ʼE ʼAoga Koa Te Tali Ki Te Fehuʼi ʼAia?

“Neʼe au kamata fakatahi mo te tamaliki tagata ʼi toku taʼu hogofulu. Neʼe kamata ʼaki pē te tāpiki nima mo te fai ʼuma. Pea ki muli mai, kua matou kamata fāfā ki te ʼu koga tapu ʼo te sino pea mo ʼahiʼahi te ʼu felāveʼi fakasino kehekehe. Neʼe au hū gāue ʼi toku taʼu 15, pea kamata ai ʼi te fale gāue te fakaovi age ʼa te ʼu tagata neʼe fia felāveʼi fakasino mo au. Neʼe au fia fakaneke taku kaugā gāue ke natou kau ki te ʼu fakatahi ʼaia. ʼI taku loto ʼaē ke tali au e nātou ʼaē ʼe matou fakatahi neʼe ʼāsilisili ai taku ʼu felāveʼi fakasino.”—SALA, a OSITALALIA.

ʼE KOTOU punamaʼuli anai ʼi takotou ʼiloʼi ʼaē neʼe lahilahi ake Sala ʼi te loto fale ʼe lotu. Neʼe faigaʼi e tana ʼu mātuʼa ke nā taupau ia ia ke ina maʼuliʼi te ʼu lēkula Fakatohi-tapu ʼo ʼuhiga mo te aga ʼaē ʼe tonu ke fai. Kae neʼe filifili e Sala te tahi maʼuli.

Tokolahi ʼe natou tali anai te filifili ʼaia ʼa Sala. Heʼe natou ʼui ko te manatu ʼa te Tohi-Tapu ʼo ʼuhiga mo te ʼu felāveʼi fakasino ʼe mole kei ʼalutahi mo te temi ʼaenī. Kae ko ʼihi ia, ʼi tanatou manatu ʼe mole fakafeagai ia te aga fakalotu pea mo te faʼifaʼitaliha ʼaē ʼi te ʼu felāveʼi fakasino.

ʼE ʼaoga koa ke kotou mahino pea mo maʼuliʼi te manatu ʼa te Tohi-Tapu ʼo ʼuhiga mo te ʼu felāveʼi fakasino? ʼE tala ʼi te Tohi-Tapu “e hau te Tohi-Tapu katoa mai te tuku manava a te Atua, pea e aoga ia ki te fakaako.” (2 Timoteo 3:16) Kapau ʼe kotou tui ko te ʼAtua neʼe ina fakatupu te tagata pea ko te Tohi-Tapu ʼe ko tana folafola, pea ʼe tonu ke ʼiloʼi e te hahaʼi tana manatu ʼo ʼuhiga mo te ʼu felāveʼi fakasino.

Meʼa fakaʼofaʼofa foki, ko te tokolahi ʼe mole natou ʼiloʼi te manatu ʼa te Tohi-Tapu ʼo ʼuhiga mo te ʼu felāveʼi fakasino. Pea ko te kau takitaki lotu, ʼaē ʼe natou ʼui ʼe natou mulimuli ki te Tohi-Tapu, ʼe natou akonaki te ʼu manatu ʼe fakafeagai kiai. ʼI tona fakahagatonu, ko te ʼu lotu lalahi ʼe mole natou manatu tahi ki te faʼahi ʼaia.

Tou tuku kehe age muʼa te manatu ʼa te tokolahi kae tou fai he ʼu kumi ʼo ʼuhiga mo te koga ʼaia. Ko te ʼalatike ʼaē kā hoa mai ʼe talanoa kiā fehuʼi e hogofulu ʼe tou fai tuʼumaʼu ʼo ʼuhiga mo te manatu ʼa te Tohi-Tapu ki te ʼu felāveʼi fakasino. ʼI te ʼalatike ʼaia, ʼe tou maʼu anai he ʼu tali ʼe fakatafito ki te ʼu akonaki Fakatohi-tapu. Pea ʼi te ʼalatike fakaʼosi ʼo te ʼu ʼalatike ʼaia, ʼe tou vakaʼi anai te maʼuhiga ʼo te ʼu tonu kā tou fai anai.

[Nota]