Ke Taki Koutou e Te Laumālie Ki Te Maʼuli Mo Te Tokalelei

“Tou haʼele ʼo mole mulimuli ki te kakano, kae ʼo mulimuli ki te laumālie.”—LOMA 8:4.

1, 2. (a) Koteā te tuʼutāmaki ʼe feala ke hoko ki he tahi ʼe fakaleluʼi lolotoga tana taki motokā? (b) Koteā te tuʼutāmaki ʼaē ʼe feala ke hoko mokā fakaleluʼi tātou ʼi te faʼahi fakalaumālie?

 KO TE sivi ʼaenī neʼe fai e te sīkalaipe pule ʼo te ʼu meʼa feʼaluʼaki ʼo Amelika: “Tokolahi ʼe fakaleluʼi nātou lolotoga tanatou taki motokā pea ʼe hagē ia ʼe fakaʼalu ʼo kovi ʼi te taʼu fuli.” ʼE kau ia te telefoni feʼāveʼaki ki te ʼu meʼa ʼaē ʼe ina fakaleluʼi he tahi ʼe taki motokā. ʼI te fakafehuʼi ʼo te hahaʼi ʼi te sivi, ko te vahe tahi mai te tolu neʼe natou ʼui kua ʼosi fakaʼī nātou pe neʼe meihiʼi pē ke fakaʼī nātou e he motokā, koteʼuhi ko te tagata taki motokā neʼe lolotoga fai telefoni. Ko te fai ʼo he ʼu meʼa lolotoga te ʼuli motokā ʼe lagi feala ke ʼaoga, kae ʼe feala foki ke hoko ai he tuʼutāmaki.

² Pea ʼe toe fēia mo tatatou ʼu felōgoi ʼaē mo Sehova. Ohagē pē ko he tahi ʼe fakaleluʼi ʼi tana taki motokā, ʼi te agamāhani ʼe mole ina tokagaʼi te tuʼutāmaki ʼe feala ke hoko, ʼe toe fēia pē ki he tahi ʼe fakaleluʼi ʼi te faʼahi fakalaumālie ʼe feala ke tō gafua ki he aga ʼe kovi. Kapau ʼe tou tuku ia tātou totonu ke tou fakamamaʼo mai tatatou tauhi ki te ʼAtua pea mo te ʼu gāue fakateokalatike, ʼe feala ke puli ai tatatou tui. (1 Tim. 1: 18, 19) Neʼe fai e te ʼapositolo ko Paulo te fakatokaga ʼo te tuʼutāmaki ʼaia ki tona ʼu tehina Kilisitiano ʼo Loma, ʼo ina ʼui fēnei: “Ko te manatu ki te kakano ko tona fakaʼuhiga ko te mate, kae ko te manatu ki te laumālie ko tona fakaʼuhiga ko te maʼuli pea mo te tokalelei.” (Loma 8:6) Koteā ʼaē neʼe fia ʼui ʼi henī e Paulo? Koteā ʼaē ʼe feala ke tou fai ke mole tou “manatu ki te kakano” kae ke tou haga “manatu ki te laumālie”?

“ ʼE Mole Fai He Tautea” Kiā Nātou

3, 4. (a) Koteā te fihi neʼe hoko kiā Paulo, ʼaē neʼe talanoa kiai ʼi tana faitohi? (b) He koʼē ʼe tonu ke tou tokagaʼi te ʼaluʼaga ʼo Paulo?

³ ʼI tana tohi ki te kau Loma, neʼe faitohi ia Paulo ʼo ʼuhiga mo te fihi neʼe hoko iā te ia, ko te fefihiʼaki ʼo tona kakano pea mo tona ʼatamai. (Lau ia Loma 7:21-23.) Ko Paulo neʼe mole ina fia fakalakatonuʼi ia ia peʼe fakaʼofaʼofa, ohagē kua mamafa fau tana ʼu agahala ke mole feala ia ke ina fai te aga ʼaē ʼe totonu. Neʼe ko he Kilisitiano kua fotufotuʼa, neʼe fakanofo ʼaki te laumālie, pea neʼe filifili ia ke liliu ko “te ʼapositolo . . . ʼo te ʼu puleʼaga.” (Loma 1:1; 11:13) Kae he koʼē neʼe faitohi ia Paulo ʼo ʼuhiga mo te fihi ʼaē neʼe hoko iā te ia?

