Tou Tokoni Ki Te Hahaʼi Tagata Ke Natou Tuputupu ʼi Te Faʼahi Fakalaumālie

“Ko te temi leva ʼaē, ko te [hahaʼi] ʼaē kā ke puke maʼuli.”—LUKA 5:10.

1, 2. (a) Neʼe tali feafeaʼi te hahaʼi tagata ki te fai fakamafola ʼa Sesu? (b) Koteā ʼaē kā tou vakaʼi ʼi te ʼalatike ʼaenī?

 ʼI TANATOU fai fakamafola ʼi Kalilea, ko Sesu pea mo tana ʼu tisipulo neʼe natou ʼolo ʼi te vaka ki he koga meʼa lāvaki. Kae neʼe muliʼi lalo nātou e te hahaʼi. Ko nātou ʼaē neʼe ʼomai ʼi te ʼaho ʼaia neʼe “fakaʼalu ki te toko nima afe tagata, kae mole lau te fafine mo te kihiʼi tamaliki.” (Mat. 14:21) ʼI te tahi lakaga, neʼe fakaovi age te hahaʼi kiā Sesu, he neʼe natou loto ke ina fakamālōlō nātou pea mo fia fagono ki tana ʼu palalau. Neʼe kau kiai “te toko fā afe tagata, kae mole lau te fafine mo te kihiʼi tamaliki.” (Mat. 15:38) ʼE hā mai, neʼe tokolahi te hahaʼi tagata iā nātou ʼaē neʼe ʼomai kiā Sesu pea mo natou fia logo ki tana faiakonaki. ʼI tona fakahagatonu, neʼe ina ʼiloʼi ʼe tokolahi anai ʼihi ʼe natou tali te moʼoni, heʼe ʼi tana ʼosi fakahoko te gelu fakamilakulo, neʼe ʼui fēnei ʼe Sesu ki te tahi ʼo tana ʼu tisipulo: “Ko te temi leva ʼaē, ko te ʼu tagata [peʼe ko te hahaʼi] ʼaē kā ke puke maʼuli.” (Luka 5:10) Koia neʼe tonu ai ki tana ʼu tisipulo ke natou ʼaʼau tanatou kupega ki te tai ʼaē ko te mālamanei, pea hoki feala ai leva ke natou puke te faʼahiga hahaʼi kehekehe, ʼe kaugamālie kiai te hahaʼi tagata.

² Iā ʼaho nei, ʼe toe fakahā pē e te hahaʼi tagata tanatou fia logo pea mo tanatou tali lelei te logo ʼaē ʼe tou fakamafola mai te Tohi-Tapu. (Mat. 5:3) Kae tokolahi ʼe mole tuputupu ʼi te faʼahi fakalaumālie. ʼE tou lava tokoni feafeaʼi kiā nātou? Logolā neʼe mole fakatuʼu e Sesu he minisitelio makehe moʼo kumi te hahaʼi tagata, kae ʼe mahino ia neʼe felāveʼi mo te ʼu faʼahi neʼe tuʼania kiai te hahaʼi tagata ʼo tona temi. ʼAki tatatou fakaʼaogaʼi ia tana faʼifaʼitaki, tou vakaʼi age muʼa peʼe tou lava tokoni feafeaʼi ki te hahaʼi tagata ke natou tauʼi ia faʼahi e tolu ʼe natou tuʼania māhani kiai iā ʼaho nei: (1) te taupau ʼo te maʼuli, (2) te tuʼania ki te manatu ʼa te hahaʼi, pea mo (3) te manatu ʼaē ʼe mole kita lava fai he meʼa.

Te Taupau ʼo Te Maʼuli

3, 4. (a) Koteā ʼaē ʼe maʼuhiga age ki te tokolahi ʼo te hahaʼi tagata? (b) He koʼē ʼe fakamuʼamuʼa age e te hahaʼi tagata te taupau ʼo tonatou maʼuli ʼi te ʼu gāue fakalaumālie?

