‘ʼE Lotolelei Te ʼAlo Ke Ina Fakahā Tana Tamai’
‘ ʼE Lotolelei Te ʼAlo Ke Ina Fakahā Tana Tamai’
“E mole he tahi e ina iloi . . . pe ko ai te Tamai, gata pe ko te Alo pea mo ae e loto te Alo ke ina fakaha ia ia ki ai.”—LUKA 10:22.
ʼE KOTOU TALI FEAFEAʼI ANAI?
․․․․․
He koʼē neʼe ko Sesu tokotahi pē ʼaē neʼe feala ke ina fakahā te Tamai?
․․․․․
Neʼe fakahā feafeaʼi e Sesu te Tamai ki te hahaʼi?
․․․․․
Koteā te ʼu ʼaluʼaga ʼaē ʼe feala ai ke tou fakahā te Tamai ki te hahaʼi ohagē ko Sesu?
1, 2. Koteā te fehuʼi ʼaē ʼe faigataʼa ki te tokolahi hanatou tali kiai, pea koteā tona tupuʼaga?
ʼE FAIGATAʼA ki te tokolahi hanatou tali ki te fehuʼi ʼaenī: ‘Ko ai te ʼAtua?’ Ohagē lā ko nātou ʼaē ʼe natou tui ko te ʼAtua ʼe ko he Tahitolu Tapu, ʼe natou fakamoʼoni ʼe mole feala hanatou mahino ki te akonaki ʼaia. Neʼe ʼui fēnei e te tagata faitohi mo takitaki lotu: “ ʼE fakalaka te akonaki ʼaia ʼi te fakakaukau ʼa te tagata. ʼE kau ki te ʼu faʼahi ʼaē ʼe mole lava mahino kiai te tagata.” ʼI te tahi age faʼahi, ko nātou ʼaē ʼe tui ki te akonaki ʼaē neʼe tou tutupu mai te ʼu manu, ʼe natou ʼui ʼe mole ʼi ai he ʼAtua pea ko te ʼu meʼa taulekaleka ʼaē ʼe tou sio kiai neʼe tupu fakafokifā pē ia. Ko Charles Darwin, ʼaē neʼe ina fakamafola te akonaki ʼaē ko te tagata neʼe tupu mai te manu, neʼe mole ina ʼui ʼe mole ʼi ai he ʼAtua. Kae neʼe ina ʼui ʼe mole feala ki te tagata ke mahino kātoa ki te ʼuhiga ʼo te ʼAtua.
2 Tatau aipē peʼe koteā tanatou faʼahiga tauhi kae ko te tokolahi ʼe natou fai fehuʼi ʼo ʼuhiga mo te ʼAtua. Kae ʼi tanatou mole maʼu ni tali kiai, tokolahi neʼe mole kei natou kumi te ʼAtua. ʼI tona fakahagatonu, ko Satana ʼaē neʼe ina ‘fakakiviʼi te ʼatamai ʼo nātou ʼaē ʼe mole tui.’ (2 Ko. 4:4) Koia ʼe mole tou punamaʼuli ai ki te mole ʼiloʼi mo mahino ʼa te tokolahi ki te moʼoni ʼo ʼuhiga mo te Tamai, ʼaē neʼe ina Fakatupu te ʼatulaulau!—Isa. 45:18.
3. (a) Ko ai ʼaē neʼe ina fakahā mai te Tamai kiā tātou? (b) Ko te ʼu fehuʼi fea ʼaē kā tou vakaʼi anai?
3 Kae ʼe maʼuhiga ʼaupitō ke ʼiloʼi e te hahaʼi te moʼoni ʼo ʼuhiga mo te ʼAtua. Koteā tona tupuʼaga? Koteʼuhi ʼe gata pē kiā nātou ʼaē ʼe natou “fetapa ki te huafa ʼo Sehova” ʼaē kā haofaki anai. (Loma 10:13, MN) Ko te pāui ki te huafa ʼo te ʼAtua ʼe ina fakamaʼua foki ke tou ʼiloʼi ia ia ʼaē ko tona higoa ʼaia. Neʼe foaki e Sesu Kilisito ia te moʼoni maʼuhiga ʼaia ki ʼana tisipulo ʼaki tana fakahā kiā nātou te Tamai. (Lau ia Luka 10:22.) He koʼē neʼe ko Sesu tokotahi pē ʼaē neʼe feala ke ina fakahā mai te Tamai? Neʼe fakahā feafeaʼi e Sesu te Tamai? Pea ʼe tou lava faʼifaʼitakiʼi feafeaʼi ia te fakahā ʼaē e Sesu te Tamai ki te hahaʼi? Tou vakaʼi te ʼu fehuʼi ʼaia.