⁴ Neʼe fakahā fakahagatonu e Paulo neʼe mole feala ke ina fai te finegalo ʼo te ʼAtua ʼaki pē ia tona mālohi, ohagē pē ko te meʼa ʼaē neʼe loto kiai. Koteā tona tupuʼaga? Neʼe ina ʼui fēnei: “Ko tātou fuli neʼe tou agahala pea mole tou aʼu ki te kolōlia ʼo te ʼAtua.” (Loma 3:23) ʼI tona ʼuhiga hōloga ʼo Atama, ko Paulo neʼe heʼe haohaoa pea neʼe ina maʼu te ʼu holi ʼe kovi. ʼE tou lava mahino ki tona ʼaluʼaga, koteʼuhi ʼe tou heʼe haohaoa fuli pea ʼe tou fetaulaki ʼi te ʼaho fuli mo he ʼu ʼaluʼaga ʼe tatau mo ʼaē neʼe hoko kiā Paulo. Tahi ʼaē, ʼe lahi te ʼu faʼahi ʼe feala ke ina fakaleluʼi tātou ke mole tou haʼele ʼi ‘te ala lauveliveli ʼaē ʼe fakatau ki te maʼuli.’ (Mat. 7:14) Kae ʼi te ʼaluʼaga ʼo Paulo neʼe ʼi ai tana ʼamanaki, pea ʼe toe fēia mo tātou.

 5. Neʼe maʼu koa ʼifea e Paulo ia te tokoni pea mo te fakaʼāteaina?

⁵ Neʼe faitohi fēnei ia Paulo: “Ko ai kā ina haofaki anai au . . . ? ʼE au fakafetaʼi ki te ʼAtua ʼaki ia Sesu Kilisito totatou ʼAliki!” (Loma 7:24, 25) Pea neʼe palalau leva ia Paulo kiā nātou “ ʼaē ʼe fakatahi mo Kilisito Sesu”—ia te kau Kilisitiano fakanofo. (Lau ia Loma 8:1, 2.) ʼAki tona laumālie māʼoniʼoni, ʼe vavae nātou e Sehova ko tona ʼu foha, ʼo ina pāui nātou ke natou “kaugā maʼu tofiʼa fakatahi pea mo Kilisito.” (Loma 8:14-17) ʼAki te laumālie ʼo te ʼAtua pea mo tanatou tui ki te sākilifisio faitotogi ʼa Kilisito, ʼe feala ke natou mālo ʼi te fihi ʼaē neʼe fakamatalatala e Paulo pea ʼe “mole fai ai he tautea kiā nātou.” ʼE fakaʼāteaina nātou “mai te lao ʼo te agahala pea mo te mate.”

 6. He koʼē koa ʼe tonu ke tokagaʼi e te ʼu kaugana fuli ʼa te ʼAtua te ʼu palalau ʼa Paulo?

⁶ Logolā neʼe palalau ia Paulo ki te kau Kilisitiano fakanofo, kae ko te ʼu meʼa ʼaē neʼe ina ʼui ʼo ʼuhiga mo te laumālie ʼo te ʼAtua pea mo te sākilifisio faitotogi ʼa Kilisito ʼe feala ke toe ʼaoga ki te ʼu kaugana fuli ʼa Sehova, peʼe natou ʼamanaki maʼuli ʼi selō peʼe ʼi te kele. Logolā neʼe takitaki e te ʼAtua ia Paulo ke ina foaki te ʼu tokoni ʼaia ki te kau Kilisitiano fakanofo, kae ʼe maʼuhiga ʼaupitō ke mahino ki te ʼu kaugana fuli ʼa te ʼAtua te ʼu faʼahi ʼaē neʼe ina tohi pea mo natou faiga ke natou maʼu mai ai he ʼu fua lelei.

Neʼe ‘Tauteaʼi Feafeaʼi e Te ʼAtua Ia Te Agahala ʼi Te Kakano’?

7, 8. (a) Koteā te fakaʼuhiga ʼo te ʼui ʼaē ko te Lao neʼe “vaivai ʼuhi ko te kakano”? (b) Koteā ʼaē neʼe fakahoko e te ʼAtua ʼaki tona laumālie pea mo te sākilifisio faitotogi ʼa Kilisito?

