Tou “Fakalotofīmālieʼi Ia Nātou Fuli ʼAē ʼe Putu”
Tou “Fakalotofīmālieʼi Ia Nātou Fuli ʼAē ʼe Putu”
“Ko Sehova neʼe ina fakanofo au . . . moʼo fakalotofīmālieʼi ia nātou fuli ʼaē ʼe putu *.”—ISA. 61:1, 2.
1. Koteā ʼaē neʼe fai e Sesu maʼa te hahaʼi ʼaē neʼe putu, pea koteā tona tupuʼaga?
NEʼE ʼui fēnei e Sesu Kilisito: “Ko taku meʼa kai ko te fai ʼo te finegalo ʼo ia ʼaē neʼe ina fekauʼi mai au, pea mo au fakaʼosi tana gāue.” (Soa. 4:34) ʼI tana fakahoko ia tana gāue ʼaē neʼe foaki age e te ʼAtua, neʼe fakahā e Sesu te ʼu kalitātē fakatalakitupua ʼo tana Tamai. ʼE kau ki te ʼu kalitātē ʼaia te ʼofa lahi ʼo Sehova ki te hahaʼi fuapē. (1 Soa. 4:7-10) Ko te faʼahi ʼe fakahā ai te ʼofa ʼo Sehova ʼe ko tana fakalotofīmālieʼi tātou. Neʼe talanoa ia te ʼapositolo ko Paulo ki te faʼahi ʼaia ʼi tana ʼui ʼaē ʼo ʼuhiga mo Sehova, ʼe ko “te ʼAtua ʼo te fakalotofīmālie fuli.” (2 Ko. 1:3) Neʼe fakahā e Sesu te ʼofa ʼaia ʼi tana fakahoko te ʼu faʼahi ʼaē neʼe fakakikite ʼi te lea fakapolofetā ʼa Isaia. (Lau ia Isaia 61:1, 2.) Neʼe lau e Sesu te lea fakapolofetā ʼaia ʼi te sinakoka ʼo Nasaleti pea neʼe ina fakaʼuhiga ia te ʼu palalau ʼaia kiā te ia totonu pē. (Luka 4:16-21) Lolotoga tana minisitelio kātoa, neʼe fakalotofīmālieʼi e Sesu ʼaki te ʼofa te hahaʼi ʼaē neʼe putu, ʼo ina foaki kiā nātou he fakalotomālohi pea mo te tokalelei ʼo te ʼatamai.
2, 3. He koʼē ʼe ʼaoga ki te kau tisipulo ʼa Kilisito, ke natou faʼifaʼitaki kiā te ia ʼi te foaki ʼaē ʼo he fakalotofīmālie?
2 ʼE ʼaoga ki te kau tisipulo fuli ʼa Sesu ke natou faʼifaʼitaki kiā te ia, ʼo natou fakalotofīmālieʼi ia nātou ʼaē ʼe putu. (1 Ko. 11:1) Neʼe ʼui fēnei e Paulo: “Ke kotou haga fefakalotofīmālieʼaki pea mo kotou felagalagaʼaki.” (1 Tes. 5:11) ʼE ʼaoga tāfito ke tou fakalotofīmālieʼi te hahaʼi, heʼe tau nei te mālamanei mo “te ʼu temi maʼuhiga ʼaupitō mo faigataʼa.” (2 Tim. 3:1) Kua tokolahi te hahaʼi aga fakahagatonu ʼi te mālamanei kātoa, ʼe natou lotomamahi ʼuhi ko te ʼu palalau pea mo te ʼu aga ʼa ʼihi hahaʼi.
3 Ohagē ko tona fakakikite ʼi te lea fakapolofetā Fakatohi-tapu, ʼi te ʼu ʼaho fakamuli ʼo te tuʼu ʼo te ʼu faʼahiga meʼa agakovi ʼaenī, tokolahi te hahaʼi ʼe natou “kaumeʼa pē anai mo nātou totonu, kaumeʼa mo te paʼaga, fiatuʼu, fialahi, fasituʼu ki te ʼAtua, talagataʼa ki te ʼu mātuʼa, maʼuli galo, heʼe agatonu, heʼeʼofa, logogataʼa, fasituʼu, heʼe fakatātāʼofi, fekai, mole manako ki te meʼa ʼaē ʼe lelei, kākā, fiatuʼu, fonu ʼi te fialahi, kaumeʼa mo te ʼu fakafiafia kae mole kaumeʼa mo te ʼAtua.” Kua ʼāsili kovi age te ʼu taʼi aga ʼaia ʼi te temi nei, heʼe ‘ko te ʼu tagata agakovi pea mo te ʼu hahaʼi kākā ʼe natou tuputupu ki te kovi ʼaupitō.’—2 Tim. 3:2-4, 13.