³ Neʼe ʼui fēnei e te sekelipa kiā Sesu: “Faiako, ʼe au mulimuli anai iā te koe ʼi te potu fuli pē ʼe ke ʼalu kiai.” Kae ʼi te temi ʼaē neʼe ʼui age e Sesu ʼe “mole he potu ʼo te Foha ʼo te tagata ke ʼuluga ai tona ʼulu,” neʼe fakahemala ai te sekelipa. Neʼe lagi mole faʼa tali e te sekelipa tana mole ʼiloʼi ʼaē peʼe koteā anai tana meʼa kai peʼe maʼuli anai ʼifea, heʼe mole ʼui ʼi te Tohi-Tapu neʼe liliu ko he tisipulo ʼa Kilisito.—Mat. 8:19, 20.

⁴ ʼI te agamāhani ʼe fakamuʼamuʼa age e te hahaʼi tagata te maʼuli koloaʼia ʼi te ʼu gāue fakalaumālie. ʼE fakamuʼamuʼa e te tokolahi iā nātou ia te maʼu pepa lalahi pea mo he gāue ʼe totogi lelei. ʼO mulimuli ki tanatou faʼahiga manatu, ʼe maʼuhiga pea mo ʼaoga age te ʼu lelei ʼaē ʼe natou maʼu mai te falā, ʼi te ʼu tapuakina ʼaē ʼe feala ke natou maʼu mai tanatou ako te Tohi-Tapu pea mo felōgoi lelei mo te ʼAtua. ʼE feala ke natou leleiʼia te ʼu faʼahi ʼaē ʼe natou ako ʼi te Tohi-Tapu, kae “ko te ʼu hoha ʼo te tuʼu ʼo te ʼu faʼahiga meʼa ʼaenī pea mo te mālohi fakahala ʼo te ʼu koloa” ʼe nā taʼotaʼo tanatou fia ako te moʼoni. (Mko. 4:18, 19) Tou vakaʼi pe neʼe tokoni feafeaʼi ia Sesu ki tana ʼu tisipulo ke natou filifili te gāue ʼaē neʼe maʼuhiga age.

5, 6. Koteā ʼaē neʼe tokoni kiā Atelea, mo Petelo, mo Sake, pea mo Soane ke natou filifili te gāue ʼaē neʼe maʼuhiga age?

⁵ Ko Atelea mo tona tehina ko Simone Petelo  neʼe nā gāue fakatahi ʼi te gelu. Neʼe toe gāue fakatahi mo nāua ia Soane mo tona tehina ko Sake pea mo tanā tamai ko Sepeteo. ʼI te haʼele lelei ʼo te gāue, neʼe maʼua leva ke ʼi ai he tahi ʼu tagata gāue. (Mko. 1:16-20) ʼI te temi ʼaē neʼe fakahā age e Soane Patita ia Sesu kiā Atelea mo Soane, neʼe nā tui papau ai kua nā maʼu te Mēsia. Ki muli age neʼe tala e Atelea te logo ʼaia ki tona tehina ko Simone Petelo, pea lagi neʼe toe fai fēia mo Soane ki tona tehina ko Sake. (Soa. 1:29, 35-41) ʼI te ʼu māhina ʼaē neʼe hoa kiai, neʼe fakatahi te foʼi toko fā ʼaia mo Sesu ʼi tana fai fakamafola ʼi Kalilea, mo Sutea, pea mo Samalia. Pea neʼe toe liliu leva te ʼu tisipulo ʼaia e toko fā ki tanatou gāue tautai. Neʼe natou leleiʼia te ʼu faʼahi fakalaumālie, kae neʼe mole maʼuhiga kiā nātou te fai fakamafola.

⁶ Ki muli age, neʼe fakaafe e Sesu ia Petelo pea mo Atelea ke nā mulimuli iā te ia pea mo liliu ko “te ʼu tautai tagata.” Neʼe koteā tanā tali? “Neʼe nā tuku atu aipē te ʼu kupega, kae nā mulimuli iā te ia.” Neʼe toe fēia mo Sake pea mo Soane. “Neʼe nā tuku atu aipē te vaka mo tanā tamai, kae nā mulimuli iā te ia.” (Mat. 4:18-22) Koteā ʼaē neʼe tokoni ki te ʼu tagata ʼaia ke natou filifili te gāue fai fakamafola temi kātoa? Neʼe ko he tonu koa neʼe mole natou fakakaukau kiai? Kailoa ia! ʼI ni ʼu māhina ki muʼa atu, ko te ʼu tagata ʼaia neʼe natou fagono ki te ʼu palalau ʼa Sesu, mo sio mata ki tana ʼu milakulo, mo tana loto mālohi ki te faitotonu, pea mo te punamaʼuli ʼaē ʼa te hahaʼi ki tana fai fakamafola. Neʼe liliu ai ʼo mālohi tanatou tui ʼaē kiā Sehova pea mo tanatou falala ʼaē kiā te ia!