⁷ ʼI te kāpite 7 ʼo Loma, neʼe fakamoʼoni ia Paulo ki te mālohi ʼo te agahala ʼi te kakano heʼe haohaoa. ʼI te kāpite 8, neʼe talanoa ia ki te mālohi ʼo te laumālie māʼoniʼoni. Neʼe fakamahino e te ʼapositolo peʼe lava tokoni feafeaʼi te laumālie ʼo te ʼAtua ki te kau Kilisitiano ʼi tanatou tauʼi te mālohi ʼo te agahala, ke feala ai hanatou maʼuli ʼo mulimuli ki te finegalo ʼo Sehova pea mo natou maʼu tona ʼofa. Neʼe fakahā lelei e Paulo, neʼe fakahoko e te ʼAtua ʼaki tona laumālie pea mo te sākilifisio faitotogi ʼo tona ʼAlo, ia te faʼahi ʼaē neʼe mole lava fakahoko e te Lao ʼa Moisese.

 ⁸ Ko te Lao mo tana ʼu fakatotonu, neʼe ina tauteaʼi te kau agahala. Tahi ʼaē, ko te kau pelepitelō lahi ʼo Iselaele ʼaē neʼe natou tauhi ʼi te Lao, neʼe natou heʼe haohaoa pea neʼe mole feala ke natou foaki he sākilifisio moʼo pulihi ia te agahala. Koia ʼaē neʼe ʼui ai ko te Lao neʼe “vaivai ʼuhi ko te kakano.” Kae “ ʼaki tana fekauʼi mai ia tona ʼAlo totonu ke tatau mo te kakano agahala” pea mo momoli ia ia ko he sākilifisio, ko te ʼAtua ʼaē neʼe ina “tauteaʼi te agahala ʼi te kakano” ʼo ina fai ai te meʼa ʼaē neʼe mole feala ke fai ʼi te faʼahi ʼo te Lao. Ko tanatou tui ki te sākilifisio faitotogi ʼa Sesu, ʼe feala ai ke ʼui ko te kau Kilisitiano fakanofo ʼe natou faitotonu. ʼE fakalotomālohiʼi nātou ke natou “haʼele ʼo mole mulimuli ki te kakano, kae ʼo mulimuli ki te laumālie.” (Lau ia Loma 8:3, 4.) Koia, ʼe tonu ke natou haga fai fēia ʼo aʼu ki te fakaʼosi ʼo tonatou maʼuli ʼi te kele ke feala ai hanatou maʼu “te kolona ʼo te maʼuli.”—Fakh. 2:10.

 9. Koteā te fakaʼuhiga ʼo te ʼu palalau ʼa Paulo iā Loma 8:2?

⁹ Neʼe talanoa ia Paulo ki “te lao ʼo te laumālie” pea mo “te lao ʼo te agahala pea mo te mate.” (Loma 8:2) Koteā te fakaʼuhiga ʼo te ʼu palalau ʼa Paulo? ʼE ʼui ʼi te tohi, ko te ʼu kupu Fakakeleka ʼaē neʼe fakaʼaogaʼi e Paulo ʼi te vaega ʼaenī, ʼe fakaʼuhiga ki te ʼu meʼa lelei peʼe kovi ʼaē ʼe fai e te hahaʼi pea ʼe natou puleʼi nātou ohagē ko he lao. ʼE feala ke toe fakaʼuhiga ki te faʼahiga maʼuli kua natou filifili ke natou mulimuli kiai.

10. ʼE puleʼi feafeaʼi tātou e te lao ʼo te agahala pea mo te mate?

