Kotou Falala Kiā Sehova, “Te ʼAtua ʼo Te Fakalotofīmālie Fuli”
Kotou Falala Kiā Sehova, “Te ʼAtua ʼo Te Fakalotofīmālie Fuli”
“Ke tapuakina te ʼAtua pea mo Tamai ʼo totatou ʼAliki ko Sesu Kilisito, ko te Tamai ʼo te manavaʼofa pea ko te ʼAtua ʼo te fakalotofīmālie fuli.”—2 KO. 1:3.
1. Koteā ʼaē ʼe ʼaoga kiā tātou fuli?
TALU mai tatatou tutupu ake, ʼe ʼaoga kiā tātou fuli he fakalotofīmālie. Ko he kiʼi toe kei meamea, ʼe tagi mokā ina loto ke fua peʼe ke kai. Māʼiapē lā kā tou lalahi ake, ʼe tou loto ke ʼofainaʼi tātou pea mo fakafīmālieʼi tātou, tāfito lā mokā tou tau mo he ʼu ʼaluʼaga faigataʼa.
2. Koteā te fakapapau ʼaē ʼe fai e Sehova ʼe fakalotofīmālieʼi anai nātou ʼaē ʼe falala kiā te ia?
2 Ko totatou fāmili pea mo totatou ʼu kaumeʼa ʼi te agamāhani ʼe natou fia fakalotofīmālieʼi tātou. Kae ʼi ʼihi temi, ʼe mole feala ia ki te tagata ke ina pulihi ia te ʼu tupuʼaga ʼo totatou mamahi. ʼE gata pē ki te ʼAtua ʼe feala ke ina foaki mai he fakafīmālie, tatau aipē te ʼaluʼaga fakalotomamahi ʼaē ʼe tou tau mo ia. ʼE ina fakapapau fēnei mai ʼi tana Folafola: “ ʼE ovi ia Sehova kiā nātou fuli ʼaē ʼe fetapa kiā te ia . . . pea ʼe logo anai ki tanatou pāui ʼaē ke tokoni age.” (Pes. 145:18, 19) ʼEī, “ ʼe sio te ʼu mata ʼo Sehova ki te kau agatonu, pea ʼe logo ʼona taliga ki tanatou ʼu tagi ʼaē ke tokoni mai.” (Pes. 34:15) Kae kapau ʼe tou loto ke tokoni mai te ʼAtua pea mo ina fakafīmālieʼi tātou, ʼe tonu ke tou falala kiā te ia. Neʼe fakahā lelei te faʼahi ʼaia e te tagata fai pesalemo ko Tavite, ʼi tana hiva fēnei: “ ʼE liliu anai Sehova ko he nonoʼaga māʼoluga ki ʼaē ʼe taʼomia, he nonoʼaga māʼoluga ʼi te ʼu temi mamahi. Ko nātou ʼaē ʼe natou ʼiloʼi tou huafa ʼe natou falala anai kiā te koe, heʼe mole ke lītuʼa anai kiā nātou ʼaē ʼe natou kumi koe, Ê Sehova!”—Pes. 9:9, 10.
3. Neʼe fakatā feafeaʼi e Sesu te ʼofa ʼaē ʼo Sehova ki Tana hahaʼi?
3 ʼE maʼuhiga ʼaupitō kiā Sehova tana kau ʼatolasio. Neʼe fakahā lelei e Sesu ia te faʼahi ʼaia ʼi tana ʼui fēnei: “ ʼE mole koa lā fakatau he ʼu misi e nima ki he ʼu foʼi piesi paʼaga e lua ʼe mole faʼa maʼuhiga? Kae ʼe mole he tahi iā nātou ʼaia ʼe galo iā muʼa ʼo te ʼAtua. Kae māʼia mo te ʼu fuluʼi ʼulu ʼo tokotou ʼulu kua ʼosi kātoa ʼi te lau. ʼAua naʼa kotou manavasiʼi; ʼe kotou maʼuhiga lahi ake koutou ʼi he faga misi tokolahi.” (Luka 12:6, 7) ʼAki te polofetā ko Selemia, neʼe ʼui fēnei e Sehova ki te kau Iselaele: “Neʼe au ʼofa kiā te koe ʼaki te ʼofa ʼe mole hona gataʼaga. Ko te tupuʼaga lā ʼaia ʼo taku fakalalataʼi koe ʼaki te lotoʼofa.”—Sel. 31:3.
