Te ʼu Fehuʼi ʼa Te Kau Lautohi
Te ʼu Fehuʼi ʼa Te Kau Lautohi
Koteā ʼaē ʼe tonu ke au fai mokā ʼe ʼi ai haku fehuʼi ʼo ʼuhiga mo he manatu neʼe au lau ʼi te Tohi Tapu, peʼe mokā ʼe ʼaoga kiā au he tokoni ʼo ʼuhiga mo hoku fihifihia?
ʼE uga tātou takitokotahi iā Tāʼaga Lea 2:1-5, ke tou “kumi tuʼumaʼu” te ʼatamai mo te fakasiosio tonu ohagē ko “he ʼu koloa maʼuhiga neʼe fufū.” Ko tona fakaʼuhiga ʼaē, ke tou faiga mālohi ke tou kumi he ʼu tali ki tatatou ʼu fehuʼi Fakatohi-tapu pea mo he ʼu puleʼaki ki totatou ʼu fihifihia. ʼE tou lava fakahoko feafeaʼi te faʼahi ʼaia?
ʼI te tohi Tirez profit de l’École du ministère théocratique ʼi te pāsina 33 ki te 38, ʼe vakaʼi ai te manatu ʼaenī: “ ʼE feafeaʼi Te Fai ʼo He ʼu Fekumi” ʼaki tatatou fakaʼaogaʼi te ʼu meʼa gāue ʼaē neʼe foaki mai e “te tagata kaugana agatonu mo poto.” (Mat. 24:45) ʼE fakamahino mai ʼi te pāsina 36, peʼe feafeaʼi te fakaʼaogaʼi ʼo te tohi Index des publications de la Société Watch Tower, ʼaē ʼe maʼu ai te Index des sujets traités pea mo te Index biblique. ʼE feala ke kotou fai ai he ʼu fekumi ʼo ni ʼu kupu tāfito peʼe ko ni ʼu vaega Tohi-Tapu, ʼe feala ai ke kotou maʼu he lisi ʼo te ʼu tohi fuli ʼaē ʼe tonu ke vakaʼi. Kotou kātaki ʼi te fai ʼo te ʼu fekumi ʼaia moʼo maʼu te tali ʼaē ʼe totonu peʼe ko te takitaki ʼe ʼaoga kiā koutou. Kotou manatuʼi ʼe kotou kumi te “ ʼu koloa maʼuhiga neʼe fufū,” ʼaē ʼe ʼaoga kiai he temi pea mo he ʼu faiga mālohi.
ʼE mahino papau ia, ʼe ʼi ai ʼihi ʼu manatu mo he ʼu vaega ʼe mole talanoa tāfito kiai tatatou ʼu tohi. Pea tatau aipē peʼe kua matou fakamahino he vaega Tohi-Tapu, kae neʼe lagi mole matou tali ki takotou fehuʼi. Pea ko ʼihi fakamatala ʼi te Tohi-Tapu, ʼe toe lagaʼi ai he ʼu fehuʼi ʼuhi ʼe lahi te ʼu faʼahi ʼe mole fakahā lelei mai ʼi te Tohi-Tapu. Koia, ʼe mole feala ke matou maʼu ʼi te moʼi temi pē ʼaia te ʼu tali ki te ʼu fehuʼi fuli ʼaē ʼe lagaʼi. Kā hoko he ʼaluʼaga fēia, pea ʼe mole matou fai he ʼu fakamahino fakatomuʼa ki he ʼu manatu ʼe mole hona tali kiai, pea ʼe mole matou fihi ʼo ʼuhiga mo “he ʼu fehuʼi ke fai ai he ʼu kumi.” Kae ʼe matou fia foaki he meʼa pē mai te ʼAtua ʼe pipiki ki te tui. (1 Tim. 1:4; 2 Tim. 2:23; Tito 3:9) Ko te Filiale peʼe ko te pilo gāue ʼo te fale lahi fakamālamanei ʼa te kau Fakamoʼoni ʼa Sehova, ʼe mole feala ke natou sivisivi pea mo tali ki he ʼu fehuʼi neʼe mole vakavakaʼi ʼi tatatou ʼu tohi. ʼE feala ke tou fakafetaʼi ki te ʼu manatu ʼe fakahā ʼi te Tohi-Tapu ʼaē ʼe ʼaoga moʼo takitaki totatou maʼuli. Pea ʼe tou toe loto fakafetaʼi foki ki te mole fakahā mai ʼaē ʼo te ʼu faʼahi fuli, heʼe feala ai hatatou fakahā tatatou tui mālohi ki te ʼAtua, ʼaē neʼe ina tohi te Tohi-Tapu.—Vakaʼi te ʼu pāsina 185 ki te 186 ʼo te tohi Approchez-vous de Jéhovah.
ʼE feafeaʼi mo kapau kua kotou fai ia meʼa fuli pē moʼo fai he ʼu fekumi ki he fihifihia ʼe malave kiā koutou totonu, kae ʼe mole heʼeki kotou maʼu te tokoni peʼe ko te puleʼaki ʼaē ʼe ʼaoga kiā koutou? ʼAua naʼa kotou tuʼania ʼi te fakaovi ki he tahi kua fotufotuʼa ʼi te faʼahi fakalaumālie, ʼe lagi ko he tahi ʼi tokotou ʼu tagata ʼāfea. ʼE lahi tanatou maʼu ia te ʼatamai mālama ʼo ʼuhiga mo te Tohi-Tapu, pea mo natou toe mahino lelei ki te maʼuli Fakakilisitiano. Kapau ʼe ʼaoga kiā koutou ia he tokoni ʼo ʼuhiga mo he fihifihia peʼe ke kotou fai he tonu, pea ʼe feala anai hanatou foaki ʼatu te tokoni fakapotopoto ʼaē ʼe ʼalutahi mo tokotou fihifihia, heʼe natou ʼiloʼi lelei ia koutou pea mo tokotou ʼaluʼaga. Pea ʼaua naʼa galo kiā koutou ia te faikole ʼaē kiā Sehova tāfito ʼo ʼuhiga mo tokotou ʼu fihifihia, pea mo kotou kole ke ina takitaki takotou fakakaukau ʼaki tona laumālie māʼoniʼoni, “heʼe foaki e Sehova totonu ia te poto . . . pea mo te fakasiosio tonu.”—Taag. 2:6; Luka 11:13.