¹⁰ Neʼe tohi fēnei e te ʼapositolo ko Paulo: “ ʼAki pē te tagata e tahi neʼe hū te agahala ki te mālamanei, pea ʼaki te agahala te mate, pea koia kua mafola ai te mate ki te tagata fuli pē koteʼuhi kua natou agahala fuli.” (Loma 5:12) ʼI totatou ʼuhiga hōloga ʼo Atama, ʼe puleʼi tātou fuli e te lao ʼo te agahala pea mo te mate. ʼE uga tuʼumaʼu tātou e totatou kakano agahala ke tou fai te ʼu meʼa ʼaē ʼe mole leleiʼia e te ʼAtua, pea ʼe iku ia ki te mate. ʼI tana tohi ki te kau Kalate, neʼe ʼui e Paulo ko te ʼu taʼi aga mo agaaga ʼaia ʼe ko “te ʼu gāue ʼo te kakano.” Pea neʼe ina ʼui fēnei leva: “Ko nātou ʼaē ʼe natou fai te ʼu taʼi meʼa ʼaia ʼe mole natou maʼu anai te Puleʼaga ʼo te ʼAtua.” (Kal. 5:19-21) Ko te hahaʼi ʼaia ʼe ko nātou pē ʼaē ʼe haʼele ʼo mulimuli ki te kakano. (Loma 8:4) Ko tanatou aga pea mo tonatou faʼahiga maʼuli ʼe mulimuli kātoa pē ki te ʼu meʼa ʼaē ʼe holi kiai tonatou kakano. Kae ko nātou ʼaē ʼe fai folonikāsio, tauhi tamapua, gaohi meʼa fakatemonio, peʼe ko ʼihi atu agahala mamafa ʼe ko nātou pē koa ʼaia ʼe haʼele ʼo mulimuli ki te kakano? Kailoa ia, heʼe toe kau ki te ʼu gāue ʼo te kakano te ʼu agaaga ʼaē ʼe lagi ʼui e ʼihi ko he ʼu  vaivaiʼaga, ohagē lā ko te maheka, te ʼitaʼita, te kē pea mo te fuaʼā. Ko ai koa ʼaē ʼe ina lava ʼui ʼe mole kei haʼele ia ʼo mulimuli ki te kakano?

11, 12. Koteā ʼaē neʼe fai e Sehova ke tou lava tauʼi te lao ʼo te agahala pea mo te mate, pea koteā ʼaē ʼe tonu ke tou fai ke tou maʼu ia tona ʼofa?

¹¹ ʼE tou fiafia heʼe fakafealagia mai e te ʼAtua kiā tātou ke tou lava tauʼi te lao ʼo te agahala pea mo te mate! Neʼe ʼui fēnei e Sesu: “Ko te ʼAtua, ʼi tona ʼofa lahi ki te mālamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kiā te ia, ke ʼaua naʼa fakaʼauha kae ke ina maʼu ia te maʼuli heʼegata.” ʼAki tatatou ʼofa ki te ʼAtua pea mo tui ki te sākilifisio faitotogi ʼo Sesu Kilisito, ʼe feala ai ke tou ʼāteaina mai te tūʼā ʼo totatou ʼuhiga agahala. (Soa. 3:16-18) Koia ʼe feala ke tou fai ohagē ko Paulo ʼo kalaga fēnei: “ ʼE au fakafetaʼi ki te ʼAtua ʼaki ia Sesu Kilisito totatou ʼAliki!”

¹² ʼE hagē pē totatou ʼaluʼaga ko he faitoʼo ʼo he mahaki ʼe kovi. Kapau ʼe tou loto ke lelei totatou mahaki, pea ʼe tonu ke tou mulimuli lelei ki te ʼu meʼa ʼaē ʼe ʼui mai e te tōketā. Logolā ʼe feala ke tou ʼāteaina mai te lao ʼo te agahala pea mo te mate mo kapau ʼe tou tui ki te sākilifisio faitotogi ʼa Kilisito, kae ʼe kei tou heʼe haohaoa pea mo agahala pē. ʼE ʼi ai te tahi faʼahi ʼe ʼaoga, ke tou felōgoi lelei ai mo te ʼAtua pea mo maʼu ia tona ʼofa pea mo tana ʼu tapuakina. Ke feala ke fakahoko “te fakamaʼua faitotonu ʼa te Lao,” neʼe ʼui e Paulo ʼe tonu ke tou haʼele ʼo mulimuli ki te laumālie.

Tou Haʼele ʼo Mulimuli Ki Te Laumālie—ʼO Feafeaʼi?

