Ko Fehuʼi e Hogofulu ʼo ʼUhiga Mo Te ʼu Felāveʼi Fakasino Kua Maʼu Ni Tali

 1 Te agahala olisinale, neʼe fakaʼuhiga koa ki te felāveʼi fakasino ʼa Atama mo Eva ʼi te ʼōloto ʼo Eteni?

▪ Tali: ʼI te manatu ʼa te tokolahi, ko te fuaʼi ʼakau ʼaē neʼe tapuʼi tona kai ʼi te ʼōloto ʼo Eteni, neʼe fakaʼuhiga ia ki te ʼu felāveʼi fakasino. Kae, ʼe mole ko te manatu ʼaia ʼa te Tohi-Tapu.

Fakakaukauʼi: ʼI muʼa ʼo te fakatupu ia Eva, neʼe fakatotonu e te ʼAtua kiā Atama ke ʼaua naʼa kai ki te “akau o te iloilo o te lelei mo te kovi.” (Senesi 2:15-18) Mai te ʼaluʼaga ʼaē ko Atama neʼe tokotahi, koia neʼe mole feala ke fakaʼuhiga te tapu ʼaia ki te ʼu felāveʼi fakasino. Pea tahi ʼaē, neʼe tuku age e te ʼAtua kiā Atama mo Eva te fakatotonu mahino gafua ʼaenī: “Kolua fanaunau, kolua liuliuga, kolua fakahahai te kele.” (Senesi 1:28) ʼE feala koa ki he ʼAtua ʼofa ke ina fakatotonu age ki te ʼuluaki taumātuʼa ke nā “fakahahai te kele”—ʼaē ʼe fakamaʼua foki kiai te ʼu felāveʼi fakasino—pea ina tauteaʼi leva nāua ki te mate ʼuhi ko tanā fakalogo ki te fakatotonu ʼaia?—1 Soane 4:8.

Tahi ʼaē, ohagē ko tona fakahā ʼi te lea Fakahepeleo ʼaē neʼe ʼuluaki tohi ai te Tohi-Tapu, neʼe mole nofo Eva mo tona ʼohoana ʼi temi ʼaē neʼe ina “tolii leva [ai te] fuai akau [tapu], o kai.” Ki muli age leva, neʼe ina “foaki ki tona ohoana, ae nee tuu i ona tafa, pea nee kai leva ia ia ki ai.”—Senesi 3:6.

Koia, neʼe mole tautea ia Atama mo Eva ʼi te temi ʼaē neʼe nā felāveʼi fakasino moʼo maʼu ai hanā fānau. (Senesi 4:1, 2) ʼE mahino lelei mai, neʼe mole fakaʼuhiga te fuaʼi ʼakau ki te felāveʼi fakasino ʼa Atama mo Eva, kae neʼe ko he fuaʼi ʼakau moʼoni.

 2 ʼE tapuʼi koa ʼi te Tohi-Tapu te fiafia ʼaē ʼe maʼu mai te ʼu felāveʼi fakasino?

▪ Tali: ʼE fakahā ʼi te ʼuluaki tohi ʼo te Tohi-Tapu neʼe fakatupu e te ʼAtua “te tagata mo te fafine.” Neʼe ʼui e te ʼAtua ʼo ʼuhiga mo te ʼu meʼa fuli ʼaē neʼe ina fakatupu ʼe “lelei tukupau.” (Senesi 1:27, 31) Ki muli age, neʼe foaki e te ʼAtua ki te tagata faitohi ʼo te Tohi-Tapu te ʼu fakatotonu ʼaenī maʼa te ʼu tagata ʼohoana: “Ke mau tou fiafia mai te fafine o tou temi tupulaga. . . . Ke ke kona i te temi fuli i tona sino.” (Taaga Lea 5:18, 19) ʼE hā koa ʼi te ʼu palalau ʼaenī ʼe tapuʼi e te Tohi-Tapu te fiafia ʼaē ʼe maʼu mai te ʼu felāveʼi fakasino?

