¹³ Kae ko Moisese “neʼe lahi tokotahi tana agavaivai ʼi te ʼu tagata fuli ʼaē neʼe māʼuʼuli ʼi te fuga kele.” (Fkau. 12:3) Neʼe ina fakahā ia tana agamalū pea mo tana agavaivai ʼaki tana lotomālohi ʼaē ke ina muliʼi te takitaki ʼa Sehova. (Eke. 7:6; 40:16) ʼE mole he vaega ʼi te Tohi-Tapu ʼe fakahā mai neʼe fakafihiʼi tuʼumaʼu pē e Moisese te faʼahiga fai ʼaē e Sehova ia te ʼu gāue, peʼe ʼita ʼi tana maʼua ʼaē ke mulimuli ki te ʼu fakatotonu ʼaē neʼe foaki age e Sehova. Ohagē lā, neʼe foaki age e Sehova he ʼu fakatotonu ʼo ʼuhiga mo te faʼu ʼo te tapenakulo, māʼia mo te ʼu kiʼi faʼahi liliki ohagē lā ko te lanu ʼo te filo mo te lahi ʼo te ʼu fakamaʼu ʼaē neʼe tonu ke fakaʼaogaʼi moʼo faʼu te ʼu lā ʼaē neʼe ʼaofi ʼaki te tapenakulo. (Eke. 26: 1-6) Kapau lā ko he tagata taupau ʼi te kautahi ʼa te ʼAtua ʼe ina foaki atu he ʼu fakatotonu ʼe hagē ia ʼe fakaʼuhiga ki he ʼu kiʼi faʼahi ʼe liliki, pea ʼi ʼihi temi ʼe lagi kotou lotovaivai ai. Kae ko Sehova ʼe ko he taupau ʼe haohaoa ia, ʼe ina foaki lahi ki tana ʼu kaugana he ʼu gāue pea mo falala kiā nātou. Mokā ina foaki mai he ʼu fakatotonu ʼo ʼuhiga mo he ʼu faʼahi ʼe liliki, ʼe ina fai ia heʼe ʼi ai tona ʼaoga kiā tātou. Kae kotou tokagaʼi neʼe mole ʼita ia Moisese kiā Sehova ʼi tana foaki age he ʼu tuʼuga fakatotonu ʼo ʼuhiga mo he ʼu faʼahi ʼe liliki. Neʼe mole manatu ia neʼe mole tuku age e Sehova ke faʼifaʼitaliha ʼi tana fakahoko tana ʼu gāue. Kailoa ia, kae ko Moisese neʼe ina fakalotomālohiʼi te kau gāue ke natou “fai ʼo mulimuli pē” ki te ʼu fakatotonu ʼa te ʼAtua. (Eke. 39:32) ʼI tagata agavaivai leva! Neʼe ʼiloʼi e Moisese neʼe ko te gāue ʼaia ʼa Sehova pea neʼe fakaʼaogaʼi pē ia ia e Sehova moʼo fai te gāue ʼaia.

¹⁴ Neʼe toe hā lelei te agavaivai ʼa Moisese ʼi te temi ʼaē neʼe tau ai mo te ʼu ʼaluʼaga faigataʼa pea neʼe fua kovi kiā ia. ʼI te tahi lakaga, ʼi te temi ʼaē neʼe tau ai mo te meo ʼa te hahaʼi, neʼe mole loto lolomi ai ia Moisese pea neʼe mole ina fakahā te māʼoniʼoni ʼo te ʼAtua. Ko te tupuʼaga lā ʼaē ʼo te ʼui age e Sehova kiā Moisese ʼe mole ina fakahū anai te hahaʼi ki te Kele ʼo Te Fakapapau. (Fkau. 20:2-12) Ko ia pea mo tona tehina, ia Alone, neʼe nā kātakiʼi te lāuga ʼa te kau Iselaele lolotoga ni ʼu taʼu. Koia mai tona ʼaluʼaga ʼaē neʼe faihala ia Moisese ʼi te lakaga ʼaia, neʼe mole ina maʼu te faʼahi ʼaē neʼe fakaʼamu kiai talu mai fualoa! Neʼe feafeaʼi ia Moisese ʼi te lakaga ʼaia? ʼE mahino ia neʼe lotomamahi, kae neʼe tali e Moisese ʼaki he agavaivai te tonu ʼa Sehova. Neʼe ina ʼiloʼi ko Sehova ʼe ko he ʼAtua ia ʼe faitotonu, pea ʼe mole iā te ia te heʼe faitotonu. (Teu. 3:25-27; 32:4) Mokā kotou fakakaukauʼi te faʼifaʼitaki ʼo Moisese, ʼe mole kotou manatu ai koa neʼe ko he tahi neʼe ʼiloʼi e Sehova?—Lau ia Ekesote 33:12, 13.