KO SESU KILISITO TOKOTAHI ʼAĒ NEʼE FEALA KE INA FAKAHĀ TE TAMAI
4, 5. He koʼē neʼe ko Sesu tokotahi pē ʼaē neʼe feala ke ina fakahā te Tamai?
4 Ko Sesu tokotahi pē ʼaē neʼe feala ke ina fakahā tana Tamai. Koteā tona tupuʼaga? Koteʼuhi, ʼi muʼa ʼo te fakatupu ʼo meʼa fuli neʼe kua maʼuli ia Sesu, “te Alo ulutokotahi o te Atua,” ʼi te lagi. (Soa. 1:14; 3:18) Ko he tuʼulaga ia neʼe maʼu e ia tokotahi! ʼI te temi ʼaia, neʼe ʼofainaʼi ia te ʼAlo e tana Tamai ʼo ina ʼiloʼi lelei ai tona ʼUhiga mo ʼOna kalitātē. Pea neʼe loaloaga ʼosi te temi ʼaē neʼe nofo ai te Tamai mo te ʼAlo ʼo mālohi ai tanā feʼofani. (Soa. 5:20; 14:31) ʼE mahino ia, neʼe lahi te ʼu meʼa neʼe ako e te ʼAlo ʼo ʼuhiga mo te ʼuluagaaga ʼo tana Tamai!—Lau ia Kolose 1:15-17.
5 Neʼe filifili e te Tamai ke liliu tona ʼAlo ko Hana tagata fakahoko palalau, ko ia ko “te folafola a te Atua.” (Apk. 19:13) Koia neʼe ko Sesu tokotahi pē ʼaē neʼe feala ke ina fakahā te Tamai ki te hahaʼi. Ko te tupuʼaga lā ʼaē ʼo te tohi e Soane ko Sesu “te Folafola” neʼe “nofo i te fatafata o te Tamai.” (Soa. 1:1, 18) Neʼe lagi manatu Soane ki te agaʼi fenua ʼaē neʼe fai ʼi tona temi lolotoga te temi kai, ʼaē neʼe ko te fakanofo ovi he tahi neʼe fakaafe ki he tahi age ke feala hanā felōgoi. Koia ko te ʼAlo neʼe “nofo i te fatafata o te Tamai” ko tona fakaʼuhiga neʼe felōgoi lelei mo tana Tamai.
6, 7. Koteā ʼaē neʼe toe lahi age ai te felōgoi ʼa Sehova mo Sesu?
6 Neʼe liliu te ʼAlo “ko he tahi neʼe ʼofa tāfito ki ai [te ʼAtua] ʼi te ʼaho mo te ʼaho. [MN]” (Lau ia Taaga Lea 8:22, 23, 30, 31.) Koia, ʼuhi ko tanā faifaitahi pea mo tana faʼifaʼitakiʼi te ʼu kalitātē ʼo tana Tamai neʼe toe mālohi age ai tanā felōgoi. ʼAki te fakatupu ʼo te kau ʼāselo mo te tagata, neʼe sio ai te ʼAlo ki te aga ʼa Sehova ʼo ʼuhiga mo nātou, ʼo lahi age ai tona ʼofa pea mo tana fakaʼapaʼapa ki tana Tamai.
7 Neʼe toe sio foki te ʼAlo ki te ʼofa ʼo Sehova, tana faitotonu, tona poto mo tona mafimafi ʼi he ʼaluʼaga faigataʼa ohagē ko te fakafihiʼi e Satana tana pule faʼitaliha. Pea ko te faʼahi ʼaia neʼe tokoni ki te ʼAlo ke ina fakatokatoka te ʼu fihifihia ʼaē kā tau mo ia lolotoga tana minisitelio ʼi te kele.—Soa. 5:19.
8. ʼE tokoni feafeaʼi mai te ʼu Evaselio ke tou ʼiloʼi lelei te ʼu kalitātē ʼa te Tamai?