4. Iā ʼaho nei, koteā ʼaē kua hoko ki te ʼu ʼaluʼaga ʼo te mālamanei?
4 ʼE mole tou punamaʼuli ki te hoko ʼo te ʼu meʼa fuli ʼaia, heʼe fakahā lelei mai ʼi te Folafola ʼa te ʼAtua “ko te mālamanei kātoa ʼe takoto ia ʼi te mālohi ʼo te agakovi.” (1 Soa. 5:19) ʼE kau ki “te mālamanei kātoa” ia te ʼu faʼahi fakapolitike, fakalotu pea mo faifakatau, ʼo fēia pē mo te ʼu faʼahi ʼaē ʼe fakaʼaogaʼi e Satana moʼo fakamafola tana ʼu manatu. Ko tona tupuʼaga lā ʼaē ʼo te ʼui ʼo ʼuhiga mo Satana te Tēvolo, ko ia “te pule ʼo te mālamanei” pea mo “te ʼatua ʼo te tuʼu ʼo te ʼu faʼahiga meʼa ʼaenī.” (Soa. 14:30; 2 Ko. 4:4) ʼE hoko atu pē te ʼāʼāsili kovi ʼo te ʼu ʼaluʼaga ʼi te kele kātoa, koteʼuhi ko Satana ʼe nofo nei mo tona toe ʼita lahi, ʼi tana ʼiloʼi ʼaē kua nounou tona temi ʼi muʼa ʼo tona fakaʼauha e Sehova. (Fakh. 12:12) ʼI meʼa fakalotofīmālie te ʼiloʼi ʼaē ʼe mole tuku fualoa anai e te ʼAtua ke maʼuli Satana pea mo tana tuʼu agakovi, pea ʼe fakatokatoka anai te fakafihiʼi ʼaē e Satana te pule faʼitaliha ʼa Sehova!—Sen., kāp. 3; Sopo, kāp. 2.
ʼE Lolotoga Fakamafola Te Logo Lelei ʼi Te Kele Kātoa
5. ʼI te ʼu ʼaho fakamuli ʼaenī, ʼe lolotoga hoko feafeaʼi te lea fakapolofetā ʼo ʼuhiga mo te gāue fai fakamafola?
5 Lolotoga te ʼu temi faigataʼa ʼaenī ʼo te hisitolia ʼo te tagata, ʼe lolotoga hoko ia te faʼahi ʼaē neʼe fakakikite e Sesu. Neʼe ina ʼui fēnei: “Ko te logo lelei ʼaenī ʼo te puleʼaga ʼe fakamafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.” (Mat. 24:14) ʼE haga tuputupu aipē ia te fakamafola ʼaia ʼo te Puleʼaga ʼo te ʼAtua, ʼaē ʼe lolotoga fai nei ʼi te kele kātoa. Iā ʼaho nei, ko Fakamoʼoni ʼa Sehova e toko 7 500 000 tupu ʼi te ʼu kōkelekāsio e 107 000 tupu ʼi te kele kātoa, ʼe natou fakamafola ia te Puleʼaga ʼo te ʼAtua, ohagē pē ko Sesu, ʼaē neʼe ko te kupu tāfito ʼaia ʼo tana fai fakamafola pea mo tana faiako. (Mat. 4:17) ʼAki tatatou gāue fai fakamafola ʼaia ʼi te temi nei, ko he toe fakalotofīmālie lahi ʼe foaki kiā nātou ʼaē ʼe putu. Koia ʼi te ʼu taʼu e lua ʼaenī kua hili (2009 mo 2010), ko hahaʼi ʼe toko 570 601 neʼe natou papitema ʼo natou liliu ai ko he kau Fakamoʼoni ʼa Sehova!