4. He koʼē ʼe feala ke tou falala ki te ʼu fakapapau ʼa Sehova?
4 Ko tatatou falala kiā Sehova pea mo tana fakahoko ʼo tana ʼu fakapapau, ʼe feala ke fakalotofīmālieʼi tātou ʼi te ʼu temi mamahi. ʼE tou falala ai anai ki te ʼAtua ohagē pē ko te falala ʼaē neʼe maʼu e Sosue, ʼaē neʼe ina tala fēnei: “Neʼe hoko te ʼu folafola lelei fuli ʼaē neʼe tala atu e Sehova, tokotou ʼAtua. Neʼe hoko fuli ia maʼa koutou. Neʼe mole hana folafola e tahi ʼi te ʼu folafola ʼaia neʼe mole hoko.” (Sos. 23:14) Tahi ʼaē meʼa, ʼe feala ke tou tui papau, kapau ʼe tou taʼomia ʼi te temi nei ʼuhi ko he ʼu ʼaluʼaga faigataʼa, “ko te ʼAtua ʼe agatonu” pea ʼe mole ina liʼaki anai ʼi he temi tana ʼu kaugana agatonu.—Lau ia 1 Kolonito 10:13.
5. ʼE lava feafeaʼi hatatou fakalotofīmālieʼi ʼihi atu?
5 ʼE fakahigoaʼi e te ʼapositolo ko Paulo ia Sehova ko “te ʼAtua ʼo te fakalotofīmālie fuli.” Ko tona fakaʼuhiga, ko Sehova ʼe ina fakalotofīmālieʼi ia ia ʼaē ʼe mamahi peʼe ko ʼaē ʼe lotomamahi. (Lau ia 2 Kolonito 1:3, 4.) ʼE mole he tahi peʼe ko he meʼa ʼe feala ke ina tāʼofi te ʼu gāue ʼo tatatou Tamai ʼaē ʼi selō, pea koia ʼe feala ke ina fai ia meʼa fuli pē ʼe ʼaoga moʼo fakalotofīmālieʼi ia nātou ʼaē ʼe ʼoʼofa kiā te ia. Pea ʼe toe feala leva mo tātou ke tou fakalotofīmālieʼi totatou ʼu tehina mo tuagaʼane ʼaē “ ʼe tau mo he ʼu faʼahiga mamahi kehekehe.” ʼE feala ke tou fai ia te faʼahi ʼaia “ ʼaki te fakalotofīmālie ʼaē neʼe fakafīmālieʼi ai tātou e te ʼAtua.” ʼE mole he tahi ʼe lelei age iā Sehova moʼo fakalotofīmālieʼi nātou ʼaē ʼe mamahi!
Te ʼu Tupuʼaga ʼo Te Mamahi
6. Kotou tuku mai he ʼu ʼaluʼaga ʼe feala ke fakatupu mamahi.
6 ʼE lahi te ʼu ʼaluʼaga ʼi totatou maʼuli ʼe ʼaoga ai ke fakalotofīmālieʼi tātou. Ko te tahi ʼo te ʼu tupuʼaga ʼaē ʼe lahi ʼaupitō ai totatou lotomamahi, ʼe ko te mate ʼo he tahi neʼe tou ʼoʼofa ai, tāfito mokā ko totatou ʼohoana peʼe ko hatatou tamasiʼi. ʼE lagi toe ʼaoga ke fakalotofīmālieʼi he tahi ʼe mamahi, he neʼe tau mo he ʼaluʼaga ʼe heʼe faitotonu. Ko te mahamahaki ʼa he tahi, tana kua matuʼa, tona maʼuli masiva, tona ʼu fihifihia fakataumātuʼa, peʼe ko te ʼu ʼaluʼaga fakamamahi ʼo te mālamanei, ʼe feala ke ʼaoga ai kiā ia he fakalotofīmālie.
7. (a) ʼI te ʼu temi mamahi, ko te faʼahiga fakafīmālie fea ʼaē ʼe ʼaoga kiā tātou? (b) Koteā ʼaē ʼe feala ke fai e Sehova moʼo fakamālōlō he loto ʼe “lavea pea mo taʼomia”?