 7. ʼE tou lava tokoni feafeaʼi ki tatatou kau ako Tohi-Tapu ke natou falala ki te fealagia ʼaē ʼa Sehova ke tokaga ki tana hahaʼi?

⁷ ʼE feafeaʼi hatatou lava faʼifaʼitakiʼi ia Sesu ʼi tatatou tokoni ʼaē ki tatatou kau ako Tohi-Tapu ke natou falala kiā Sehova? (Taag. 3:5, 6) ʼE ʼaoga ʼaupitō ki te faʼahi ʼaia ia tatatou faʼahiga faiako. ʼI te temi ʼaē ʼe tou faiako ai, ʼe feala ke tou fakahā lelei age te fakapapau ʼa Sehova ke ina tapuakiʼi lahi tātou mo kapau ʼe tou fakamuʼamuʼa te ʼu gāue ʼo te Puleʼaga. (Lau ia Malakia 3:10; Mateo 6:33.) Logolā ʼe feala ke tou fakaʼaogaʼi he ʼu vaega Tohi-Tapu kehekehe moʼo fakahā lelei ko Sehova ʼe tokaga ki tana hahaʼi, kae ʼaua naʼa galo kiā tātou te maʼuhiga ʼo tatatou faʼifaʼitaki. ʼI tatatou fakamatalatala he ʼu meʼa neʼe hoko ʼi totatou maʼuli, ʼe feala ke tokoni lahi ki tatatou kau ako ke natou fakatuputupu tanatou falala kiā Sehova. ʼE toe feala foki ke tou fakamatala he ʼu hisitolia ʼe fakalotomālohi neʼe tou lau ʼi tatatou ʼu tohi. a

 8. (a) He koʼē ʼe maʼuhiga ki he tahi ʼe ako Tohi-Tapu ke ina ‘ ʼahiʼahi pea mo vakaʼi ko Sehova ʼe lelei’? (b) ʼE feafeaʼi hatatou lava tokoni kiā ia ʼaē ʼe ako ke sio tonu ko Sehova ʼe lelei?

⁸ Ko te fakatuputupu ʼo he tui ʼe mālohi ʼe mole gata ʼaki pē te lau pea mo logo ki te tapuakinaʼi ʼo ʼihi e Sehova. ʼE toe ʼaoga foki kiā ia ʼaē ʼe ako ke sio ʼi tona maʼuli totonu ko Sehova ʼe lelei. Neʼe hiva fēnei e te tagata fai pesalemo: “Kotou ʼahiʼahi pea mo kotou vakaʼi ko Sehova ʼe lelei. Manūʼia te tagata mālohi ʼaē ʼe hola kiā te ia.” (Pes. 34:8) ʼE feafeaʼi hatatou lava tokoni ki he tahi ʼe ako ke sio ko Sehova ʼe lelei? Kapau lā ko he tahi ʼe ako ʼe tau mo he ʼu fihifihia fakaekonomika pea ʼe toe faiga ke ina tauʼi he agamāhani ʼe kovi, ohagē lā ko te suluka, te gaoʼi paʼaga, peʼe ko te ʼinu fakavale. (Taag. 23:20, 21; 2 Ko. 7:1; 1 Tim. 6:10) Kapau anai ʼe tou akoʼi age ke faikole kiā Sehova ke tokoni age moʼo tauʼi tana agamāhani ʼaē ʼe kovi, ʼe mole koa lā ko he tokoni ʼaia kiā ia ke sio ko Sehova ʼe lelei? Tou toe vakaʼi peʼe koteā ʼaē ʼe feala ke hoko mokā tou fakalotomālohi ia ia ʼaē ʼe ako ke  ina fakamuʼamuʼa te ʼu meʼa fakalaumālie, ʼaki tana fakatuʼutuʼu ʼaē ke ina ako te Tohi-Tapu ʼi te vāhaʼa fuli, pea mo teuteuʼi te ʼu fono mo kau kiai. ʼE mālohi age anai tana tui heʼe sio tonu ki te haga ʼaē ʼa Sehova ʼo tapuakinaʼi tana ʼu faiga.