Ko Te Fakalogo ʼAē Kiā Sehova ʼe Fakamaʼua Kiai Te Agavaivai

15. Koteā te ako ʼe tou lava maʼu mai te fialahi ʼaē ʼa Kole?

¹⁵ Ko tatatou faʼahiga aga ʼo ʼuhiga mo te ʼu fetogi ʼaē ʼe fai ʼi te ʼu kōkelekāsio Fakakilisitiano fakamālamanei pea mo te ʼu tonu ʼaē ʼe fai e nātou ʼaē ʼe natou takitaki, ʼe malave ki te ʼiloʼi ʼaē ʼo tātou e Sehova. Ko Kole pea mo nātou ʼaē neʼe kau mo ia, neʼe natou fakamamaʼo mai te ʼAtua he neʼe natou falala fau kiā nātou totonu, mo fialahi pea neʼe mole kei natou tui. Ko Kole neʼe manatu ia ko Moisese neʼe kua matuʼa pea neʼe  ina fai pē ia tana ʼu tonu ʼoʼona totonu, kae neʼe galo kiā Kole neʼe ko Sehova moʼoni ʼaē neʼe ina takitaki te puleʼaga. Neʼe mole kei ina manatuʼi te faʼahi ʼaia pea neʼe tupu ai tana mole fakahā ia tana agatonu kiā nātou ʼaē neʼe fakaʼaogaʼi e te ʼAtua. Neʼe ko he aga fakapotopoto ia mo kanapau lā neʼe fakatalitali ia Kole kiā Sehova, ke ina foaki age he fakamahino lelei peʼe ke ina fai he ʼu fetogi mokā neʼe ʼaoga moʼoni. Mai tona ʼaluʼaga ʼaē neʼe mole ina fai te faʼahi ʼaia, iā ʼaho nei ʼe mole tou manatuʼi te ʼu taʼu ʼaē neʼe tauhi agatonu ai ia Kole kiā Sehova. ʼE tou manatuʼi tuʼumaʼu pē ia ia neʼe ko he tahi neʼe talagataʼa kiā Sehova he neʼe fialahi.

16. ʼE lava tokoni feafeaʼi mai kiā tātou te faʼifaʼitaki ʼo te agavaivai ʼa Moisese?

¹⁶ ʼE foaki mai e te fakamatala ʼaia he fakatokaga maʼuhiga ki te kau tagata ʼāfea pea mo ʼihi ʼo te kōkelekāsio iā ʼaho nei. ʼE maʼua ke tou agavaivai moʼo fakatalitali kiā Sehova, pea mo tou mulimuli ki te ʼu fakatotonu mai iā nātou ʼaē neʼe hinoʼi ke natou takitaki tana hahaʼi. ʼE tou fakahā koa ko tātou ko he ʼu hahaʼi ʼe agavaivai pea mo agamalū ohagē ko Moisese? ʼE tou lava tali koa te tuʼulaga ʼo nātou ʼaē ʼe natou takitaki ʼi te lotolotoiga ʼo tātou pea mo tou fakalogo ki te ʼu fakatotonu ʼaē ʼe natou foaki mai? Mokā ʼe mole tou leleiʼia te ʼu faʼahi ʼaia, ʼe feala koa ke tou tuku keheʼi tatatou ʼu manatu? Kapau ʼe tou fai fēia, ʼe toe ʼiloʼi lelei pē foki anai mo tātou e Sehova. ʼE tupu anai te ʼofainaʼi ʼaē ʼo tātou e Sehova mokā tou agavaivai pea mo fakalogo.