7 ʼI te ʼu temi mamahi, ʼe lagi ʼaoga he fakafīmālie ʼe malave lelei ki totatou loto, totatou ʼatamai, mo te ʼu meʼa ʼaē ʼe tou logoʼi, mo totatou maʼuli fakasino pea mo totatou maʼuli fakalaumālie. Ohagē lā, tou vakaʼi age muʼa ia te loto. ʼE fakamoʼoni ʼi te Folafola ʼa te ʼAtua ko totatou loto ʼe feala ke “lavea pea mo taʼomia.” (Pes. 51:17) ʼE mahino papau ia, ʼe feala kiā Sehova ke ina fakatokatoka ia te ʼaluʼaga ʼaia, heʼe “ina fakamālōlō te hahaʼi ʼaē ʼe mafasia tonatou loto, pea ʼe ina haʼihaʼi tonatou ʼu lavea.” (Pes. 147:3) Māʼiapē lā ʼi te ʼu ʼaluʼaga faigataʼa ʼaupitō, ʼe feala ki te ʼAtua ke ina fakafīmālieʼi totatou loto ʼaē kua vaivai, mo kapau ʼe tou faikole kiā te ia ʼaki he tui kātoa pea mo tou mulimuli ki tana ʼu fakatotonu.—Lau ia 1 Soane 3:19-22; 5:14, 15.
8. ʼE lava tokoni feafeaʼi mai ia Sehova mokā hoha totatou ʼatamai?
8 ʼI ʼihi temi, ʼe ʼaoga ke fakalotofīmālieʼi totatou ʼatamai heʼe feala ke hoha lahi ʼuhi ko te ʼu faigataʼaʼia kehekehe. ʼE mole feala anai ke tou tauʼi te ʼu ʼahiʼahi ʼaia ʼo tatatou tui ʼaki pē totatou mālohi. Kae neʼe hiva fēnei te tagata fai pesalemo: “ ʼI te hoha lahi ʼo toku loto, neʼe fakapelepeleʼi toku nefesi e tau ʼu fakalotofīmālie.” (Pes. 94:19) Tahi ʼaē meʼa, neʼe tohi fēnei e Paulo: “ ʼAua naʼa kotou tuʼania ki he meʼa, kae ʼi te faʼahi fuli, ʼaki te faikole pea mo te ʼu kole mamahi ʼaki te fakafetaʼi, kotou fakahā ki te ʼAtua takotou ʼu kole; pea ko te tokalelei ʼo te ʼAtua, ʼaē ʼe māʼoluga ake ʼi te ʼu manatu fuapē, ʼe ina taupau anai tokotou ʼu loto pea mo tokotou ʼu ʼatamai ʼaki ia Kilisito Sesu.” (Filp. 4:6, 7) Kapau ʼe tou lau pea mo metitāsioʼi te Tohi-Tapu, pea ʼe feala ke tokoni lahi mai ke tou tauʼi te hoha ʼo totatou ʼatamai.—2 Tim. 3:15-17.
9. ʼE lava feafeaʼi hatatou tauʼi he ʼu meʼa ʼe tou logoʼi ʼe mole lelei, ohagē lā ko te mataku peʼe ko te tuʼania?
9 ʼI ʼihi temi, ʼi te lahi fau ʼo totatou lotovaivai, ʼe feala ke tou logoʼi he ʼu meʼa ʼe mole lelei, ohagē lā ko te mataku peʼe ko te tuʼania. ʼE lagi tou logoʼi ʼe mole feala ke tou fakahoko ia he maʼua ʼe tuʼu ʼi te Tohi-Tapu peʼe ko he pilivilēsio gāue. ʼE toe feala pē ʼi te faʼahi ʼaia, ke fakalotofīmālieʼi tātou e Sehova pea mo tokoni mai. Ohagē lā, ʼi te temi ʼaē neʼe fakatotonu ai kiā Sosue ke ina taki ia Iselaele moʼo tauʼi te ʼu puleʼaga mālohi fakafeagai, neʼe ʼui fēnei e Moisese kiā ia: “Ke ke lototoʼa pea mo mālohi, heʼe ko koe ʼaē kā ke fakahū anai te hahaʼi ʼaenī ki te fenua ʼaē neʼe fakapapauʼi e Sehova ki tanatou ʼu kui ke ina foaki age, pea ʼe ko koe ʼaē kā ke foaki age anai ko honatou tofiʼa. Ko Sehova ʼaē ʼe haʼele ʼi ʼou muʼa. ʼE haga nofo tonu anai mo koe. ʼE mole mavae anai iā koe peʼe ina liʼaki kātoa anai ia koe. ʼAua naʼa ke mataku peʼe ke tuʼania.” (Teu. 31:7, 8) ʼAki te tokoni ʼa Sehova, neʼe feala ke taki e Sosue ia te hahaʼi ʼa te ʼAtua ki te Kele ʼo Te Fakapapau pea mo natou mālo ʼi tonatou ʼu fili kātoa. Ki muʼa atu, ʼi te Tai Kula, neʼe toe fēia te tokoni ʼa te ʼAtua kiā Moisese.—Eke. 14:13, 14, 29-31.
