Kua Kotou ʼIloʼi Koa?

He koʼē neʼe ʼi ai te kau fetogi paʼaga ʼi te fale lotu ʼo Selusalemi?

▪ ʼI muʼa ʼo tana mate, neʼe palalau ia Sesu ʼo ʼuhiga mo te aga heʼe faitotonu neʼe hoko ʼi te fale lotu. ʼE fakamatala fēnei ʼi te Tohi-Tapu: “Neʼe . . . kapu [e Sesu] ia nātou fuli ʼaē neʼe fai fakatau pea mo nātou ʼaē ʼe totogi manu ʼi te fale lotu; pea neʼe ina holoki te ʼu laupapa ʼo te kau fetogi paʼaga, pea mo te ʼu hekaʼaga ʼo nātou ʼaē ʼe fakatau lupe. Pea neʼe ʼui māʼana kia nātou: ‘ ʼE tohi fēnei: “Ko toku fale ʼe fakahigoa anai ia ko te fale faikole,” kae kua gaohi ia e koutou ko he ʼana ʼo he kau kaihaʼa.’ ”—Mateo 21:12, 13.

Ko te kau Sutea pea mo te kau poloselite Sutea ʼo te ʼuluaki sēkulō neʼe natou folau mai te ʼu fenua pea mo te ʼu kolo kehekehe ki te fale lotu ʼo Selusalemi, ʼo natou ʼaumai te paʼaga ʼo tonatou fenua. Kae, neʼe tonu ke natou maʼu te falā ʼa te kau Sutea ke natou totogi ʼi te taʼu fuli te tukuhau ʼo te fale lotu, te ʼu manu ki te sākilifisio pea mo fai he ʼu meʼa ʼofa. Koia, ko te kau fetogi paʼaga neʼe natou fetogi te paʼaga ʼaē neʼe ʼaumai e te hahaʼi mai te ʼu koga meʼa kehekehe ki te falā ʼa te kau Sutea kae neʼe maʼua ke totogi nātou. ʼI te kua tau ovi mai ʼo te ʼu lafeti ʼa te kau Sutea, ko te kau fetogi paʼaga neʼe natou fakatuʼu ʼonatou laupapa ʼi te Malaʼe ʼo Te Kau Senitile ʼi te fale lotu.

ʼAki te ʼui ʼaē ʼa Sesu neʼe fakaliliu ʼe te kau fetogi paʼaga te fale lotu ko “he ʼana ʼo te kau kaihaʼa,” ʼe hā mai ai neʼe mamafa fau te falā ʼaē neʼe natou fakamaʼua ki te hahaʼi.