He Koʼē ʼe Tonu Ke Takitaki Tātou e Te Laumālie ʼo Te ʼAtua?

“Ko koe ko toku Atua. Ke taki au e tou Laumalie lelei!”—PES. 143:10.

 1. Koteā ʼaē ʼe ʼaoga ke tou fai mokā tou fia ʼolo ki he koga meʼa ʼe mole tou ʼiloʼi?

 OHAGĒ lā ʼe kotou fia ʼolo ki he koga meʼa ʼe mole kotou ʼiloʼi. ʼE kotou ʼolo anai mo he tahi ʼe kotou falala ki ai he neʼe maʼuli ʼi te koga meʼa ʼaia ʼi muʼa atu. Kapau ʼe ina ʼiloʼi lelei te ala ʼaē ki te koga meʼa ʼaia, pea ʼe ina takitaki anai koutou kiai. ʼE mole kotou hehē anai mo kapau ʼe kotou fakalogo lelei ki tana ʼu fakatotonu.

2, 3. (a) Koteā te mālohi ʼaē neʼe fakaʼaogaʼi e Sehova ʼi te temi ki muʼa atu? (b) He koʼē ʼe feala ke takitaki tātou e te mālohi fakapulipuli ʼo te ʼAtua iā ʼaho nei?

² ʼE ʼaoga ke takitaki totatou maʼuli. ʼI te ʼu ʼuluaki vaega ʼo te Tohi-Tapu, ʼe fakahā ai te faʼahi ʼaē ʼe feala ke takitaki ai tātou. ʼO ʼuhiga mo te ʼu gāue ʼaē neʼe fai e Sehova ʼi te temi ki muʼa atu, ʼe ʼui fēnei iā Senesi: “I te kamataaga nee fakatupu leva e te Atua te atu lagi mo te kele.” ʼI tana fai ʼaia, neʼe ina fakaʼaogaʼi te mālohi, heʼe ʼui fēnei ʼi te fakamatala ʼo ʼuhiga mo te fakatupu: “Nee haele te Laumalie o te Atua i oluga o te atu vai.” (Sen. 1:1, 2) Koteā te mālohi ʼaia? Neʼe fakaʼaogaʼi e te ʼAtua te Laumālie Māʼoniʼoni, te mālohi gāue moʼo fakatupu ia meʼa fuli. ʼE tou māʼuʼuli lā he neʼe fakaʼaogaʼi e Sehova te laumālie ʼaia moʼo fakatupu ia meʼa fuli pē.—Sopo 33:4; Pes. 104:30.

³ ʼI te fakatupu ʼo tātou ʼaki te mālohi ʼaia ʼo te ʼAtua, ʼe feala koa ke toe ʼaoga te mālohi ʼaia ʼi te tahi age faʼahi ʼo totatou maʼuli? Neʼe ʼiloʼi e te ʼAlo ʼo te ʼAtua ʼe toe ʼaoga anai, he neʼe ʼui fēnei e Sesu ki tana ʼu tisipulo: “[Ko] te laumalie . . . e ina taki anai koutou i te mooni katoa.” (Soa. 16:13) Koteā te laumālie ʼaia, pea he koʼē ʼe tonu ke tou tuku ke ina takitaki tātou?

Te Fakaʼuhiga ʼo Te Laumālie Māʼoniʼoni

4, 5. (a) ʼO ʼuhiga mo laumālie māʼoniʼoni, koteā te manatu hala ʼa te hahaʼi ʼaē ʼe natou tui ki te Tahitolu Tapu? (b) ʼE kotou fakamahino feafeaʼi anai te fakaʼuhiga moʼoni ʼo te laumālie māʼoniʼoni?

⁴ Ko ʼihi hahaʼi neʼe kotou fai palalau mo ia ʼi takotou fai fakamafola, ʼe lagi natou tui ki te Tahitolu Tapu. ʼE natou manatu hala ko te laumālie māʼoniʼoni ʼe ko he ʼipotasi, ʼe tatau mo te ʼAtua ia te Tamai. (1 Ko. 8:6) Kae ko te akonaki ʼaia ʼe mole fakatafito ki te Tohi-Tapu.