10. Kapau ko he ʼu ʼaluʼaga fakalotomamahi ʼe fua kovi ki totatou maʼuli fakasino, koteā ʼaē ʼe feala ke tokoni mai?
10 Ko he ʼu ʼaluʼaga fakalotomamahi ʼe feala ke fua kovi ki totatou maʼuli fakasino. ʼE moʼoni, ʼe feala ke fua lelei kiā tātou mo kapau ʼe tou kai fakapotopoto, mo feʼauga tatatou mālōlō mo tatatou faigaoʼi, pea mo tou maʼuli maʼa. ʼE toe fua lelei ki totatou sino mo kapau ʼe tou manatuʼi te ʼu fakapapau ʼaē ʼe tuʼu ʼi te Tohi-Tapu. Koia, ʼi te temi ʼaē ʼe tou tuʼania ai, ʼe tokoni mai anai kiā tātou mo kapau ʼe tou manatuʼi te ʼu meʼa ʼaē neʼe hoko kiā Paulo, pea mo tana ʼu palalau fakalotomālohi ʼaenī: “ ʼE efihia māua, kae mole fāveliveli ke mole feala he toe gaūgaūe; ʼe mā nonofo ʼi te tuʼania, kae ʼe ʼi aipē tona haoʼaga. ʼE fakatagaʼi māua, kae mole liʼakina māua; kua tokahi ia māua kae mole fakaʼauha māua.”—2 Ko. 4:8, 9.
11. ʼE tou lava tauʼi feafeaʼi te mahaki fakalaumālie?
11 Ko ʼihi ʼahiʼahi ʼe feala ke fua kovi ki totatou maʼuli fakalaumālie. ʼE toe feala pē ʼi te ʼaluʼaga ʼaia ke tokoni mai ia Sehova. ʼE tuʼu ʼi Tana Folafola ia te fakapapau ʼaenī: “ ʼE poupouki e Sehova ia nātou ʼaē ʼe fetokaʼi, ʼe ina fakatuʼu ake ia nātou ʼaē kua mapelu ki lalo.” (Pes. 145:14) Ke feala hatatou tauʼi te mahaki fakalaumālie, ʼe lelei ke tou kumi tokoni ki te kau tagata ʼāfea Kilisitiano. (Sake 5:14, 15) Pea ko tatatou manatuʼi tuʼumaʼu ia te ʼamanaki Fakatohi-tapu ʼaē ko te maʼuli heʼegata, ʼe feala ke tou maʼu he mālohi ʼi te ʼu temi ʼaē ʼe ʼahiʼahi ai tatatou tui.—Soa. 17:3.
