5 ʼE Tali e Te ʼAtua Te ʼu Tauhi Fakamālotoloto Fuli—ʼE Moʼoni Koa?

Te ʼu palalau neʼe kua lagi kotou logo kiai: “Ohagē pē ko te lahi ʼo te ʼu ala foufou pea mo te ʼu ala ʼaē ʼe fakatau ki te potu e tahi, ʼe toe lahi mo te ʼu ala foufou ʼaē ʼe fakatau ki te ʼAtua. ʼE tonu ki te hahaʼi takitokotahi ke natou maʼu tonatou ala totonu ki te ʼAtua.”

Te Ako Mai Te Tohi-Tapu: ʼE tonu ke fakamālotoloto tatatou tauhi, kae ʼe mole ko he tauhi ke hā pē ki tuʼa pea mo mālualoi. Neʼe tala e Sesu ki te kau takitaki lotu ʼo tona temi te tupuʼaga ʼaē ʼo te liʼaki ʼo nātou e te ʼAtua, ʼo ina ʼui fēnei: “Neʼe tonu ai te lea fakapolofetā ʼa Isaia ʼo ʼuhiga mo koutou, kau mālualoi, ohagē ko tona kua tohi, ‘Ko te hahaʼi nei ʼe natou fakamaʼuhiga au ʼaki ʼonatou laugutu, kae mamaʼo ʼaupitō tonatou loto iā te au.’ ” (Maleko 7:6) Kae ʼe mole tali anai e te ʼAtua tatatou tauhi ʼuhi pē heʼe tou fai fakamālotoloto.

Neʼe fakamahino lelei e Sesu te faʼahi ʼaia, ʼi tana fakahā te hala tāfito ʼi te tauhi ʼa te kau takitaki lotu pea mo tanatou ʼu tisipulo. Neʼe ina fakaʼuhiga kiā nātou te ʼu folafola ʼaenī ʼa te ʼAtua: “ ʼE ko he maumau noa pē ʼo tanatou haga fai mai kiā te au he tauhi, heʼe natou akonakiʼi te ʼu akonaki ʼe ko he ʼu fakatotonu fakatagata pē.” (Maleko 7:7) Neʼe “maumau noa” peʼe mole he fua ʼo tanatou tauhi, koteʼuhi neʼe natou fakamuʼamuʼa tanatou ʼu talatisio fakalotu ʼi te ʼu fakatotonu ʼa te ʼAtua.

ʼE mole lagolago te Tohi-Tapu ki te manatu ʼaē ʼe lahi te ʼu ala lelei moʼo fakaovi ki te ʼAtua, kae ʼe akoʼi mai ai ʼe ko te ala pē ia e tahi. Iā Mateo 7:13, 14, ʼe ʼui fēnei ai: “Kotou hū ʼi te matapā fāveliveli; heʼe laulahi pea mo ʼātea ia te ala ʼaē ʼe fakatau ki te fakaʼauha, pea ʼe tokolahi ia nātou ʼe hū ai; kae fāveliveli ia te matapā pea mo lauveliveli ia te ala ʼaē ʼe fakatau ki te maʼuli, pea ʼe tokosiʼi ia nātou ʼe natou maʼu.”

Te ʼIloʼi ʼo Te Moʼoni ʼe ʼAoga Kiā Koutou: Kotou fakakaukauʼi age muʼa peʼe kotou feafeaʼi anai mo kapau neʼe kotou akoako ʼi ni ʼu māhina ki he lele manavā, pea neʼe kotou mālo ʼi te lele ʼaia, kae neʼe mole fakapale leva koutou he neʼe mole kotou mulimuli ki he lēkula ʼo te lele neʼe mole kotou ʼiloʼi. ʼE feala ke kotou manatu neʼe tō noa takotou ʼu faiga fuli. ʼE feala koa ke hoko he faʼahi fēia ʼi tatatou tauhi ʼaē ki te ʼAtua?

ʼI tana fakatatau ia tatatou tauhi ki he faigaoʼi fakataupiepie, neʼe tohi fēnei e te ʼapositolo ko Paulo: “Kapau ʼe ʼi ai he tahi ʼe faiga ʼi te ʼu faigaoʼi, ʼe hoki fakapale mo kapau neʼe faiga ʼo mulimuli ki te ʼu lēkula.” (2 Timoteo 2:5) ʼE tou maʼu te ʼofa ʼo te ʼAtua mokā tou tauhi kiā te ia “ ʼo mulimuli ki te ʼu lēkula,” ko tona fakaʼuhiga, mokā tou fakahoko te tauhi ʼaē ʼe ina tali. Ohagē pē ko te mole feala ki he tagata lele ke lele faʼifaʼitaliha pea mo fakaʼamu ke mālo ʼi te lele ʼaia, ʼe mole feala mo tātou ke tou filifili totonu tatatou ala ʼaē ki te ʼAtua.

Ke leleiʼia tātou e te ʼAtua, ʼe mole tonu ke maʼu ʼi tatatou tauhi he ʼu loi ʼo ʼuhiga mo ia. Neʼe ʼui fēnei e Sesu: “[ʼE] ʼatolasio . . . anai te kau ʼatolasio moʼoni ki te Tamai ʼaki te laumālie pea mo te moʼoni.” (Soane 4:23) ʼE tou ʼiloʼi ia te ala moʼoni ki te ʼAtua ʼaki tana Folafola, ia te Tohi-Tapu.—Soane 17:17. a

[Nota]

[Fakamatala ʼo te pāsina 8]

ʼE akoʼi koa e te ʼu lotu fuli ki te hahaʼi, ke natou fakahoko te tauhi ʼaē ʼe tali e te ʼAtua?