Te Tuʼania Ki Te Manatu ʼa Te Hahaʼi

9, 10. (a) He koʼē ko Nikotemo pea mo Sosefo mai Alimatea neʼe nā fufū tanā tui kiā Sesu? (b) He koʼē ko ʼihi tagata iā ʼaho nei ʼe mole natou fia mulimuli iā Kilisito?

⁹ Ko ʼihi tagata ʼe lagi mole natou fia mulimuli kātoa iā Kilisito ʼuhi ko te fakaneke ʼa ʼihi. Ko Nikotemo pea mo Sosefo mai Alimatea neʼe nā fufū tanā tui kiā Sesu, koteʼuhi neʼe nā mātataku ki te ʼu meʼa ʼaē kā ʼui peʼe kā fai e te kau Sutea, mo kapau neʼe natou ʼiloʼi. (Soa. 3:1, 2; 19:38) Neʼe ʼi ai te tupuʼaga ʼo tanā mātataku ʼaia. ʼI te lahi fau ʼo te fehiʼa ʼa te kau takitaki lotu iā Sesu, neʼe natou fakamavae he tahi pē ʼi te sinakoka mo kapau neʼe tui kiā te ia.—Soa. 9:22.

¹⁰ ʼI ʼihi koga meʼa iā ʼaho nei, kapau ko he tagata ʼe ina fia ʼiloʼi ia te ʼAtua, te Tohi-Tapu, peʼe ko te lotu, ʼe feala ke gaohi koviʼi e tona ʼu kaugā gāue, peʼe ko tona ʼu kaumeʼa, peʼe ko tona ʼu kāiga. ʼI te tahi age ʼu koga meʼa, ʼe feala pē foki ke toe tuʼutāmaki he tahi mokā ina ʼui ʼe fia fetogi lotu. ʼE feala ke faigataʼa age, tāfito lā mokā ko he tahi ʼe gāue ʼi te sōlia, peʼe ʼi te politike, peʼe maʼu tuʼulaga ʼi tona kolo. Ohagē lā, neʼe ʼui fēnei e te tagata ʼe nofo ʼi Siamani: “ ʼE moʼoni te meʼa ʼaē ʼe kotou fakamafola ʼo ʼuhiga mo te Tohi-Tapu. Kae kapau ʼe au liliu ko he Fakamoʼoni ʼi te ʼaho nei, ʼi ʼapogipogi ʼe ʼiloʼi anai te faʼahi ʼaia e te hahaʼi fuli. Koteā anai te manatu ʼa te hahaʼi ʼo toku fale gāue, toku ʼu vāhaʼa fale, pea mo nātou ʼaē ʼe natou ʼiloʼi au pea mo toku fāmili? ʼE mole feala anai haku kātakiʼi te faʼahi ʼaia.”

11. Neʼe tokoni feafeaʼi ia Sesu ki tana ʼu tisipulo ke natou tauʼi te mataku ʼaē ki te tagata?

¹¹ Logolā neʼe mole fula te ʼu ʼapositolo ʼa Sesu, kae neʼe natou mātataku fuli ki te tagata. (Mko. 14:50, 66-72) Neʼe tokoni feafeaʼi ia Sesu kiā nātou ke natou tuputupu logolā tonatou fakaneke e te hahaʼi? Neʼe teuteuʼi e Sesu tana ʼu tisipulo ki te fakafeagai ʼaē kā hoko anai kiā nātou. Neʼe ina ʼui fēnei: “Manūʼia ia koutou mokā ʼe fehiʼaʼinaʼi ia koutou e te hahaʼi, pea mokā ʼe natou kapu ia koutou mo tauveleʼi ia koutou pea mo liʼaki tokotou higoa ohagē ko he meʼa ʼe kovi, ʼuhi ko te Foha ʼo te tagata.” (Luka 6:22) Neʼe fakatokaga e Sesu ki tana ʼu tisipulo ʼe laukoviʼi anai nātou. Ko te ʼu laukovi fuli neʼe fai “ ʼuhi ko te Foha ʼo te tagata.” Neʼe toe fakapapau age foki e Sesu, ʼe tokaga tuʼumaʼu pē anai te ʼAtua kiā nātou mokā ʼe natou falala ʼe ina foaki age anai tana tokoni pea mo tona mālohi. (Luka 12:4-12) Tahi ʼaē, neʼe fakaafe e Sesu ia nātou ʼaē kei foʼofoʼou ke natou fakatahitahi mo tana ʼu tisipulo pea ke natou liliu ʼo kaumeʼa mo nātou.—Mko. 10:29, 30.

