ʼE Fia ʼIloʼi e Te Kau Lautohi . . .

ʼE Tonu Koa Ke Fakamahino e Te ʼu Mātuʼa Te ʼUhiga ʼo Te ʼu Felāveʼi Fakasino Ki Tanatou Fānau?

▪ ʼE lahi te ʼu mātuʼa ʼe natou faiga mālohi ke natou puipui tanatou fānau mai ni mahaki fakalialia. ʼE toe ʼaoga he faiga mālohi fēia ki te ʼu mātuʼa moʼo puipui ʼanatou fānau mai te ʼu aga fakalialia. Pea ko te puleʼaki ʼe feala ke natou fai ʼe ko te foaki he fakamahino ʼe tāu mo te ʼu fānau ʼo ʼuhiga mo te faʼahi ʼaia. (Taaga Lea 5:3-23) ʼE maʼuhiga te taʼi ako ʼaia ʼa te ʼu mātuʼa, koteʼuhi kua fakahaʼuhaʼu ʼo lahi te maʼu gafua e te ʼu fānau te ʼu pāki heʼeʼaoga ʼi te televisio, ʼi te Neti, ʼi te ʼu tohi pea mo te ʼu meʼa fakakata.

ʼE fakamahino fēnei e te Polofesea ʼo te faiako, te fafine faitohi ko Diane Levin: “Iā ʼaho nei, ko te meʼa ʼaē ʼe kovi, ʼe mole ko te ako ʼo ʼatatou tamaliki ia te ʼuhiga ʼo te ʼu felāveʼi fakasino, kae ʼe ko te meʼa ʼaē ʼe natou ako, te taʼu ʼaē ʼe natou ako ai te ʼu faʼahi ʼaia, pea mo ia ʼaē ʼe ina fakamahino age. ʼE maʼu mai te kau fakatau koloa pea mo te hahaʼi he faʼahiga manatu ʼo ʼuhiga mo te ʼu felāveʼi fakasino ʼe malave ʼaupitō mo fakatupu kovi ki te fānau.”

ʼE ʼaoga ki te ʼu mātuʼa ke natou puipui ʼanatou fānau mai te ʼu manatu hala mo heʼeʼaoga ʼaē ʼe ina ʼulihi te fakakaukau ʼa te hahaʼi ʼi te temi nei. (Taaga Lea 5:1; Efeso 6:4) ʼE ʼaoga ki te ʼu fānau liliki ke natou mahino ki te agaaga ʼo tonatou sino mo tona tokaga kiai, pea mo te puipui ʼo nātou mai te hahaʼi aga heʼeʼaoga. ʼI muʼa ʼo te temi matala ʼo te sino—te taʼu ʼaē ʼe kamata ʼiloga ai te ʼu fetogi ʼo te sino—ʼe ʼaoga ke mahino he tamasiʼi fafine ki te ʼu fetogi ʼaē kā hoko anai ki tona sino mo te tupuʼaga ʼo te menise. ʼO toe fēia mo he tamasiʼi tagata, ʼe tonu ke mahino fakatomuʼa ʼo ʼuhiga mo te hali ʼo te huʼa vai fakatagata ʼi te pōʼuli. ʼI te temi ʼaē ʼe kei nātou liliki ai, ʼe feala ki te ʼu mātuʼa ke natou kamata akoʼi ki ʼanatou fānau te ʼu higoa totonu ʼo te ʼu koga kehekehe ʼo te sino. Ko te ʼu mātuʼa ʼofaina ʼe natou fakamahino anai ki ʼanatou fānau te ʼu faʼahi maʼuhiga ʼaenī e tolu ʼo ʼuhiga mo te ʼu koga ʼaia ʼo te sino: (1) ʼE makehe pea mo tapu. (2) ʼE mole tonu ke natou talanoa kiai ʼi he ʼu ʼaluʼaga kovi. (3) ʼE mole tonu ke fāfā he tahi kiai peʼe natou fakahāhā ki he tahi. Kiā nātou lalahi leva, ʼe ʼaoga ki te ʼu mātuʼa ke natou fakafuafua te temi ʼaē ʼe tonu ai ke natou fakamahino peʼe feafeaʼi te maʼu fānau ʼa he fafine. a

Ko te temi fea ʼaē ʼe tonu ke kamata ai e te ʼu mātuʼa te ako ʼaia? ʼE tonu ke kamata tautonu. ʼE feala ke kamata menise he taʼahine ʼi tona taʼu 10 peʼe ʼi muʼa atu. Ko he tūpulaga ʼe feala ia ke hali tona ʼuluaki huʼa vai fakatagata ʼi te pōʼuli ʼi tona taʼu 11 peʼe 12. ʼE feala ke fakatupu tuʼania ki he fānau te ʼu fetogi ʼaia ʼi tona maʼuli mo kapau ʼe mole mahino ki te meʼa ʼaē neʼe hoko. Koia ʼe ʼaoga anai ke fakamahino fakatomuʼa ki te fānau ko te ʼu fetogi ʼaia ʼo tona sino ʼe ko he ʼaluʼaga māhani ia ʼo te maʼuli. Pea ʼe ko te temi lelei ʼaia ʼo te tokoni ke natou mahino ki te maʼuhiga ʼaē ʼo te mulimuli ki te ʼu lēkula Fakatohi-tapu, ko te fakamahino ʼaia ʼe mole feala ke foaki e te ʼu polokalama ako fuli ʼaē kua fakatuʼutuʼu ke fai ʼo ʼuhiga mo te ʼu felāveʼi fakasino.—Taaga Lea 6:27-35.

[Nota]