ʼE ʼIloʼi e Sehova Ia Nātou ʼAē ʼAʼana

17, 18. Koteā ʼaē ʼe lava tokoni mai kiā tātou ke tou haga maʼu te ʼofa ʼo Sehova?

¹⁷ ʼE fua lelei anai kiā tātou ia tatatou fakakaukauʼi te ʼu faʼifaʼitaki ʼo nātou ʼaē neʼe taki mai e Sehova kiā te ia pea mo ʼofa ai. Ko Apalahamo pea mo Moisese neʼe nā heʼe haohaoa pea neʼe ʼi ai tonā ʼu vaivaiʼaga ohagē pē ko tātou. Kae neʼe ʼiloʼi nāua e Sehova ko he ʼu hahaʼi ʼaʼana. Kae ʼe fakahā mai e te faʼifaʼitaki ʼo Kole, ʼe feala pē hatatou fakamamaʼo mai iā Sehova, ʼo tupu ai tana mole kei ʼiloʼi tātou pea mo tatatou mole kei maʼu tona ʼofa. ʼE lelei ke tou fai kiā tātou takitokotahi te ʼu fehuʼi ʼaenī: ‘Koteā te manatu ʼa Sehova ʼo ʼuhiga mo au? Koteā ʼaē ʼe au lava ako mai te ʼu faʼifaʼitaki Fakatohi-tapu ʼaia?’

¹⁸ ʼE feala ke kotou maʼu he lotofīmālie lahi ʼi takotou ʼiloʼi ʼaē kiā mata ʼo Sehova ko te kau agatonu ʼe ko te hahaʼi ʼaʼana, ia nātou ʼaē neʼe ina taki mai kiā te ia. Kotou haga fakamālohi takotou tui, mo fakatuputupu takotou agavaivai, pea mo ʼihi atu ʼu kalitātē ke tupu ai hokotou ʼofainaʼi e totatou ʼAtua. ʼE mahino ia ko te ʼiloʼi ʼaē ʼo tātou e Sehova, ʼe ko he pilivilēsio maʼuhiga ia ʼe tou maʼu ai te fiafia ʼi totatou maʼuli ʼi te temi nei, pea mo tou maʼu he ʼu tapuakina taulekaleka ki te kā haʼu.—Pes. 37:18.

ʼE Kei Kotou Manatuʼi Koa?

• Koteā te fakaʼuhiga ʼo te ʼiloʼi ʼaē ʼo tātou e Sehova?

• ʼE kotou lava faʼifaʼitakiʼi feafeaʼi te tui ʼaē ʼa Apalahamo?

• Koteā te ʼu ako ʼe tou lava maʼu mai te faʼifaʼitaki ʼo Kole pea mo ʼaē ʼo Moisese?

[ʼU fehuʼi ʼo te ako]

[Paki ʼo te pāsina 29]

Ohagē ko Apalahamo, ʼe tou tui koa ko Sehova ʼe ina fakahoko kātoa anai ia tana ʼu fakapapau?

[Paki ʼo te pāsina 31]

Ko Kole neʼe mole ina loto lelei ke fakalogo ʼaki he agavaivai ki te ʼu fakatotonu

[Paki ʼo te pāsina 32]

ʼE ʼiloʼi koa koutou e Sehova ko he tahi ʼe fakalogo ʼaki he agavaivai ki te ʼu fakatotonu?