12. ʼE feafeaʼi hatatou lava tokoni kiā nātou ʼaē ʼe kei foʼofoʼou ke natou tauʼi te mataku ʼaē ki te tagata?

¹² ʼE toe ʼaoga foki kiā tātou ke tou tokoni ki tatatou kau ako Tohi-Tapu ke natou tauʼi te mataku ʼaē ki te tagata. ʼI te agamāhani, ʼe faigafua age ki he tahi hana tauʼi he faigataʼaʼia mokā kua teuteu fakatomuʼa kiai. (Soa. 15:19) Ohagē lā he koʼē ʼe mole tou tokoni kiā ia ʼaē ʼe ako ke ina teuteuʼi he ʼu tali Fakatohi-tapu ʼe faigafua mo fakapotopoto, ki he ʼu fehuʼi pea mo he ʼu palalau fakafeagai ʼe feala ke lagaʼi e tona ʼu kaugā gāue pea mo ʼihi atu? ʼI tatatou kua kaumeʼa lelei mo ia, ʼe feala leva ke tou faigaʼi ke feʼiloʼiʼaki ia ia mo ʼihi ʼi te kōkelekāsio, tāfito lā ia nātou ʼe lagi tatau tonatou ʼu ʼaluʼaga  mo ia. ʼE toe maʼuhiga ke tou akoʼi age ki ai ke faikole tuʼumaʼu ʼaki tona loto kātoa. ʼE feala ke tokoni te faʼahi ʼaia kiā ia ke fakaovi ki te ʼAtua pea ke liliu ia Sehova ko tona Holaʼaga pea mo tona Maka.—Lau ia Pesalemo 94:21-23; Sake 4:8.

Te Manatu ʼAē ʼe Mole Kita Lava Fai He Meʼa

13. Ko te manatu ʼaē ʼe mole natou lava fai he meʼa, ʼe ina lava tāʼofi feafeaʼi ʼihi ke mole natou kau ki te ʼu gāue fakalaumālie?

¹³ Ko ʼihi tagata ʼe mole natou fia kau ki te ʼu gāue fakalaumālie heʼe mole natou lautohi lelei, peʼe mole feala hanatou fakamahino lelei tanatou ʼu manatu, peʼe natou umiuminoa. Ko ʼihi tagata ʼe natou ufiufi ʼi te palalau ʼi muʼa ʼo te kaugamālie ʼo ʼuhiga mo tanatou ʼu manatu, peʼe ko te ʼu meʼa ʼaē ʼe natou logoʼi. ʼE faigataʼa ʼaupitō kiā nātou hanatou ako, hanatou tali ʼi te ʼu fono, peʼe natou fai fakamafola. Ko he tehina neʼe ina ʼui, ʼi tana kei tūpulaga, neʼe ʼalu ia ki te ʼu ʼapi, pea neʼe faikākā ia ʼo tukituki te ʼu matapā, pea neʼe mavae fakalogologo ia, mo tana fakaʼamu ʼaē ke ʼaua naʼa logo age he tahi peʼe sio age he tahi. Neʼe ina ʼui fēnei: “ ʼE au mahaki ʼi te manatu pē ʼaē ke au ʼalu ʼo fai fakamafola ʼi te ʼu ʼapi.”