13. Koteā te fakaʼuhiga ʼo te haʼele ʼo mulimuli ki te laumālie?

¹³ Mokā tou haʼele, ʼe tou kaku māmālie pē anai ki te faʼahi ʼaē ʼe tou ʼolo kiai. Koia, kā tou haʼele ʼo mulimuli ki te laumālie ʼe tonu ke tou haga tuputupu ʼi te faʼahi fakalaumālie, kae ʼe mole fakaʼuhiga ia ke tou haohaoa. (1 Tim. 4:15) ʼE tonu ke tou faiga mālohi ʼi te ʼaho fuli, pea mo totatou ʼu fealagia kātoa ʼo haʼele peʼe tou maʼuli ʼo mulimuli ki te takitaki ʼo te laumālie. ʼI tatatou “haʼele ʼaki te laumālie,” ʼe tou maʼu ai te ʼofa ʼo te ʼAtua.—Kal. 5:16.

14. ʼE feafeaʼi te manatu mo te aga ʼo nātou ʼaē ʼe “mulimuli ki te kakano”?

¹⁴ ʼI tana tohi ʼaē ki te kau Loma, neʼe palalau leva ia Paulo ʼo ʼuhiga mo faʼahiga hahaʼi e lua, ʼe natou maʼu te ʼu faʼahiga manatu kehekehe. (Lau ia Loma 8:5.) ʼI henī ʼe mole fakaʼuhiga pē te kakano ki te sino. ʼI te Tohi-Tapu, ʼe fakaʼaogaʼi ʼi ʼihi temi te kupu “kakano” moʼo talanoa ki te agahala pea mo te ʼuhiga heʼe haohaoa ʼo te kakano. Ko te tupuʼaga lā ʼaia ʼo te fihi ʼo te kakano mo te ʼatamai ʼaē neʼe toe talanoa kiai ia Paulo ʼi te tohi ʼo Loma. Kae ko nātou ʼaē ʼe natou  “mulimuli ki te kakano,” ʼe mole natou hagē ko Paulo, heʼe mole natou tauʼi pē lā te faʼahi ʼaia. ʼE mole natou fakakaukauʼi peʼe koteā ʼaē ʼe fakamaʼua e te ʼAtua kiā nātou, pea ʼe mole natou tali te tokoni ʼaē ʼe ina foaki age, kae ʼe ‘manatu pē nātou ki te ʼu meʼa ʼo te kakano.’ ʼI te agamāhani ʼe natou tōkakaga tāfito ke natou maʼuli fīmālie pea mo mulimuli ki tonatou ʼu holi fakasino. Kae ko nātou ʼaē ʼe “mulimuli ki te laumālie,” ʼe “natou manatu ki te ʼu meʼa ʼo te laumālie”—ia te ʼu fakatuʼutuʼu pea mo te ʼu gāue fakalaumālie.

15, 16. (a) ʼE lava fakatupu kovi feafeaʼi ki tatatou manatu ia te faʼahi ʼaē ʼe tuku kiai tatatou fakakaukau? (b) Koteā ʼaē ʼe feala ke tou ʼui ʼo ʼuhiga mo te faʼahiga manatu ʼa te tokolahi iā ʼaho nei?

¹⁵ Lau ia Loma 8:6. Mokā fai e he tahi he meʼa, ʼe lelei peʼe kovi, neʼe tonu ke ina tuku kiai tana fakakaukau. Ko te hahaʼi ʼaē ʼe natou tuku tuʼumaʼu tanatou fakakaukau ki te ʼu meʼa ʼo te kakano, mole tuai pea natou fakahoko pē anai te ʼu meʼa ʼo te kakano. ʼI te agamāhani, ko te ʼu faʼahi ʼaia ʼaē ʼe natou logoʼi ʼi tonatou loto, mo tōkakaga tāfito kiai pea mo manako kiai.

