1 Ko Te ʼAtua ʼe Ko He Misitelio—ʼE Moʼoni Koa?

Te ʼu palalau neʼe kua lagi kotou logo kiai: “Ko te ʼu gāue ʼa te ʼAtua ʼe ko he misitelio ia.”

“Ko Te Tamai ʼe Mole Feala He Mahino Ki Ai, Ko Te ʼAlo ʼe Mole Feala He Mahino Ki Ai, Pea Ko Te Laumālie Māʼoniʼoni ʼe Mole Feala He Mahino Kiai.”—Ko te ʼu palalau ʼaia ʼa te tagata takitaki lotu ko Athanase, ʼe tuʼu ʼi te tikisionalio Katolika, ʼe ina fakamahino te ʼuhiga ʼo te akonaki ʼo te Tahitolu ʼaē ʼe akoʼi e te ʼatu lotu ʼo te Keletiate.

Te ako mai te Tohi-Tapu: Neʼe ʼui e Sesu ko nātou ʼaē ʼe “natou ako ke natou ʼiloʼi . . . te ʼAtua moʼoni e tahi,” ʼe natou maʼu anai he ʼu tapuakina. (Soane 17:3) Kae ʼe feafeaʼi hatatou lava ʼiloʼi te ʼAtua mo kapau ʼe ko he misitelio? ʼE mole fufū e te ʼAtua ia tona ʼuhiga totonu, kae ʼe ina loto ke ʼiloʼi ia ia e te hahaʼi fuli.—Selemia 31:34.

ʼE moʼoni, ʼe mole feala anai ʼi he ʼaho ke tou ʼiloʼi ia meʼa fuli ʼo ʼuhiga mo te ʼAtua. Ko te faʼahi ʼaia ʼe mole feala ia, heʼe māʼoluga age tana ʼu manatu pea mo tana ʼu ala ia tātou.—Tagata Tānaki 3:11; Isaia 55:8, 9.

Te ʼIloʼi ʼo Te Moʼoni ʼe Aoga Kiā Koutou: He koʼē koa ʼe tou faiga anai ke tou ʼiloʼi ia te ʼAtua, mo kanapaulā ʼe ko he misitelio ia ʼe mole feala hatatou mahino ki ai? Kae ko te ʼAtua ʼe loto ke tou mahino kiā te ia pea ke tou toe fakakaumeʼa lelei mo ia. Neʼe talanoa te ʼAtua ʼo ʼuhiga mo te tagata agatonu ko Apalahamo ʼo ina ʼui ko “toku kaumeʼa,” pea neʼe tohi fēnei e te Hau ʼo Iselaele ko Tavite: “ ʼE kaumeʼa ia Sehova mo nātou ʼaē ʼe manavasiʼi kiā te ia.”—Isaia 41:8; Pesalemo 25:14.

Ko te fakakaumeʼa mo te ʼAtua ʼe hagē koa ko he faʼahi ʼe mole feala? ʼE moʼoni ʼe hagē ia ʼe mole feala, kae kotou fakatokagaʼi peʼe koteā ʼaē ʼe ʼui iā Gāue 17:27: “[Ko te ʼAtua] ʼe mole mamaʼo ia iā tatou takitokotahi.” ʼO feafeaʼi? ʼI te Tohi-Tapu, ʼe foaki mai e te ʼAtua ia faʼahi fuli ʼaē ʼe ʼaoga kiā tātou ke tou ʼiloʼi lelei ia ia. a

ʼE ina fakahā mai kiā tātou ia tona huafa, ʼe ko Sehova. (Isaia 42:8) Neʼe ina tohi tana ʼu gāue ʼaē neʼe ina fai maʼa te mālamanei, koia ʼaē ʼe feala ai ke tou ʼiloʼi peʼe ko ai ia ia. ʼE mole gata ai, kae ʼe ina toe fakahā mai te ʼu meʼa ʼaē ʼi tona loto. ʼE “manavaʼofa [ia], pea mo agaʼofa, tuai ʼi te ʼita pea mo mohu ʼi te lotoʼofa pea mo te moʼoni.” (Ekesote 34:6) Ko tatatou ʼu aga ʼe feala ke malave kiā te ia. Ohagē lā, ko te puleʼaga ʼāfea ʼo Iselaele neʼe natou “fakalotomamahi” ia ia ʼi te temi ʼaē neʼe natou agatuʼu ai kiā te ia, kae ko nātou ʼaē ʼe natou fakalogo fakapotopoto kiā te ia, ʼe natou fakafiafia ia tona loto.—Pesalemo 78:40; Tāʼaga Lea 27:11.

[Nota]

[Fakamatala ʼo te pāsina 4]

Kapau ko te ʼAtua ʼe ko he Tahitolu Tapu ʼe fakamisitelio, pea ʼe lava feafeaʼi hatatou ʼiloʼi moʼoni ia ia?

[Haʼuʼaga ʼo te paki pāsina 4]

The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International