6. Koteā takotou manatu ʼo ʼuhiga mo te lahi ʼo tatatou gāue fai fakamafola?
6 ʼE feala ke tou mahino lelei age ki te lahi ʼaupitō ʼo te gāue fai fakamafola ʼaia, mokā tou tokagaʼi ko te kau Fakamoʼoni ʼa Sehova kua natou fakaliliu pea mo tufa ʼi te temi nei te ʼu tohi Fakatohi-tapu iā lea e 500 tupu. Neʼe mole heʼeki tou sio ki he meʼa fēia ʼi te hisitolia kātoa ʼo te tagata! Ko te fakatuʼu, mo te gāue pea mo te tuputupu ʼo te koga ʼo te kautahi ʼa Sehova ʼi te kele ʼe fakaofoofo moʼoni. Kapau ʼe mole takitaki pea mo tokoni kiai te laumālie māʼoniʼoni mālohi ʼa te ʼAtua, pea ʼe mole feafeala ia ke hoko he taʼi meʼa fēia ʼi te mālama ʼaenī ʼaē ʼe puleʼi e Satana. Mai tona ʼaluʼaga ʼaē ko te logo lelei ʼe fakamafola ʼi te kele kātoa, koia ko te fakalotofīmālie ʼaē ʼe foaki mai ʼi te Tohi-Tapu ʼe mole maʼu pē e te hahaʼi ʼa Sehova, kae ʼe toe maʼu e te hahaʼi putu ʼaē ʼe natou tali ia te logo ʼo te Puleʼaga.
Te ʼu Tehina Mo Tuagaʼane Fakalotofīmālie
7. (a) He koʼē ʼe mole feala ke tou fakaʼamu ke pulihi nei e Sehova te ʼu ʼaluʼaga fuli ʼaē ʼe fakatupu mamahi? (b) He koʼē ʼe tou ʼiloʼi ʼe feala ke tou kātakiʼi te fakataga pea mo te mamahi?
7 ʼI te mālama ʼaenī ʼaē ʼe fonu ai te agakovi pea mo te mamahi, ʼe tou ʼiloʼi papau ʼe tou tau anai mo he ʼu ʼaluʼaga fakatupu mamahi. ʼE mole feala ke tou fakaʼamu ke pulihi nei e te ʼAtua te ʼu ʼaluʼaga fuli ʼaē ʼe fakatupu mamahi, heʼe tonu ke tou fakatalitali ʼo aʼu ki tana fakaʼauha ia te tuʼu ʼo te ʼu faʼahiga meʼa ʼaenī. Neʼe toe fakakikite ʼe fakatagaʼi tātou, pea ʼe ko he faigamālie ʼaia ke tou fakahā ai tatatou nofo agatonu, pea mo tatatou lagolago ki te pule faʼitaliha ʼa Sehova ʼi te ʼatulaulau. (2 Tim. 3:12) Kae ʼaki te tokoni pea mo te fakalotofīmālieʼi ʼo tātou e tatatou Tamai ʼaē ʼi selō, ʼe feala ke tou hagē ko te kau Kilisitiano fakanofo ʼo Tesalonika ʼi te temi muʼa, ʼaē neʼe natou tali te ʼu fakatagata pea mo te ʼu mamahi ʼaki te faʼa kātaki pea mo te tui.—Lau ia 2 Tesalonika 1:3-5.