¹⁶ Koteā te ʼu meʼa ʼaē ʼe maʼumaʼua kiai te tokolahi iā ʼaho nei? Neʼe tohi fēnei e te ʼapositolo ko Paulo: “Ko te ʼu meʼa fuli ʼaē ʼe ʼi te mālamanei—te holi ʼo te kakano, te holi ʼo te ʼu mata pea mo te fakahāhā ʼo tota ʼu koloa—ʼe mole haʼu ia mai te Tamai, kae haʼu ia mai te mālamanei.” (1 Soa. 2:16) ʼE kau ki te ʼu holi ʼaia ia te ʼu aga ʼaē ko te felāveʼi fakasino ʼa he tahi mo he ʼu hahaʼi kehekehe, mo te fia māʼoluga pea mo te fia maʼu koloa. ʼE tau hā te ʼu taʼi aga ʼaia ʼi te ʼu tohi, mo te ʼu nusipepa, mo te ʼu ʼata, mo te ʼu polokalama televisio, pea mo te Neti, heʼe tuku tāfito kiai e te tokolahi tonatou fakakaukau pea mo fia fai moʼoni kiai. Kae “ko te manatu ki te kakano ko tona fakaʼuhiga ko te mate”—ʼi te faʼahi fakalaumālie ʼi te temi nei pea ʼi te faʼahi fakasino ʼi te kā haʼu. Koteā tona tupuʼaga? “Koteʼuhi ko te manatu ki te kakano ko tona fakaʼuhiga ʼe ko he fakafeagai ki te ʼAtua, koteʼuhi ʼe mole fakalogo ia ki te lao ʼa te ʼAtua pea ʼe tatau aipē ʼe mole pē feala ia.”—Loma 8:7, 8.

17, 18. ʼE lava feafeaʼi hatatou haga manatu ki te laumālie, pea koteā anai tona fua mokā tou fai te faʼahi ʼaia?

¹⁷ ʼI te tahi faʼahi, “ko te manatu ki te laumālie ko tona fakaʼuhiga ko te maʼuli pea mo te tokalelei”—ʼi te kā haʼu ia te maʼuli heʼegata, pea ʼi te temi nei ko he loto ʼe tokalelei pea mo he ʼu felōgoi ʼe tokalelei mo te ʼAtua. ʼE lava feafeaʼi hatatou haga “manatu ki te laumālie”? ʼAki tatatou tuku tuʼumaʼu totatou fakakaukau ki te ʼu meʼa ʼo te laumālie pea mo tou fakatuputupu iā tātou he ʼu manatu mo he ʼu aga fakalaumālie. ʼI tatatou fai te faʼahi ʼaia, ko tatatou ʼu manatu ʼe “fakalogo . . . ki te lao ʼa te ʼAtua” pea ʼe “mulimuli ki” tana ʼu manatu. Mokā tou tau mo he fakahala, ʼe tou ʼiloʼi papau anai peʼe koteā ʼaē ʼe tonu ke tou fai. ʼE tou fai anai te tonu ʼaē ʼe lelei—te tonu ʼaē ʼe mulimuli ki te laumālie.

¹⁸ Koia ʼe maʼuhiga ke tou tuku tatatou fakakaukau ki te ʼu meʼa ʼo te laumālie. ʼE tou fai te faʼahi ʼaia ʼaki tatatou ‘fakaʼaogaʼi kātoa totatou fakakaukau ki te gāue,’ ʼo tou fakamuʼamuʼa ʼi totatou maʼuli ia te faʼahi fakalaumālie, ʼaē ko te faikole tuʼumaʼu, te lau mo ako ʼo te Tohi-Tapu mo te kau ki te ʼu fono pea mo te fai fakamafola. (1 Pet. 1:13) ʼAua naʼa tou tuku ke fakaleluʼi tātou e te ʼu meʼa ʼo te kakano, kae ke tou tuku tatatou fakakaukau ki te ʼu meʼa ʼo te laumālie. ʼE tou haga haʼele anai ʼo mulimuli ki te laumālie. ʼI tatatou fai te faʼahi ʼaia ʼe tou maʼu ai anai he ʼu tapuakina, koteʼuhi ʼe fakaʼuhiga te manatu ki te laumālie ki te maʼuli pea mo te tokalelei.—Kal. 6:7, 8.

ʼE Feala Koa Hakotou Fakamahino?

• Neʼe koteā “te meʼa ʼaē neʼe mole feala ke fai ʼi te faʼahi ʼo te Lao,” pea neʼe lava tauʼi feafeaʼi e te ʼAtua te faʼahi ʼaia?

• Koteā “te lao ʼo te agahala pea mo te mate,” pea ʼe feafeaʼi hatatou lava ʼāteaina mai ai?

• Koteā ʼaē ʼe tonu ke tou fai ke fakatuputupu ai tatatou “manatu ki te laumālie”?

[ʼU fehuʼi ʼo te ako]

[Paki ʼo te pāsina 16, 17]

ʼE kotou haʼele koa ʼo mulimuli ki te kakano peʼe ʼo mulimuli ki te laumālie?