⁵ Koteā te fakaʼuhiga moʼoni ʼo te laumālie māʼoniʼoni? ʼI te Tosi Tapu Faka-Futuna Katolika ʼe tuʼu ai te kiʼi nota ʼi te vaega ʼo Senesi 1:2, ʼe fakamahino fēnei: “Ko te laumālie ʼo te ʼAtua, peʼe ko te mālohi ʼo te ʼAtua, peʼe ko te matagi mai te ʼAtua, peʼe ko te matagi lelei.” Ohagē pē ko te matagi ʼaē ʼe fakapulipuli kae ʼe tou sio ki te ʼu meʼa ʼe hoko mokā agi te matagi, ʼe toe fēia pē mo te laumālie ʼaē ʼe fakapulipuli kae ʼe tou sio ki tana ʼu gāue. Ko te laumālie ʼaia ʼe ko te mālohi ʼaē ʼe foaki e te ʼAtua ki te hahaʼi peʼe ki he ʼu meʼa moʼo fakahoko tona finegalo. ʼE faigataʼa koa hatatou ʼui ʼe haʼu te toe mālohi lahi ʼaia mai te ʼAtua Māfimāfi, te Matapuna māʼoniʼoni? Kailoa ia!—Lau ia Esaia 40:12, 13.

 6. Koteā te kole ʼaē neʼe fai e Tavite kiā Sehova?

⁶ ʼE feala koa ke toe fakaʼaogaʼi e Sehova tona laumālie moʼo takitaki ʼo tātou? Neʼe ina fakapapau fēnei ki te tagata fai pesalemo ko Tavite: “E au ako anai kia koe pea e au fakaha anai kia koe te ala ae e tonu ke ke muli ai.” (Pes. 32:8)  Neʼe loto koa Tavite kiai? ʼEī, he neʼe ina kole fēnei kiā Sehova: “Ako mai kia au te fai o tou finegalo, koteuhi ko koe ko toku Atua. Ke taki au e tou Laumalie lelei!” (Pes. 143:10) ʼE tonu ke toe fēia mo tātou ke tou tuku ke takitaki tātou e te laumālie ʼo te ʼAtua. Koteā tona tupuʼaga? Tou vakaʼi ia tupuʼaga e fā.

ʼE Mole Feala Hatatou Takitaki Ia Tātou Totonu

7, 8. (a) He koe ʼe mole feala ke tou takitaki ia tātou totonu, ʼo mole tou fakalogo ki te ʼAtua? (b) Kotou tuku mai he fakatā moʼo fakahā ʼe mole tonu ke tou faiga ke tou takitaki ia tātou totonu ʼi te tuʼu ʼo te ʼu faʼahiga meʼa agakovi ʼaenī.

⁷ ʼUluaki, ʼe tou loto ke takitaki tātou e te laumālie ʼo te ʼAtua heʼe mole feala ke tou takitaki ia tātou totonu. Ko te “takitaki ʼo he tahi” ko tona fakaʼuhiga “ ʼe ke taki peʼe kaugā ʼalu mo he tahi ke fakahāhā kiai te ala.” Kae neʼe mole fakatupu tātou e Sehova ʼaki te fealagia ʼaē ke tou takitaki ia tātou totonu, pea ʼe kua tou agahala. Neʼe tohi fēnei e tana polofetā ko Selemia: “ ʼE au ʼiloʼi, Eteleno, ko te ala ʼa te tagata ʼe mole ʼa ia ia, heʼe mole ʼa te mālohi ʼo te tagata ʼaē ʼe haʼele ke ina takitaki tana faʼahiga haʼele.” (Sel. 10:23, La Sainte Bible, J.N. Darby) Koteā tona tupuʼaga? Neʼe fakahā age e te ʼAtua kiā Selemia tona tupuʼaga. ʼI tana talanoa ʼo ʼuhiga mo totatou loto, neʼe ʼui fēnei e Sehova: “E pikopiko te loto o fakalaka i te u mea fuli, pea e agakovi ia ia: Ko ai e feala ke ina iloi ia ia?”—Sel. 17:9; Mat. 15:19.