8. Koteā te ʼu fakamoʼoni Fakatohi-tapu ʼaē ʼe fakahā ai ko Sehova ʼe ina fakalotofīmālieʼi tana ʼu kaugana?
8 ʼE mahino papau ia ʼe foaki e Sehova te fakalotofīmālie ʼaē ʼe ʼaoga ki tana ʼu kaugana. Ohagē lā, ʼi te fia matehi e te Fineʼaliki agakovi ko Sesapele ia te polofetā ko Elia, neʼe mataku te polofetā pea neʼe hola ia, pea neʼe ina toe kole ke mate. Neʼe mole fakatonutonuʼi e Sehova ia Elia, kae neʼe ina fakalotofīmālieʼi ia ia pea mo ina foaki age te lototoʼa moʼo fakahoko tana gāue fakapolofetā. (1 Hau 19:1-21) Ko te fakalotofīmālieʼi ʼaē e Sehova tana hahaʼi, ʼe toe hā ʼi te ʼaluʼaga ʼaē neʼe maʼu ʼi te kōkelekāsio Fakakilisitiano ʼo te ʼuluaki sēkulō. Ohagē lā, ʼe tou lau ʼi te Tohi-Tapu “ko te kōkelekāsio, ʼi Sutea kātoa, mo Kalilea pea mo Samalia neʼe maʼuli ʼi te tokalelei, pea neʼe mālohi.” Pea tahi ʼaē, “neʼe haga tuputupu he neʼe haʼele ʼi te manavasiʼi kiā Sehova pea mo te fakafīmālie mai te laumālie māʼoniʼoni.” (Gāue 9:31) ʼE tou loto fakafetaʼi lahi ʼi tatatou toe maʼu mo tātou ia “te fakafīmālie mai te laumālie māʼoniʼoni”!
9. He koʼē ʼe feala ke fakalotofīmālieʼi tātou mokā tou ako ʼo ʼuhiga mo Sesu?
9 ʼI totatou ʼuhiga Kilisitiano, ʼe fakalotofīmālieʼi tātou ʼaki tatatou ako ʼo ʼuhiga mo Sesu Kilisito pea mo tou haʼele ʼi tona ʼu tapugā vaʼe. Neʼe ʼui fēnei e Sesu: “Kotou ʼomai kiā te au, ia koutou fuli ʼaē ʼe kinakina pea mo mafasia, pea ʼe au fakafīmālie anai koutou. Kotou toʼo kiā koutou taku ʼakau ʼamo pea ke kotou ako iā te au, heʼe au agamalū pea mo loto agavaivai, pea ʼe kotou maʼu anai he fīmālie ki ʼokotou nefesi. Heʼe ko taku ʼakau ʼamo ʼe malū pea ko taku kavega ʼe maʼamaʼa.” (Mat. 11:28-30) Ko tatatou ʼiloʼi ʼaē te ʼu felōgoi fakalotomālohi ʼa Sesu mo te hahaʼi, pea mo tou mulimuli leva ki tana faʼifaʼitaki lelei ʼaia, ʼe tokoni lahi mai moʼo fakasiʼisiʼi te hoha ʼaē ʼe lagi tou tau mo ia.
10, 11. ʼI te kōkelekāsio, ko ai ʼaē ʼe feala ke natou foaki he fakalotofīmālie?
10 ʼE toe feala foki ke fakalotofīmālieʼi tātou e totatou ʼu tehina mo tuagaʼane. Ohagē lā, tou vakaʼi peʼe tokoni feafeaʼi te ʼu tagata ʼāfea ʼi te kōkelekāsio kiā nātou ʼaē ʼe tau mo te ʼu ʼaluʼaga fakalotomamahi. Neʼe tohi fēnei e te tisipulo ko Sake: “ ʼE mahaki koa he tahi iā koutou [ʼi te faʼahi fakalaumālie]? Ke ina pāui ke ʼomai kiā te ia te ʼu tagata ʼāfea ʼo te kōkelekāsio, pea ke natou faikole ʼo ʼuhiga mo ia.” Koteā anai tona fua? “Ko te faikole ʼo te tui ʼe ina fakamālōlō anai ia ia ʼaē ʼe mahaki, pea ʼe fakatuʼu anai ia ia e Sehova. Pea kapau neʼe ina fai he ʼu agahala, pea ʼe fakamolemole anai kiā te ia.” (Sake 5:14, 15) ʼE toe feala foki ki ʼihi atu ʼo te kōkelekāsio ke natou foaki he fakalotofīmālie.