8 Neʼe ko Sesu tokotahi pē ʼaē neʼe feala ke ina fakamahino lelei te ʼuhiga ʼo Sehova ʼuhi ko tana felōgoi lelei mo ia. Koia ke feala hatatou ʼiloʼi lelei te Tamai ʼe tonu ke tou mahino ki te ʼu akonaki ʼa te ʼAlo mo ʼana gāue. Ohagē lā, ʼe mole feala hatatou mahino kātoa ki te fakaʼuhiga ʼo te kupu “ ʼofa” ʼaki pē te tikisionalio. Kae ʼe feala hatatou mahino lelei ki te ʼui ʼaē “e ofa te Atua” ʼaki tatatou fakakaukauʼi ia te ʼu Evaselio ʼaē ʼe talanoa ki te minisitelio ʼa Sesu pea mo tana tokaga ʼaē ki te hahaʼi. (1 Soa. 4:8, 16) ʼE feala ke tou toe fai fēia mo te tahi ʼu kalitātē ʼo te ʼAtua ʼaē neʼe fakahā e Sesu ki ʼana tisipulo ʼi te temi ʼaē neʼe maʼuli ai ʼi te kele.
NEʼE FAKAHĀ E SESU IA TANA TAMAI
9. (a Koteā te ʼu ʼaluʼaga e lua ʼaē neʼe fakahā ai e Sesu ia tana Tamai? (b) Kotou tuku mai he faʼifaʼitaki neʼe fakahā ai e Sesu ia tana Tamai ʼi ʼana akonaki.
9 Neʼe fakahā feafeaʼi e Sesu tana Tamai ki ʼana tisipulo pea mo nātou ʼaē ki muli age? Neʼe ina fakahā te Tamai ʼi te ʼu ʼaluʼaga e lua: ʼi ʼana akonaki mo tana aga. ʼUluaki, tou vakaʼi muʼa te ʼu akonaki ʼa Sesu. Neʼe ʼiloga ʼi te ʼu akonaki ʼaē neʼe ina foaki ki ʼana tisipulo ia tana mahino lelei ʼaē ki te ʼu manatu ʼo tana Tamai, mo te ʼu meʼa ʼe ina logoʼi pea mo tana aga. Ohagē lā, neʼe fakatatau e Sesu ia tana Tamai ki he tagata tauhi ovi ʼofa neʼe ʼalu ʼo kumi ia tana ovi ʼaē neʼe hehē. Neʼe toe ʼui e Sesu ʼo ʼuhiga mo te tagata tauhi ovi, ʼi te temi ʼaē neʼe ina maʼu ai tana ovi neʼe “lahi age tona fiafia i te ovi aena e tahi i te u ovi e hivagofulu ma hiva ae nee mole hehe.” He koʼē neʼe talanoa Sesu ki te faʼifaʼitaki ʼaia? ʼE fakamahino fēnei e Sesu: “E mole ko te finegalo o takotou Tamai i te atu lagi ke puli he toko tahi i te u toe liliki aena.” (Mat. 18:12-14) Koteā ʼe tou ako mai te faʼifaʼitaki ʼaia ʼo ʼuhiga mo Sehova? Kapau ʼi ʼihi temi ʼe kotou manatu ʼe mole ʼi ai hokotou ʼuhiga pea mo hagē ʼe liʼakina koutou, kotou manatuʼi ko te Tamai ʼi selō ʼe tokaga moʼoni kiā koutou, pea kiā mata ʼo te ʼAtua ʼe kotou kau ki ʼana “toe liliki.”