14. He koʼē neʼe mole lava fakamālōlō e te ʼu tisipulo ʼa Sesu te tama ʼaē neʼe ʼulusino ai ia te temonio?

¹⁴ Kotou fakakaukauʼi age muʼa pe neʼe feafeaʼi te kau tisipulo ʼa Sesu, ʼi te temi ʼaē neʼe mole natou lava fakamālōlō te tama ʼaē neʼe ʼulusino ai ia te temonio. Neʼe lagi natou manatu neʼe mole kei natou lava fai he meʼa. Neʼe haʼu te tamai ʼa te tama kiā Sesu pea mo ina ʼui fēnei: “[Ko] toku foha, . . . [ʼe] mahaki moa pea ʼe kovi; ʼe tautau tō ki te afi pea ʼe toe tautau tō ki te vai; pea neʼe kua au ʼaumai ki tau kau tisipulo, kae neʼe mole natou lavaʼi tona fakamālōlō.” Neʼe kapu e Sesu ia te temonio, ʼo ina fakamālōlō ai te tama. Ki muli age neʼe fakaovi te kau tisipulo kiā Sesu pea mo natou fehuʼi fēnei age kiā te ia: “He koʼē neʼe mole matou lavaʼi tona kapu?” Neʼe tali fēnei age e Sesu: “ ʼE tupu ko takotou tui vaivai. Heʼe au tala moʼoni atu kiā koutou: Kapau ʼe kotou maʼu he tui ʼe fualahi ohagē he tegaʼi sinapi, pea ʼe kotou ʼui age anai ki te moʼuga ʼaenī: ‘Hiki ia koe ʼi henī ki he atu,’ pea ʼe hiki anai ia, pea ʼe mole toe faigataʼa anai he meʼa kiā koutou.” (Mat. 17:14-20) Ko te tui kiā Sehova ʼe ʼaoga ke feala hatatou ʼūtakiʼi ia te ʼu faigataʼaʼia ʼaē ʼe hagē ko he ʼu moʼuga. Koteā ʼaē kā hoko mokā ʼe mole kei tui he tahi kiā Sehova kae falala pē ia ki tona ʼu fealagia? ʼI te mole kei hoko ʼaē ʼo tana ʼu fakatuʼutuʼu, ʼe liliu anai ia ʼo manatu ʼe mole kei ina lava fai he meʼa.

15, 16. ʼE feafeaʼi hatatou lava tokoni ki he ako Tohi-Tapu ke ina tauʼi te manatu ʼaē ʼe mole ina lava fai he meʼa?

¹⁵ Ko he faʼahiga tokoni lelei ʼe feala ke tou foaki ki he tahi ʼe ina maʼu te manatu ʼaē ʼe mole ina lava fai he meʼa, ʼe ko tona fakalotomālohi ke tokaga tāfito kiā Sehova kae mole tokaga tāfito kiā ia totonu. Neʼe tohi fēnei e Petelo: “Kotou agavaivai ʼi te lalo nima mālohi ʼa te ʼAtua ke feala hana hiki ia koutou ʼi tona temi faigamālie, ʼo kotou tuku kiā te ia takotou ʼu tuʼania fuli.” (1 Pet. 5:6, 7) ʼE fakamaʼua kiai ke tou tokoni kiā ia ʼaē ʼe ako te Tohi-Tapu mo tātou ke ina leleiʼia te ʼu meʼa fakalaumālie. Ko he tahi ʼe ina leleiʼia te ʼu meʼa fakalaumālie ʼe maʼuhiga ʼaupitō kiā ia te ʼu meʼa fakalaumālie. ʼE manako ia ki te Folafola ʼa te ʼAtua pea ʼe ina fakahā ʼi tona maʼuli “te fua ʼo te laumālie.” (Kal. 5:22, 23) ʼE ko he tagata ʼe faikole tuʼumaʼu. (Filp. 4:6, 7) Tahi ʼaē, ʼe ina kole ki te ʼAtua te lototoʼa pea mo te mālohi ʼaē ʼe ʼaoga kiā ia, moʼo tauʼi he ʼaluʼaga pē peʼe ina fakahoko lelei he gāue pē neʼe kua hinoʼi ki ai.—Lau ia 2 Timoteo 1:7, 8.