11 ʼI te agamāhani, ʼe faigafua age ki te hahaʼi fafine hanatou palalau ki ʼihi atu fafine ʼo ʼuhiga mo tanatou ʼu fihifihia kehekehe. Ko te ʼu tuagaʼane, tāfito nātou ʼaē kua mātutuʼa pea kua natou māhani ʼi te maʼuli, ʼe feala ke natou foaki he ʼu tokoni poto ki te ʼu tuagaʼane ʼaē ʼe kei finemui. Ko te ʼu tuagaʼane fotufotuʼa ʼaia, ʼe lagi kua natou fakalaka ʼi he ʼu ʼaluʼaga fēia ʼi tonatou maʼuli. Ko tanatou lotomahino pea mo tanatou ʼu kalitātē, ʼe lava tokoni lahi ʼaupitō ki te ʼu tuagaʼane ʼaē ʼe kei finemui. (Lau ia Tito 2:3-5.) ʼE mahino ia, ʼe feala pea ʼe lelei ki te kau tagata ʼāfea pea mo ʼihi atu, ke natou “fai he ʼu palalau fakafīmālie ki te kau nefesi lotovaivai” ʼaē ʼe nonofo mo tātou. (1 Tes. 5:14, 15) Pea ʼe lelei ke tou manatuʼi ko te ʼAtua “ ʼe ina fakalotofīmālieʼi tātou ʼi totatou ʼu mamahi fuli, ke feala hatatou fakalotofīmālieʼi ia nātou ʼaē ʼe tau mo he ʼu faʼahiga mamahi kehekehe.”—2 Ko. 1:4.
12. He koʼē ʼe maʼuhiga ʼaupitō ke tou kau ki te ʼu fono Fakakilisitiano?
12 Ko te tahi faʼahi maʼuhiga ʼaupitō ke fakalotofīmālieʼi ai tātou, ʼe ko tatatou kau ki te ʼu fono Fakakilisitiano, ʼaē ʼe fakalotomālohiʼi ai tātou ʼaki te ʼu fai palalau ʼe fakatafito ki te Tohi-Tapu. ʼE tou lau ko Sutasi pea mo Silasi “neʼe nā fakalotomālohiʼi te ʼu tehina ʼaki te tuʼuga akonaki pea neʼe nā fakamālohi nātou.” (Gāue 15:32) ʼI muʼa pea ʼi te hili ʼo tatatou ʼu fono, ʼe tou fefakalotomālohiʼaki ʼi te kōkelekāsio ʼaki tatatou ʼu fai palalau. Koia tatau aipē peʼe tou mamahi ʼuhi ko he ʼu ʼaluʼaga fakatupu lotomamahi, kae ʼaua naʼa tou fakatō tokotahi ia tātou, heʼe mole fua lelei anai kiā tātou. (Taag. 18:1) Kae ʼe lelei age ke tou mulimuli ki te tokoni ʼaenī neʼe fai e te ʼapositolo ko Paulo ʼaki te takitaki ʼa te ʼAtua: “Tou fetokagaʼaki ke tou uga ia tātou ki te ʼofa pea mo te ʼu gāue matalelei, ʼo mole tou tuku tatatou ʼu fakatahi, ohagē ko te agamāhani ʼa ʼihi, kae ke tou fefakalotomālohiʼaki, tāfito lā heʼe kua kotou sio ki te fakaovi mai ʼo te ʼaho.”—Hep. 10:24, 25.
Tou Maʼu He Fakalotofīmālie ʼi Te Folafola ʼa Te ʼAtua
13, 14. Kotou fakahā mai peʼe lava fakalotofīmālieʼi feafeaʼi tātou ʼaki te Tohi-Tapu.
13 Tatau aipē peʼe ko tātou ko he ʼu Kilisitiano kua papitema pe neʼe hoki tou kamata pē tatatou ako ʼo ʼuhiga mo te ʼAtua pea mo tana ʼu fakatuʼutuʼu, kae ʼe feala ke tou maʼu he toe fakalotofīmālie lahi ʼi te Folafola ʼa te ʼAtua. Neʼe tohi fēnei e Paulo: “Ko meʼa fuli ʼaē neʼe tohi ʼi te temi muʼa, neʼe tohi ia moʼo akoʼi ʼo tātou, koteʼuhi ke tou maʼu te ʼamanaki ʼaki tatatou faʼa kātaki pea mo te fakalotofīmālie ʼaē ʼe haʼu mai te Tohi-Tapu.” (Loma 15:4) ʼE feala ke tou maʼu he fakalotofīmālie ʼi te Tohi-Tapu pea ke tou liliu ʼo “faiva . . . pea mo kātoa ki te ʼu gāue lelei fuli pē.” (2 Tim. 3:16, 17) ʼE mahino ia, ʼe ko he fakalotofīmālie lahi anai tatatou ʼiloʼi ia te moʼoni ʼo ʼuhiga mo te ʼu fakatuʼutuʼu ʼa te ʼAtua, pea mo tatatou maʼu he ʼamanaki moʼoni ki te kā haʼu. Koia, tou fakaʼaogaʼi lelei ia te Folafola ʼa te ʼAtua pea mo te ʼu tohi Fakatohi-tapu, ʼaē ʼe feala ke fakalotofīmālieʼi tātou pea mo ʼaoga kiā tātou ʼi ni ʼu ʼaluʼaga kehekehe.