⁸ ʼE mole ko he fakapotopoto he fakalaka tokotahi ʼa he tahi ʼi he koga meʼa toafaʼia, ʼe mole he tahi moʼona takitaki. ʼI tana mole ʼiloʼi ʼaē peʼe feafeaʼi hana hao ʼi te ʼu ʼaluʼaga faigataʼa ʼo te toafa pea mo te ala ʼaē ki te koga meʼa ʼaē ʼe fia ʼalu kiai, ʼe feala ke tuʼutāmaki ai tona maʼuli. ʼO toe fēia pē, ʼe feala anai ke hoko he tuʼutāmaki kiā ia ʼaē ʼe manatu ʼe feala pē ke ina takitaki tona maʼuli ʼi te mālama agakovi ʼaenī, ʼo mole ina tuku ke fakahā age e te ʼAtua te ala ʼaē ʼe tonu ke ʼalu ai. ʼE feala anai hatatou hao ʼi te tuʼu ʼo te ʼu faʼahiga meʼa ʼaenī mo kapau ʼe tou faikole kiā Sehova ohagē ko tona fai e Tavite, ʼi tana ʼui fēnei: “E tuu malohi oku lakaaga i ou ala, e mole higa oku vae.” (Pes. 17:5; 23:3) ʼE tou lava maʼu feafeaʼi te takitaki ʼaia?

 9. Ohagē ko tona fakahā ʼi te pāki ʼi te pāsina 19, ʼe lava takitaki feafeaʼi tātou e te laumālie ʼo te ʼAtua?

⁹ Kapau ʼe tou agavaivai pea mo lotolelei ke tou fakalogo kiā Sehova, ʼe ina foaki mai anai tona laumālie māʼoniʼoni ke ina takitaki lelei tatatou haʼele. ʼE tokoni feafeaʼi mai anai te mālohi gāue ʼaia? Neʼe ʼui e Sesu ki tana ʼu tisipulo, ʼe foaki anai e te ʼAtua tona mālohi moʼo tokoni kiā nātou. Neʼe ina ʼui ko te mālohi ʼaia ʼo te ʼAtua ‘ ʼe ina ako age anai kiā nātou te ʼu meʼa fuli pea ʼe ina fakamanatu age anai kiā nātou te ʼu meʼa fuli ʼaē neʼe ina fakahā age kiā nātou.’ (Soa. 14:26) Kapau ʼe tou faikole pea mo ako tuʼumaʼu te Folafola ʼa te ʼAtua, pea mo te ʼu akonaki fuli ʼa Kilisito, pea ʼe tokoni mai anai te laumālie māʼoniʼoni ke tuputupu tatatou mahino  ki te toe poto lahi ʼo Sehova, ʼo feala ai hatatou fakahoko fakalelei tona finegalo. (1 Ko. 2:10) Tahi ʼaē meʼa, ʼe fakahā mai anai e te laumālie te meʼa ʼaē ʼe tonu ke tou fai mokā hoko he ʼu ʼaluʼaga faigataʼa. ʼE ina fakamanatuʼi mai anai he ʼu pelesepeto ʼi te Tohi-Tapu neʼe kua tou ʼosi ako pea mo tokoni mai ke tou ʼiloʼi peʼe feafeaʼi hona maʼuliʼi.

Ko Sesu Neʼe Ina Tuku Ke Takitaki Ia Ia e Te Laumālie ʼo Te ʼAtua

10, 11. Koteā ʼaē neʼe loto moʼoni kiai te ʼAlo ʼulu tokotahi ʼa te ʼAtua ʼo ʼuhiga mo te laumālie māʼoniʼoni, pea neʼe tokoni feafeaʼi te laumālie kiā ia?

¹⁰ Ko te lua tupuʼaga ʼaē ʼe tou loto ai ke takitaki tātou e te laumālie māʼoniʼoni, he neʼe takitaki e te ʼAtua tona ʼAlo ʼaki te laumālie ʼaia. ʼI muʼa ʼo tana hifo mai ki te kele, neʼe ʼiloʼi e te ʼAlo ʼulu tokotahi ʼa te ʼAtua te lea fakapolofetā ʼaenī: “E nofo anai te Laumalie o te Eteleno ia ia: Laumalie o te poto mo te atamai, Laumalie o te tokoni mo te malohi, Laumalie o te iloilo mo te mataku ki te Eteleno.” (Esa. 11:2) Kotou fakakaukauʼi age muʼa te loto moʼoni ʼa Sesu ke ina maʼu te tokoni ʼo te laumālie ʼo te ʼAtua ʼi te temi ʼaē neʼe maʼuli ai ʼi te kele!