 ʼE mahino mai ai ko te ʼAtua neʼe ina fakatupu te ʼu koga tapu moʼo fakafealagia te maʼu fānau pea neʼe ina toe fakafealagia ki he taumātuʼa ke nā fefakahāʼaki tanā feʼofaʼofani ʼi he ʼaluʼaga ʼe nā fiafia fakatahi ai. ʼO nā fefoakiʼaki ai te ʼu meʼa ʼaē ʼe ʼaoga kiā nāua ʼi te faʼahi fakasino mo te ʼu meʼa ʼi tonā loto, ʼi tanā ʼu felōgoi fakataumātuʼa ʼaia.

 3 ʼE fakagafua koa ʼi te Tohi-Tapu te nofo fakapōʼuli ʼa he tagata mo he fafine?

▪ Tali: ʼE ʼui lelei mai ʼi te Tohi-Tapu “ ʼe fakamāuʼi anai e te ʼAtua te kau fai folonikāsio.” (Hepeleo 13:4, MN) Ko te kupu Fakakeleka pornéïa, ʼaē neʼe fakaliliu ʼaki te kupu folonikāsio, ʼe fakaʼuhiga ki he tokolua e nā fakaʼaogaʼi kovi ʼonā ʼu koga tapu kae ʼe mole heʼeki nā ʼohoana. a Koia ʼe mole leleiʼia e te ʼAtua te nofo fakapōʼuli ʼa he tagata mo he fafine tatau aipē peʼe nā fakatuʼutuʼu ʼohoana ki ʼamuli.

Tatau aipē peʼe feʼofaʼofani he tagata mo he fafine, kae ʼe fakamaʼua aipē e te ʼAtua ke nā ʼohoana ʼi muʼa ʼo tanā felāveʼi fakasino. Neʼe fakatupu nāua e te ʼAtua ʼaki te fealagia ʼaē ke nā feʼofaʼofani. Ko te ʼofa ʼe ko te kalitātē tāfito ʼaia ʼa te ʼAtua. Koia lā ʼaē ʼe ina ʼui liuliuga ai, ʼe hoki feala pē ke felāveʼi fakasino he tagata mo tona ʼohoana, ohagē ko tona fakamahino anai ʼi te ʼalatike kā hoa mai.

 4 E gafua koa te ʼohoanaʼi ʼo he ʼu fafine e tokolahi?

▪ Tali: Lolotoga he temi, neʼe fakagafua e te ʼAtua ke ʼohoana he tagata mo he ʼu fafine e tokolahi. (Senesi 4:19; 16:1-4; 29:18–30:24) Kae neʼe mole ko he fakatuʼutuʼu ia neʼe haʼu mai te ʼAtua. Neʼe ina foaki kiā Atama hona ʼohoana pē e tahi.

Neʼe fakagafua e te ʼAtua kiā Sesu Kilisito ke ina toe fakatuʼu Tana fakatuʼutuʼu ʼuluaki ʼaē ke ʼohoana he tagata mo he fafine e tahi. (Soane 8:28) ʼI te fehuʼi age ʼo ʼuhiga mo te ʼohoana, neʼe tali fēnei e Sesu: “I te kamataaga, nee fakatupu e te Tupuaga te tagata mo te fafine pea nee ina ui leva: Koia, e mavae anai te tagata mai tana tamai mo tana fae, pea e pipiki anai ia ia ki tona ohoana, pea e na liliu anai ko he kakano e tahi.”—Mateo 19:4, 5.

Ki muli age, ʼaki te takitaki ʼa te ʼAtua, neʼe tohi fēnei e te tisipulo ʼa Sesu: “Ke tahi mau e te tagata hona ohoana, pea ke tahi mau e te  fafine hona ohoana.” (1 Kolinito 7:2) ʼI te Tohi-Tapu, ʼe toe fakamaʼua ki he tagata ʼohoana maʼu pilivilēsio ʼi te kōkelekāsio ke “ohoana mo he fafine e tahi.”—1 Timoteo 3:2, 12.

 5 ʼE tapu koa te fakaʼaogaʼi e he taumātuʼa te ʼu meʼa moʼo tāʼofi te faitama?

