HE Koʼē ʼe Tonu Ke Tou Maʼuliʼi Te ʼu Lēkula ʼo Te Tohi-Tapu?

KO TE manatu ʼa te Tohi-Tapu ʼo ʼuhiga mo te ʼu felāveʼi fakasino ʼe kua ʼāfea koa peʼe faigataʼa fau? Kailoa. Kae ʼe tokoni mai te manatu ʼa te Tohi-Tapu ke tou tekeʼi:

▪ Te ʼu mahaki ʼaē ʼe feʼaveʼaki ʼi te ʼu felāveʼi fakasino

▪ Te faitamataka

▪ Te ʼu mamahi ʼuhi ko te māvete

▪ Te hoha ʼo te leʼo ʼo loto

▪ Te maumauʼi ʼa ʼihi tokita matagafua

Ko Sehova ʼAtua, a totatou Tupuʼaga, ʼe ina loto ke tou maʼu te fiafia pea mo te tapuakina mai te fakaʼaogaʼi ʼo ʼana ʼu meʼa ʼofa. Ko te ʼAtua ʼe ina “ako ia koe ke ke manuia.” (Esaia 48:17) Koʼenī te ʼu lelei kā maʼu anai e he tahi ʼe ina maʼuliʼi te ʼu pelesepeto Fakatohi-tapu ʼo ʼuhiga mo te ʼu felāveʼi fakasino:

▪ Te ʼofa ʼo te ʼAtua

▪ Te tokalelei ʼo te ʼatamai

▪ Te felōgoi lelei ʼo te fāmili

▪ He matagafua lelei

▪ Te fakaʼapaʼapaʼi ʼo kita

ʼE feafeaʼi lā mo kapau ʼe mole kotou maʼuliʼi te ʼu lēkula Fakatohi-tapu ʼo ʼuhiga mo te aga ʼaē ʼe tonu ke fai? ʼE feala koa ke fetogi tokotou maʼuli? ʼE tukugākoviʼi anai koa koutou e te ʼAtua ʼuhi ko takotou ʼu aga ʼo te temi muʼa?

Kotou tokagaʼi te ʼaluʼaga ʼaenī: Ko ʼihi iā nātou ʼaē neʼe natou faʼufaʼu te kōkelekāsio Fakakilisitiano ʼo te ʼuluaki sēkulō, neʼe ko te ʼu hahaʼi neʼe fai folonikāsio, mo tono, pea mo fai tagata mo fai fafine. Neʼe natou filifili ke natou fetogi tonatou maʼuli ʼo natou maʼu ai te ʼu tapuakina neʼe ʼiloga kehe. (1 Kolinito 6:9-11) Iā ʼaho nei, ko te toko lauʼi afe ʼe natou mulimuli ki te fakatuʼutuʼu ʼaia. Neʼe natou  lītuʼa ki te ʼu aga heʼeʼaoga ʼaia pea mo maʼu tapuakina ʼuhi ko tanatou maʼuliʼi te ʼu lēkula ʼa te Tohi-Tapu. Ohagē lā, kotou tokagaʼi te maʼuli ʼo Sala ʼaē neʼe tou talanoa kiai ʼi te ʼuluaki ʼalatike.

“[Neʼe] Au Logoʼi Fakavilivili Ai He Fīmālie Ki Toku Loto”

Neʼe mahino kiā Sala, neʼe mole ina maʼu te ʼāteaina pea mo te fīmālie ʼaē neʼe fakaʼamu kiai mai tona maʼuli faʼitaliha ʼaia. ʼE ina ʼui fēnei: “Neʼe au logoʼi neʼe vevele toku leʼo ʼo loto. Neʼe au ufiufi pea mo tuʼania naʼa au faitama peʼe au maʼu he mahaki fakalialia. Neʼe mole galo ki au te ʼAtua pea mo taku ʼiloʼi ʼaē e mamahi tona loto ʼuhi ko taku faʼahiga maʼuli. Neʼe au mahino ki toku ʼuhiga heʼe maʼa ʼo tupu ai te mamahi ʼo toku loto.”

Ki muli mai, neʼe lotomālohi ia Sala ʼo ina fetogi tona maʼuli. Neʼe kumi tokoni ki tana ʼu mātuʼa, ko te ʼu Fakamoʼoni ʼa Sehova. Neʼe toe kole tokoni ki te ʼu tagata ʼāfea ʼo te kōkelekāsio ʼo tana kolo. ʼE ina ʼui fēnei: “Neʼe au punamaʼuli mo fiafia ki te loto manavaʼofa neʼe maʼu e taku ʼu mātuʼa pea mo te ʼu tagata ʼāfea ʼo te kōkelekāsio, ʼo au logoʼi fakavilivili ai he fīmālie ki toku loto.”

ʼI te temi nei, ʼe taupau tokotahi e Sala tana ʼu tamaliki e lua. “Neʼe au fakamatala ki taku ʼu tamaliki ʼo ʼuhiga mo te ʼu tonu ʼaē neʼe au fai ʼi muʼa atu. ʼE au loto ke nā mahino ki te lotomamahi neʼe au maʼu ʼuhi ko taku mole mulimuli ki te ʼu lēkula ʼa te ʼAtua. ʼE au fakatuʼutuʼu ke au tokoni kiā nāua, ke nā mahino ki te ʼu tapuakina kā nā maʼu anai ʼi te faʼahi fakasino, te ʼatamai mo te loto, mo kapau ʼe nā maʼuliʼi te ʼu lēkula ʼa te ʼAtua ʼo ʼuhiga mo te ʼu felāveʼi fakasino. Kua au ʼiloʼi papau, neʼe foaki mai e te ʼAtua te ʼu lēkula ʼo ʼuhiga mo te ʼu aga ʼaē ʼe tonu ke fai koteʼuhi ʼe mole ina loto ke mamahi he tahi.”

ʼE toe feala ke kotou maʼu tapuakina mai te fakalogo ki te takitaki ʼofa ʼa te ʼAtua. ʼE fai e te Tohi-Tapu te fakapapau ʼaenī: “E totonu te u fakatotonu a [Sehova], e ina fakafiafiai te loto. E maa te u lao a [Sehova], e natou fakamalamai te u mata. . . . E lahi te fakapale o ae e ina tauhi natou.”—Pesalemo 19:9, 12. b

[ʼU nota]

[Fakamatala ʼo te pāsina 8]

ʼE tau tuʼumaʼu mo te lotomamahi ia nātou ʼaē ʼe mole mulimuli ki te ʼu lēkula Fakatohi-tapu

[Fakamatala ʼo te pāsina 9]

ʼE maʼu e nātou ʼaē ʼe natou maʼuliʼi te ʼu lēkula Fakatohi-tapu he leʼo ʼo loto maʼa mo he fiafia ʼi te felōgoi lelei ʼo tonatou fāmili