¹¹ Neʼe hoko moʼoni te folafola ʼa Sehova. ʼE fakahā ʼi te fakamatala ʼo te Evaselio te meʼa ʼaē neʼe hoko ʼi te hili pē ʼo te papitema ʼo Sesu. ʼE ʼui fēnei: “Nee fonu ia Sesu i te Laumalie Maonioni, i tana liliu mai te Solotane, pea nee taki leva ia e te Laumalie Maonioni ki te toafa.” (Luka 4:1) ʼI tana ʼi te toafa, ko Sesu neʼe sēsuniō, mo faikole, pea mo metitāsio, pea neʼe lagi fakamahino age e Sehova ki tona ʼAlo te ʼu meʼa ʼaē kā hoko anai kiā ia. Neʼe gāue te mālohi ʼo te ʼAtua ʼi tona ʼatamai pea mo tona loto, ʼo ina takitaki tana ʼu manatu pea mo tana ʼu tonu. Koia ʼi te ʼu ʼaluʼaga fuli ʼaē neʼe hoko kiā Sesu, neʼe ina ʼiloʼi te ʼu meʼa ʼaē ke ina fai, pea neʼe ina fai ohagē pē ko te loto kiai ʼo tana Tamai.

12. He koʼē ʼe maʼuhiga ke tou kole ke takitaki tātou e te laumālie ʼo te ʼAtua?

¹² ʼI tana ʼiloʼi ʼaē te maʼuhiga ʼo te gāue ʼa te laumālie ʼo te ʼAtua ʼi tona maʼuli, neʼe fakalotomālohiʼi e Sesu tana ʼu tisipulo ke natou kole te laumālie māʼoniʼoni pea ke natou tuku ke takitaki nātou e te laumālie ʼaia. (Lau ia Luka 11:9-13.) He koʼē ʼe maʼuhiga ke tou fai te faʼahi ʼaia? Heʼe feala ke fetogi e te laumālie ʼo te ʼAtua tatatou ʼu manatu, ke tatau mo te manatu ʼa Kilisito. (Loma 12:2; 1 Ko. 2:16) ʼI tatatou tuku ʼaē te laumālie ʼo te ʼAtua ke ina takitaki totatou maʼuli, ʼe tou manatu anai ohagē ko Sesu pea mo tou mulimuli ki tana faʼifaʼitaki.—1 Pet. 2:21.

ʼE Fakahalaʼi Tātou e Te Laumālie ʼo Te Mālamanei

13. Koteā te laumālie ʼo te mālamanei, pea koteā ʼaē ʼe ina uga te hahaʼi ke natou fai?

¹³ Ko te tolu tupuʼaga ʼaē ʼe tou loto ai ke takitaki tātou e te laumālie ʼo te ʼAtua, heʼe feala anai ke fakahēʼi tātou e te laumālie heʼe maʼa ʼaē ʼe mulimuli kiai te hahaʼi tokolahi iā ʼaho nei. ʼE maʼu e te mālamanei tona mālohi, ʼe ina uga te hahaʼi ke natou fai he ʼu meʼa ʼe fakafeagai ʼaupitō ki te ʼu gāue ʼo te laumālie māʼoniʼoni.  ʼE mole fakalotomālohiʼi e te laumālie ʼo te mālamanei te hahaʼi ke natou mulimuli ki te manatu ʼa Kilisito, kae ke hagē tanatou ʼu manatu pea mo tanatou ʼu gāue ko Satana, te pule ʼo te mālamanei. (Lau ia Efeso 2:1-3; Tito 3:3.) ʼE ʼi ai te ʼu fua kovi mokā mulimuli he tahi ki te laumālie ʼo te mālamanei pea mo ina fai te ʼu gāue ʼo te kakano, ʼe mole ina maʼu anai te Puleʼaga ʼo te ʼAtua.—Kal. 5:19-21.

14, 15. ʼE tou lava tauʼi feafeaʼi te laumālie ʼo te mālamanei?