▪ Tali: Neʼe mole fakatotonu e Sesu ki tana kau tisipulo ke natou fānaunau. ʼO toe fēia mo tana ʼu tisipulo, ʼe mole natou fai he ʼu tonu ʼo ʼuhiga mo te faʼahi ʼaia. Koia, ʼe mole tapuʼi e te Tohi-Tapu te fakaʼaogaʼi ʼo te ʼu meʼa moʼo tāʼofi te faitama.

Koia ʼe fakalogo pē ki te ʼu taumātuʼa hanatou fai he tonu ʼo ʼuhiga mo te maʼu fānau peʼe kailoa. ʼO toe fēia mo te kaugamālie ʼo te fānau pea mo te temi ʼaē ʼe natou maʼu fānau ai. Kapau ʼe filifili he taumātuʼa ke nā fakaʼaogaʼi te ʼu meʼa moʼo tāʼofi te faitama, pea ʼe ko te fakatuʼutuʼu pē ia ʼa nāua, pea ʼe mole tonu ke valoki. b—Loma 14:4, 10-13.

 6 ʼE tapu koa te fakatō fatu?

▪ Tali: Ko te maʼuli ʼe taputapu kiā mata ʼo te ʼAtua, māʼiapē lā mokā māhina lua te fafine, kua maʼuli ia te tamasiʼi ʼi tona fatu. (Pesalemo 139:16) Neʼe ʼui e te ʼAtua ʼe tūʼā te tagata ʼaē ʼe ina fakatupu tuʼutāmaki ki he kiʼi tamasiʼi ʼe kei fuafatuʼi (pe neʼe ina matehi). Koia, ko te matehi ʼo he kiʼi tamasiʼi e kei fuafatuʼi ʼe ko he fakapō kiā mata ʼo Sehova.—Ekesote 20:13; 21:22, 23.

ʼE feafeaʼi anai mo kapau ʼe hoko he ʼaluʼaga ʼe tonu ke foimo fai ai he tonu ʼo ʼuhiga mo te ʼiloʼi ʼaē pe ko ai kā tuku anai ke maʼuli, peʼe ko te faʼē peʼe ko te kiʼi tamasiʼi meamea ʼe kei fuafatuʼi? ʼE maʼua anai ke fai pē e te taumātuʼa te tonu ʼo ʼuhiga mo te maʼuli ʼaē kā haofaki. c

 7 ʼE fakagafua koa ʼi te Tohi-Tapu te māvete?

▪ Tali: ʼE fakagafua ʼi te Tohi-Tapu te māvete. Kae neʼe fakahā e Sesu te tupuʼaga pē e tahi ʼaē ʼe feala ai ke māvete he taumātuʼa, ʼo ina ʼui fēnei: “Ko ʼaē ʼe māvete mo tona ohoana, gata pē mokā ʼe tupu mai he folonikāsio [felāveʼi fakasino ʼi tuʼa ʼo te nofo ʼohoana], pea toe ʼohoana ia mo he tahi fafine, ʼe tono ia.”—Mateo 19:9, MN.

ʼE fehiʼa ia te ʼAtua ki te māvete neʼe fai ʼaki he ʼu manatu kākā. ʼE ina tukugākoviʼi anai ia nātou ʼaē neʼe māvete faʼitaliha mo ʼonatou ʼohoana, tāfito ʼaki te fakatuʼutuʼu ʼaē ke toe ʼohoana mo he tahi age.—Malakia 2:13-16; Maleko 10:9.

  8 ʼE tali koa e Te ʼAtua te fai tagata mo te fai fafine?

▪ Tali: ʼE tautea ʼi te Tohi-Tapu te fai folonikāsio, ʼo kau kiai te felāveʼi fakasino ʼa he tagata mo he tagata peʼe ko he fafine mo he tahi fafine. (Loma 1:26, 27; Kalate 5:19-21) Logolā ʼe fakahā ʼi te Tohi-Tapu ʼe fehiʼa te ʼAtua ki te taʼi maʼuli ʼaia, kae ʼe tou toe ʼiloʼi foki “nee ofa lahi osi te Atua ki te malamanei nee ina foaki ai tona Alo ulutokotahi, o tupu ko he tahi pe e tui kia ia ke aua naa mate ia, kae ke ina mau te mauli heegata.”—Soane 3:16.