10. Neʼe fakahā feafeaʼi e Sesu te Tamai ʼi tana aga?
10 Lua, neʼe fakahā e Sesu tana Tamai ki ʼana tisipulo ʼi tana aga. Koia ʼi te temi ʼaē neʼe fehuʼi fēnei ai e te ʼapositolo ko Filipo kiā Sesu: “Fakaha mai kia matou te Tamai,” neʼe feala ai ke tali fēnei e Sesu: “Ko ae kua sio ki au kua sio ia ki te Tamai.” (Soa. 14:8, 9) Tou vakaʼi he ʼu faʼifaʼitaki neʼe fakahā ai e Sesu ia te ʼu kalitātē ʼo tana Tamai. ʼI te temi ʼaē neʼe kole ai e te tagata neʼe “kilia katoa” kiā Sesu ke ina fakamālōlō ia ia, neʼe faoʼi e Sesu tona nima ʼo fāfā kiā ia mo ʼui fēnei age: “E au loto ki ai, ke ke maa.” Neʼe lagi mahino te tagata kilia ko te fakamālōlō ʼaē neʼe fakahoko e Sesu neʼe fakafealagia e Sehova. (Luka 5:12, 13) ʼO toe fēia mo te temi ʼaē neʼe mate ai ia Lasalo, neʼe lagi logoʼi e te kau tisipulo te manavaʼofa ʼo te Tamai ʼi te “mamahi lahi” ʼo te loto ʼa Sesu mo tana “tagi.” Logolā neʼe ʼiloʼi e Sesu ʼe ina fakatuʼuake anai ia Lasalo, kae neʼe malave ʼosi kiā ia te mamahi ʼaē neʼe tau mo te fāmili ʼo Lasalo mo ʼona kaumeʼa. (Soa. 11:32-35, 40-43) ʼE lagi kotou ʼiloʼi te tahi ʼu fakamatala Fakatohi-tapu ʼo ʼuhiga mo Sesu ʼe ʼiloga ai te manavaʼofa ʼa te Tamai.
11. (a) Koteā te ako ʼe tou maʼu ʼo ʼuhiga mo te Tamai ʼi te fakamaʼa ʼaē e Sesu ia te fale tapu? (b) He koʼē ʼe ko he fakalotomālohi kiā tātou ia te fakamatala ʼaia?
11 Kae koteā te ako ʼe tou maʼu mai te fakamaʼa ʼaē e Sesu ia te fale tapu? Kotou fakakaukauʼi age muʼa te meʼa neʼe hoko, neʼe fai e Sesu he huipi ʼaki ni maea pea ina kapu mai te fale tapu ia te kau fai fakatau ovi mo vītulo. Pea neʼe ina veuki te paʼaga ʼa te kau fetogi paʼaga pea mo ina tokatokahi ʼanatou laupapa. (Soa. 2:13-17) ʼAki tana aga ʼaia neʼe manatuʼi e te kau tisipulo te lea fakapolofetā ʼaenī ʼa te Hau ko Tavite: “Kua tutu au e te faa ki tou fale.” (Pes. 69:10 [Pes. 69:9, MN]) ʼAki tana tauʼi mālohi ʼaia, neʼe fakahā ai e Sesu tana loto māfana ʼaē ke ina puipui te tauhi moʼoni. Koteā ʼaē ʼe kotou mahino kiai ʼo ʼuhiga mo te ʼuluagaaga ʼo te Tamai ʼi te fakamatala ʼaenī? ʼE ina fakamanatuʼi mai kiā tātou ʼe mole maʼu pē e te ʼAtua te mālohi moʼo tauteaʼi te kau agakovi kae ʼe ina toe maʼu te loto māfana moʼo fakahoko ʼaki. Ko te fakamatala ʼaenī ʼe ina fakahā mai te manatu ʼa te Tamai ʼo ʼuhiga mo te agakovi ʼaē ʼe mafola ʼi te kele. ʼI manatu fakalotomālohi leva ki te ʼu temi ʼaē ʼe tou tau ai mo ni ʼaluʼaga heʼe faitotonu!
12, 13. Koteā te ako ʼe tou maʼu ʼo ʼuhiga mo Sehova ʼi te aga ʼa Sesu ʼaē ki ʼana tisipulo?
12 Tou vakaʼi te faʼifaʼitaki ʼaenī ʼo ʼuhiga leva mo tana aga ʼaē ki ʼana tisipulo. Neʼe tuʼa lahi tanatou fihi pe ko ai ʼe lahi age iā nātou. (Mko. 9:33-35; 10:43; Luka 9:46) ʼI tana maʼuli fualoa mo tana Tamai, neʼe ʼiloʼi ai e Sesu te manatu ʼa Sehova ʼo ʼuhiga mo te fialahi. (2 Sam. 22:28; Pes. 138:6) Pea tahi, neʼe toe sio Sesu ki te fialahi ʼaē neʼe maʼu e Satana te Tēvolo, mo tana manatu pē ʼaē kiā ia pea mo tana fia māʼoluga. ʼE mahino ia, neʼe lotomamahi ia Sesu ʼi tana sio ʼaē ʼe kei maʼu te aga ʼaia ʼi ʼana tisipulo ʼaē neʼe ina akoʼi pea māʼiapē lā mo ʼana ʼapositolo. Pea neʼe hoko atu tanatou maʼu te manatu ʼaia ʼo kaku ki te ʼaho ʼo te mate ʼo Sesu. (Luka 22:24-27) Kae neʼe hoko atu pē Sesu tana fakatonutonuʼi ia nātou ʼaki he lotoʼofa pea mo ʼamanaki ʼe natou maʼu anai ʼi he ʼaho te agavaivai ohagē ko ia.—Filp. 2:5-8.