Te ʼu Faʼifaʼitaki ʼo Te Fakafīmālie Fakaʼatua
12. Kotou fakamatalatala te haga ʼaē ʼa Sehova ʼo fakalotofīmālieʼi ia Apalahamo.
12 Neʼe ʼui fēnei e te tagata fai pesalemo ʼaki te takitaki ʼa te ʼAtua: “Manatuʼi tau fakapapau ʼaē ki tau tagata faifekau, ʼaē neʼe ke fakatalitali au kiai. ʼE ko te meʼa fakalotofīmālie lā ʼaia ʼo ʼoku ʼi toku mamahi, heʼe ko tau folafola totonu ʼe ina fakatologa au ke au maʼuli.” (Pes. 119:49, 50) Iā ʼaho nei, ʼe tou maʼu ia te Folafola ʼa Sehova, ʼaē ʼe lahi ai te ʼu faʼifaʼitaki ʼo te fakafīmālie fakaʼatua. Ohagē lā, neʼe tuʼania lahi ia Apalahamo ʼi te temi ʼaē neʼe ina ʼiloʼi ai ko Sehova kā ina fakaʼauha ia Sotoma pea mo Komola. Neʼe fehuʼi fēnei e te pāteliaka agatonu ki te ʼAtua: “ ʼE ke matehi moʼoni anai koa te agatonu pea mo te agakovi?” Neʼe fakalotofīmālieʼi e Sehova ia Apalahamo ʼaki tana fakapapau age ʼaē, kapau ʼe ina maʼu pē he toko 50 agatonu, pea ʼe mole ina fakaʼauha anai ia Sotoma. Kae neʼe tuʼa nima te fehuʼi age ʼa Apalahamo kiā Sehova peʼe feafeaʼi lā mo kapau ko hahaʼi agatonu pē ia e toko 45? 40? 30? 20? 10? ʼI te ʼu lakaga fuli ʼaia, neʼe faʼa kātaki aipē Sehova mo lotolelei, ʼo ina fakapapau age kiā Apalahamo ʼe mole ina fakaʼauha anai ia Sotoma. Logolā neʼe mole maʼu pē lā e Sehova he toko 10 agatonu ʼi te kolo, kae neʼe ina haofaki ia Lote pea mo tona ʼu ʼofafine.—Sen. 18:22-32; 19:15, 16, 26.
13. Neʼe fakahā feafeaʼi e Ana tana falala ʼaē kiā Sehova?
13 Ko Ana, te ʼohoana ʼo Elekana, neʼe loto ʼaupitō ke ina maʼu hana tamasiʼi. Kae neʼe paʼa ia, pea neʼe tupu ai tona lotomamahi. Neʼe faikole kiā Sehova ʼo ʼuhiga mo te faʼahi ʼaia, pea neʼe ʼui fēnei age kiā ia e te Pelepitelō Lahi ko Elia: “Ke tali e te ʼAtua ʼo Iselaele tau kole.” Neʼe maʼu ai e Ana hona fīmālie, “pea neʼe mole kei mata tuʼania tona fofoga.” (1 Sam. 1:8, 17, 18) Neʼe falala ia Ana kiā Sehova, ʼo ina tuku ia meʼa fuli ki te ʼu nima ʼo Sehova. Logolā neʼe mole ina ʼiloʼi pe koteā anai kā hoko, kae neʼe maʼu e Ana he loto tokalelei. ʼAki te temi, neʼe tali Sehova ki tana faikole. Neʼe faitama pea ina fānauʼi te tama, neʼe ina fakahigoaʼi ko Samuele.—1 Sam. 1:20.
14. He koʼē neʼe ʼaoga ke fakalotofīmālieʼi ia Tavite, pea neʼe kumi fīmālie kiā ai?
14 Ko Tavite, te Hau ʼo te Iselaele ʼāfea, ʼe ko he tahi faʼifaʼitaki ʼo he tahi neʼe fakalotofīmālieʼi e te ʼAtua. Mai tona ʼaluʼaga ʼaē ko Sehova “ ʼe sio ki te loto,” koia ʼi te temi ʼaē neʼe ina filifili ai ia Tavite ke ina fetogi ki muli age ia te hau ʼo Iselaele, neʼe kua ina ʼiloʼi ia ko Tavite neʼe agatonu pea neʼe kātoa tona loto ki te tauhi moʼoni. (1 Sam. 16:7; 2 Sam. 5:10) Kae ki muli age, ko Tavite neʼe tono ia mo Pati-Sepa pea neʼe faiga ke ina fufū tana agahala ʼaia ʼaki tana matehi ia te ʼohoana ʼo Pati-Sepa. ʼI te temi ʼaē neʼe mahino ai Tavite ki te mamafa ʼo tana agahala, neʼe faikole fēnei kiā Sehova: “ ʼAki te lahi ʼo tou ʼu manavaʼofa, molehi taku ʼu talagataʼa. Fufulu kātoa au mai taku hala, pea mo fakamaʼa au mai taku agahala. Koteʼuhi, ʼe au ʼiloʼi taku ʼu talagataʼa, pea ko taku agahala ʼe nofo tuʼumaʼu ʼi ʼoku muʼa.” (Pes. 51:1-3) Neʼe fakahemala moʼoni ia Tavite, pea neʼe fakamolemole age ia Sehova kiā ia. Kae neʼe mole hao Tavite mai te ʼu fua kovi ʼo tana agahala. (2 Sam. 12:9-12) Kae ko te manavaʼofa ʼo Sehova neʼe ina fakalotofīmālieʼi ia tana tagata kaugana agavaivai.