¹⁴ ʼE foaki mai e Sehova te ʼu meʼa ʼaē ʼe ʼaoga ke tou lava tauʼi te laumālie ʼo te mālamanei. Neʼe ʼui e te ʼapositolo ko Paulo ke “kotou fakamalohii koutou i te Aliki, pea kotou fakamalohii aki tona malohi mafimafi . . . ke feala ai takotou tuu mau i te aho kovi.” (Efe. 6:10, 13) ʼAki tona laumālie, ʼe foaki mai e Sehova te mālohi ke tou tutuʼu maʼu ʼi te ʼu faiga ʼaē ʼa Satana ke ina kākāʼi tātou. (Apk. 12:9) ʼE mālohi ia te laumālie ʼo te mālamanei, pea ʼe mole lava hatatou tekeʼi tuʼumaʼu. Kae ʼe mole tonu ke ina ʼulihi tātou. ʼE mālohi age te laumālie māʼoniʼoni, pea ʼe tokoni mai anai kiā tātou!

¹⁵ Neʼe tohi fēnei e te ʼapositolo ko Petelo ʼo ʼuhiga mo nātou ʼaē neʼe natou liʼaki te Lotu Fakakilisitiano ʼi te ʼuluaki sēkulō: “Kua natou siaki te ala totonu, pea kua natou hehe.” (2 Pet. 2:15) ʼE tou loto fakafetaʼi lahi ʼi tatatou mole maʼu “te laumalie o te malamanei, kae ko te Laumalie ae e hau mai te Atua”! (1 Ko. 2:12) ʼAki te takitaki ʼo tātou e te laumālie ʼo te ʼAtua pea mo tatatou fakaʼaogaʼi ia te ʼu fakatuʼutuʼu ʼaē neʼe fai e Sehova moʼo taupau tātou ʼi te ala fakalaumālie, ʼe feala anai ke tou tauʼi ia te laumālie ʼo Satana ʼi te mālama agakovi ʼaenī.—Kal. 5:16.

ʼE Fakatupu e Te Laumālie Māʼoniʼoni Te Fua ʼe Lelei

16. Koteā te fua ʼaē ʼe feala ke fakatupu e te laumālie māʼoniʼoni iā tātou?

¹⁶ Ko te fā tupuʼaga ʼaē ʼe tou loto anai ke takitaki tātou e te laumālie ʼo te ʼAtua, heʼe ina fakatupu te fua ʼe lelei ʼi te maʼuli ʼo nātou ʼaē ʼe natou tuku ke takitaki nātou e te laumālie. (Lau ia Kalate 5:22, 23.) Ko ai koa ʼe mole ina loto ke lahi age tona ʼofa, tona fiafia, pea mo tana tokalelei? Ko ai koa ʼe mole loto ke faʼa kātaki age, mo agalelei pea mo agaʼofa? Ko ai koa ʼe mole ina maʼu anai ni lelei mai tana maʼu te tui, te agamalū, pea mo te loto lolomi? ʼE fakatupu e te laumālie ʼo te ʼAtua iā tātou te ʼu kalitātē ʼe fua lelei kiā tātou, mo nātou ʼaē ʼe māʼuʼuli mo tātou pea mo te kōkelekāsio. Ke tou maʼu te fua ʼaia ʼe tonu ke tou haga gāue tuʼumaʼu, heʼe mole he tuʼakoi ʼo te fua ʼo te laumālie ʼaē ʼe ʼaoga kiā tātou pea ʼe feala ke lahi tona fua ʼi totatou maʼuli.