13 ʼE kotou tokagaʼi koa ia te ʼuluagaaga ʼo te Tamai iā Sesu ʼi tana fakatonutonuʼi ʼaki te faʼa kātaki ia te ʼu aga ʼaē ʼe kovi ʼo ʼana tisipulo? ʼE kotou tokagaʼi koa ʼi te aga mo te palalau ʼa Sesu ia te ʼuluagaaga ʼo te Tamai, ʼaē ʼe mole ina liʼaki tana hahaʼi logolā te liuliuga ʼo ʼanatou hala? Ko te mahino ʼaē ki te ʼu kalitātē ʼaia ʼo te ʼAtua, ʼe mole ina ʼekenaki koa lā tātou ke tou fakahemala mo kole ia te fakamolemole ʼa Sehova ʼi te ʼu temi ʼaē ʼe tou agahala ai?
NEʼE LOTOLELEI TE FOHA KE INA FAKAHĀ TANA TAMAI
14. Neʼe ʼiloga feafeaʼi ia te lotolelei ʼa Sesu ke ina fakahā tana Tamai?
14 Tokolahi te kau takitaki agamālohi ʼe natou fufū ia tonatou ʼuhiga ke feala te hoko atu tanatou puleʼi te hahaʼi. Kae neʼe mole fēia ia Sesu, neʼe lotolelei ia ke ina fakahā meʼa fuli ʼo tana Tamai ki te hahaʼi. (Lau ia Mateo 11:27.) Pea tahi, neʼe foaki e Sesu ki ʼana tisipulo te ʼatamai ke natou “iloi ai ae e Mooni,” ia Sehova ʼAtua. (1 Soa. 5:20) Koteā tona fakaʼuhiga? Neʼe ina fakamālamagia nātou ke natou mahino ki ʼana akonaki ʼo ʼuhiga mo te Tamai. Kae neʼe mole ina fai he akonaki ʼe faigataʼa he mahino kiai ʼo ʼuhiga mo te ʼAtua, ohagē lā ko te Tahitolu Tapu.
15. He koʼē neʼe mole fakahā fuli e Sesu te ʼu meʼa ʼaē ʼe ina ʼiloʼi ʼo ʼuhiga mo tana Tamai?
15 Neʼe fakahā fuli koa e Sesu ia te ʼu meʼa ʼaē ʼe ina ʼiloʼi ʼo ʼuhiga mo tana Tamai? Kailoa, neʼe maʼu e Sesu te fakapotopoto ʼo mole ina fakahā fuli te ʼu meʼa ʼe ina ʼiloʼi. (Lau ia Soane 16:12.) Koteā tona tupuʼaga? Koteʼuhi ʼi te temi ʼaia neʼe “heeki feala ke . . . fua” e ʼana tisipulo ia te ʼu meʼa ʼaia. Kae neʼe fakamahino e Sesu, ʼe haʼu anai “te Palakeleto,” ia te laumālie māʼoniʼoni ʼo fakahā meʼa fuli pea mo taki nātou “i te mooni katoa.” (Soa. 16:7, 13) Ko te ʼu mātuʼa fakapotopoto ʼe natou tuku muʼa ke lalahi ʼanatou fānau ke feala hanatou fakahā age he ʼu meʼa ʼe natou mahino anai kiai. ʼO toe fēia mo Sesu neʼe ina tuku muʼa ke maʼu e ʼana tisipulo ia te fealagia mo te fakapotopoto ʼaē ke natou mahino ki ʼihi atu fakamahino ʼo ʼuhiga mo te Tamai. Kae neʼe ina toe tokagaʼi foki ʼaki he loto ʼofa ʼonatou tuʼakoi.
TOU FAʼIFAʼITAKIʼI IA SESU ʼO TOU TOKONI KI TE HAHAʼI KE NATOU ʼILOʼI IA SEHOVA
16, 17. He koʼē kua feala hakotou fakahā te Tamai ki te hahaʼi?