15. Koteā te tokoni ʼaē neʼe foaki age e Sehova kiā Sesu ʼi muʼa pē ʼo tona mate?
15 ʼI tana maʼuli ʼi te kele, ko Sesu neʼe tau mo te ʼatu ʼu ʼaluʼaga faigataʼa. Neʼe fakagafua e te ʼAtua ke ʼahiʼahi te tui ʼa Sesu, kae neʼe nofo agatonu pē ia. Ko Sesu neʼe ko he tagata haohaoa neʼe falala tuʼumaʼu pē kiā Sehova pea mo lagolago ki Tana pule faʼitaliha. ʼI muʼa pē ʼo tona lavakiʼi pea mo matehi, neʼe faikole fēnei Sesu kiā Sehova: “Ke mole ko toku finegalo ʼaē ʼe tonu ke fai, kae ʼo koe ia.” Pea neʼe hā age te ʼāselo kiā Sesu pea neʼe ina fakalotomālohiʼi ia ia. (Luka 22:42, 43) Neʼe foaki e te ʼAtua kiā Sesu te fakalotofīmālie, mo te mālohi, pea mo te tokoni ʼaē neʼe ʼaoga kiā te ia ʼi te temi ʼaia.
16. Koteā ʼaē ʼe feala ke fai e te ʼAtua, mo kapau ʼe tonu ke matehi tātou ʼuhi ko tatatou nonofo agatonu?
16 Māʼiapē lā mo kapau ʼe tonu ke matehi tātou ʼuhi ko tatatou nonofo agatonu ʼi totatou ʼuhiga Kilisitiano, ʼe feala pē kiā Sehova ke tokoni mai, pea ʼe tokoni mai anai ke tou taupau tatatou agatonu kiā te ia. Tahi ʼaē, ʼe tou toe maʼu he fakalotofīmālie ʼaki te ʼamanaki ʼo te fakatuʼuake. Pea ʼe tou fakaʼamu lahi ki te ʼaho ʼaē kā “fakaʼauha” ai anai te fili fakaʼosi, ia te mate! (1 Ko. 15:26) ʼE manatuʼi lelei e Sehova tana ʼu kaugana agatonu ʼaē kua mamate, pea mo ʼihi atu, pea ʼe ina fakatuʼuake anai nātou. (Soa. 5:28, 29; Gāue 24:15) Ko tatatou falala ʼaē ki te fakapapau ʼa Sehova ʼo ʼuhiga mo te fakatuʼuake, ʼe ina foaki mai he fakalotofīmālie pea mo he ʼamanaki moʼoni mokā fakatagaʼi tātou.
17. ʼE lava fakalotofīmālieʼi feafeaʼi tātou e Sehova mokā mate he tahi neʼe tou ʼoʼofa ai?
17 ʼI manatu fakalotofīmālie foki te ʼiloʼi ʼaē ko totatou ʼu ʼofaina ʼaē kua mamate, ʼe natou maʼu te ʼamanaki ʼo te fakatuʼuake ʼi te mālama foʼou taulekaleka, kua puli ai te ʼu ʼaluʼaga fakatupu mamahi fuli ʼo te temi ʼaenī! Pea ʼe ko he toe pilivilēsio lahi anai maʼa te “toe hahaʼi tokolahi” ʼo te ʼu kaugana ʼa Sehova ʼaē kā natou hao ʼi te fakaʼosi ʼo te tuʼu ʼo te ʼu faʼahiga meʼa agakovi ʼaenī, hanatou tali nātou ʼaē kā fakatuʼuake ki te maʼuli ʼi te kele pea mo akoʼi nātou!—Fakh. 7:9, 10.
Ko Te ʼAtua ʼo Te ʼu Temi ʼĀfea ʼe Ko He Nonoʼaga
18, 19. Neʼe fakalotofīmālieʼi feafeaʼi te ʼu kaugana ʼa te ʼAtua ʼi te temi ʼaē neʼe fakatagaʼi ai nātou?