17. Koteā ʼaē ʼe feala ke tou fai ke lahi age tatatou fakahā he kalitātē ʼo te fua ʼo te laumālie?

¹⁷ ʼE fakapotopoto anai mo kapau ʼe tou fakasiosio ia tātou totonu, ke tou ʼiloʼi papau peʼe hā ʼi tatatou ʼu palalau pea mo tatatou ʼu gāue ʼe takitaki tātou e te laumālie māʼoniʼoni pea ʼe tuputupu tona fua iā tātou. (2 Ko. 13:5a; Kal. 5:25) Kapau ʼe tou tokagaʼi ʼe tonu ke tou gāueʼi ʼihi kalitātē ʼo te fua ʼo te laumālie, pea ʼe tou tuku anai ke takitaki tātou e te laumālie māʼoniʼoni ʼaki tatatou fakatuputupu iā tātou te ʼu kalitātē ʼaia. ʼE tou fai te faʼahi ʼaia mokā tou ako takitokotahi te ʼu agaaga ʼo te fua ʼo te laumālie ohagē ko tona tuʼu ʼi te Tohi-Tapu pea mo tona vakaʼi ʼi tatatou ʼu tohi Fakakilisitiano. Koia, ʼe lelei ke tou fakakaukauʼi peʼe tonu ke hā feafeaʼi te fua ʼo te laumālie ʼi totatou maʼuli ʼi te ʼaho fuli pea mo tou gāue ai ke mahu te ʼu kalitātē ʼaia iā tātou. a ʼI tatatou sio ki te fua ʼo te gāue ʼo te laumālie ʼa te ʼAtua ʼi totatou maʼuli pea ʼi te maʼuli ʼo totatou ʼu tehina mo tuagaʼane Kilisitiano, ʼe tou mahino lelei ai pe koʼē ʼe tonu ke tou tuku ke takitaki tātou e te laumālie.

 ʼE Kotou Fakalogo Koa Ki Te Laumālie ʼo Te ʼAtua?

18. He koʼē ko Sesu ʼe ko he faʼifaʼitaki maʼa tātou ʼo ʼuhiga mo te fakalogo ki te laumālie ʼo te ʼAtua?

¹⁸ ʼE ʼui mai ʼi te Tohi-Tapu neʼe gāue te mālohi ʼo te laumālie māʼoniʼoni ʼo te ʼAtua kiā Sesu, ʼi tana tupu tagata ʼi te kele. Neʼe ina tuku ke takitaki ia ia e te laumālie ʼaia, pea ʼi te temi ʼaē neʼe uga ai ia ia e te laumālie, neʼe fakalogo pea neʼe mulimuli kiai. (Mko. 1:12, 13; Luka 4:14) ʼE fēia koa mo koutou?

19. Koteā ʼaē ʼe tonu ke tou fai ke takitaki tātou e te laumālie māʼoniʼoni?

¹⁹ ʼE kei gāue pē te mālohi ʼa te ʼAtua ki te ʼatamai pea mo te loto ʼo nātou ʼaē ʼe lotolelei ke takitaki nātou. ʼE feafeaʼi hakotou tuku ke gāue te laumālie ʼaia iā koutou, ke ina taki koutou ki te ala ʼaē ʼe totonu? Kotou faikole tuʼumaʼu kiā Sehova ke ina foaki atu tona laumālie pea mo tokoni atu ke kotou fakalogo ki tana takitaki. (Lau ia Efeso 3:14-16.) Kotou mulimuli ki takotou ʼu faikole ʼo kotou kumi tokoni ki te Tohi-Tapu, ʼaē neʼe tohi ʼaki te laumālie māʼoniʼoni. (2 Tim. 3:16, 17) Kotou mulimuli ki te ʼu fakatotonu ʼaē ʼe tuku mai ʼi te Tohi-Tapu pea mo kotou tuku ke takitaki koutou e te laumālie māʼoniʼoni. Kotou gāue ʼaki te tui ʼaē ʼe feala kiā Sehova ke ina takitaki lelei koutou ʼi te mālama agakovi ʼaenī.

[Nota]

Neʼe Kotou Tāʼofi Koa Te ʼu Manatu Tāfito?

• He koʼē ʼe ʼaoga te laumālie māʼoniʼoni ʼi totatou maʼuli?

• Koteā ia te ʼu tupuʼaga e fā ʼaē ʼe tou loto anai ke takitaki tātou e te laumālie ʼo te ʼAtua?

• Koteā ʼaē ʼe tonu ke tou fai ke tou maʼu ia te ʼu lelei fuli mai te takitaki ʼo te laumālie māʼoniʼoni?

[ʼU fehuʼi ʼo te ako]

[Paki ʼo te pāsina 17]

Ko te laumālie ʼo te ʼAtua neʼe ko he mālohi neʼe ina uga ia Sesu ʼi tona maʼuli

[Paki ʼo te pāsina 19]

ʼE gāue te laumālie ʼo te ʼAtua ki te manatu pea mo te loto ʼo te hahaʼi moʼo takitaki nātou