2 Ko Te ʼAtua ʼe Mole Tokaga Moʼoni Ia Ki Te Hahaʼi—ʼE Moʼoni Koa?

Te ʼu palalau neʼe kua lagi kotou logo kiai: “Kapau ʼe tokaga moʼoni te ʼAtua ki te hahaʼi, pea ʼe ina molehi anai te agakovi mo te mamahi ʼi te mālamanei. Pea tatau aipē peʼe tokaga ki te hahaʼi fuli, kae ʼe mole tokaga ia ki te ʼu meʼa ʼaē ʼe hoko kiā au.”

Te ako mai te Tohi-Tapu: Ko Sehova ʼAtua ʼe mole ina fai he meʼa ʼe kovi. (Sake 1:13) Logolā ʼe feala ke ina molehi te ʼu meʼa ʼe kovi ʼi he temi pē, kae ʼe ina fakagafua ʼi te temi nei ke tuʼu te aga fakahehema ʼaenī, moʼo fakatokatoka te fakafifihi ʼaē neʼe lagaʼi ʼi te kamataʼaga ʼo te hisitolia ʼo te tagata, ʼo ʼuhiga mo tana pule faʼitaliha pea mo te nofo agatonu ʼa te tagata. Ki ʼamuli, ʼe gāue anai ia moʼo tokoni ki te mālamanei, pea ʼe ina pulihi anai te ʼu fihifihia fuli ʼaē ʼe tupu mai iā nātou ʼaē ʼe natou fakafisi ki tana pule.—Senesi 3:1-6; Isaia 65:17. a

ʼE mole tokaga pē te ʼAtua ki te hahaʼi fuli, kae ʼe toe ʼofa lahi kiā tātou takitokotahi. ʼE hā mai iā Mateo 10:29-31, ko te ʼAtua ʼe sio ia ki te ʼu kiʼi faʼahi liliki ʼo ʼuhiga mo tātou, māʼia mo ʼaē ʼe mole tou ʼiloʼi, heʼe ʼui fēnei ai: “ ʼE mole koa lā fakatau he ʼu pasele e lua ki he foʼi piesi paʼaga e tahi ʼe mole faʼa maʼuhiga? Kae mole he tahi iā nātou ʼe tō ki te kele kae mole ʼiloʼi e takotou Tamai. Kae māʼia mo te ʼu fuluʼi ʼulu fuli ʼo tokotou ʼulu kua ʼosi kātoa ʼi te lau. Koia, ʼaua naʼa kotou manavasiʼi: ʼe kotou maʼuhiga lahi ake koutou ʼi he tuʼuga pasele.”

Te ʼIloʼi ʼo Te Moʼoni ʼe ʼAoga Kiā Koutou: ʼI te agamāhani ʼe mole tou fia fakaovi ki te hahaʼi ʼaē ʼe loto fefeka peʼe mole natou tōkakaga ki ʼihi. Koia, ʼuhi ko te loi ʼo ʼuhiga mo te ʼAtua ʼe mole tokaga ki te hahaʼi, tokolahi ʼe mole natou fia ʼiloʼi ia ia peʼe natou fakaovi pē kiā ia mokā mole he tahi age puleʼaki. ʼI takotou ʼiloʼi ʼaē ko Sehova ʼAtua ʼe tokaga moʼoni ki te hahaʼi, ʼe feala ke lahi ai takotou fia ako ʼo ʼuhiga mo ia pea mo fakakaumeʼa mo ia.

Ohagē lā, neʼe lagi kotou faikole ki te ʼAtua, kae neʼe kotou feʼekeʼaki pe neʼe fagono ki takotou faikole pe neʼe tali atu kiā koutou. ʼE fakapapau mai ʼi te Tohi-Tapu ko ia ʼaē “ ʼe fagono ki te faikole,” ʼe loto ia ke fagono tuʼumaʼu kiā nātou fuli ʼaē ʼe fakaovi fakamālotoloto age kiā te ia.—Pesalemo 65:2.

ʼE fakaafe e te ʼAtua ke kotou “tuku kiā te ia takotou ʼu tuʼania fuli, heʼe tokaga ia kiā koutou.” (1 Petelo 5:7) ʼE tou lava falala ki tana tokaga ʼaē kiā tātou māʼia ʼi te ʼu temi ʼaē ʼe tou mamahi ʼaupitō ai, heʼe ʼui fēnei ʼi tana Folafola: “Ko Sehova ʼe ovi kiā nātou ʼaē ʼe lavea tonatou loto pea ʼe ina haofaki ia nātou ʼaē ʼe mafasia tonatou ʼatamai.”—Pesalemo 34:18.

[Nota]

[Fakamatala ʼo te pāsina 5]

Kapau ʼe mole tokaga te ʼAtua ki te hahaʼi, pea he koʼē koa ʼe ina fakaafe tātou ke tou faikole age kiā te ia?