18 ʼAki he ʼu palalau fakatuketuke mālohi pea mo malave loto, neʼe fakapapau fēnei e Moisese ki te hahaʼi ʼo Iselaele: “Ko te ʼAtua ʼo te ʼu temi ʼāfea ʼe ko he nonoʼaga, pea ki lalo ʼe ko te ʼu nima ʼo te ʼu temi ʼe mole ʼiloʼi hona gataʼaga.” (Teu. 33:27) Ki muli age neʼe ʼui fēnei e te polofetā ko Samuele ki te kau Iselaele: “ ʼAua naʼa kotou maliu kehe mai iā Sehova, pea ʼe tonu ke kotou tauhi kiā Sehova ʼaki tokotou loto kātoa. . . . [ʼE] mole liʼaki anai e Sehova tana hahaʼi, ʼuhi ko tona huafa lahi.” (1 Sam. 12:20-22) Kapau ʼe tou pipiki maʼu kiā Sehova ʼi te tauhi moʼoni, pea ʼe mole ina liʼaki anai tātou ʼi he temi. ʼE ina foaki mai tuʼumaʼu pē anai te tokoni ʼaē ʼe ʼaoga kiā tātou.
19 ʼE foaki tuʼumaʼu pē e Sehova te tokoni pea mo te fakalotofīmālie ʼaē ʼe ʼaoga ki tana hahaʼi ʼi te ʼu ʼaho fakamuli pea mo faigataʼa ʼaenī. Talu mai ni ʼu taʼu e teau tupu, ko te ʼu toko lauʼi afe ʼi totatou ʼu tehina mo tuagaʼane ʼi te mālamanei kātoa, neʼe fakatagaʼi pea mo pilisoniʼi nātou ʼuhi pē ko tanatou tauhi ʼaē kiā Sehova. Ko te ʼu meʼa ʼaē neʼe hoko kiā nātou, ʼe fakamoʼoni ai, ko Sehova ʼe ina fakalotofīmālieʼi moʼoni tana ʼu kaugana ʼi te ʼu temi faigataʼa. Ohagē lā, ko te tahi ʼi ʼotatou tehina ʼi Lusia neʼe fakatūʼā ke pilisoni iā taʼu e 23 ʼuhi ko tana tui. Logolā tana nofo ʼi te fale pilisoni, kae neʼe maʼu pē te fealagia moʼo foaki age te meʼa kai fakalaumālie, pea neʼe feala ai ke mālohi pea mo lotofīmālie. Neʼe ina ʼui fēnei: “Lolotoga te ʼu taʼu ʼaia, neʼe au ako te falala ʼaē kiā Sehova pea mo au maʼu te mālohi mai iā te ia.”—Lau ia 1 Petelo 5:6, 7.
20. He koʼē ʼe feala ke tou tui papau ʼe mole liʼaki anai tātou e Sehova?
20 Tatau aipē te ʼu ʼaluʼaga ʼaē ʼe lagi feala anai ke tou tau mo ia, kae ʼe lelei anai ke tou manatuʼi te ʼu palalau fakalotofīmālie ʼaenī ʼa te tagata fai pesalemo: “ ʼE mole liʼaki anai e Sehova tana hahaʼi.” (Pes. 94:14) Logolā ʼe ʼaoga ke fakalotofīmālieʼi tātou, kae ʼe tou toe maʼu ia te pilivilēsio lahi ʼaē ke tou fakalotofīmālie ʼihi atu. ʼI te ʼalatike ʼaē kā hoa mai, ʼe tou vakaʼi anai peʼe feafeaʼi hatatou fakafīmālie te hahaʼi lotomamahi ʼi te mālama maveuveu ʼaenī.
ʼE Kotou Tali Feafeaʼi Anai?
• Koteā ʼaē ʼe feala ke tupu ai totatou mamahi?
• ʼE fakalotofīmālieʼi feafeaʼi e Sehova tana ʼu kaugana?
• Kapau ʼe tonu ke matehi tātou, koteā ʼaē ʼe feala ke ina fakalotofīmālieʼi tātou?
[ʼU fehuʼi ʼo te ako]
[Talanoa/Paki ʼo te pāsina 23]
TOU TAUʼI TE ʼU ʼALUʼAGA ʼAĒ ʼE FEALA KE FUA KOVI KI . . .
▪ te loto Pes. 147:3; 1 Soa. 3:19-22; 5:14, 15
▪ te ʼatamai Pes. 94:19; Filp. 4:6, 7
▪ te ʼu meʼa ʼaē ʼe tou logoʼi Eke. 14:13, 14; Teu. 31:6
▪ te maʼuli fakasino 2 Ko. 4:8, 9
▪ te maʼuli fakalaumālie Pes. 145:14; Sake 5:14, 15
