3 Ko Te ʼAtua ʼe Ina Liufaki Te Kovi ʼAki Te Kovi—ʼE Moʼoni Koa?

Te ʼu palalau neʼe kua lagi kotou logo kiai: “Ko te ʼAtua ʼe ina tāʼofi maʼu te ʼu agahala fuli ʼa te hahaʼi pea ʼe ina toe liufaki age ʼaki te tautea heʼegata ʼi ʼifeli.”

“ ʼE tauteaʼi e te ʼAtua ia te kau agahala ʼaki te ʼu tuʼutāmaki fakanātulā.”

Te ako mai te Tohi-Tapu: ʼI te lua tohi ʼa Petelo 3:9, ʼe ʼui ai ko Sehova “[ʼe] mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.” ʼE mole tokaga tāfito ia ki te ʼu hala ʼaē ʼe tou fai, kae ʼe tokaga tāfito ia ki te ʼu faʼahi lelei ʼaē ʼe tou fai. “Ko [te] ʼu mata [ʼo te ʼAtua] ʼe taka ʼi te kele kātoa, ke ina fakahā tona mālohi kiā nātou ʼaē ʼe kātoa tonatou loto kiā te ia.”—2 Fakamatala 16:9.

Ko te ʼifeli ʼe mole ko he akonaki Fakatohi-tapu ia, heʼe ko te manatu ʼaē ʼo he fakamamahi heʼegata ʼe fakalialia ia ki te ʼAtua. Ko te mate ʼaē ʼa te kau agakovi ʼe ko te fakatūʼā lahi ʼaia ʼa te ʼAtua kiā nātou. (Selemia 7:31; Loma 6:7) Pea ko te ʼu tuʼutāmaki fakanātulā, ʼaē ʼe mamate ai te hahaʼi fuli pē, ʼe mole ko te ʼu gāue ia ʼa te ʼAtua, kae ʼe ko he ʼu meʼa fakafokifā ʼe feala ke hoko ki te hahaʼi fuli.—Tagata Tānaki 9:11.

Te ʼIloʼi ʼo Te Moʼoni ʼe ʼAoga Kiā Koutou: ʼE feala ke tou fakaovi ki te ʼAtua mokā ʼe mahino kiā tātou ʼe “fakamolemole gafua” pea ʼe mole ina foimo tauteaʼi atu aipē he tahi. (Pesalemo 86:5) ʼE mole lelei hatatou tauhi ki te ʼAtua ʼuhi heʼe tou tukugākoviʼi tātou ki he meʼa ʼe kovi neʼe tou fai, peʼe tou mātataku naʼa fakatūʼā tātou. Kae ʼe feala ke tou fakamālohi tatatou tui heʼe tou ʼoʼofa kiā Sehova, pea ko te faʼahi ʼaia ʼaē ʼe lelei age. Ko te faʼahiga ʼofa ʼaia ʼe ko he mālohi ʼe ina uga tātou ke tou fai ia meʼa fuli ʼe tou lavaʼi, ke leleiʼia tātou e te ʼAtua.—Mateo 22:36-38; 1 Soane 5:3.

Logolā te loto ʼaē ʼa te ʼAtua ke liliu te hahaʼi fuli ʼo fai he ʼu meʼa ʼe lelei, kae ʼe ina ʼiloʼi ko te tokolahi ʼe mole natou fai anai ʼi he ʼaho te faʼahi ʼaia. Kapau ʼe mole tauteaʼi e te ʼAtua ʼi he temi ia nātou ʼaē ʼe mole fia fetogi tanatou ʼu aga ʼaē ʼe kovi, pea ʼe hagē anai ia ko he pule ʼe ina fakatuʼu he ʼu lao kae ʼe mole ina fakamaʼua te hahaʼi ke natou mulimuli kiai, ʼe fakagafua ai ke tuputupu ʼo talu ai te heʼe faitotonu mo te mamahi. (Tagata Tānaki 8:11) Ko tatatou ʼiloʼi ʼaē ʼe mole fakagafua anai e te ʼAtua ke hoholo ʼo talu ai te agakovi pea mo te mamahi, ʼe ina foaki mai he ʼamanaki moʼoni ki te kā haʼu. ʼE fakapapau mai e te ʼAtua ʼe ina molehi anai ia nātou ʼaē ʼe natou haga fai te ʼu aga ʼe kovi, ke feala ai ki “te kau agavaivai” ke natou maʼu te maʼuli heʼegata ʼi te kele ohagē ko tana fakatuʼutuʼu ʼi te kamata.—Pesalemo 37:10, 11, 29. a

[Nota]

[Fakamatala ʼo te pāsina 6]

ʼE loto koa e te ʼAtua ke tou tauhi age kiā te ia heʼe tou mātataku naʼa fakatūʼā tātou?

[Haʼuaga ʼo te paki pāsina 6]

Engravings by Doré