¹⁶ ʼE lagi toe ʼaoga foki ki ʼihi kau ako ke tou tokoni age kiā nātou ki tanatou lautohi, ki tanatou faʼahiga palalau, peʼe ki tanatou poto ʼi te faiakonaki. Ko ʼihi ʼe lagi natou manatu ʼe mole tuha mo nātou ke natou tauhi ki te ʼAtua, ʼuhi ko he ʼu aga  ʼe kovi neʼe natou fai ʼi muʼa atu ʼo tanatou ʼiloʼi ia Sehova. ʼI te ʼu ʼaluʼaga ʼaia e lua, ko te lagi faʼahi pē ʼaē ʼe ʼaoga kiā nātou ʼe ko tatatou tokoni kiā nātou ʼaki te ʼofa pea mo te faʼa kātaki. Neʼe ʼui fēnei e Sesu: “ ʼE mole ko te hahaʼi mālolohi ʼaē ʼe ʼaoga ki ai he tōketā, kae ko te hahaʼi mahahaki.”—Mat. 9:12.

“Puke” Ke Lahi Ia Te Hahaʼi Tagata

17, 18. (a) ʼE feafeaʼi hatatou lava maʼu ʼi tatatou minisitelio he ʼu hahaʼi tagata ʼe kaugamālie age? (b) Koteā anai kā tou ako ʼi te ʼalatike ʼaē kā hoa mai?

¹⁷ ʼE tou loto ke kaugamālie age te hahaʼi tagata ʼaē kā natou tali anai te logo fakafiafia lahi ʼaē ʼe maʼu ʼi te Tohi-Tapu. (2 Tim. 3:16, 17) Koia ʼe tou lava maʼu feafeaʼi ʼi tatatou minisitelio he ʼu tagata ʼe kaugamālie age? ʼAki tatatou fakaʼaogaʼi lahi totatou temi ʼi te fai fakamafola ʼi te afiafi, ʼi te hili hoʼatā ʼo te ʼu fakaʼosi vāhaʼa, peʼe lolotoga te ʼu ʼaho mālōlō ʼaē ʼe lahi ai te hahaʼi tagata iō nātou. ʼE feala ki te ʼu tehina ke natou kole ke natou palalau mo te tagata ʼo te ʼapi mokā ʼe feala. Tou fai fagonogono faigamālie ki tatatou ʼu kaugā tagata gāue mokā ʼe feala, pea mo tou tokoni ki te ʼu tagata ʼohoana ʼaē ʼe heʼe tui ʼi te kōkelekāsio ke natou fia logo ki te moʼoni.

¹⁸ Mai tona ʼaluʼaga ʼaē ʼe tou fai fakamafola ki te hahaʼi fuli pē ʼaē ʼe tou felāveʼi mo ia, ʼe feala ke tou falala ʼe tali leleiʼi anai te moʼoni e nātou pē ʼaē ʼe loto fakafetaʼi. ʼAki he faʼa kātaki tou tokoni kiā nātou fuli ʼaē ʼe natou fia ʼiloʼi te moʼoni. Kae ʼe feafeaʼi hatatou lava tokoni ki te ʼu tagata ʼaē kua papitema ʼi te kōkelekāsio, ke natou fakaʼamu pea ke feala hanatou fakahoko he ʼu maʼua ʼi te kōkelekāsio? ʼE tali anai ʼi te ʼalatike ʼaē kā hoa mai ki te fehuʼi ʼaia.

[Nota]

ʼE Kotou Tali Feafeaʼi Anai?

• ʼE tou lava tokoni feafeaʼi ki te hahaʼi tagata ke natou fakamuʼamuʼa te ʼu gāue fakalaumālie?

• ʼE tou lava tokoni feafeaʼi kiā nātou ʼaē ʼe kei foʼofoʼou ke natou tauʼi te fakaneke ʼa ʼihi?

• Koteā ʼaē ʼe lagi feala ke tokoni ki ʼihi ke natou tauʼi te manatu ʼaē ʼe mole natou lava fai he meʼa?

[ʼU fehuʼi ʼo te ako]

[Paki ʼo te pāsina 25]

ʼE kotou maʼu koa he ʼu faigamālie ke kotou tala ki te hahaʼi tagata ia te logo lelei?

[Paki ʼo te pāsina 26]

ʼE kotou lava teuteuʼi feafeaʼi ia ia ʼaē ʼe ako Tohi-Tapu mo koutou ke ina tauʼi te ʼu ʼahiʼahi?