16 ʼI te temi ʼaē kua kotou ʼiloʼi lelei ai he tahi pea mo ʼofa ai, ʼe mole kotou fia fakahā anai koa lā tona ʼuhiga ki niʼihi? ʼI te maʼuli ʼa Sesu ʼi te kele, neʼe palalau ia ʼo ʼuhiga mo tana Tamai. (Soa. 17:25, 26) ʼE feala koa hatatou faʼifaʼitakiʼi ia ia ʼo tou fakahā ia Sehova ki te hahaʼi?
17 Ohagē ko te ʼu faʼahi neʼe tou vakaʼi, ʼe mole he tahi age ʼe ina ʼiloʼi lelei te Tamai gata pē kiā Sesu. Koia neʼe mole gata ʼaki pē tana fakahā ʼaki he lotolelei ʼihi meʼa ʼe ina ʼiloʼi ki ʼana tisipulo kae neʼe toe tokoni foki ke natou mahino lelei age ki te ʼu kalitātē ʼo te Tamai. ʼAki te tokoni ʼa Sesu, ʼe tou ʼiloʼi lelei age te Tamai ʼi te tokolahi ʼo te temi ʼaenī. ʼE mole tou loto fakafetaʼi koa lā ki te lotolelei ʼaē ʼa Sesu ke ina fakahā te Tamai ʼi ʼana akonaki mo tana aga? ʼE mahino ia, ʼe ko he toe fiafia lahi ʼe tou maʼu ʼi tatatou ʼiloʼi lelei ia te Tamai. (Sel. 9:24; 1 Ko. 1:31) ʼE fakaovi mai anai Sehova kiā tātou ʼuhi ko tatatou faiga mālohi ʼaē ke tou fakaovi kiā te ia. (Sakp. 4:8) Koia, ʼi te temi nei kua feala tatatou tokoni ki te hahaʼi ke natou ʼiloʼi ia Sehova. ʼO feafeaʼi?
18, 19. Koteā te ʼu ʼaluʼaga ʼaē ʼe feala ai ke tou fakahā te Tamai ki te hahaʼi? Kotou fakamahino.
18 Ke feala hatatou fakahā te Tamai ki te hahaʼi ʼe tonu ke tou faʼifaʼitakiʼi ia Sesu ʼi ʼatatou palalau mo te aga. Kotou manatuʼi ko te hahaʼi ʼaē ʼe tou felāveʼi mo nātou ʼi te fai fakamafola ʼe mole natou ʼiloʼi te ʼuhiga totonu ʼo te ʼAtua. Neʼe lagi fakahalaʼi nātou e he ʼu akonaki hala ʼo ʼuhiga mo te ʼAtua. ʼE feala ke tou fakahā kiā nātou ia te huafa ʼo te ʼAtua ʼi te Tohi-Tapu, tona finegalo ʼo ʼuhiga mo te tagata pea mo tona ʼuluagaaga. ʼO toe hilifaki kiai, ʼe feala ke tou fai palalau mo ni tehina mo tuagaʼane ʼo ʼuhiga mo he ʼu fakamatala Fakatohi-tapu ʼe talanoa ki he kalitātē ʼa te ʼAtua neʼe mole tou mahino lelei kiai ʼi muʼa atu, pea ʼe feala pē ke natou toe maʼu ai he fakalotomālohi.
19 ʼE tonu ke tou faʼifaʼitakiʼi ia Sesu pea mo fakahā te Tamai ʼi tatatou aga. Kapau ʼe tokagaʼi e te hahaʼi ʼe ʼiloga iā tātou te ʼofa ʼaē neʼe maʼu e Kilisito, pea ʼe natou fia fakaovi anai ki te Tamai mo te ʼAlo. (Efe. 5:1, 2) Neʼe ʼekenaki tātou e te ʼapositolo ko Paulo ke ‘tou liliu ko ʼona faʼifaʼitaki, ohagē ko ia ko te faʼifaʼitaki ʼo Kilisito.’ (1 Ko. 11:1) ʼE ko he toe pilivilēsio te tokoni ki te hahaʼi ke natou ʼiloʼi te ʼuhiga ʼo Sehova ʼaki tatatou aga. Koia, ʼofa pē ke tou haga faʼifaʼitaki ia Sesu ʼi tana fakahā te Tamai ki te hahaʼi.
[ʼU fehuʼi ʼo te ako]