Logolā ʼe mole natou tali te fai tagata mo te fai fafine, kae ko te kau Kilisitiano ʼe natou ʼofa ki te hahaʼi fuapē. (Mateo 7:12) ʼE loto e te ʼAtua ke tou “fakaapaapa ki te tagata kehekehe.” Koia ʼe ko te aga ʼaē ʼe fehiʼa kiai te kau Kilisitiano moʼoni, kae ʼe mole ko te tagata peʼe ko te fafine.—1 Petelo 2:17.

 9 ʼE kovi koa te fakaʼaogaʼi ʼo te telefoni mo te Neti ki he ʼu fakatuʼutuʼu heʼeʼaoga?

▪ Tali: ʼE fakaʼaogaʼi te telefoni, te telefoni feʼāveʼaki mo te Neti ki he ʼu fakatuʼutuʼu heʼeʼaoga, ke fai palalau mo fakalogo ki he ʼu fakamatala heʼe maʼa, mo momoli he ʼu pāki pea mo sio ki he ʼu meʼa ʼo ʼuhiga mo te ʼu felāveʼi fakasino.

Ko te Tohi-Tapu ʼe mole talanoa fakahagatonu ki te ʼu meʼa fakafelōgoi foʼou ʼaia. Kae ʼe ina ʼui fēnei mai: “Ke aua pe naa palalaui ia koutou te feauaki [“folonikasio,” MN], mo te u mea uli fuli, mo te manumanu, koteuhi e mole gali ia mo te kau sagato. Ke aua naa logo ia koutou ki ni palalau kovi, mo ni palalau fakavale, mo ni fakahuahua, koteuhi e mole gali te u mea aia.” (Efeso 5:3, 4) Ko te ʼu faʼahiga meʼa ʼaia, ohagē ko te fakaʼaogaʼi ʼo te telefoni peʼe ko te Neti ki he ʼu fakatuʼutuʼu heʼeʼaoga, ʼe natou fakamafola he ʼu manatu hala ʼo ʼuhiga mo te ʼu felāveʼi fakasino pea mo fakaneke te hahaʼi ke natou ʼahiʼahi te ʼu fakafiafia ʼaia ʼi tuʼa atu ʼo te nofo ʼohoana. Ko te ʼu aga ʼaia ʼe mole tokoni ki te hahaʼi ke natou tātāʼofi, kae ke natou fakahoko tanatou ʼu holi fakavale ki te ʼu felāveʼi fakasino.

 10 Koteā te manatu ʼa te Tohi-Tapu ʼo ʼuhiga mo te kulu?

▪ Tali: ʼE mole talanoa fakahagatonu ia te Tohi-Tapu ki te kulu—te fakatupu ʼo te holi fakasino ʼaki te palu peʼe ko te alaala ʼo tokita ʼu koga tapu ʼo aʼu ki tokita fīmālie. Kae ʼe fakatotonu ʼi te Tohi-Tapu ki te kau Kilisitiano: ‘Kotou tāmateʼi te meʼa ʼaē, ʼi ʼokotou koga sino , ʼe kau ki te kele, te folonikāsio, mo te aga fakalialia, mo te holi kovi ki te ʼu felāveʼi fakasino.’—Kolose 3:5.

Ko te kulu ʼe ina fakahalaʼi te manatu pea mo fakamālohi te manako ki te ʼu felāveʼi fakasino. ʼE fakapapau mai ʼi te Tohi-Tapu ʼe feala ke foaki e te ʼAtua “te mālohi ʼaē ʼe fakalaka ʼi te mālohi māhani” kiā nātou ʼaē ʼe faiga fakamālotoloto ke natou liʼaki te agamāhani ʼaia.—2 Kolonito 4:7, MN; Filipe 4:13.

[ʼU nota]