14 Neʼe tuku mai e Sesu te faʼifaʼitaki lelei ʼi tana fakaʼaogaʼi te Folafola ʼa te ʼAtua moʼo akoʼi pea mo fakalotofīmālie te hahaʼi. Ohagē lā, ʼi tana hā ki tana ʼu tisipulo e toko lua hili tona fakatuʼuake, neʼe ina ‘ ʼavahi kātoa te Tohi-Tapu’ kiā nāua. ʼI tana palalau age kiā nāua, neʼe malave loloto ki tonā loto. (Luka 24:32) ʼI tana mulimuli ki te faʼifaʼitaki lelei ʼa Sesu, ko te ʼapositolo ko Paulo neʼe ‘fakakaukau ʼaki te Tohi-Tapu.’ ʼI Pelea, ko te hahaʼi ʼaē neʼe fagono kiā ia “neʼe natou fia ʼiloʼi ʼaupitō te folafola, ʼo natou vakavakaʼi lelei te ʼu Tohi ʼi te ʼaho fuli pē.” (Gāue 17:2, 10, 11) ʼE lelei ke tou lau te Tohi-Tapu ʼi te ʼaho fuli ke fua lelei ai kiā tātou, ʼo toe fēia mo te ʼu tohi Fakakilisitiano ʼaē ʼe feala ke tou maʼu ai te fakalotofīmālie pea mo te ʼamanaki ʼi te ʼu temi maveuveu ʼaenī!
Te Tahi ʼu Faʼahi Moʼo Fakalotofīmālieʼi Te Hahaʼi
15, 16. Koteā ʼihi ʼu faʼahi ʼe feala ke tou fai, moʼo tokoni pea mo fakalotofīmālieʼi totatou ʼu tehina mo tuagaʼane Kilisitiano?
15 ʼE lahi te ʼu faʼahi ʼe feala ke tou fai moʼo tokoni pea mo fakalotofīmālieʼi totatou ʼu tehina mo tuagaʼane. Ohagē lā, ʼe feala ke tou fai fakatau maʼa totatou ʼu tehina mo tuagaʼane ʼaē kua mātutuʼa peʼe māhahaki. ʼE feala ke tou tokoni ki ʼihi atu ʼaki tatatou fai he ʼu gāue ʼi tonatou ʼapi, ʼo tou fakahā ai tatatou tōkakaga ʼaē kiā nātou. (Filp. 2:4) ʼE lagi feala ke tou vikiʼi he ʼu tehina peʼe ko he ʼu tuagaʼane ʼuhi ko tanatou ʼu kalitātē, ohagē ko tonatou ʼofa, tanatou poto fai puleʼaki, tanatou lototoʼa, pea mo tanatou tui.
16 ʼI tatatou faiga ʼaē ke tou fakalotofīmālieʼi te kau mātutuʼa, ʼe feala ke tou ʼaʼahi nātou pea mo fakalogo lelei mokā natou fakamatala mai te ʼu meʼa ʼaē neʼe hoko ʼi tonatou maʼuli ʼi te temi muʼa, pea mo te ʼu lelei ʼaē neʼe natou maʼu ʼi tanatou tauhi kiā Sehova. Pea ʼi tatatou fai ʼaia, ʼe lagi fakalotomālohi moʼoni tātou pea mo fakalotofīmālieʼi tātou. ʼE feala ke tou lau ia te Tohi-Tapu peʼe ko tatatou ʼu tohi Fakatohi-tapu mo nātou ʼaē ʼe tou ʼolo ʼo fakasiosio. Lagi ʼe feala ke tou vakaʼi ia te ʼalatike ako ʼo Te Tule Leʼo ki te vāhaʼa peʼe ko te ʼu manatu ʼaē ʼe vakaʼi anai ʼi te Ako Tohi-Tapu ʼo te Kōkelekāsio. ʼE feala ke tou sioʼi mo nātou he foʼi ʼata ʼo te Sōsiete. Pea ʼe toe feala ke tou lau peʼe tou fakamatala age he ʼu hisitolia fakalotomālohi neʼe tou maʼu ʼi tatatou ʼu tohi.
