Neʼe Lohiʼi Koa Koutou?

MOKĀ kotou ʼiloʼi neʼe lohiʼi koutou e he tahi ʼe kotou falala ki ai, pea ʼe kotou mamahi ʼaupitō ai. Neʼe lagi kotou logoʼi neʼe fakalainoaʼi koutou, pe neʼe kākāʼi koutou, peʼe kotou ʼiʼita ai. Ko nātou ʼaē ʼe loi, ʼe natou maumauʼi te ʼu fakakaumeʼa pea mo te ʼu maʼuli fakataumātuʼa, pea ʼe natou kaihaʼa mai te hahaʼi te lauʼi miliona falā.

Kae kotou fakakaukauʼi age muʼa peʼe kotou feafeaʼi anai mo kapau ʼe kotou ʼiloʼi neʼe lohiʼi koutou ʼo ʼuhiga mo te ʼAtua. Kapau ʼe kotou tauhi fakamālotoloto ki takotou lotu, pea ʼe feala ke malave loto kiā koutou ohagē ko te ʼu hahaʼi lotu ʼaenī:

● “Neʼe hagē kiā au neʼe kākāʼi au e te ʼēkelesia.”—DEANNE.

● “Neʼe au ʼita. Neʼe hagē neʼe lohiʼi au, ko taku ʼu ʼamanaki pea mo taku ʼu fakatuʼutuʼu kua vaʼiganoa ia.”—LUIS.

ʼE lagi kotou manatu neʼe mole feafeala ke lohiʼi koutou ʼo ʼuhiga mo te ʼAtua. Ko te ʼu meʼa ʼaē ʼe kotou ʼiloʼi ʼe lagi neʼe kotou ako mai he tahi ʼe kotou falala ki ai pea ʼe mole ina loto anai ʼi he temi ke kotou lotomamahi, lagi ko takotou ʼu mātuʼa, peʼe ko he pātele, peʼe ko he pasitea, peʼe ko hokotou kaumeʼa lelei. Lagi ʼe kotou tui ki he faʼahiga akonaki talu mai takotou tutupu. Kae ʼe kotou tali anai koa te manatu ʼaē, ko he akonaki kua mafola ʼe feala ia ko he loi? Ko te Pelesitā ʼāfea ʼo Amelika ko Franklin D. Roosevelt, neʼe fakamoʼoni ki te faʼahi ʼaia he neʼe ina ʼui fēnei: “ ʼE mole liliu anai he loi ʼo moʼoni mokā tou lau liuliuga.”

ʼE kotou lava ʼiloʼi feafeaʼi pe neʼe lohiʼi koutou? ʼI te tahi lakaga, ʼi tana faikole ki te ʼAtua neʼe ʼui fēnei e Sesu: “Ko tau folafola ʼe moʼoni.” (Soane 17:17) ʼEī, ʼi te Folafola ʼa te ʼAtua, ia te Tohi-Tapu, ʼe tou maʼu ai ia faʼahi fuli ʼaē ʼe ʼaoga kiā tātou ke tou fakakehekeheʼi te moʼoni mai te ʼu loi.

He koʼē ʼe mole kotou tuku te Tohi-Tapu ke ina fakamahino atu te ʼu loi e nima ʼo ʼuhiga mo te ʼAtua ʼaē logo māhani kiai te hahaʼi? ʼE kotou sio anai peʼe lava feafeaʼi ki te moʼoni ke ina fetogi tokotou maʼuli ke lelei age.