Ko Te Moʼoni ʼe Ina Lava Fetogi Tokotou Maʼuli

NEʼE lagi kua kotou logo pe neʼe akoʼi atu te ʼu loi ʼo ʼuhiga mo te ʼAtua ʼaē neʼe fakahā ʼi te ʼu ʼalatike ʼaenī e nima. Kae ʼe lagi kei kotou lotolotolua ke kotou fetogi te ʼu akonaki ʼaē ʼe kotou tui kiai, tāfito lā mo kapau kua kotou tui kiai talu mai fualoa.

ʼE matou mahino ki takotou lotolotolua ʼaia. Ko ʼihi lotu ʼe mole natou fakalotomālohi ke fakatatau tanatou ʼu akonaki pea mo te manatu ʼaē ʼe tuʼu ʼi te Tohi-Tapu. Ko ʼihi ʼe faiga ke natou lagolago ki te ʼu akonaki loi ʼo natou ʼui ko te Tohi-Tapu ʼe faigataʼa fau, ʼe mole feala ke mahino kiai te hahaʼi fuli. Kae tokolahi ʼi te ʼu tisipulo ʼa Sesu neʼe ko he ʼu hahaʼi māhani, neʼe mole kau ʼi te ʼu ako lalahi, pea neʼe natou mahino gafua ki te ʼu meʼa ʼaē neʼe akoʼi age e Sesu.—Gāue 4:13.

ʼE toe feala foki ke mole kotou fia vakavakaʼi peʼe moʼoni takotou ʼu akonaki, ʼi takotou tuʼania ʼaē naʼa fakahā ai takotou mole tui. Kae ʼe fakapotopoto anai koa te mole leleiʼia ʼo koutou e te ʼAtua heʼe kotou kumi ke kotou mahino ki tana ʼu fakamaʼua ʼi te Tohi-Tapu, tana logo ʼaē neʼe ina foaki ki te mālamanei? Kailoa ia, kae ʼe fakalotomālohiʼi koutou ʼi tana Folafola ke kotou vakavakaʼi e koutou totonu ia te Tohi-Tapu, heʼe ʼui fēnei ai: “[Ke kotou] ʼiloʼi papau peʼe koteā te finegalo ʼo te ʼAtua, tona lelei, tona tali lelei, pea mo tona haohaoa.”—Loma 12:2.

Ko tatatou ako ʼaē te moʼoni ʼo ʼuhiga mo te ʼAtua, ʼe mole ko he ako pē ia ʼo te ʼatamai, kae ʼe ina lava fetogi tokotou maʼuli ke lelei age. (Soane 8:32) Ko Deanne ʼaē neʼe tou talanoa ki ai ʼi te ʼuluaki ʼalatike, kua ina fakatuputupu ʼi te temi nei tana tui ki te Folafola ʼa te ʼAtua. ʼE ina ʼui fēnei: “Neʼe mole au manatu ʼi he ʼaho ʼe mahino gafua ia te Tohi-Tapu ʼo aʼu ki taku kamata ako te Tohi-Tapu. ʼI te temi nei kua au ʼiloʼi ia Sehova, ʼe mole ko he mālohi pē ia, kae ʼe ko taku Tamai ʼofa ʼaē ʼi selō. Kua au maʼu he fakatuʼutuʼu moʼoni ʼi toku maʼuli.”

ʼI muʼa atu neʼe lagi kotou ako te Tohi-Tapu, kae neʼe kotou manatu ʼe mole hona fua lelei kiā koutou. Kapau koia, pea ʼaua naʼa kotou lotovaivai. Ko takotou faiga ʼaē ke kotou mahino ki te Tohi-Tapu kae neʼe akoʼi atu he ʼu loi ʼo ʼuhiga mo te ʼAtua, ʼe hagē ia ko hakotou faiga ke kotou fakapikipiki te ʼu piesi ʼo he masini kae ʼe kotou fakaʼaogaʼi kiai te tohi ʼaē mole lelei. Lagi kua kotou fakapikipiki ʼihi piesi ʼo te masini, kae ʼe mole kotou hoko atu heʼe kotou ʼita ʼi takotou mole lava fakapikipiki te toe ʼo te masini. Kae mokā ʼe kotou fakaʼaogaʼi te tohi ʼaē ʼe lelei, pea ʼe feala anai hakotou fakapikipiki ia te masini kātoa.

ʼE kotou fia ako koa te moʼoni ʼo ʼuhiga mo te ʼAtua? ʼE matou fakaafe atu koutou ke kotou felōgoi mo te kau Fakamoʼoni ʼa Sehova ʼo tokotou telituale, peʼe ke kotou faitohi ki te tuʼasila totonu ʼo tokotou fenua ʼaē ʼe tuʼu ʼi te pāsina 4 ʼo te nusipepa ʼaenī, ke fai hakotou ako Tohi-Tapu ʼe mole totogi.

[Fakamatala ʼo te pāsina 9]

“[Ke kotou] ʼiloʼi papau peʼe koteā te finegalo ʼo te ʼAtua, tona lelei, tona tali lelei, pea mo tona haohaoa.”—LOMA 12:2