17, 18. ʼI totatou ʼuhiga kaugana agatonu ʼa Sehova, he koʼē ʼe feala ke tou tui papau ʼe lagolago anai kiā tātou pea mo fakalotofīmālieʼi anai tātou?
17 Kapau ʼe tou tokagaʼi ʼe ʼaoga ke fakalotofīmālieʼi hotatou tehina peʼe ko hotatou tuagaʼane, pea ʼe feala ke tou faikole ʼo ʼuhiga mo ia. (Loma 15:30; Kol. 4:12) Kā tou tau mo hotatou ʼu fihifihia pea tou toe faiga fakamālotoloto ke tou fakafīmālieʼi ʼihi atu, ʼe feala ai ke tou maʼu te tui ʼaē neʼe maʼu e te tagata fai pesalemo, ʼaē neʼe ina hivaʼi fēnei: “Tuku tau kavega kiā Sehova totonu, pea ko ia totonu ʼe lagolago anai kiā te koe. ʼE mole ina fakagafua anai ke tūkia ia ia ʼaē ʼe faitotonu.” (Pes. 55:22) Koia ʼi totatou ʼuhiga kaugana agatonu ʼa Sehova, ʼe ina fakalotofīmālieʼi tuʼumaʼu pē anai tātou pea mo lagolago mai.
18 Neʼe ʼui fēnei e te ʼAtua ki tana kau ʼatolasio ʼo te temi muʼa: “Ko au—ʼe ko au totonu ʼaē ʼe fakalotofīmālieʼi ia koutou.” (Isa. 51:12) ʼE toe fai fēia pē anai e Sehova kiā tātou pea mo ina tapuakina anai tatatou ʼu aga pea mo tatatou ʼu palalau ʼaē ʼe lelei, mokā tou fakalotofīmālieʼi te hahaʼi ʼaē ʼe putu. Peʼe tou ʼamanaki ke tou māʼuʼuli ʼi selō peʼe ʼi te kele, ʼe fakalotofīmālieʼi tātou fuli ʼaki te ʼu palalau ʼaenī neʼe fai e Paulo ki tona ʼu tehina Kilisitiano ʼaē neʼe fakanofo ʼaki te laumālie: “Ko totatou ʼAliki ko Sesu Kilisito pea mo ʼAtua ko tatatou Tamai, ʼaē neʼe ʼofa kiā tātou pea neʼe ina foaki te fakafīmālie heʼegata pea mo te ʼamanaki lelei ʼaki te ʼofa makehe, ke nā fakafīmālieʼi ʼokotou loto pea mo fakamālohiʼi koutou ʼaki te ʼu gāue pea mo te ʼu palalau lelei.”—2 Tes. 2:16, 17.
[Nota]
^ ʼI te lea Fakahepeleo ʼo te temi muʼa, ko te kupu “nātou ʼaē ʼe putu” ʼe lahi tona fakaʼuhiga, pea ʼe feala ke fakaʼuhiga ki he tahi ʼe lotomamahi ʼuhi ko he ʼaluʼaga pē neʼe hoko, kae mole ʼuhi pē ko te mate ʼo he tahi.
ʼE Kei Kotou Manatuʼi Koa?
• ʼE lahi feafeaʼi tatatou gāue ʼaē ko te fakalotofīmālieʼi te hahaʼi putu?
• Koteā ʼihi ʼu faʼahi ʼe feala ke tou fai moʼo fakalotofīmālieʼi ʼihi atu?
• ʼE fakahā feafeaʼi ʼi te Tohi-Tapu, ko Sehova ʼe ina fakalotofīmālieʼi tana hahaʼi?
[ʼU fehuʼi ʼo te ako]
[Paki ʼo te pāsina 26]’
E kotou kau koa ki te fakalotofīmālieʼi ʼo te hahaʼi putu?
[Paki ʼo te pāsina 28]
ʼE feala ki te kau tūpulaga pea mo te hahaʼi mātutuʼa ke natou fakalotomālohiʼi ʼihi atu